ཆབ་མདོ་གྲོང་ཁྱེར་ཁ་རུབ་ཆུས་གཡེར་སྟོད་གྲོང་ཚོའི་མི་རིགས་མཐུན་སྒྲིལ་གྱི་ཁྱིམ་ཚང་བཀྲ་ཤིས་ཆོས་སྒྲོན་ཚང་གི་སྐོར་བཀོད་པ།
ཕན་ཚུན་རོགས་རེས་ཀྱིས་ཐུན་མོང་ཐོག་མདུན་སྐྱོད་བྱེད་པ།
ཀྲང་པའོ་ཧའེ་ནི་མཚོ་སྔོན་བ་ཡིན་པ་དང་། ལོ་ཉི་ཤུ་ལྷག་ཙམ་གོང་ཀྲང་པའོ་ཧའེ་ཕ་ཡུལ་ནས་ལྷ་སར་ཡོང་སྟེ་ཟ་ཁང་ཞིག་བཙུགས་པར་ཚོང་ལ་ལམ་འགྲོ་རྒྱུག་པོ་བྱུང་ཡོད། འོན་ཀྱང་སྐབས་དེ་དུས་ཁོང་དང་འཕྲད་པའི་བཀྲ་ཤིས་ཆོས་སྒྲོན་གྱི་འཚོ་བར་དཀའ་ངལ་ཆེན་པོ་འཕྲད།
མ་གཞི་ཆབ་མདོ་ནས་ཡིན་པའི་བཀྲ་ཤིས་ཆོས་སྒྲོན་ལ་བདེ་སྐྱིད་ལྡན་པའི་ཁྱིམ་ཚང་ཞིག་ཡོད་མོད། འོན་ཀྱང་གློ་བུར་དུ་བཟའ་ཟླར་ནད་ཕོག་སྟེ་གྲོངས་པས་ཁྱིམ་ཚང་དེའི་ཀ་བ་མེད་པ་ལྟ་བུར་གྱུར། ད་དུང་ཁོང་གཉིས་ཀྱི་བུ་ལོ་བཞི་ལ་སླེབས་དུས་པགས་ནད་ཚབས་ཆེན་ཞིག་ཕོག་ནས་གཟུགས་པོའི་པགས་པ་མང་ཆེ་བ་རུལ་བས་བཀྲ་ཤིས་ཆོས་སྒྲོན་གྱིས་བུ་ཁྲིད་ནས་ལྷ་སར་སྨན་པ་བསྟེན་པར་ཡོང་བ་རེད།
ཀྲང་པའོ་ཧའེ་ལ་ཐོག་མར་ལྷ་སའི་སྒོ་བསྟེན་སྨན་བཅོས་ཁང་ཞིག་གི་སྒོ་འགྲམ་ནས་བཀྲ་ཤིས་ཆོས་སྒྲོན་ཐུག་པ་དང་། སྐབས་དེ་དུས་ཁོ་མོས་ཕྲུ་གུ་པང་ཁར་བཏབ་ནས་ཁྲོམ་གཞུང་དུ་མིག་ཆུ་གཏོང་བཞིན་ཡོད། སེམས་རྩ་འཁོལ་བའི་ཀྲང་པའོ་ཧའེ་ཡིས་ཁོ་མོའི་འགྲམ་དུ་ཕྱིན་ནས་སེམས་གསོ་བཏང་བ་དང་ཆབས་ཅིག་གནས་ཚུལ་གང་འཕྲད་མིན་སྐད་ཆ་དྲིས་མཐར་བྱ་བའི་སྔ་ཕྱི་ཚང་མ་ཤེས་རྟོགས་བྱུང་བས་ཁོ་མོར་སྙིང་རྗེ་ཚད་མེད་སྐྱེས། དེར་བརྟེན་ཁོང་གིས་ཁོ་གཉིས་མ་བུ་གཉིས་རང་གི་ཟ་ཁང་དུ་རིན་མེད་ངང་སྡོད་དུ་བཅུག་པ་མ་ཟད། ད་དུང་བཀྲ་ཤིས་ཆོས་སྒྲོན་ལ་ཕྲུ་གུ་སྨན་ཁང་དུ་སྨན་བཅོས་བྱེད་པ་དང་སློབ་གྲྭར་གཏོང་རོགས་བྱས་པ་རེད། ཀྲང་པའོ་ཧའེ་ཡི་བཀའ་དྲིན་གསོལ་ཆེད། བཀྲ་ཤིས་ཆོས་སྒྲོན་གྱིས་ཀྱང་ཁོང་ལ་ཟ་ཁང་ནང་གི་ལས་ཀ་བྱེད་རོགས་བྱེད་ཀྱི་ཡོད།
ལོ་གཅིག་ཙམ་ཕན་ཚུན་གཤིབ་རྗེས་2000ལོར་ཀྲང་པའོ་ཧའེ་དང་བཀྲ་ཤིས་ཆོས་སྒྲོན་གཉེན་སྒྲིག་བྱེད་རྒྱུའི་སེམས་ཐག་བཅད། “གཉེན་སྒྲིག་བྱེད་སྐབས་ངས་ཁོ་མོར་ང་གཉིས་ལ་ད་ལྟའི་བུ་གཅིག་དེས་འགྲིག་གི་རེད། ངས་ཚེ་གང་ཁྱེད་མ་བུ་གཉིས་ལ་ལྟ་རྟོག་བྱེད་ཀྱི་ཡིན་ཞེས་ཤོད་མྱོང་ཡོད”ཅེས་ཀྲང་པའོ་ཧའེ་ཡིས་བརྗོད་བྱུང་།
གཉེན་སྒྲིག་བྱས་རྗེས། ཁོ་གཉིས་ཀྱིས་སེམས་ནུས་ཡོད་རྒུས་བདེ་སྐྱིད་ལྡན་པའི་ཁྱིམ་ཚང་འདི་སྐྱོང་བཞིན་ཡོད། འཚོ་བ་སྔར་བས་བདེ་སྐྱིད་ལྡན་པར་སོང་རྗེས། ཀྲང་པའོ་ཧའེ་ཡིས་བཀྲ་ཤིས་ཆོས་སྒྲོན་ཆབ་མདོར་ལོག་འདོད་ཀྱི་འདུན་པ་སྐོང་ཆེད་ལྷ་སར་བཙུགས་པའི་ཟ་ཁང་ནང་བཤུག་བཏང་ནས་བཟའ་ཟླའི་ཕ་ཡུལ་དུ་ལོག
ཕ་ཡུལ་དུ་ལོག་ནས་ཡུན་རིང་མ་སོང་བར་བཀྲ་ཤིས་ཆོས་སྒྲོན་གྱིས་རང་ཁྱིམ་གྱི་འཚོ་བ་ཡག་པོ་ཡོད་པས་མི་འགྲིག་པར། ད་དུང་ཡུལ་མི་ཚོ་ཡང་མཉམ་དུ་ཕྱུག་པོ་ཆགས་ཐབས་བྱེད་དགོས་བསམས། མི་རིང་བར་ཁོ་མོ་གྲོང་ཚོ“ཨུ་ལྷན་གཉིས”ཀྱི་ཚན་ཁག་ལ་ཞུགས་པ་དང་ད་ཆ་གཡེར་སྟོད་གྲོང་ཚོའི་ཏང་ཀྲི་པུའི་ཧྲུའུ་ཅིར་གྱུར་ཡོད།
བཀྲ་ཤིས་ཆོས་སྒྲོན་གྲོང་ཚོ“ཨུ་ལྷན་གཉིས”ཀྱི་ཚན་ཁག་ལ་ཞུགས་རྗེས། གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་བཏང་བ་དང་། ཆབ་མདོའི་གྲོང་ཁྱེར་སྒྱུར་བཀོད་བྱེད་པའི་གོ་སྐབས་སྤྱད་དེ་གཡེར་སྟོད་གྲོང་ཚོའི་ཞིང་པའི་སྐྱེལ་འདྲེན་རུ་ཁག་དང་ཞིང་འབྲོག་པའི་སྐྱེལ་འདྲེན་ཀུང་སི་བཙུགས་ནས་གཡེར་སྟོད་གྲོང་ཚོར་སྐྱེལ་འདྲེན་ལས་སྒོ་རག་རྒྱུའི་བརྩོན་ལེན་བྱ་ཆེད། གྲོང་ཚོའི་མཉམ་སྡེབ་ཀྱི་བྱེ་རྡོ་ར་བ་དང་རླངས་འཁོར་འཇོག་ས་བསྐྲུན་པ་དང་སོ་ཕག་བོགས་མར་གཏོང་བ་སོགས་བྱས་ནས་གྲོང་ཚོའི་མང་ཚོགས་ལ་ཡོང་འབབ་མི་ཉུང་བ་ཞིག་རག་ཐབས་བྱས།
བཟའ་ཚོ་དེ་གཉིས་རྒྱུན་དུ་གཞན་ལ་རོགས་རམ་བྱེད་རྒྱུར་དགའ་པོ་ཡོད། 2010ལོར་མཚོ་སྔོན་ཡུལ་ཤུལ་དུ་ས་ཡོམ་རྒྱག་སྐབས། བཟའ་ཚོ་གཉིས་ཀྱིས་ཡུལ་ཤུལ་དུ་བསྐྱོད་ནས་དང་བླངས་པ་བྱས་ཏེ་རང་གི་ནུས་པས་ལྕོགས་ཚོད་ཀྱིས་གནོད་འཚེ་ཕོག་པའི་མང་ཚོགས་ཀྱི་ཁ་ཚ་དགོས་གཏུགས་ཀྱི་འཚོ་བའི་དངོས་ཟོག་ཐག་གཅོད་བྱས་ཡོད། ཁོང་གཉིས་ཀྱིས་ད་དུང་སློབ་མ་དབུལ་པོ་དང་རྒན་རྒོན་དང་རྒན་གསོ་ཁང་སོགས་ལ་གྱོན་ཆས་ཞལ་འདེབས་རྒྱག་གི་ཡོད། བཀྲ་ཤིས་ཆོས་སྒྲོན་དང་ཀྲང་པའོ་ཧའེ་ཡིས་ཁྱིམ་ཆུང་ལ་བཅངས་པའི་བརྩེ་སེམས་དེ་མང་ཚོགས་ལ་བཅངས་པའི་བརྩེ་སེམས་བར་ཆེ་རུ་བཏང་བས་རང་ཉིད་ཀྱི་ཁྱིམ་ཚང་འཆམ་མཐུན་ལྡན་པའི་ཁར་མང་ཚོགས་ཀྱི་གདེང་འཇོག་ཀྱང་ཡག་པོ་ཐོབ་ཡོད།