འདི་ནི་ལྷུན་རྩེ་རྫོང་རྩ་རི་ཤང་གི་ལྷོ་པ་གྲོང་གསར་ཡིན་པ།

ཡུལ་སྨད་གྲོང་ཚོའི་ཞོགས་པ་ནམ་མཁའ་གཡའ་དག་ཅིང་། བོད་བཟོའི་སྡོད་ཁང་སྔོ་ལྗང་རི་ཀླུང་ཁྲོད་གྲལ་སྟར་འགྲིག་ལ། གཙང་སྦྲ་དོད་པའི་གྲོང་ཚོའི་ལམ་བུ་དུད་ཚང་ཚང་མའི་སྒོ་འགྲམ་བར་བཟོས་འདུག

ཕག་ལྟོ་སྟེར་བཞིན་པའི་གྲོང་མི་པ་སངས་ཟླ་བས“ཡུལ་སྨད་ཤང་དུ་སྤོས་ནས་འཚོ་བ་གསར་པ་སྐྱེལ་འགོ་ཚུགས་པ་ཡིན། ང་འདི་གར་ལས་ཀ་བྱེད་ཀྱི་ཡོད་ལ། ཕག་པ་གསོ་སྟངས་ཀྱང་ཤེས་པས་ཟླ་རེར་ཡོང་འབབ་སྒོར་5000ལྷག་ཙམ་འདུག ད་ཆ་བདེ་སྐྱིད་ལྡན་པའི་འཚོ་བ་སྐྱེལ་བཞིན་ཡོད”ཅེས་བཤད།

གྲོང་མི་བསོད་ནམས་ཚེ་རིང་གི་ཁྱིམ་དུ་སྐྱོད་སྐབས་ཚོམས་ཆེན་གྱི་དཀྱིལ་དུ་བཞག་པའི་ཐབ་ཐོག་སྐོལ་བའི་ཇ་ལང་ལོང་དུ་འཁོལ་བཞིན་ཇའི་དྲི་ཞིམ་འཐུལ་བཞིན་མཆིས། ཐོག་སོ་གཉིས་པའི་ཁང་མིག་རྒྱ་ཆེ་ལ་དཀར་ཆ་དོད་ཅིང་གཙང་སྦྲ་ལྡན་པ་ཞིག་འདུག

“ང་ཚོ་2019ལོར་ལྷུན་རྩེ་རྫོང་རི་རོང་ཤང་ནས་དེར་སྤོས་པ་ཡིན། ངས་ཕྱིར་སྐྱེལ་འདྲེན་བྱེད་པ་དང་། བཟའ་ཟླས་ཁྱིམ་ཚང་མགྲོན་ཁང་གཉེར་བས་ཁྱིམ་གྱི་ལོའི་ཡོང་འབབ་སྒོར་ཁྲི་10ཡན་ཟིན་གྱི་འདུག དབྱར་ཁ་ཡུལ་སྐོར་བ་མང་བས་ཁང་པ་འདང་གི་མི་འདུག ཉེ་ཆར་ཁྱིམ་ཚང་མགྲོན་ཁང་མཛེས་བཟོ་བྱས་ནས་རྒྱ་ཆེ་རུ་བཏང་སྟེ་ཡུལ་སྐོར་བ་དེ་བས་མང་བར་སྣེ་ལེན་ཞུ་རྩིས་ཡོད”ཅེས་བསོད་ནམས་ཚེ་རིང་གིས་བཤད།

ཉེ་བའི་ལོ་ཤས་རིང་། ལྷུན་རྩེ་རྫོང་ཡུལ་སྨད་ཤང་གིས་མཐའ་མཚམས་འབྱོར་འབྲིང་དཔེ་སྟོན་གྲོང་ཚོ་ཧུར་ཐག་བསྐྲུན་པ་མ་ཟད། གསར་བརྗེའི་ཡུལ་སྐོར་གནས་བསྐྲུན་ནས་ཡུལ་སྐོར་ལས་རིགས་ལ་བརྟེན་ནས་མང་ཚོགས་ཀྱི་ཡོང་འབབ་འཕར་བར་སྣེ་ཁྲིད་བྱས་ཡོད། ངོ་སྤྲོད་བྱས་པར་གཞིགས་ན། ད་ཆ་གྲོང་ཚོའི་ནང་གི་དུད་ཚང་44ཡིས་རང་ཁྱིམ་དུ་ཁྱིམ་ཚང་མགྲོན་ཁང་དང་། ཚོང་ཁང་ཆུང་གྲས། མྱུར་སྐྱེལ་ས་ཚིགས་སོགས་བཙུགས་ནས་ཡུལ་སྐོར་ལས་རིགས་གཉེར་བ་དང་2022ལོར་ཤང་དེ་ཡོངས་ཀྱི་མི་རེའི་ལོའི་ཆ་སྙོམས་ཡོང་འབབ་སྒོར་ཁྲི་4.4ཙམ་ཟིན་ཡོད།

ཡུལ་བབ་དང་བསྟུན་ནས་ཁྱད་ལྡན་ཐོན་ལས་འཕེལ་རྒྱས་བཏང་སྟེ་མི་རིགས་ཁག་གི་མང་ཚོགས་མཐའ་མཚམས་སུ་གཞི་ཚུགས་པ་དང་མཐའ་མཚམས་སྐྲུན་པར་ཁྲིད་སྟོན་བྱས་ཤིང་། ཉེ་བའི་ལོ་ཤས་རིང་། རང་སྐྱོང་ལྗོངས་ཀྱིས་མཐའ་མཚམས་བརྟན་ལྷིང་དང་མཐའ་མཚམས་སྲ་བརྟན་གྱི་དགོས་མཁོ་དང་མཐའ་མཚམས་མང་ཚོགས་ཀྱི་འཕྲལ་མཁོ་དང་རེ་སྒུག་ཐག་གཅོད་བྱ་རྒྱུ་དེ་ཚད་བརྒལ་སར་བརྩི་རྒྱུ་མཐའ་འཁྱོངས་བྱས་ནས་མཐའ་བརྟན་མཐའ་དར་དམངས་ཕྱུག་བྱ་སྤྱོད་ལག་བསྟར་གཏིང་ཟབ་དང་། ཐོན་ལས་ལ་བརྟེན་ནས་གྲོང་གསེབ་དར་རྒྱས་ལ་ཁྲིད་སྟོན་བྱས་ཏེ་མཐའ་མཚམས་མང་ཚོགས་ཀྱི་ཡོང་འབབ་མང་དུ་གཏོང་བ་དང་། འཚོ་བ་ཕྱུག་ཏུ་འགྲོ་བ། རྒྱལ་གཅེས་མཐའ་སྲུང་བཅས་ཀྱི་འདུ་ཤེས་ཟབ་ཏུ་བཏང་ཡོད།

ཧི་མ་ལ་ཡའི་རི་རྒྱུད་ཀྱི་ལྷོ་ངོས་སུ་གནས་པའི་ལྷུན་རྩེ་རྫོང་རྩ་རི་ཤང་གི་ཡུལ་ལྗོངས་མཛེས་ལ་གནམ་གཤིས་ཚ་གྲང་སྙོམས་ཤིང་། ལྷོ་པ་གྲོང་ཚོ་དེ་སྔར་བཞིན་གདོད་མའི་ནགས་ཚལ་ཁྲོད་དུ་གནས་ཡོད།

གྲོང་ཚོ་གསར་པ་བསྐྲུན་ནས་ལོ་གཉིས་ལྷག་ཙམ་སོང་རིང་རྫོང་ཡོངས་ཀྱི་ཤང་དང་གྲོང་རྡལ་ཁག་ནས་སྤོས་པའི་དུད་ཚང་དེ་གར་ཕྱུགས་འཚོ་མཐའ་སྲུང་དང་བདེ་སྡོད་ལས་བརྩོན་བྱེད་བཞིན་ཡོད།

“ང་ཚོས་ཡུལ་བབ་དང་བསྟུན་ནས་ཡུལ་སྐོར་དང་། ཇ། ཀོ་ཤ་འདེབས་འཛུགས་སོགས་ཁྱད་ལྡན་ཐོན་ལས་འཕེལ་རྒྱས་བཏང་ནས་མང་ཚོགས་ལ་ཁྱིམ་ཚང་མགྲོན་ཁང་དང་སྨྱུག་བཟོའི་ཐོན་ལས་འཕེལ་རྒྱས་གཏོང་རྒྱུར་ཁྲིད་སྟོན་བྱས་ཡོད། ཏང་གི་དམངས་ཕན་སྲིད་ཇུས་ཀྱི་སྣེ་ཁྲིད་འོག་གྲོང་ཚོ་ཡོངས་ཀྱི་ནང་སྐྱེས་འཕེལ་རྒྱས་ཀྱི་སྒུལ་ཤུགས་རྒྱུན་ཆད་མེད་པར་ཆེ་རུ་ཕྱིན་ནས་མང་ཚོགས་ཀྱི་འཚོ་བ་ཉིན་རེ་བཞིན་ལེགས་སུ་ཕྱིན་ཡོད”ཅེས་ལྷོ་ཁ་གྲོང་གསར་གྱི་ཏང་ཀྲི་པུའི་ཧྲུའུ་ཅི་ཚུལ་ཁྲིམས་ཀྱིས་བཤད།

ཡར་ངོའི་ཟླ་ལྟར་འཕེལ་རྒྱས་ཕྱིན་པའི་ལྷོ་པ་གྲོང་གསར་ནི་བོད་ཀྱི་མཐའ་མཚམས་འབྱོར་འབྲིང་གྲོང་ཚོའི་ཐོན་ལས་མཐའ་དར་གྱི་བསྡུས་རིས་ཤིག་རེད། གྲངས་གཞི་ལས་མངོན་པར། 2022ལོའི་ལོ་མཇུག་བར་བོད་ཀྱི་མཐའ་མཚམས་འབྱོར་འབྲིང་གྲོང་ཚོ་624ཚང་མ་བསྐྲུན་ཟིན་པ་དང་། མཐའ་མཚམས་གཞུང་ལམ་ལ་རླངས་འཁོར་ཤར་གཏོང་ཐུབ་ཚད་ལྡབ་3.7འཕར་བ། མཐའ་མཚམས་རྫོང་21གི་དཔལ་འབྱོར་བསྡོམས་འབོར་དང་གྲོང་མིའི་ཡོང་འབབ་མུ་མཐུད་མགྱོགས་མྱུར་འཕར་ནས་མཐའ་སྟོབས་མཐའ་དར་དམངས་ཕྱུག་ལ་ཚད་བརྒལ་གསར་པ་ཡོང་བར་སྐུལ་འདེད་བཏང་ཡོད། 

མཐའ་མཚམས་ཀྱི་མི་སེར་ཕྱུག་པོ་ཆགས་པའི་འགག་རྩ་ཐོན་ལས་དར་རྒྱས་རེད། བོད་ཀྱི་མི་རིགས་ཁག་གི་མི་དམངས་ཀྱིས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་ཐོག་མཐའ་བར་གསུམ་དུ་སེམས་ལ་བརྟན་པོར་ངེས་ནས་མཐུན་སྒྲིལ་རྡོག་རྩ་གཅིག་སྒྲིལ་དང་། འགན་འཁྲི་འཁུར་ཕོད་པ། རང་འགུལ་ངང་བྱས་རྗེས་འཇོག་པ་བཅས་བྱས་ནས་ཡུལ་བབ་དང་བསྟུན་ཏེ་ཁྱད་ལྡན་ཐོན་ལས་འཕེལ་རྒྱས་ལ་སྐུལ་འདེད་བཏང་བར་བརྟེན་མང་ཚོགས་ཀྱི་འབབ་འཕར་ཕྱུག་འགྱུར་གྱི་ཐབས་ལམ་རིམ་བཞིན་རྒྱ་སྐྱེད་དང་འཚོ་བའི་ཆུ་ཚད་ཧ་ཅང་མཐོ་རུ་ཕྱིན་ནས་སྐྱིད་སྣང་དང་། ཐོབ་སྣང་། བདེ་སྣང་བཅས་རྒྱུན་ཆད་མེད་པར་ཆེ་རུ་ཕྱིན་ཡོད།

གཞིས་རྩེའི་མཐའ་མཚམས་རྫོང་གིས་རང་ངོས་ཀྱི་ཐོན་ཁུངས་ལེགས་ཆར་གཞི་ཚུགས་ནས་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་ཤུགས་ཆེན་བཏང་སྟེ། ཐོན་ཁུངས་ཀྱི་ལེགས་ཆ་དཔལ་འབྱོར་དང་འཕེལ་རྒྱས་ཀྱི་ལེགས་ཆར་བསྒྱུར་ནས་ཕྱུག་འགྱུར་ལམ་བུར་བསྐྱོད་ཡོད།

གམ་པའི་ལུག་ནི་གཞིས་རྩེར་དབང་བའི་ཐོན་ཁུངས་ཀྱི་ལེགས་ཆའི་གྲས་ཤིག་རེད། ཆ་སྙོམས་ས་བབ་མཐོ་ཚད་སྨི་5050ཡོད་པའི་གམ་པ་རྫོང་གམ་པ་གྲོང་རྡལ་དགྱེས་རུ་གྲོང་ཚོར“ཕྱུགས་འཚོ་བཞིན་མཐའ་མཚམས་སྲུང་བའི”སེམས་མཐུན་མཐའ་བརྟན་གྱི་ལུག་གསོ་ཚགས་མཉམ་ལས་ཁང་བཙུགས་ནས་མང་ཚོགས་ཀྱི་འབབ་འཕར་ལ་སྣེ་ཁྲིད་བྱས་ཡོད།

མཉམ་ལས་ཁང་གི་ལས་འཛིན་དཔོན་ཚེ་དབང་དོན་གྲུབ་ཀྱིས་གསར་འགོད་པར“མཉམ་ལས་ཁང་ལ་ད་ཆ་གམ་པའི་ལུག་མགོ་གྲངས་1200ཡོད་པ་དང་། 2022ལོར་གྲོང་མིར་ཡོང་འབབ་སྒོར་ཁྲི་39བགོ་འགྲེམས་བྱས་ཡོད། ད་ཆ་ང་ཚོས་གསོ་ཚགས་ཀྱི་གཞི་ཁྱོན་རིམ་བཞིན་ཆེ་རུ་གཏོང་རྩིས་ཡོད་ལ། གྲོང་མིའི་ཡོང་འབབ་མུ་མཐུད་མང་དུ་འགྲོ་ངེས་ཡིན་པ་ང་ལ་ཡིད་ཆེས་ཡོད”ཅེས་བཤད།

བསྟན་འཛིན་དངོས་གྲུབ་ནི་དིང་རི་རྫོང་སྒང་དཀར་གྲོང་རྡལ་དབང་པོ་སྐྱོན་ཅན་མི་རིགས་ལག་ཤེས་བཟོ་ལས་ཆེད་ལས་མཉམ་ལས་ཁང་གི་ལས་འཛིན་དཔོན་ཡིན་ཞིང་། བསྟན་འཛིན་དངོས་གྲུབ་ཀྱི་སྣེ་ཁྲིད་འོག་མཉམ་ལས་ཁང་གིས་དཀའ་ངལ་ཡོད་པའི་མང་ཚོགས་དང་དབང་པོ་སྐྱོན་ཅན་116ལས་ཀར་བཅུག་པ་དང་ལོའི་ཡོང་འབབ་སྒོར་ཁྲི་900ལྷག་ཙམ་ཟིན་གྱི་ཡོད།

འདི་ལོ་ལོ་61ལ་སླེབས་པའི་དབང་འདུས་ནི་དིང་རི་རྫོང་ལབ་ཕུ་ལུང་གྲོང་ཚོའི་གྲོང་མི་རེད། 2019ལོར་རྐང་པ་ཐང་པོ་མེད་པའི་ཁོང་གིས་དབང་པོ་སྐྱོན་ཅན་མི་རིགས་ལག་ཤེས་བཟོ་ལས་ཆེད་ལས་མཉམ་ལས་ཁང་དུ་ལག་རྩལ་སྦྱངས་ནས་འཚོ་བ་གསར་པ་སྐྱེལ་འགོ་ཚུགས་ཡོད། “ངས་དིང་རི་རྫོང་གི་སློབ་གྲྭ་ཁག་གི་དགུན་དུས་ཀྱི་སློབ་གོས་འཚེམ་གྱི་ཡོད། ད་ཆ་ལག་རྩལ་ཤེས་པས་ཡོང་འབབ་ཡོད་ལ། ལས་ཀ་བྱེད་ས་ཁྱིམ་དང་ཐག་ཉེ་བས་ཡོང་འབབ་འགན་ལེན་ཐུབ་ལ་འཚོ་བའང་སྔར་བས་ཡག་ཏུ་ཕྱིན་སོང”ཞེས་བཤད།

ཐོན་ལས་དར་ན་ལས་རིགས་དར། ཐོན་ལས་སྟོབས་ཆེར་གྱུར་ན་དཔལ་འབྱོར་སྟོབས་ཆེར་གྱུར། དུས་རབས་གསར་པའི་རྒྱང་ལམ་གསར་པར་ལྗོངས་ཡོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཐོག་མཐའ་བར་གསུམ་དུ་བློ་ལ་བརྟན་པོར་ངེས་ནས་ཀྲུང་དབྱང་གིས་གནང་བའི་སྲིད་ཇུས་ཀྱི་ལེགས་ཆ་དང་བོད་ལ་ལྡན་པའི་དམིགས་བསལ་གྱི་ཐོན་ཁུངས་ལེགས་ཆར་དམ་འཛིན་ནན་པོ་བྱས་ཏེ“སྲིད་ཇུས་དང་ཐོན་ཁུངས་ཟུང་དུ་འབྲེལ་བའི”ཐོན་ལས་ཀྱི་ཐབས་བཟང་ལ་བརྟེན་ཏེ་ཀུན་སེམས་གཅིག་སྒྲིལ་དང་མཐུན་སྒྲིལ་འབད་འཐབ་ཀྱིས་མཐའ་དར་མཐའ་བརྟན་གྱི་བྱ་སྤྱོད་དངོས་ལ་བརྟེན་ནས་མེས་རྒྱལ་གྱི་མཐའ་མཚམས་སྲུང་བཞིན་ཡོད།