“སྤྱིར་བཏང་ལས་རླབས་ཆེན་བྱུང་ཞིང་། དཔའ་བོ་ཚང་མ་མི་དམངས་ཁྲོད་ནས་ཐོན་པས་མི་ཚང་མར་རིན་ཐང་ཆེན་པོ་ལྡན”སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་དེས་མར་ཁེ་སི་རིང་ལུགས་ཀྱི་མི་དམངས་ལྟ་བར་འགྲེལ་བཤད་གསལ་པོ་བསྐྱོན་ཡོད། མར་ཁེ་སི་རིང་ལུགས་ཀྱིས། མི་དམངས་མང་ཚོགས་ནི་ལོ་རྒྱུས་གསར་གཏོད་མཁན་དང་། སྤྱི་ཚོགས་ཀྱི་དངོས་པོའི་རྒྱུ་ནོར་དང་བསམ་པའི་རྒྱུ་ནོར་གསར་གཏོད་མཁན་ཡིན་པས། ང་ཚོ་ཚང་མས་སྤྱིར་བཏང་གི་ལས་ཀ་གང་ཞིག་བྱེད་ཀྱང་། དེ་ལས་སྤྱིར་བཏང་མིན་པའི་གྲུབ་འབྲས་ཤིག་གཏོད་ཐུབ་པ་མ་ཟད་ སྤྱི་ཚོགས་ལ་རིན་ཐང་ཡོད་པའི་ལེགས་སྐྱེས་ཀྱང་འབུལ་ཐུབ་པའི་ངོས་འཛིན་བྱེད་ཀྱི་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྤྱི་ཚོགས་ཁྲོད་ཀྱི་ངལ་རྩོལ་པ་མི་འདྲ་བ་ཚང་མར་ཚད་མཐོའི་གདེང་འཇོག་གནང་གི་ཡོད་པ་དང་། ཁོང་གིས། ཞིང་པ་ལས་མི་ནི་ངལ་རྩོལ་དཔུང་ཆེན་གསར་པ་དང་། ཁོར་ཡུག་གཙང་སྦྲ་བ་ནི་གྲོང་ཁྱེར་གྱི“མཛེས་བཟོ་མཁན”རེད། བོགས་གཏོང་རླངས་འཁོར་གཏོང་མཁན་ཚང་མས་གྲོང་ཁྱེར་གྱི་འགྲིམ་འགྲུལ་བྱ་གཞག་འཕེལ་རྒྱས་ལ་རམ་འདེགས་བྱེད་ཀྱི་ཡོད་ལ། “མྱུར་སྐྱེལ་མཁན”གྱིས་ཐུམ་སྒྲིལ་ལ་བརྟེན་ནས་དུད་ཚང་ཁྲི་སྟོང་མང་པོ་དང་འབྲེལ་བ་བྱེད་ཀྱི་ཡོད། ང་ཚོའི་སྤྱི་ཚོགས་ཐོག་ངལ་རྩོལ་པ་དཀྱུས་མ་དུང་ཕྱུར་མང་པོས་དཀའ་སྤྱད་འབད་བརྩོན་བྱས་པས། འཚོ་བ་ཇི་ཙམ་བསྐྱལ་བ་དེ་ཙམ་གྱིས་ཡག་ཏུ་འགྲོ་ངེས་རེད་ཅེས་གསུངས་ཡོད།

ད་ཆའི་བོད་ཀྱི་དཔལ་འབྱོར་དར་རྒྱས་གོང་འཕེལ་བྱུང་ཞིང་། སྤྱི་ཚོགས་ཕྱོགས་ཡོངས་ནས་ཡར་ཐོན་བྱུང་བ། སྐྱེ་ཁམས་ཁོར་ཡུག་ལེགས་པ། མི་དམངས་ཀྱི་འཚོ་བ་བདེ་སྐྱིད་ལྡན་པ་བཅས་ནི་བོད་ཀྱི་མི་དམངས་དཀྱུས་མའི་རྔུལ་ཆུ་ལས་བྱུང་བ་ཡིན། སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་སྐྲུན་པའི་བརྒྱུད་རིམ་ནང་མི་དཀྱུས་མའི་ཁྲོད་ནས་སྤྱིར་བཏང་མ་ཡིན་པའི་ལེགས་སྐྱེས་འབུལ་མཁན་གྱི་ངལ་རྩོལ་བ་མང་པོ་ཞིག་ཐོན་ཡོད། ཁོང་ཚོའི་ཁྲོད་སྒྲོལ་དཀར་དང་གཡང་འཛོམས་གཅེན་གཅུང་ལྟ་བུའི་ལོ་བཅུ་ཕྲག་ཁ་ཤས་ཉིན་གཅིག་ལྟར་སྐོར་གཡེང་མཐའ་འཁྱོངས་ཀྱིས་མེས་རྒྱལ་གྱི་སྤྱི་ལེ་ངོས་གྲུ་སྟོང་ཕྲག་ཟིན་པའི་རྒྱལ་ཁབ་ཀྱི་ས་ཆ་སྲུང་སྐྱོང་བྱེད་བཞིན་པའི་མཐའ་མཚམས་ཞིང་འབྲོག་མང་ཚོགས་ཀྱང་ཡོད་པས་ཁོང་ཚོ་ནི་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་དཔེ་མི་སྲིད་པ་ཡག་པོ་ཞིག་རེད། གཞན་ཡང་ཆབ་མདོ་གྲོང་ཁྱེར་ཁ་རུབ་ཆུས་ཀྱི་པད་མ་ཚེ་སྐྱིད་དང་འདྲ་བའི་ཁོར་ཡུག་གཙང་སྦྲ་བས་གྲོང་ཁྱེར་གཙང་མ་བཟོ་བའི་ཐོག་མའི་བསམ་འདུན་བརྟན་སྲུང་བྱས་ནས་བློ་གཅིག་སེམས་གཅིག་གིས་གྲོང་ཁྱེར་གྱི་ཁོར་ཡུག་ལ་གཙང་སྦྲ་ཡག་པོ་བྱེད་མཁན་ཡོད་ལ། ད་དུང་ཧུའུ་ཡུང་དང་འདྲ་བའི་མྱུར་སྐྱེལ་བས་འགོ་ནད་ཀྱི་ཉེན་ཁ་ཚབས་ཆེན་ལ་མ་འཛེམ་པར་ལེ་དབར་སྟོང་ཕྲག་ཁ་ཤས་ཀྱི་སར་རླངས་འཁོར་བཏང་ནས་ཡུལ་སྐོར་བར་སྲོག་སྐྱོབ་སྨན་སྤྲད་དེ་བྱ་སྤྱོད་དངོས་ལ་བརྟེན་ནས་ཚེ་སྲོག་གོང་དུ་བཀུར་མཁན་ཡང་ཡོད། དེ་མིན་ཡང་བཀྲ་ཤིས་ཉི་མ་དང་འདྲ་བའི་གློག་ཁྲིད་མཁན་ཡང་ཡོད་ཅིང་། ཁོང་གིས་གློག་ཁྲིད་པའི་ལོ་30ཡི་རིང་ཁྱིམ་ཚང་ཁྲི་སྟོང་མང་པོར་འོད་སྣང་སྦྱིན་ཡོད། ཁོང་ཚོ་ནི་མི་དཀྱུས་མ་ཤ་སྟག་ཡིན་ཡང་ཚང་མ་དཔེ་མི་སྲིད་པ་ཞིག་རེད།

དཀའ་བའི་ལས་ཤིག་མ་བྱས་ན། ཞིམ་པའི་ཟས་ཤིག་ག་ལ་རག འབད་བརྩོན་བྱས་ཚེ་ཕུགས་འདུན་འགྲུབ་ངེས་རེད། མི་འབོར་དུང་ཕྱུར་14ལྷག་ཙམ་ཟིན་པའི་རང་རེའི་རྒྱལ་ཁབ་ལ་མཚོན་ན། མི་ཚང་མའི་སྟོབས་ཤུགས་གཅིག་ཏུ་སྒྲིལ་ཚེ་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་བརྗིད་ཉམས་ཆེ་བའི་སྟོབས་ཤུགས་ཤིག་ཆགས་ཐུབ། མི་ཚང་མས་ལས་ཀ་དང་བྱ་གཞག་ཡག་པོ་བསྒྲུབས་ཚེ་ཏང་དང་རྒྱལ་ཁབ་ཀྱི་བྱ་གཞག་གོང་དུ་འཕེལ་ཐུབ་ལ། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཆེན་སྐྲུན་པར་སྐུལ་འདེད་ཀྱང་གཏོང་ཐུབ། མཛེས་སྡུག་ལྡན་པའི་འཚོ་བའི་ཕྱོགས་སུ་སྐྱོད་པའི་ཡངས་ཤིང་རྒྱ་ཆེ་བའི་འགྲོ་ལམ་ཐོག་ང་ཚོ་ཚང་མ་ནི་བདག་པོ་དང་དེའི་ནང་ཞུགས་མཁན་ཡིན་ལ་ལེགས་སྐྱེས་འབུལ་མཁན་དེ་བས་ཀྱང་ཡིན།