ས་ཆ་འདི་དག་ལ་ཆར་པ་ཡང་སེ་འབབ་རྒྱུ་རེད་འདུག དོ་སྣང་གྱིས།
ཟླ་8ཚེས་20ཉིན། རང་སྐྱོང་ལྗོངས་གནམ་གཤིས་ལས་ཁུངས་ཀྱིས་གཟའ་འཁོར་འདིའི་གནམ་གཤིས་སྔོན་བརྡ་བཏང་བ་གཤམ་གསལ།
སྔོན་དཔག་བྱས་ན། གཟའ་འཁོར་འདིར་རང་ལྗོངས་ཀྱི་དབུས་ཤར་རྒྱུད་དུ་ཆར་པ་ཡང་སེ་འབབ་རྒྱུ་དང་ཤར་ལྷོའི་རྒྱུད་ཀྱི་ས་བབ་དམའ་སར་ཆར་པ་ཆེན་པོ་འབབ་རྒྱུ་རེད་འདུག་པས། ཞོར་ཐོན་གྱི་གནོད་འཚེར་འགོག་ཟོན་བྱེད་དགོས།
གཟའ་འཁོར་འདིའི་ཆར་ཆུ་འབབ་ཚད། མངའ་རིས་དང་། གཞིས་རྩེའི་ནུབ་རྒྱུད། ནག་ཆུའི་ནུབ་རྒྱུད་བཅས་སུ་ཆར་པ་འབབ་ཚད་ཅུང་ཉུང་བ་དང་ས་ཆ་གཞན་དག་ལ་སྔར་རྒྱུན་བཞིན་ཡིན་པ།
གཟའ་འཁོར་འདིའི་ཆ་སྙོམས་དྲོད་ཚད། མངའ་རིས་སུ་དྲོད་ཚད་རྒྱུན་གཏན་ལས་ཅུང་མཐོ་བ་དང་དེ་བྱིངས་ཀྱི་ས་ཆ་ཁག་ལ་དམའ་ཙམ་ཡོད་པ།
གནམ་གཤིས་འགྱུར་ལྡོག
ཚེས་21ནས་23ཉིན་བར། ཉིང་ཁྲི་དང་། ལྷོ་ཁ། གཞིས་རྩེའི་ལྷོ་རྒྱུད་བཅས་སུ་ཆར་པ་ཆུང་བ་ནས་འབྲིང་བའི་བར་འབབ་རྒྱུ་དང་ས་བབ་དམའ་ས་ཁག་གཅིག་ལ་ཆར་པ་ཆེན་པོ་འབབ་རྒྱུ། ལྷ་ས་དང་། ཆབ་མདོའི་ལྷོ་རྒྱུད། ནག་ཆུའི་ཤར་རྒྱུད། གཞིས་རྩེའི་བྱང་རྒྱུད་བཅས་ལ་གནམ་འཐིབས་ནས་ཆར་པ་ཆུང་བའམ་ཡང་ན་འབྲུག་ཆར་འབབ་རྒྱུ། ས་ཆ་ཁག་གཅིག་ལ་ཆར་པ་འབྲིང་བ་ནས་ཆེ་བའི་བར་འབབ་རྒྱུ། དེ་མིན་གྱི་ས་ཆ་ཁག་གཅིག་ལ་སྤྲིན་པ་མང་པོ་འཁོར་ནས་ཐོལ་ཆར་འབབ་རྒྱུ།
ཟླ་8ཚེས་24ནས་27ཉིན་བར། ཉིང་ཁྲི་དང་། ནག་ཆུའི་ཤར་རྒྱུད། ཆབ་མདོ་བཅས་སུ་ཆར་པ་ཆུང་བ་ནས་འབྲིང་བའི་བར་འབབ་རྒྱུ་དང་ས་ཆ་ཁག་གཅིག་ལ་ཆར་པ་ཆེན་པོ་འབབ་རྒྱུ། དེའི་རིང་ཉིང་ཁྲིའི་ས་བབ་དམའ་བའི་ཤང་གྲོང་དུ་ཆར་པ་ཆེ་བ་ནས་དྲག་ཆར་འབབ་རྒྱུ། ལྷ་ས་དང་། ལྷོ་ཁ། གཞིས་རྩེ་བཅས་ལ་གནམ་འཐིབས་ནས་ཆར་པ་ཆུང་བའམ་ཡང་ན་འབྲུག་ཆར་འབབ་རྒྱུ་དང་དེ་མིན་གྱི་ས་ཆ་ཁག་གཅིག་ལ་ཆར་པ་འབྲིང་བ་ནས་ཆེ་བའི་བར་འབབ་རྒྱུ།
གྲོས་འགོ
གཅིག གཟའ་འཁོར་འདིའི་ནང་རང་ལྗོངས་ཀྱི་དབུས་ཤར་རྒྱུད་དུ་ཆར་པ་ཡང་སེ་འབབ་རྒྱུ་དང་ཤར་ལྷོའི་རྒྱུད་ཀྱི་ས་བབ་དམའ་སར་ཆར་པ་ཆེ་ཙམ་འབབ་རྒྱུ་ཡིན་པས། ཆུ་ལོག་དང་ཤྭ་འོད་ཀྱི་ས་གཤིས་གནོད་འཚེ་དང་གྲོང་ཁྱེར་དང་གྲོང་གསེབ་ཏུ་འཁྱིལ་ཆུ་སོགས་ཀྱི་ཞོར་ཐོན་གནོད་འཚེར་འགོག་ཟོན་བྱེད་དགོས།
གཉིས། ཡར་ཀླུང་གཙང་པོའི་རྒྱུད་དང་། ཧི་མ་ལ་ཡའི་རྒྱུད། ནག་ཆུ། ཆབ་མདོ་བཅས་སུ་ཕྱི་དྲོར་གློག་དམར་འཁྱུག་པ་དང་འབྲུག་སྒྲ་གྲགས་པ། ལྷགས་པ་ཆེན་པོ་རྒྱག་པ། སེར་བ་འབབ་པ། སྐབས་འགར་དྲག་ཆར་འབབ་པ་སོགས་གཏད་རྒྱུག་གི་གནམ་གཤིས་སྟོན་པར་འགོག་ཟོན་ཡག་པོ་བྱེད་དགོས།
གསུམ། གཞིས་རྩེའི་ཞིང་པ་ཚོས་ཞིང་ནང་གཡོག་བྱེད་ལ་ཤུགས་སྣོན་རྒྱག་པ་དང་། དེ་བྱིངས་ཀྱི་ཞིང་པ་ཚོས་གནམ་གཤིས་སྔོན་བརྡར་དོ་སྣང་བྱས་ཏེ། གནམ་གཤིས་ཡག་པོ་སྟོན་པའི་སྐབས་དང་བསྟུན་ནས་བཙས་མ་བརྔ་བ་དང་གཡུལ་ཁ་གཏོང་བ་སོགས་བྱེད་དགོས།