འདི་ནི་གཉའ་ལམ་རྫོང་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་དང་གཉའ་ལམ་མཐའ་མཚམས་དོ་དམ་རུ་ཆེན་གྱི་དཔོན་དམག་ཚོས་ཏང་ཞུགས་དམ་བཅའ་ཡང་བསྐྱར་འཇོག་པ།

དུས་རབས་གསར་པའི་བོད་ཀྱི་ལས་དོན་ཡག་པོ་སྒྲུབ་པར་ངེས་པར་དུ་ཏང་གི་འགོ་ཁྲིད་མཐའ་འཁྱོངས་དང་ཏང་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་དགོས།

“ཏང་ལ་དོ་དམ་དང་ཏང་ནན་པོས་སྐྱོང་བ་གཏིང་ཟབ་དང་ཏན་ཏིག་གི་ཕྱོགས་སུ་སྐུལ་འདེད་གཏོང་བ་དང་རིམ་པ་ཁག་གི་འགོ་ཁྲིད་ཚན་ཁག་དང་། ལས་བྱེད་པའི་ཤེས་ལྡན་མི་སྣའི་དཔུང་ཁག གཞི་རིམ་རྩ་འཛུགས་འཛུགས་སྐྱོང་བཅས་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་མི་རིགས་ཁག་གི་མང་ཚོགས་ཀྱི་སྣེ་ཁྲིད་དེ་ཉེན་ཁར་ཁ་གཏད་གཅོག་པ་དང་། དཀའ་ངལ་དང་འགྲན་སློང་ལས་རྣམ་པར་རྒྱལ་བ། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བ་བཅས་ཀྱི་སྟོབས་དང་ལྡན་པའི་ཆབ་སྲིད་སྟོབས་ཤུགས་སུ་འགྱུར་བའི་འགན་ལེན་བྱེད་དགོས”ཞེས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ཀྱི་མི་རིགས་ཁག་གི་ཏང་ཡོན་ལས་བྱེད་པར་སློབ་སྟོན་ཟབ་མོ་གནང་ཡོད།

མངགས་བཅོལ་ཟབ་མོ་བློ་ལ་བཅངས་ནས་འབད་འབུངས་མདུན་དུ་སྐྱོད། ཉེ་བའི་ལོ་ཤས་རིང་། བོད་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ། ཏང་རྩ་འཛུགས་ཀྱི་དམག་འཐབ་མཁར་རྫོང་གི་ནུས་པ་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་གང་ལེགས་བཏོན་ནས་ཀུན་སེམས་གཅིག་སྒྲིལ་དང་དཀའ་སྤྱད་འབད་འཐབ་ཀྱིས་ཏང་བཙུགས་ཀྱི་སྙིང་སྟོབས་རླབས་པོ་ཆེར་བརྟེན་ནས་ལྗོངས་ཡོངས་ཀྱི་བྱ་གཞག་ཁག་ལ་ཁྲིད་སྟོན་བྱས་པར་བརྟེན་ངོ་བོའི་རང་བཞིན་གྱི་གྲུབ་འབྲས་ཐོབ་པ་མ་ཟད། སྐྱེ་སྟོབས་ཀྱི་དཔལ་འབར་བའི་གྲ་རྒྱས་ཀྱི་རྣམ་པའང་མངོན་ཡོད། 

ཏང་གཤིས་ལ་ཞུན་བརྡར་བྱས་ནས་བོད་སྐྱོད་པ་རྒན་གྲས་ཀྱི་སྙིང་སྟོབས་རྒྱུན་འཛིན་དང་དར་སྤེལ་བཏང་བ།

2021ལོའི་ཟླ་7པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལ་གཟིགས་ཞིབ་གནང་སྐབས། ཏང་གཤིས་ལ་ཞུན་བརྡར་བྱེད་པའི་ཐད་ཤུགས་བརྒྱབ་ནས་རྒྱ་ཆེའི་ཏང་ཡོན་དང་ལས་བྱེད་པས་ཏང་གི་གཟི་བརྗིད་སྲོལ་རྒྱུན་དར་སྤེལ་གཏོང་བ་དང་གསར་བརྗེའི་ས་བོན་རྒྱུན་འཛིན་ལ་སློབ་གསོ་ཁྲིད་སྟོན་དང་། ཏང་བཙུགས་ཀྱི་སྙིང་སྟོབས་རླབས་པོ་ཆེར་བརྟེན་ནས་ཏང་གཤིས་བློ་སྦྱོང་ཟབ་ཏུ་གཏོང་བ། ཕུགས་བསམ་དད་སེམས་བརྟན་དུ་གཏོང་བ། ཆབ་སྲིད་ཀྱི་བརྡར་ཤ་གཅོད་ནུས་དང་། ཆབ་སྲིད་ཀྱི་གོ་རྟོགས་སད་ནུས། ཆབ་སྲིད་ལག་ལེན་བསྟར་ནུས་བཅས་ཟམ་མི་ཆད་པར་ཆེ་རུ་གཏོང་བ། “རྒྱལ་ཁབ་ཀྱི་དོན་ཆེན”བློ་ལ་བརྟན་པོར་འཆང་བ། ཐོག་མཐའ་བར་གསུམ་དུ་ཏང་གཤིས་ཀྱི་རྩ་དོན་ལ་བརྟེན་ནས་རང་གཅུན་ནན་པོ་བཅས་བྱས་ཏེ་སྟོབས་དང་ལྡན་པའི་ཏང་གཤིས་ལ་དམངས་ཀྱིས་ཡིད་ཆེས་བྱེད་པ་དང་མང་ཚོགས་ལ་སྣེ་ཁྲིད་བྱེད་དགོས་ཞེས་ནན་བཤད་གནང་ཡོད།

ས་མཐོར་ལས་ཀ་བྱེད་སྐབས་དཀོན་ཤོས་ནི་གསོ་རླུང་དང་རྩ་ཆེ་ཤོས་ནི་སྙིང་སྟོབས་རེད། ལོ་གཉིས་རིང་གཞིས་རྩེ་གྲོང་ཁྱེར་སྐྱིད་གྲོང་རྫོང་གི་ལས་བྱེད་པ་དང་མང་ཚོགས་ཀྱིས“ཏང་གི་གཟི་བརྗིད་སྲོལ་རྒྱུན་དར་སྤེལ་བཏང་ནས་གསར་བརྗེའི་ས་བོན་རྒྱུན་འཛིན་བྱེད་དགོས”པའི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་བློ་ལ་བརྟན་པོར་ངེས་ཏེ་དུས་རབས་གསར་པའི་ཏང་ཡོན་གྱི་སློབ་གསོའི་དུས་བབ་གསར་པ་དང་། ལས་འགན་གསར་པ། བླང་བྱ་གསར་པ་བཅས་ལ་དམ་པོར་དམིགས་པ་དང་། ས་གནས་ཀྱི་གསར་བརྗེའི་ཐོན་ཁུངས་སྔོག་འདོན་གང་ལེགས། ཏང་གི་ལོ་རྒྱུས་གཏམ་རྒྱུད་དང་དཔའ་བོ་དང་སྔོན་གཤེགས་དཔའ་བོའི་བྱས་རྗེས་ཤོད་པ་བཅས་བྱས་ནས་གསར་བརྗེའི་སྟོབས་ཤུགས་གཅིག་སྒྲིལ་ལ་ཤུགས་སྣོན་བརྒྱབ་ཡོད།

སྐྱིད་གྲོང་རྫོང་ཨུད་རྩ་འཛུགས་པུའི་ལས་དོན་པ་ལི་ཆན་གྱིས“སྐྱིད་གྲོང་རྫོང་གིས་གསར་བརྗེའི་ལོ་རྒྱུས་གཏམ་རྒྱུད་མི་རིགས་མཐུན་སྒྲིལ་གྱི་བསླབ་གཞིར་མཐའ་འཁྱོངས་དང་། གསར་བརྗེའི་རྗེས་ཤུལ་མི་རྣམས་ལ་སློབ་གསོ་གཏོང་བའི་སློབ་ཁང་དུ་བརྩི་བ། ‘ཇོ་མོ་གླང་མའི་ཕྱོགས་སྟོན’དང‘མཐའ་མཚམས་ཀྱི་མཁར་རྫོང’སོགས་ཏང་འཛུགས་ཀྱི་སྤུས་རྟགས་ཧུར་ཐག་གཏོད་པ། ‘འཛུགས་གཏོད་བཞིའི’གཞི་རིམ་ཏང་རྩ་འཛུགས་ཀྱི་དཔེ་སྟོན་ས་ཚིགས་འཛུགས་སྐྱོང་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་བྱས་ཏེ་གསར་བརྗེའི་རིག་གནས་མི་སེམས་སུ་གཏིང་ཟབ་ཟུག་པར་བྱས་ཡོད”ཅེས་བཤད།

“བདུན་གཅིག་གཟེངས་རྟགས”འཐོབ་མཁན་སྒྲོལ་དཀར་ནི་བོད་སྐྱོད་པ་རྒན་གྲས་ཀྱི་སྙིང་སྟོབས་རྒྱུན་འཛིན་བྱེད་མཁན་ཞིག་རེད། ཁོང་གིས“ཁྱིམ་གཞིས་ནི་ཡུལ་སྨད་དང་རྒྱལ་ཁོངས་ནི་ཀྲུང་གོ་ཡིན”པའི་ཕུགས་བསམ་གྱི་དད་སེམས་མཐའ་འཁྱོངས་བྱས་ནས་ལོ་བཅུ་ཉིན་གཅིག་ལྟར་སྤྱི་ལེ་ངོས་གྲུ་སྟོང་ཕྲག་ཁ་ཤས་ཀྱི་རྒྱལ་ཁབ་ཀྱི་ས་ཆ་བརྟན་པོར་བསྲུངས་ཏེ་བྱ་སྤྱོད་དངོས་ཀྱིས“དཀའ་ཚེགས་ཇི་ཙམ་ཆེ་རུང་མེས་རྒྱལ་གྱི་ས་ཆ་སྦར་མཐིལ་ཙམ་ཡང་སྲུང་སྐྱོང་ཡག་པོ་བྱེད་པའི”དམ་བཅའ་ལག་ལེན་བསྟར་ཡོད།

ཁུང་ཧྥན་སེན་གྱི་གངས་ལྗོངས་ལ་བཅངས་པའི་བརྩེ་སེམས་ནས་བོད་སྐྱོར་དགེ་རྒན་ལི་ཀོང་ཝུན་དང་ཁྲེན་ཧུང་བཟའ་ཚོ་བར་དང་། སྒྲོལ་དཀར་དང་གཡང་འཛོམས་གཅེན་གཅུང་གཉིས་ཀྱིས་ཕྱུགས་འཚོ་བཞིན་མཐའ་མཚམས་སྲུང་བ་ནས་ཆི་ཨའེ་ཆུན་གྱི་མི་ཚེའི་གདམ་གའི་བར་བོད་སྐྱོད་པ་རྒན་གྲས་ཀྱི་སྙིང་སྟོབས་མུ་མཐུད་རྒྱུན་འཛིན་ཐུབ་ཡོད་ལ། དུས་རབས་ཀྱི་ནང་དོན་གསར་པའང་བསྣན་ཡོད།

སྤྱོད་ཚུལ་ལེགས་སུ་བཏང་ནས་ལས་སྒྲུབ་ལས་གཏོད་ཀྱི་མཉམ་ཤུགས་ཆེན་པོ་གཅིག་ཏུ་བསྒྲིལ་བ།

སྤྱོད་ཚུལ་འཛུགས་སྐྱོང་ནི་ཏང་འཛུགས་སྐྱོང་གི་གཏན་དུའི་བརྗོད་དོན་གཙོ་བོ་ཡིན་ལ། བོད་ཀྱི་བྱ་གཞག་འཕེལ་རྒྱས་ལ་སྐུལ་འདེད་གཏོང་བའི་འགན་ལེན་གལ་ཆེན་ཞིག་ཀྱང་རེད།

2021ལོའི་ཟླ་12པར་བོད་རང་སྐྱོང་ལྗོངས་ཏང་ཨུད་ཀྱིས་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་བཀོད་སྒྲིག་བྱས་ཤིང་། ལོ་གཉིས་རིང་། ལྗོངས་ཡོངས་ཀྱི་ས་གནས་ཁག་དང་སྡེ་ཚན་ཁག་གིས་ལས་ཀའི་དོན་དངོས་དང་ཟུང་འབྲེལ་གྱིས་དམིགས་ཚད་ཀྱི་སྟོན་ཕྱོགས་དང་། གནད་དོན་གྱི་སྟོན་ཕྱོགས། གྲུབ་འབྲས་ཀྱི་སྟོན་ཕྱོགས་བཅས་མཐའ་འཁྱོངས་བྱེད་པ་དང་འབྲེལ་གཟེར་འདེབས་ཀྱི་སྙིང་སྟོབས་ལ་བརྟེན་ནས་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་ལ་མུ་མཐུད་སྐུལ་འདེད་གཏིང་ཟབ་བཏང་བར་བརྟེན་ལས་དོན་ཁག་ལ་སྐུལ་འདེད་གཏོང་བར་རྣམ་པ་གསར་པ་མངོན་ཡོད།

རང་སྐྱོང་ལྗོངས་སྐྱེ་ཁམས་ཁོར་ཡུག་ཐིང་གིས་ལས་རིགས་74ཁོར་ཡུག་སྲུང་སྐྱོང་གི་ཚོད་སྐོར་ཆག་ཡང་ངམ་ཡང་ན་གསལ་བཤད་དང་ཁས་ལེན་ལག་བསྟར་བྱས་ནས་2022ལོའི་ལོ་འཁོར་གྱི་གཙོ་གནད་རྣམ་གྲངས་549ལ་ཁོར་ཡུག་ཚོད་སྐོར་གྱི་རིམ་པ་དང་། ཞིབ་མཆན་གྱི་རིམ་པ། སྲིད་ཇུས་ཀྱི་རྒྱབ་སྐྱོར་བཅས་རིམ་གྱིས་ཁ་གསལ་བཟོས་པ་དང་། ཞིབ་མཆན་འགོད་པའི་དུས་ཡུན་ཡང་ཐུང་དུ་བཏང་ནས་2022ལོར་ཁྱོན་རྣམ་གྲངས་178ལ་ཁོར་ཡུག་ཚོད་སྐོར་ཆག་ཡང་དང་། རིམ་པ་གཅོག་པའམ་ཡང་ན་གསལ་བཤད་དང་ཁས་ལེན་བྱེད་དུ་བཅུག་སྟེ་དྲ་ཐོག་ནས་ཐོ་འགོད་སྙན་སེང་ཞུ་ཚད་95%ཟིན་པ་དང་མང་ཚོགས་འགྲོ་འོང་བྱེད་ཚད་དང་དོན་དག་གཉེར་ཡུན་60%ཡན་ཐུང་དུ་བཏང་ཡོད།

ནག་ཆུ་གྲོང་ཁྱེར་ཨ་མདོ་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་གནམ་གཤིས་ཞན་པའི་སྐབས་སུ“ཉེན་གཡོལ་བྱེད་ས”དང་། མང་ཚོགས་ལ་ཞབས་འདེགས་ཞུ་བའི“དམངས་ཕན་ཚོམས་ཆེན” མཚོ་བོད་གཞུང་ལམ་གྱི“ལེ་ཏ་ས་ཚིགས”བཅས་བསྐྲུན་པ་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལས་དོན་ལ་སྐུལ་འདེད་གཏོང་བའི་བྱེད་ཐབས་སུ་བརྩིས་ཡོད།

ནག་ཆུ་གྲོང་ཁྱེར་གསེར་རྙེད་ཆུས་གླིང་སྐོར་སྡེ་ཁུལ་གྱི་དམངས་ཕན་ཞབས་འདེགས་ཚོམས་ཆེན་དུ“གློག་རིན་བསྡུ་བ”དང“དམངས་འཚོའི་ཞབས་འདེགས”སོགས་སྐར་ཁུང་བདུན་གྱི་མདུན་དུ་རུ་བསྒྲིགས་ནས་དོན་དག་སྒྲུབ་བཞིན་པའི་མང་ཚོགས་ལ་ལས་དོན་པས་སེམས་རྩ་འཁོལ་པོས་སྣེ་ལེན་ཞུ་བཞིན་འདུག “ད་ཆ་གློག་རིན་སྤྲོད་པར་སྐར་མ་གསུམ་ལས་མི་འགོར་བས། སྟབས་བདེ་པོ་འདུག”ཅེས་གློག་རིན་སྐྱེལ་མཁན་གྲོང་མི་ཞིག་གིས་དེ་ལྟར་བཤད།

བཀོད་སྒྲིག་ཞིབ་ཚགས་བྱེད་པ་ནས་ལྟ་སྐུལ་ཞིབ་བཤེར་བར་དང་། སྒྲིག་བཀོད་ཚད་ལྡན་དུ་བཏང་བ་ནས་དམངས་ལ་སྟབས་བདེ་སྐྲུན་པའི་བར། གོ་རིམ་རྙོག་འཛིང་ཆེ་བ་ནས་གོ་རིམ་སྟབས་བདེ་རུ་ཕྱིན་པའི་བར། ལོ་གཉིས་རིང་བོད་ཀྱིས་སྤྱོད་ཚུལ་འཛུགས་སྐྱོང་གི་རྩ་བ་འདིར་དམ་པོར་བཟུང་ནས་ཞིབ་ཚགས་སུ་གཏོང་བ་ནས་འགོ་འཛུགས་པ་དང་། དོན་འཁྱོལ་ལ་ཤུགས་སྣོན། སྤྱོད་ཚུལ་ལེགས་སུ་གཏོང་བ་ནས་འགོ་འཛུགས་པ་བཅས་བྱས་ཏེ་ཏང་ལ་དོ་དམ་དང་ཏང་བཅོས་སྐྱོང་གི་རྣམ་པ་བཟང་པོ་ཆགས་ནས་ཏང་འཛུགས་སྐྱོང་གིས་ལས་སྒྲུབ་ལས་གཏོད་ལ་ཁྲིད་སྟོན་བྱེད་པའི་སྟོབས་ཤུགས་ཆེན་པོ་ཟམ་མི་ཆད་པར་གཅིག་སྒྲིལ་ཐུབ་ཡོད།

དམིགས་ཡུལ་ལག་ལེན་བསྟར་ནས་མི་རིགས་ཁག་གི་མང་ཚོགས་ཀྱི་དམངས་འཚོའི་བདེ་རྩ་ཟབ་ཏུ་བཏང་བ།

2021ལོའི་ཟླ་7པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་དུ་གཟིགས་ཞིབ་གནང་སྐབས། མི་དམངས་ལྟེ་བར་བྱེད་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་ཀྱིས་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་དང་འབྲེལ་མཐུད་ནུས་ལྡན་བྱེད་པ་དང་། མང་ཚོགས་ཀྱིས་ཡོངས་ཁྱབ་ངང་དོ་ཁུར་བྱེད་པའི་དམངས་འཚོའི་གནད་དོན་ལ་དེ་བས་དམིགས་པ། ལས་ཞུགས་དང་། སློབ་གསོ། སྤྱི་ཚོགས་འགན་བཅོལ། སྨན་བཅོས། རྒན་གསོ། བུ་བཅོལ། སྡོད་ཁང་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ་བཅས་བྱས་ནས་བྱ་བ་རེ་རེ་བཞིན་དོན་འཁྱོལ་ལ་དམ་འཛིན་བྱས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་དེ་བས་ཟབ་པ་དང་། སྐྱིད་སྣང་དེ་བས་རྒྱུན་མཐུད། བདེ་སྣང་དེ་བས་འགན་ལེན་བཅས་བྱེད་དགོས་པའི་ནན་བཤད་གནང་ཡོད།

སྔོན་མ་ནག་ཆུ་གྲོང་ཁྱེར་སོག་རྫོང་རོང་པོ་གྲོང་རྡལ་དུ་སྡོད་ཁང་ནི་ས་ཕག་གི་ཁང་པ་དང་ལམ་ནི་འདམ་རྫབ་ཀྱི་ལམ་རེད། དུས་ཐུང་ལོ་ཤས་ནང་ས་ཕག་གི་ཁང་པ་དག་བཤིགས་ནས་ཚོང་ཁང་དང་སྡོད་ཁང་རང་སྒྲིག་གི་ཁང་པ་གསར་པར་བསྐྲུན་ཡོད་ལ། ཡངས་ཤིང་རྒྱ་ཆེ་བའི་སྣུམ་ནག་ལམ་ཡང་བསྐྲུན་ཡོད། ཚོང་ཁང་དང་། ཟ་ཁང་། མགྲོན་ཁང་བཅས་བརྒྱབ་ཡོད་པས་མང་ཚོགས་ཀྱི་འཚོ་བའི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་ཡོད།

རོང་པོ་གྲོང་རྡལ་གྱི་འཕེལ་རྒྱས་དང་འཕོ་འགྱུར་ནི་རང་ལྗོངས་ཀྱིས་གཞི་རིམ་ཏང་རྩ་འཛུགས་ཀྱི་དམག་འཐབ་ཀྱི་མཁར་རྫོང་ཟམ་མི་ཆད་པར་བརྟན་དུ་བཏང་ནས་གྲོང་གསེབ་དར་རྒྱས་ལ་སྐུལ་འདེད་བཏང་བའི་བསྡུར་རིས་ཤིག་རེད།

ཉེ་བའི་ལོ་ཤས་རིང་། བོད་ཀྱི་རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པས་མང་ཚོགས་ཀྱིས་དོ་སྣང་ཆེ་ཤོས་བྱེད་པ་དང་། མང་ཚོགས་དང་ཐད་ཀར་འབྲེལ་བ་ཆེ་ཤོས་ཡོད་པ། མང་ཚོགས་ལ་འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གྱི་གནད་དོན་ལ་དམ་འཛིན་བྱས་ཏེ་ཏང་བཙུགས་ཀྱི་སྙིང་སྟོབས་རླབས་པོ་ཆེ་རྒྱུན་འཛིན་དང་དར་སྤེལ་ཤུགས་ཆེན་བཏང་བ་མ་ཟད། ལས་ཀའི་གཙོ་གནད་གཞི་རིམ་དུ་བསྒྱུར་ནས་ཡུལ་བབ་དང་བསྟུན་པ་དང་། ཚན་རིག་དང་མཐུན་པའི་ངང་ཇུས་འགོད། འབད་འབུངས་ཡར་བརྩོན། དུས་བསྟུན་མདུན་སྐྱོད་བཅས་བྱས་ཏེ་མང་ཚོགས་ཀྱི་སྐྱིད་སྣང་དང་། ཐོབ་སྣང་། བདེ་སྣང་བཅས་ཟམ་མི་ཆད་པར་ཆེ་རུ་བཏང་ཡོད།

དུས་རབས་གསར་པ་དང་རྒྱང་ལམ་གསར་པར། བོད་ཀྱི་རྒྱ་ཆེའི་ཏང་ཡོན་ལས་བྱེད་པས་ཐོག་མཐར་བར་གསུམ་དུ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་དར་ཆ་རླབས་ཆེན་མཐོན་པོར་བསྒྲེངས་ནས་གུང་ཁྲན་ཏང་མིའི་ཕུགས་བསམ་དད་སེམས་ནམ་ཡང་མི་ཉམས་པ་དང་ཐོག་མཐར་བར་གསུམ་དུ་ཏང་བཙུགས་ཀྱི་སྙིང་སྟོབས་རླབས་པོ་ཆེ་ལག་བསྟར་བྱས་ཏེ་མཛེས་སྡུག་ལྡན་པའི་བོད་ལྗོངས་འཛུགས་སྐྲུན་དང་བསྐྱར་དར་རླབས་པོ་ཆེའི་ཕུགས་འདུན་མངོན་འགྱུར་བྱ་ཆེད་སྟོབས་ཤུགས་གཅིག་ཏུ་སྒྲིལ་བཞིན་ཡོད།