ཤིན་ཧྭ་གསར་འགྱུར་ཁང་ཟི་ལིང་ནས་ཟླ་8ཚེས་10ཉིན་གློག་འཕྲིན་འབྱོར་གསལ། ལོ་24ལ་སླེབས་པའི་ཤུའེ་པོ་ཡོན་ནི་ཆིང་ཧྭ་སློབ་ཆེན་ཁོར་ཡུག་སློབ་གླིང་གི་འབུམ་རམས་ཞིབ་འཇུག་སློབ་མ་ཞིག་རེད། དབྱར་གསེང་ལ་ཁོང་དང་སློབ་གྲོཌ་གཞན་དག་བཞི་ལས་གྲུབ་པའི་ཆིང་ཧྭ་སློབ་ཆེན་གྱི་འབུམ་རམས་པའི་ཚོགས་པ་གཙང་གསུམ་ཆུ་འགོའི་རྒྱལ་ཁབ་སྤྱི་གླིང་དོ་དམ་ཅུས་འབྲི་ཆུའི་ཆུ་འགོ་ཁུལ་དོ་དམ་ཨུ་ལྷན་འབྲི་སྟོད་དོ་དམ་ཁྲུའུ་རུ་ཡོང་སྟེ་ས་གནས་ས་ཐོག་ཏུ་ཚན་རིག་དང་མཐུན་པའི་རྟོག་ཞིབ་དང་ཞིབ་འཇུག་བྱས་པ་རེད།

འབྲི་ཆུའི་ཆུ་འགོར་ཡོང་ནས་ས་གནས་ས་ཐོག་ཏུ་རྟོག་ཞིབ་དང་ཕྱི་རོལ་དུ་ཞིབ་འཇུག་བྱས་པ་ཕུད། འབུམ་རམས་པའི་ཚོགས་པ་དེར་ད་དུང་དམིགས་ཡུལ་གལ་ཆེན་ཞིག་ཡོད་པ་ནི་གཙང་གསུམ་ཆུ་འགོའི་ཁུལ་དུ་ལྷག་པའི“དྲེད་མོང་གི་ཉེན་ཁའི”གནད་དོན་ལ་བརྟག་དཔྱད་གཏིང་ཟབ་བྱ་རྒྱུ་དང་འབྲེལ། ལག་བསྟར་བྱེད་ཐུབ་པའི་ཐག་གཅོད་བྱེད་ཐབས་འཚོལ་ཞིབ་བྱ་རྒྱུ་རེད།

མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཀྲོའུ་ཆུ་དམར་ལེབ་རྫོང་དར་དམར་གྲོང་ཚོའི་ཏང་ཀྲི་པུའི་ཧྲུའུ་ཅི་ནོར་བུ་ཚེ་རིང་གིས་ངོ་སྤྲོད་བྱས་པར་གཞིགས་ན། མིག་སྔའི་བར་གྲོང་ཚོའི་འབྲོག་དུད་65ལ་དྲེད་མོང་གི་གཏོར་སྐྱོན་ཕོག་ཡོད་པ་རེད།

དེང་རབས་ཅན་གྱི་ཚན་རྩལ་བྱ་ཐབས་ཇི་ལྟར་སྤྱད་དེ་གཙང་གསུམ་ཆུ་འགོའི་ཁུལ་གྱི་མི་དང་རི་སྐྱེས་སྲོག་ཆགས་ཞི་མཐུན་མཉམ་གནས་ལ་སྐུལ་འདེད་གཏོང་རྒྱུ་ནི་འབུམ་རམས་པའི་ཚོགས་པས་དོ་ཁུར་བྱེད་པའི་ཞིབ་འཇུག་བྱ་གཞི་ཞིག་རེད།

ཕྱི་རོལ་དུ་རྟོག་ཞིབ་བྱེད་པའི་ལམ་བར་དུ་ཁྲེན་ཅེ་ཧའོ་ལ་རྒྱུན་དུ་འབྲོང་དང་། གཙོད། ཁྲུང་ཁྲུང་སྐེ་ནག་སོགས་ཀྱི་རི་སྐྱེས་སྲོག་ཆགས་འཕྲད་ཀྱི་ཡོད། ཁོང་གིས་ས་མཐོའི་སྲོག་ཆགས་དེ་དག་གིས་མི་ལ་ཞེད་སྣང་བྱེད་ཀྱི་མེད། “གཙང་གསུམ་ཆུ་འགོ་ནི་ང་ཚོའི་ཐུན་མོང་གི་ཁྱིམ་གཞིས་རེད། ང་ཚོས་རི་སྐྱེས་སྲོག་ཆགས་དེ་དག་ལ་མཐོང་ཆེན་དང་སྲུང་སྐྱོང་བྱས་ཚེ་མི་དང་སྲོག་ཆགས་དབར་འཆམ་མཐུན་མཉམ་གནས་ཡོང་ཐུབ”ཅེས་ཁྲེན་ཅེ་ཧའོ་ཡིས་བཤད།