ཉེ་ཆར། རྒྱལ་སྤྱིའི་སློབ་གྲྭ་ཆེ་མོ་བའི་ལུས་རྩལ་མཉམ་འབྲེལ་ལྷན་ཚོགས་ཀྱི་ལས་ཚབ་ཀྲུའུ་ཞི་ལེ་ནུའོ·ཨེ་ཏེ་དང་དྲུང་ཆེ་ཨེ་རུའེ་ཁེ·སེན་ཁྲའོ་ཡིས་བཅར་འདྲི་དང་ལེན་བྱེད་སྐབས། ཁྲེང་ཏུའུ་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་ཀྱིས་འཛམ་གླིང་ལ་ངོ་མཚར་ཆེ་བའི་འགྲན་བསྡུར་ཞིག་ལེགས་སྐྱེས་ཕུལ་ནས་འགྲན་བསྡུར་ནང་ཞུགས་མཁན་ཚང་མར་བརྗེད་པར་དཀའ་བའི་དྲན་འཆར་ཞིག་བཞག་ཡོད་པ་དང་། ཁྲེང་ཏུའུ་ཡིས་ཕུགས་འདུན་མངོན་འགྱུར་གྱི་སྟེགས་བུ་བཏོད་པར་ཐུགས་རྗེ་ཆེ་ཞུ་གི་ཡིན་ཞེས་བརྗོད།

“དང་ཐོག་ཀྲུང་གོ་དང་ཀྲུང་གོ་མི་དམངས་ལ་རྟེན་འབྲེལ་ཞུ་རྒྱུ་ཡིན། ཁྲེང་ཏུའུ་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་ཀྱི་འགྲན་རའི་སྒྲིག་བཀོད་དང་ལེ་ལག་ཚང་བའི་ཞབས་ཞུ་ཚང་མ་ཧ་ཅང་ཡག་པོ་འདུག་ལ། དང་བླངས་པ་དང་ལྟད་མོ་བ་ཡང་ཧ་ཅང་སེམས་རྩ་འཁོལ་པོ་འདུག ཚང་མས་དེ་གར་མཉམ་དུ་མཛེས་སྡུག་ལྡན་པའི་འཚོ་བ་ཞིག་མྱོང་རོལ་བྱས་ཡོད”ཅེས་ཨེ་ཏེས་རྒྱ་སྐད་ཐོག་ནས་ས་གནས་ས་ཐོག་གི་སྨྱན་སྦྱོར་དང་སྐུ་མགྲོན་ལ“ཐུགས་རྗེ་ཆེ”ཞེས་བརྗོད།

འདས་ཟིན་པའི་ཉིན་10ལྷག་ཙམ་རིང་རྒྱལ་ཁབ་དང་ས་ཁུལ་113ནས་ཡོང་བའི་ལུས་རྩལ་པ་6500ཡིས་མཉམ་དུ་འགྲན་བསྡུར་བྱས་པ་མ་ཟད། མཛའ་གྲོགས་ཟབ་ཏུ་ཕྱིན་ཡོད། ཨེ་ཏེས“རྒྱལ་ཁབ་ཁག(ས་ཁུལ)གི་ལུས་རྩལ་པས་འགྲན་རར་འབད་འཐབ་ཧུར་ཐག་བྱས་པ་དང་འགྲན་བསྡུར་རྗེས་སྤེལ་རེས་ཟབ་མོ་བྱས་ཡོད། རིག་གནས་མི་འདྲ་བའི་དབར་སྤེལ་རེས་བྱེད་པ་དེ་ཧ་ཅང་གལ་འགངས་ཆེན་པོ་ཞིག་རེད། ལུས་རྩལ་པ་ཚོས་བརྗེད་པར་དཀའ་བའི་གཏམ་རྒྱུད་དེ་དག་མི་དེ་བས་མང་བར་བརྗོད་ནས། མི་དེ་བས་མང་བས་ཁྲེང་ཏུའུ་དང་ཀྲུང་གོ་ཤེས་རྟོགས་ཐུབ་པར་བྱེད་པ་ནི་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་ཀྱི་ཡིད་དབང་འགུག་ཤུགས་ཤིག་རེད”ཅེས་བརྗོད།

ཁྲེང་ཏུའུ་སློབ་གྲྭ་ཆེ་མོ་བའི་ཏ་ཡུན་གྲོང་ཚོའི་སྣ་མང་ཕུན་སུམ་ཚོགས་པའི་རིག་གནས་སྤེལ་རེས་ཀྱི་བྱེད་སྒོ་དང་དེ་བཞིན་གཙོ་གཉེར་ཕྱོགས་ཀྱིས་སྒྲིག་འཛུགས་ཞིབ་ཚགས་བྱས་པའི་ལྟ་སྐོར་དང་ཡུལ་སྐོར་བྱེད་སྒོས་ཨེ་ཏེ་ལ་བག་ཆགས་ཟབ་མོ་བཞག་ཅིང་། “ཁྲེང་ཏུའུ་ལ་ལོ་རྒྱུས་ཡུན་རིང་ལྡན་ལ། དེང་རབས་ཅན་གྱི་འཕེལ་རྒྱས་མྱུར་པོ་བྱུང་བས། མཛེས་སྡུག་ལྡན་པའི་འབྱུང་འགྱུར་ཞིག་བསུ་ཐུབ་ངེས་རེད། ང་སླར་ཡང་ཁྲེང་ཏུའུ་ལ་ཡོང་འདོད་ཡོད”ཅེས་བརྗོད།

ཚེས་8ཉིན་གྱི་དགོང་མོ། ཁྲེང་ཏུའུ་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་མཇུག་འགྲིལ་ཞིང་། སེན་ཁྲའོ་ཡིས་ཁྲེང་ཏུའུ་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་ཐུགས་གྲ་ལེགས་འགྲིག་བྱུང་བ་དེས་སླད་ཕྱིན་གྱི་སློབ་གྲྭ་ཆེ་མོ་བའི་ལུས་རྩལ་འགྲན་ཚོགས་ལ་ཚད་ཤིང་ཞིག་བཏོད་ཡོད། འདུ་ཚོགས་གཟབ་རྒྱས་དེ་ནི་མི་ཚང་མར་དབང་ཡོད། ཁྱིམ་བདག་མང་པོ་ཞིག་ཕྲུ་གུ་ཁྲིད་ནས་འགྲན་བསྡུར་ལ་ལྟ་བར་ཡོང་བ་མཐོང་སྐབས་ཧ་ཅང་དགའ་པོ་བྱུང་། སློབ་གྲྭའི་ལུས་རྩལ་ཡང་ང་ཚོས་དོ་ཁུར་བྱེད་པའི་གཙོ་གནད་ཁྱབ་ཁོངས་ཤིག་རེད་ལ། གཞོན་ནུ་ལོ་ཆུང་གིས་མ་འོངས་ཀྱི་རེ་བ་མཚོན་གྱི་ཡོད”ཅེས་སེན་ཁྲའོ་ཡིས་བརྗོད།