ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་གསལ། མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་ལས་དོན་གྱི་འགན་འཁུར་མཁན་དྲུང་ཆེ་གཞོན་པ་ལཱ་ཁེ་ལུའུ་ཝ་ཚེས་25ཉིན་གྱི་དགོང་མོ་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་ཚབ་ཚོགས་པས་གཉེར་བའི་ཀྲུང་གོ་མི་དམངས་བཅིངས་འགྲོལ་དམག་བཙུགས་ནས་ལོ་96འཁོར་བར་རྟེན་འབྲེལ་ཞུ་བའི་སྣེ་ལེན་ཚོགས་འདུར་ཞུགས་པ་རེད། ཁོང་གིས་ཀྲུང་གོའི་ཞི་བདེ་སྲུང་སྐྱོང་དཔུང་སྡེའི་སྤྱོད་ཚུལ་བཟང་ལ་བྱང་ཚད་མཐོ་པོ་འདུག ཀྲུང་གོས་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ལ་རྒྱབ་སྐྱོར་དང་ལེགས་སྐྱེས་ཕུལ་བར་ཐུགས་རྗེ་ཆེ་ཞུ་གི་ཡིན་ཞེས་བརྗོད་པ་རེད།

ལཱ་ཁེ་ལུའུ་ཝ་ཡིས། དུས་ཡུན་རིང་པོའི་ནང་ཀྲུང་གོས་ཁྱབ་ཁོངས་ཁག་ཚང་མའི་ནང་མཉམ་འབྲེལ་རྒྱལ་ཚོགས་དང་མཉམ་ལས་དམ་ཟབ་རྒྱུན་འཁྱོངས་བྱས་ནས་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ལ་རྒྱབ་སྐྱོར་ཧུར་ཐག་བྱས་ཡོད། མཉམ་འབྲེལ་རྒྱལ་ཚོགས་ཀྱིས་ཀྲུང་གོ་དང་ཁྱབ་ཁོངས་ཁག་གི་མཉམ་ལས་ལ་མུ་མཐུད་ཤུགས་སྣོན་རྒྱག་རྒྱུའི་རེ་སྒུག་བྱེད་བཞིན་ཡོད་ཅེས་བརྗོད་པ་རེད།

ཉིན་དེའི་དགོང་མོར་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་ཚབ་ཚོགས་པའི་དམག་དོན་ཚན་མོའུ་ཐོན་ཤོག་གི་ཐོན་ཀྲང་དབྱི་ཀྲུང་ལེང་གིས་སྣེ་ལེན་ཚོགས་འདུ་གཙོ་སྐྱོང་གནང་བ་དང་། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་ཚབ་ཀྲང་ཅུན་དང་འཐུས་ཚབ་གཞོན་པ་ཀེང་ཧྲོང་དང་། ལཱ་ཁེ་ལུའུ་ཝ། མཉམ་འབྲེལ་རྒྱལ་ཚོགས་ཀྱི་ལས་རོགས་དྲུང་ཆེ་པུའུ་ཐེང་ཧའེ་མུའུ། མཉམ་འབྲེལ་རྒྱལ་ཚོགས་ཀྱི་དྲུང་ཆེའི་དམག་དོན་བློ་འདྲི་བ་ཏི་ཨའོ་ཕུའུ་སོགས་དཔོན་རིགས་དང་། མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་ཆེད་གཏོང་ཐོན་ཤོག་དཔུང་སྡེ་12ཀྱི་སི་ལིང་དང་དེ་བཞིན་མཉམ་འབྲེལ་རྒྱལ་ཚོགས་སུ་རྒྱུན་སྡོད་རྒྱལ་ཁབ་ཁག་གི་འཐུས་ཚབ་ཚོགས་པའི་དམག་དོན་བློ་འདྲི་བ་དང་ཉེན་རྟོག་པའི་བློ་འདྲི་བ་དེ་བཞིན་སྤྱི་ཚོགས་ལས་རིགས་ཁག་གི་མི་སྣ་སོགས་200ལྷག་ཙམ་ཞུགས་ཡོད་པ་རེད།

དབྱི་ཀྲུང་ལེང་གིས་ཤིས་ཚིག་སྒྲོན་སྐབས། ཀྲུང་གོའི་དམག་དཔུང་ནི་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ཁྲོད་ཀྱི་བཀྲག་མདངས་འཚེར་བའི་སྟོབས་ཤུགས་ཤིག་ཡིན་པ་དང་། མཉམ་འབྲེལ་རྒྱལ་ཚོགས་ཀྱི་ལས་འགན་སྒྲུབ་ཁུལ་25ལ་ཞི་བདེ་སྲུང་སྐྱོང་དཔོན་དམག་མི་ཐེངས་ཁྲི་5ཙམ་མངགས་གཏོང་བྱས་ནས་ཞི་བདེ་སྲུང་སྐྱོང་གི་ལས་འགན་བསྒྲུབས་པ། རྒྱལ་ཁབ་150ལྷག་ཙམ་དང་དམག་དོན་སྤེལ་རེས་དང་མཉམ་ལས་གཏིང་ཟབ་བྱས་ཡོད། འབྱུང་འགྱུར་ལ་རྒྱང་ལྟ་བྱེད་སྐབས་ཀྲུང་གོའི་དམག་དཔུང་གིས་སྔར་བཞིན་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་དང་དེ་བཞིན་འབྲེལ་ཡོད་གྲོས་འགོར་རྒྱབ་སྐྱོར་དང་དེའི་ནང་ཞུགས་ནས་ཞི་བདེ་སྲུང་སྐྱོང་བྱ་གཞག་ཆེད་ལེགས་སྐྱེས་གསར་པ་འབུལ་འདོད་ཡོད་ཅེས་བརྗོད་པ་རེད།

ཀྲང་ཅུན་གྱིས་གསུང་བཤད་གནང་སྐབས། ཀྲུང་གོས་ཞི་བདེ་འཕེལ་རྒྱས་ཀྱི་ལམ་བུའི་ཐོག་བསྐྱོད་རྒྱུ་མཐའ་འཁྱོངས་ཀྱིས་འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་ལག་ལེན་བསྟར་གྱི་ཡོད། ཀྲུང་གོས་དྲང་གཞག་དྲང་བདེན་བརྟན་སྲུང་དང་ཆབ་སྲིད་ཀྱི་ཐོག་ནས་རྩོད་གཞི་ཐག་གཅོད་བྱ་རྒྱུར་སྐུལ་འདེད་བཏང་སྟེ་ནམ་ཡང་ཞི་བདེའི་ཕྱོགས་སུ་ལངས་ཀྱི་ཡོད། ཀྲུང་གོས་མཉམ་འབྲེལ་རྒྱལ་ཚོགས་ཀྱིས་སྲོག་ཤིང་གི་ནུས་པ་འདོན་སྤེལ་བྱ་རྒྱུར་རྒྱབ་སྐྱོར་མཐའ་གཅིག་ཏུ་བྱེད་པ་དང་། མཉམ་འབྲེལ་རྒྱལ་ཚོགས་ཀྱི་རྩ་འཛིན་གྱི་དམིགས་ཡུལ་དང་རྩ་དོན་བརྟན་སྲུང་བྱས་ཏེ་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་ནང་ཧུར་ཐག་ཞུགས་ཀྱི་ཡོད་པས། བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་ཁྲོད་ཀྱི་ཞི་བདེ་སྲུང་སྐྱོང་དམག་གཏོང་མཁན་རྒྱལ་ཁབ་ཆེ་ཤོས་ཡིན་ལ་འཛམ་གླིང་གི་ཞི་བདེ་སྲུང་སྐྱོང་ཀྱི་སྟོབས་ཤུགས་བརྟན་པོ་ཞིག་ཡིན་པ་སྨོས་མེད་རེད། མ་འོངས་པར་ཁ་ཕྱོགས་སྐབས་ཀྲུང་གོས་ཡུན་རིང་ཞི་བདེ་དང་ཡོངས་ཁྱབ་བདེ་འཇགས་ཀྱི་འཛམ་གླིང་ཞིག་སྐྲུན་ཆེད་སྟོབས་ཤུགས་དེ་བས་མང་བ་ལེགས་སྐྱེས་སུ་འབུལ་གྱི་ཡིན་ཞེས་བརྗོད་པ་རེད།

མཉམ་འབྲེལ་རྒྱལ་ཚོགས་ཀྱི་དྲུང་ཆེའི་དམག་དོན་བློ་འདྲི་ཏི་ཨའོ་ཕུའུ་ཡིས། ཀྲུང་གོའི་དམག་དཔུང་གིས་རང་རྒྱལ་ཁབ་ཀྱི་མི་དམངས་ལ་ཞབས་འདེགས་ཞུ་བ་མ་ཟད། མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་གཞག་ལ་ལེགས་སྐྱེས་གལ་ཆེན་ཡང་ཕུལ་ཡོད། སྣེ་ལེན་ཚོགས་འདུར་ཞུགས་མཁན་སྐུ་མགྲོན་གཞན་དག་གིས་ཀྱང་ཀྲུང་གོའི་དམག་དཔུང་གིས་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་སྐྱོང་བྱ་སྤྱོད་དང་དེ་བཞིན་འཛམ་གླིང་ཞི་བདེར་ལེགས་སྐྱེས་ཧུར་ཐག་ཕུལ་བར་ཚད་མཐོའི་གདེང་འཇོག་གནང་བ་རེད།