འདི་ནི་འཕྱོངས་རྒྱས་རྫོང་ལྷ་ཡུལ་ཤང་སློབ་ཆུང་གི་སློབ་མས་འགྱིག་སྐུད་ཀྱི་སྒུལ་ཤུགས་འཁོར་ལོ་བཟོ་བའི་ཚོད་ལྟ་བྱེད་བཞིན་པ། （དཔྱད་གཞིའི་པར་རིས）

2021ལོའི་ཟླ་7པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་དུ་གཟིགས་ཞིབ་གནང་སྐབས། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཏེ་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་ཉིད་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་དང་འབྲེལ་མཐུད་ནུས་ལྡན་བྱ་རྒྱུར་ཤུགས་སྣོན་བརྒྱབ་ནས་མང་ཚོགས་ཀྱིས་ཡོངས་ཁྱབ་ངང་དོ་ཁུར་བྱེད་པའི་དམངས་འཚོའི་གནད་དོན་ལ་དེ་བས་དམིགས་ཏེ་ལས་ཞུགས་དང་། སློབ་གསོ། སྤྱི་ཚོགས་འགན་བཅོལ། སྨན་བཅོས། རྒན་གསོ། བུ་བཅོལ། སྡོད་ཁང་སོགས་དམངས་འཚོའི་བྱ་བ་དངོས་ཡག་པོ་སྒྲུབ་པ་དང་བྱ་བ་རེ་རེ་བཞིན་དོན་འཁྱོལ་དམ་འཛིན་བྱས་ཏེ་མི་རིགས་ཁག་གི་མང་ཚོགས་ཀྱི་ཐོབ་སྣང་དེ་བས་ཟབ་པ་དང་། སྐྱིད་སྣང་དེ་བས་རྒྱུན་མཐུད་པ། བདེ་འཇགས་ཚོར་སྣང་དེ་བས་འགན་ལེན་བཅས་བྱེད་དགོས་ཞེས་ནན་བཤད་གནང་ཡོད།

ཉེ་བའི་ལོ་ཤས་རིང་། བོད་ཀྱིས་མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་པའི་དམིགས་ས་དང་ཤུགས་རྒྱག་ས་དེར་གཞི་ཚུགས་པ་དང་། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་གྱི་འགོ་འཛུགས་ས་དང་དོན་ལ་བབས་ས་དེར་སྟངས་འཛིན་ཡག་པོ་བྱས་ཏེ་སློབ་གསོ་དང་ལས་ཞུགས་གཞི་གཅིག་ཏུ་དམ་འཛིན་དང་། འགན་ལེན་ཁག་གཞི་གཅིག་ཏུ་འཛུགས་པ། སྨན་བཅོས་དང་བདེ་ཐང་ལ་གཞི་གཅིག་ཏུ་སྐུལ་འདེད་གཏོང་བ་བཅས་མཐའ་འཁྱོངས་ཀྱིས་མང་ཚོགས་ཉེ་འགྲམ་གྱི་བྱ་བ་ཆུང་ངུ་ཏང་ཨུད་དང་སྲིད་གཞུང་གི་དོན་ཆེན་ལ་བརྩིས་ནས་དམ་འཛིན་བཅས་བྱས་ཏེ། མི་རིགས་ཁག་གི་མང་ཚོགས་ཚོས་སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པར་བྱས་ཡོད།

མང་ཚོགས་སྔར་བས་ཕྱུག་པོ་ཆགས་པར་བྱས།

ལས་ཞུགས་ནི་དམངས་འཚོའི་རྩ་བ་ཡིན་ལ། ཐུན་མོང་ཕྱུག་འགྱུར་ལ་སྐུལ་འདེད་ཏན་ཏིག་གཏོང་བའི་རྨང་གཞི་གལ་ཆེན་ཡང་ཡིན།

ཉེ་བའི་ལོ་ཤས་རིང་། བོད་ཀྱིས་སྔ་རྗེས་སུ་ལས་ཞུགས་ལས་གཏོད་ལ་རྒྱབ་སྐྱོར་བྱེད་པའི་སྲིད་ཇུས་རང་བཞིན་གྱི་ཡིག་ཆ་ཁག་20ལྷག་ཙམ་བཏོན་པ་དང་། འཐུས་སྒོ་ཚང་བའི་སྲིད་ཇུས་མ་ལག་གི་འདེགས་སྐྱོར་འོག་བོད་ཀྱི་མཐོ་སློབ་སློབ་ཐོན་སློབ་མའི་ཁྲོམ་རའི་ལས་ཞུགས་རྣམ་པ་གཞི་རྩའི་ཆ་ནས་གྲུབ་སྟེ་ལས་རིགས་རྩལ་ནུས་གསོ་སྦྱོང་གིས་ལས་ཞུགས་ལ་སྐུལ་མ་གཏོང་བའི་ནུས་པ་རྒྱུན་ཆད་མེད་པར་མངོན་གསལ་དོད་དུ་ཕྱིན་ཡོད། ལོ་ལྔའི་རིང་། ལྗོངས་ཡོངས་ཀྱི་ལོ་འདིའི་སློབ་ཐོན་སློབ་མ་ལས་ཞུགས་ཐུབ་ཚད་95%ཡན་རྒྱུན་འཁྱོངས་ཐུབ་ཡོད་ལ། ལོ་ལྟར་ཞིང་འབྲོག་པ་ཁྲི་60ཡན་ལས་ཞུགས་གཞན་སྒྱུར་ཐུབ་ཡོད།

ཆབ་མདོ་གྲོང་ཁྱེར་འཇོ་མདའ་རྫོང་ཝེ་འཕྲང་གྲོང་ཚོའི་ཧྭ་གློག་བོད་ལྗོངས་ཀུང་སིའི་གྲོང་སྡོད་ལས་དོན་རུ་ཁག་གི་སྐོར་གླེང་སྐབས་གྲོང་མི་ཚོས་མཐེ་བོང་ཀེར་ནས་བསྔགས་བརྗོད་བྱེད། 2018ལོར་ཧྭ་གློག་བོད་ལྗོངས་ཀུང་སིའི་གྲོང་སྡོད་ལས་དོན་རུ་ཁག་གིས་བརྟག་ཞིབ་གཏིང་ཟབ་བྱས་པའི་རྨང་གཞིའི་ཐོག མ་དངུལ་རེ་ཞུ་བྱས་ནས་ཝེ་འཕྲང་གྲོང་ཚོར་མི་རིགས་ལག་ཤེས་བཟོ་རྩལ་ཀུང་སི་བཙུགས་པ་དང་འབྲེལ་མཐུན་སྦྱོར་བྱས་ནས་མ་དངུལ་སྒོར་ཁྲི་4000ཙམ་ཟིན་པའི་ལོ་བཅུའི་དངོས་ཟོག་མཁོ་འདོན་གྲོས་མཐུན་ལ་མིང་རྟགས་བཀོད་དེ་རྣམ་གྲངས་འཕེལ་རྒྱས་བཏང་ཡོད།

ཡོང་འབབ་མང་དུ་ཕྱིན་ཞིང་། འདས་ཟིན་པའི་ལོ་ལྔའི་ནང་། མི་རིགས་ལག་ཤེས་བཟོ་རྩལ་ཀུང་སིའི་ཤིང་རྐོའི་འཁོར་ཁང་དེ་ཤིང་བརྐོས་དང་། ཡིག་གཟུགས། སྤོས་བཅས་གཞི་གཅིག་ཅན་གྱི་མཉམ་འདུས་རྣམ་པའི་གྲོང་ཚོའི་མཉམ་སྡེབ་ཐོན་ལས་སུ་རིམ་བཞིན་འཕེལ་རྒྱས་ཕྱིན་ཏེ། རིམ་རྩིས་བྱས་ན་མང་ཚོགས་ལ་ཡོང་འབབ་སྒོར་ཁྲི་900ལྷག་ཙམ་བྱུང་ཡོད། གྲོང་ཚོའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ཀྱང་2017ལོའི་སྒོར་3668ནས་2022ལོའི་སྒོར་ཁྲི་1.2ལྷག་ཙམ་བར་འཕར་ནས། ཝེ་འཕྲང་གྲོང་ཚོ་དེ་ཆབ་མདོ་གྲོང་ཁྱེར་གྱི་དབུལ་སྒྲོལ་ཕྱུག་འགྱུར་དང་གྲོང་གསེབ་དར་རྒྱས་ཀྱི་དཔེ་མཚོན་གྲོང་ཚོར་གྱུར་ཡོད།

དམངས་འཚོའི་བདེ་རྩ་ཟབ་ཏུ་གཏོང་རྒྱུ་ནི་འཕེལ་རྒྱས་ཀྱི་རྩ་བའི་དམིགས་ཡུལ་ཡིན། ཉེ་བའི་ལོ་ཤས་རིང་། བོད་ཀྱིས་ས་མཐོའི་ཁྱད་ལྡན་ཞིང་འབྲོག་ཐོན་ལས་འཕེལ་རྒྱས་ཤུགས་ཆེན་བཏང་ནས་ལེགས་ཆའི་ཁྱད་ལྡན་ཐོན་ལས་མཉམ་འདུ་དང་ཞིང་ལས་ཐོན་ལས་གྱི་གྲོང་རྡལ་སྟོབས་ཆེན་འཛུགས་སྐྲུན་དང་། ཞིང་འབྲོག་ལས་ཐོན་ལས་ཅན་གྱི་སྣེ་འདྲེན་ཁེ་ལས་ཟམ་མི་ཆད་པར་སྐྱེད་སྲིང་དང་སྟོབས་ཆེར་གཏོང་བ། ཐོན་ལས་ཀྱི་ལས་སྟེགས་དང་། གཙོ་ཁྲིད་ཐོན་ལས། གཉེར་སྐྱོང་བྱེད་པོ། ཐོན་ལས་གསུམ་མཉམ་འདྲེས་སོགས་ལ་དམིགས་ནས་གསར་གཏོད་ལ་སྐུལ་འདེད་གཏོང་བ་བཅས་བྱས་ཏེ་སྐྱེ་ཁམས་ཀྱི་ལེགས་ཆ་དང་ཐོན་ཁུངས་ཀྱི་ལེགས་ཆ་དེ་དཔལ་འབྱོར་དང་འཕེལ་རྒྱས་ཀྱི་ལེགས་ཆར་བསྒྱུར་ནས་ཞིང་འབྲོག་པའི་ཡོང་འབབ་མང་དུ་ཕྱིན་ཡོད།

མང་ཚོགས་ཀྱི་འཚོ་བའི་སྤུས་ཚད་ལེགས་སུ་ཕྱིན་པ།

རྒྱང་ལམ་གསར་པར་མཛེས་སྡུག་ལྡན་པའི་འཚོ་བར་བཅངས་པའི་མང་ཚོགས་ཀྱི་དགོས་མཁོ་ཉིན་བཞིན་ཆེ་རུ་འགྲོ་བཞིན་ཡོད་ལ། “འཕེལ་རྒྱས་བྱུང་རྗེས”ཀྱི་འདུན་པ་དང་རེ་སྒུག་གསར་པ་ཉིན་བཞིན་རྙོག་འཛིང་ཆེ་རུ་དང་སྣ་མང་དུ་འགྲོ་བཞིན་ཡོད་པས། དམངས་འཚོ་ལེགས་གཏོང་གི་ལས་འགན་ད་དུང་ལྕི་ཙམ་ཡོད། 2022ལོར་རང་སྐྱོང་ལྗོངས་ཀྱིས་མི་དམངས་མང་ཚོགས་ཀྱི་དགོས་མཁོར་དམིགས་ནས་དམངས་འཚོ་ལེགས་གཏོང་གསར་གཏོད་ལ་མུ་མཐུད་སྐུལ་འདེད་བཏང་སྟེ། “དམངས་འཚོའི་འདུ་འགོད་ཆེན་པོ་བཅུར”མ་དངུལ་སྒོར་དུང་ཕྱུར་147.4བཏང་བ་མ་ཟད། སློབ་གསོ་དང་། སྨན་བཅོས། རིག་གནས། བདེ་སྡོད་འགན་ལེན། རོགས་སྐྱོབ་སོགས་ཐད་ལ་མ་དངུལ་གཏོང་ཤུགས་ཟམ་མི་ཆད་པར་ཆེ་རུ་བཏང་ཡོད།

ཟླ་3པའི་ཟླ་འགོར། བོད་བྱང་ཐང་གི་ནག་ཆུར་གནམ་གཤིས་གྲང་ཡང་། ས་བབ་མཐོ་བའི་སློབ་གྲྭའི་སློབ་ཁང་དྲོ་སོབ་སོབ་ཡོད། ས་བབ་མཐོ་ཚད་སྨི་4700ལྷག་ཙམ་ཡོད་པའི་ནག་ཆུ་གྲོང་ཁྱེར་དཔལ་མགོན་རྫོང་བྱ་ཁྱུང་གྲོང་རྡལ་སློབ་ཆུང་དུ་ཕྲུ་གུ་ཚོས་ཤེལ་ཁང་ནང་སྤྲོ་སྣང་ལྡན་པའི་བྱེད་སྒོ་སྤེལ་བཞིན་མཆིས། “ཕྱིར་གནམ་གཤིས་གྲང་ཡང་། སློབ་ཁང་ནང་དྲོ་སོབ་སོབ་ཡོད་པས་གྱོན་གོས་མཐུག་པོ་གྱོན་དགོས་མེད་ལ། སློབ་སྦྱོང་དང་བྱེད་སྒོ་སྤེལ་སྐབས་འཁྱགས་པའི་སེམས་ཁྲལ་མི་འདུག”ཅེས་ལོ་རིམ་ལྔ་པའི་སློབ་མ་ཚེ་དབང་ལྷ་མོས་དགའ་སྤྲོའི་ངང་བཤད།

ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་འབྲས་ནང་གྲོང་ཚོའི་སྤྲོ་ཁང་ནང་བགྲེས་སོང་ཁ་ཤས་དྲོ་འཇམ་ཉི་འོད་འོག་ཇ་འཐུང་གིན་གླེང་མོལ་བྱེད་བཞིན་འདུག 2021ལོར་ཉིང་ཁྲི་གྲོང་ཁྱེར་དམངས་སྲིད་ཅུས་ཀྱིས“ཏང་འཛུགས་སྐྱོང＋རྒན་གསོའི་ཞབས་ཞུའི”བྱེད་ཐབས་སྤྱད་ནས་གྲོང་གསེབ་ཀྱི་སྤྲོ་ཁང་བསྐྲུན་ཞིང་། 2022ལོའི་ལོ་མཇུག་བར། ཉིང་ཁྲི་གྲོང་ཁྱེར་གྱིས་གྲོང་ཚོ་ཨུ་ལྷན་གྱི་བེད་མེད་ས་ཆར་མ་དངུལ་སྒོར་ཁྲི་530ལྷག་ཙམ་བཏང་སྟེ། གྲོང་གསེབ་ཀྱི་སྤྲོ་ཁང་7དང་རྒན་གསོ་ཁང་2བསྐྲུན་ནས་རིམ་རྩིས་བྱས་ན་མང་ཚོགས་ཁྲི་2ལྷག་ཙམ་ལ་ཞབས་འདེགས་ཞུས་ཡོད།

ཆུ་ཚད་དེ་བས་མཐོ་བའི་སྨན་བཅོས་ནས་སྤུས་ཚད་དེ་བས་མཐོ་བའི་སློབ་གསོ་དང་། དེ་བས་ལེགས་པའི་སྐྱེ་ཁམས་ཁོར་ཡུག དེ་བས་སྐྱིད་སྣང་ལྡན་པའི་སྡོད་ཁང་སོགས་བར། བོད་ཀྱིས་མུ་མཐུད་འབད་བརྩོན་བྱས་ཏེ་དམངས་འཚོའི་བདེ་རྩ་ཟབ་ཏུ་བཏང་བ་མ་ཟད། བྱེད་ཐབས་རབ་དང་རིམ་པ་སྤྱད་དེ་དམངས་འཚོར་ཕན་འདོགས་པ་དང་། དམངས་ཀྱི་དཀའ་ངལ་སེལ་བ། དམངས་ཀྱི་སེམས་ཁྲལ་སེལ་བ་བཅས་བྱས་ཏེ་མང་ཚོགས་ཀྱི་འཚོ་བའི་སྤུས་ཚད་མཐོ་རུ་བཏང་ཡོད།

མང་ཚོགས་ཀྱི་ངོ་གདོང་ནས་དགའ་བའི་འཛུམ་མདངས་འཕྱུར་བ།

དམངས་འཚོ་ལེགས་གཏོང་ལ་ཕན་འབྲས་མངོན་གསལ་དོད་པོ་ཐོབ་མིན་དེ་མང་ཚོགས་ཀྱི་འཛུམ་མདངས་ལས་མཐོང་ཐུབ། མང་ཚོགས་དངོས་འབྲེལ་བློ་ལ་འཆང་བ་དང་། མང་ཚོགས་ལ་ལྷག་བསམ་ཟོལ་མེད་ངང་ཞབས་འདེགས་ཞུ་བ། མང་ཚོགས་ལ་ལྷག་བསམ་རྣམ་དག་ངང་བརྟེན་པ་བཅས་བྱས་ནས་ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་སེམས་ནུས་ཡོད་རྒུས་དམངས་འཚོའི་ལས་དོན་ཡག་པོ་བསྒྲུབས་ཏེ་མང་ཚོགས་ཀྱི་སྐྱིད་སྣང་ཟབ་ཏུ་བཏང་ཡོད།

ཉེ་བའི་ལོ་ཤས་རིང་། བོད་ཀྱིས་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་བྱེད་པ་དེ་ཐོག་མཐའ་བར་གསུམ་དུ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགོ་འཛུགས་ས་དང་དོན་ལ་བབས་སར་བརྩི་བ་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས། “དམངས་འཚོའི་འདུ་འགོད་ཆེན་པོ་བཅུ”ལག་བསྟར་ཤུགས་ཆེན། ཞིང་འབྲོག་ཁུལ་དར་རྒྱས་དང་། ཞིང་འབྲོག་ལས་འཕེལ་རྒྱས་གཏོང་བ། ཞིང་འབྲོག་མང་ཚོགས་ཕྱུག་འགྱུར་བཅས་ཀྱི་ལས་དོན་སྔོན་ལ་འཇོག་པ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་བཅས་བྱས་ཏེ་གྲོང་གསེབ་དར་རྒྱས་ཀྱི་འཐབ་ཇུས་དང་འབྲེལ་མཐུད་ནུས་ལྡན་བྱས་ཡོད།

སྔོན་མ་ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཁྲོམ་གཞུང་གར་པ་གྲོང་ཚོར་རླུང་བུ་སྐབས་གང་སར་ཐལ་རྡུལ་གྱིས་ཁེངས་པ་དང་ཆར་པ་འབབ་སྐབས་གང་སར་འདམ་བག་གིས་ཁེངས་པ་མ་ཟད། གྲོང་ཚོའི་ཁོར་ཡུག་ཞན་པས་གྲོང་མི་ཚོའི་འཚོ་བའི་སྤུས་ཚད་ལ་ཤུགས་རྐྱེན་ཐེབས་ཡོད།

མི་དམངས་ལ་ཞབས་འདེགས་ཞུ་དགོས་ན། བྱེད་ཐབས་དངོས་འདོན་དགོས། 2022ལོར་ཁྱོན་མ་དངུལ་སྒོར་ཁྲི་4500བཏང་བའི་གར་པ་གྲོང་ཚོའི་གྲོང་གསེབ་དར་རྒྱས་ཀྱི་དཔེ་སྟོན་གྲོང་ཚོའི་རྣམ་གྲངས་དངོས་སུ་ལག་བསྟར་བྱས་ཤིང་། དེའི་ནང་དུ་སྨི་ངོས་གྲུ་ཁྲི་2.4ཡི་འགྲོ་ལམ་སྒྱུར་བཀོད་དང་། ཞིང་དུད་ཀྱི་གསང་སྤྱོད་སྒྱུར་བཀོད། གྲོང་ཚོའི་རྣམ་པ་ལེགས་གཏོང་། རྨང་གཞིའི་སྒྲིག་བཀོད་ཀྱི་ཞོར་གཏོགས་ལས་གྲྭ་གཞན་བཅས་ཚུད་ཡོད་ཅིང་། སྒྱུར་བཀོད་བྱས་རྗེས་གར་པ་གྲོང་ཚོའི་རྣམ་པ་གསར་རྐྱང་དུ་གྱུར་ཡོད།

“གུང་ཁྲན་ཏང་ལ་ཐུགས་རྗེ་ཆེ་ཞུ་རྒྱུ་ཡིན། ང་རྔ་ཆེན་རི་འདབས་ཀྱི་ཁང་པ་རྙིང་པ་ནས་ད་ཆ་ཆུ་གློག་དྲ་བ་བཅས་ཡོད་པའི་ཁང་པ་གསར་པར་སྤོས་པ་ཡིན། སྲིད་གཞུང་གི་རོགས་རམ་འོག་ང་ཚོའི་སྡོད་ཁང་གི་ཁོར་ཡུག་ལེགས་སུ་ཕྱིན་པ་དང་རིག་གནས་ཐང་ཆེན་ཡང་བསྐྲུན་ཡོད”ཅེས་ལོ་87ལ་སླེབས་པའི་གར་པ་གྲོང་ཚོའི་ཨ་མ་པད་སྒྲོན་གྱིས་སེམས་འགུལ་ཐེབས་བཞིན་བཤད།

སྤུས་ཚད་མཐོ་བའི་འཚོ་བར་བཅངས་པའི་མི་དམངས་མང་ཚོགས་ཀྱི་རེ་སྒུག་གསར་པ་ནི་དམངས་འཚོའི་ལས་དོན་འགན་ལེན་དང་ལེགས་སུ་གཏོང་བར་མུ་མཐུད་སྐུལ་འདེད་གཏོང་བའི་འགོ་འཛུགས་ས་གསར་པ་ཞིག་རེད། དམངས་འཚོ་འགན་ལེན་དང་ལེགས་སུ་གཏོང་བའི་བྱེད་ཐབས་གསར་པ་དང་མི་དམངས་ཀྱི་མཛེས་སྡུག་ལྡན་པའི་འཚོ་བ་གཏོད་པའི་བྱེད་ཐབས་གསར་པ་གངས་ལྗོངས་ས་མཐོར་ལག་བསྟར་བྱེད་བཞིན་ཡོད།