རྒྱ་ཆེའི་ཀློག་པ་པོའི་དགོས་མཁོ་སྐོང་ཆེད། ཟླ་7ཚེས་22ཉིན་ནས་བཟུང་། ལྷ་ས་གྲོང་ཁྱེར་དཔེ་མཛོད་ཁང་དངོས་སུ་སྒོ་ཕྱེ་བ་རེད། ལྷ་ས་གྲོང་ཁྱེར་དཔེ་མཛོད་ཁང་བསྐྲུན་པ་ལས་ལྷ་ས་གྲོང་ཁྱེར་གྱི་སྤྱི་པའི་རིག་གནས་ཞབས་ཞུའི་མ་ལག་འཛུགས་སྐྲུན་གྱི་སྟོང་ཆ་བསྐངས་ཡོད། 

ཤེས་རྟོགས་བྱུང་བར་གཞིགས་ན། ལྷ་ས་གྲོང་ཁྱེར་དཔེ་མཛོད་ཁང་ལ་ཁྱོན་ཐོག་བརྩེགས་དྲུག་ཡོད་པ་དང་དཔེ་དེབ་ཁྲི་30ལྷག་ཙམ་ཉར་ཚགས་བྱེད་ཆོག སྡོད་ས་2000ལྷག་ཙམ་ཡོད་པ་དེས་སྡེབ་གཅིག་ལ་མི་2000ལ་སྣེ་ལེན་ཞུ་ཐུབ་ཀྱི་ཡོད།

ལྷ་ས་གྲོང་ཁྱེར་དཔེ་མཛོད་ཁང་གི་ཐོག་བརྩེགས་དང་པོ་ནས་ལྔ་པ་བར་ཚང་མ་རིན་པ་མི་དགོས་པར་རྒྱ་ཆེའི་ཀློག་པ་པོར་སྒོ་ཕྱེ་ཡོད་པས། ཀློག་པ་པོས་ཐོབ་ཐང་ལག་ཁྱེར་སོགས་འབྲེལ་ཡོད་ལག་ཁྱེར་ལ་བརྟེན་ནས་དེབ་གཡར་ཆོག་པ་དང་། རྒྱ་ཡིག་དང་ཕྱི་རྒྱལ་སྐད་ཡིག་གི་དེབ་གཡར་སྐབས་གཏའ་མ་སྒོར་400འཇོག་དགོས་པ་ཕུད། དེ་བྱིངས་ཀྱི་དཔེ་དེབ་ཚང་མ་རིན་པ་མི་དགོས་པར་གཡར་ཆོག གཡར་ནས་ལྟ་བའི་དུས་ཡུན་ཉིན་30ཡིན་པ་དང་དུས་བཀག་གཙང་རྗེས་མུ་མཐུད་གཡར་ཆོག་གི་ཡོད། 

དཔེ་མཛོད་ཁང་གི་ཐོག་སོ་དང་པོར། ལོ་ཆུང་བྱིས་པའི་དཔེ་ཀློག་ཁང་དང་། ལོང་བའི་དཔེ་ཀློག་ཁང་། ཏང་འཛུགས་སྐྱོང་སྐོར་གྱི་དཔེ་ཀློག་ཁང་བཅས་དང་། ཐོག་སོ་གཉིས་པར། རྒྱ་ཡིག་དང་ཕྱི་རྒྱལ་སྐད་ཡིག་དཔེ་ཀློག་ཁང་དང་ནུས་མང་ཁང་། ཐོག་སོ་གསུམ་པར། དུས་དེབ་ལྟ་ཀློག་ཁང་། ཐོག་སོ་ལྔ་པར། རང་སྦྱོང་བྱེད་ས་བཅས་རེད། ཐོག་སོ་བཞི་པར་ཁྱད་ལྡན་ཆེད་དོན་འགྲེམས་ཁང་གཉིས་བཙུགས་ཡོད་དེ། སྤྱི་ཚོགས་ཚན་རིག་གི་ཆེད་དོན་འགྲེམས་ཁང་དང་རང་བྱུང་ཚན་རིག་གི་ཆེད་དོན་འགྲེམས་ཁང་རེད། འགྲེམས་ཁང་ནང་སྤོས་དང་། ཐང་ག རི་མོ་སོགས་མངོན་མིན་རིག་གནས་ཤུལ་བཞག་གི་ཐོན་རྫས་བཟོ་སྟངས་ཀྱི་སློབ་ཚན་བཀོད་སྒྲིག་བྱས་ཡོད་པ་མ་ཟད། ཆེད་ལས་དགེ་རྒན་གདན་དྲངས་ནས་སློབ་ཁྲིད་བྱ་རྒྱུ་དང་། རྒྱུན་དུ་ད་དུང་དམའ་རིམ་སློབ་འབྲིང་གི་དངོས་ཁམས་གཙོ་བོར་བྱས་ནས་སློབ་ཁྲིད་བྱ་རྒྱུ་ཡིན་པ་ཚང་མ་སྤྱི་ཕན་བྱེད་སྒོ་ཡིན་པ་རེད།