ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་གསལ། མཉམ་འབྲེལ་རྒྱལ་ཚོགས་ཀྱི་རྒྱུན་མཐུད་ཆོག་པའི་འཕེལ་རྒྱས་ཀྱི་རིམ་མཐོའི་ཆབ་སྲིད་གླེང་སྟེགས་ཀྱི་པུའུ་ཀྲང་རིམ་པའི་ཚོགས་འདུ་ཉེ་ཆར་ཉིའུ་གཡོད་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་འཚོགས་ཤིང་། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྐབས་དོན་བདུན་པའི་ཀྲུའུ་ཞི་ཁེ་ལེ་ཤིས་དང་། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུ་ཐེ་ལེ་སི། མཉམ་འབྲེལ་རྒྱལ་ཚོགས་དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱི་ཀྲུའུ་ཞི་ལཱ་ཆེ་ཀྲ་ལཱ·སི་ཐུའོ་ཡེ་ཝ་སོགས་འགོ་ཚུགས་མཛད་སྒོར་ཞུགས་པ་དང་སྦྲགས་ཤིས་ཚིག་ཀྱང་བསྒྲོན་པ་དང་། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་ཚབ་ཀྲང་ཅུན་སྤྱིར་བཏང་རང་བཞིན་གྱི་རྩོད་གླེང་ནང་ཞུགས་ནས་རྒྱལ་སྤྱིའི་སྤྱི་ཚོགས་ལ་ཐུན་མོང་ཐོག་བྱ་སྤྱོད་སྤེལ་ནས་མིའི་རིགས་ཀྱི་ལས་དབང་གཅིག་མཐུན་འདུས་གྲུབ་འཛུགས་པར་སྐུལ་འདེད་གཏོང་དགོས་པའི་འབོད་སྐུལ་བྱས་པ་རེད།

ཀྲང་ཅུན་གྱིས་བརྗོད་དོན། 2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་ཕྱེད་ཀ་ལྷག་ཙམ་དོན་འཁྱོལ་བྱས་ཚར་ཡང་སྤྱིའི་འཕེལ་རིམ་དང་སྔོན་དཔག་དམིགས་ཚད་དབར་ད་དུང་ཧེ་བག་ཆེན་པོ་ཡོད། རྒྱལ་ཁབ་ཁག་གིས་འཕེལ་རྒྱས་ཀྱི་གནད་དོན་དེ་རྒྱལ་སྤྱིའི་གྲོས་རིམ་གྱི་ལྟེ་བའི་གནས་བབ་ལ་བཞག་ཐོག་ཐོན་ཁུངས་མཐའ་དག་བཀོད་གཏོང་བྱས་ནས་མི་ཚང་མས་འཕེལ་རྒྱས་ལ་མཐོང་ཆེན་བྱེད་པ་དང་རྒྱལ་ཁབ་ཚང་མས་ཐུན་མོང་ཐོག་འཕེལ་རྒྱས་དོན་གཉེར་བྱེད་པའི་མཉམ་ཤུགས་ཆེན་པོ་ཆགས་པར་བྱེད་དགོས། འཕེལ་རྒྱས་ལ་ཕན་པའི་རྒྱལ་སྤྱིའི་ཁོར་ཡུག་ཧུར་ཐག་གཏོད་པ་དང་། སྒོ་དབྱེ་རྣམ་པའི་འཛམ་གླིང་དཔལ་འབྱོར་འཛུགས་པ། རྒྱལ་སྤྱིའི་དངུལ་རྩའི་མ་ལག་སྒྱུར་བཅོས་ལ་སྐུལ་འདེད་གཏོང་བ་བཅས་བྱས་ནས། རྒྱལ་ཁབ་ཁག་དང་ལྷག་པར་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་འཕེལ་རྒྱས་ཀྱི་གོ་སྐབས་དང་གྲུབ་འབྲས་འདྲ་མཉམ་ངང་ལོངས་སྤྱོད་ཐུབ་པའི་འགན་ལེན་བྱེད་དགོས།

ཀྲང་ཅུན་གྱིས་ནན་བཤད་བྱས་དོན། ཀྲུང་གོས་ཐོག་མཐའ་བར་གསུམ་དུ་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་དེ་རྒྱལ་ཁབ་འཕེལ་རྒྱས་འཆར་འགོད་དང་ཟུང་འབྲེལ་དམ་ཟབ་བྱས་ཐོག་དོན་འཁྱོལ་དམ་འཛིན་དང་། ཁས་ལེན་ལག་བསྟར། བྱ་སྤྱོད་སྤེལ་རྒྱུར་སྣང་ཆེན་བཅས་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་ཀྱི་ཡོད། ཀྲུང་གོས་འཕེལ་རྒྱུས་གཏོང་རྒྱུ་དེ་གནས་ལུགས་ཁུངས་བཙན་ཡིན་པ་དང་། ལྗང་མདོག་ཐཱན་ཉུང་གི་དཔལ་འབྱོར་འཕེལ་རྒྱས་གཏོང་བ། འཛམ་གླིང་དང་མཉམ་དུ་འཕེལ་རྒྱས་ཀྱི་གོ་སྐབས་མཉམ་སྤྱོད་བཅས་མཐའ་འཁྱོངས་བྱེད་ཀྱི་ཡོད། ཀྲུང་གོའི་འགོ་ཁྲིད་ཀྱིས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་གོ་ལ་ཧྲིལ་པོ་འཕེལ་རྒྱས་ཀྱི་གྲོས་འགོ་བཏོན་པ་ནི་རྒྱལ་ཁབ་ཁག་གིས་རྒྱུན་མཐུད་ཆོག་པའི་འཕེལ་རྒྱས་ཀྱི་དམིགས་ཚད་དོན་འཁྱོལ་མགྱོགས་པོ་ཡོང་བར་རྒྱབ་སྐྱོར་བྱ་ཆེད་ཡིན། ཀྲུང་གོ་ཕྱོགས་ཀྱིས་མཉམ་ལས་རོགས་ཟླ་སྔར་བས་མང་པོ“རྒྱུད་གཅིག་ལམ་གཅིག”མཉམ་སྐྲུན་དང་གོ་ལ་ཧྲིལ་པོ་འཕེལ་རྒྱས་ཀྱི་གྲོས་འགོའི་ནང་ཞུགས་ནས། ཀྲུང་གོའི་འཕེལ་རྒྱས་གསར་པ་ལས་བྱུང་བའི་གོ་སྐབས་གསར་པ་མཉམ་སྤྱོད་བྱ་རྒྱུའི་རེ་བ་བྱེད་ཀྱི་ཡོད།

ཀྲང་ཅུན་གྱིས་བསྟན་དོན། ཀྲུང་གོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་ཧ་ཅང་ཆེན་པོ་ཐོབ་ཡོད། ཡིན་ན་ཡང་དེ་དང་ཆབས་ཅིག་ཀྲུང་གོ་སྔར་བཞིན་འཕེལ་རྒྱས་འགྲོ་བཞིན་པའི་རྒྱལ་ཁབ་ཅིག་ཡིན་པ་དང་། འཕེལ་རྒྱས་དོ་མི་མཉམ་པ་དང་ཆ་མི་ཚང་བའི་གནད་དོན་སྔར་བཞིན་མངོན་གསལ་དོད་པོ་ཡོད་པ། ཀྲུང་གོའི་ལུགས་ཀྱི་དེང་རབས་ཅན་མངོན་འགྱུར་ཡོང་བར་ད་དུང་ཡུན་རིང་འབད་འཐབ་བྱེད་དགོས་པ་བཅས་ཀྱང་གསལ་པོ་རྟོགས་དགོས། རྒྱལ་སྤྱིའི་སྤྱི་ཚོགས་ཀྱིས་མཉམ་གྲོས་མཉམ་སྐྲུན་མཉམ་སྤྱོད་དང་མཉམ་ལས་གཉིས་ཕན་གྱི་སྙིང་སྟོབས་མཐའ་འཁྱོངས་བྱས་ཐོག་རྒྱུན་མཐུད་ཆོག་པའི་འཕེལ་རྒྱས་དམིགས་ཚད་ཀྱི་དབུ་ཚོགས་དང་། འབྱུང་འགྱུར་གྱི་དབུ་ཚོགས། མཉམ་འབྲེལ་རྒྱལ་ཚོགས་བཙུགས་ནས་ལོ་80འཁོར་བ་སོགས་ཀྱི་གོ་སྐབས་གལ་ཆེན་བེད་སྤྱོད་གང་ལེགས་བྱས་ནས། 2030ལོའི་གྲོས་རིམ་དེ་རེ་འདུན་ནས་དོན་དངོས་སུ་ཧུར་ཐག་བསྒྱུར་ཏེ་ཐུན་མོང་འཕེལ་རྒྱས་མངོན་འགྱུར་དང་ཐུན་མོང་གི་འབྱུང་འགྱུར་བཏོད་དེ། མིའི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་རྒྱུར་སྐུལ་འདེད་གཏོང་དགོས།