འདི་ནི་ཤུགས་འགྲེམས་མེ་འཁོར་CR450གྱི་ཚོད་ལྟའི་མེ་འཁོར་ཧའེ་ཝུའེ་ཕུག་ལམ་ནས་སྐྱོད་བཞིན་པ།

ཉེ་ཆར། ཀྲུང་གོའི་རབས་གསར་པའི་ཤུགས་འགྲེམས་མེ་འཁོར་―ཤུགས་འགྲེམས་མེ་འཁོར་CR450གྱི་འཁོར་སྐྱོད་མྱུར་ཚད་དེ་བས་མགྱོགས་པའི་སྐབས་ཀྱི་ལག་རྩལ་གསར་པའི་ལྷུ་ལག་གི་ནུས་པའི་ར་སྤྲོད་ཚོད་ལྟ་བྱས་པ་རེད། ཀྲུང་གོ་རྒྱལ་ཁབ་ལྕགས་ལམ་ཚོགས་པ་ཚད་ཡོད་ཀུང་སིས། ཚད་ལེན་ཚོད་ལྟ་བྱེད་རིང་། ལྷུ་ལག་གསར་པ་སྒྲིག་སྦྱོར་བྱས་པའི་ཚོད་ལྟའི་མེ་འཁོར་གྱི་འཁོར་སྐྱོད་མྱུར་ཚད་མགྱོགས་ཤོས་སྐབས་ཆུ་ཚོད་རེར་སྤྱི་ལེ་453ཟིན་པ་དང་། ཕུག་ལམ་ནང་གི་མེ་འཁོར་གྱི་འཁོར་སྐྱོད་མྱུར་ཚད་མགྱོགས་ཤོས་སྐབས་ཆུ་ཚོད་རེར་སྤྱི་ལེ་420ཟིན་ནས་ལག་རྩལ་གསར་པའི་ལྷུ་ལག་གི་ཚད་གཞི་ཁག་ཡག་པོ་བྱུང་བས་ཤུགས་འགྲེམས་མེ་འཁོར་གྱི་ཞིབ་འཇུག་ལ་འཕེལ་རྒྱས་གསར་པ་བྱུང་ཡོད་ཅེས་བསྟན་པ་རེད།

ད་ཐེངས་ཀྱི་ཚོད་ལྟ་ནི་ཀྲུང་གོ་ལྕགས་ལམ་ཚན་རིག་ཞིབ་འཇུག་ཁང་ཚོགས་པ་ཀུང་སི་དང་། ཀྲུང་གོ་ཀྲུང་ཁྲེའི་ཁོངས་གཏོགས་ཁེ་ལས། པེ་ཅིང་འགྲིམ་འགྲུལ་སློབ་ཆེན། ལྷོ་ནུབ་འགྲིམ་འགྲུལ་སློབ་ཆེན། ཀྲུང་ནན་སློབ་ཆེན་སོགས་ཀྱིས་མཉམ་དུ་ལག་བསྟར་བྱས་པ་རེད།

ཤུགས་འགྲེམས་མེ་འཁོར་CR450གྱིས་དེ་བས་མགྱོགས་པ་དང་། དེ་བས་བདེ་འཇགས། དེ་བས་ཁོར་ཡུག་སྲུང་སྐྱོང་། དེ་བས་ནུས་རྒྱུ་གྲོན་ཆུང་། དེ་བས་རིག་ནུས་ལྡན་པ་བཅས་ཡོང་བ་དམིགས་ཚད་དུ་བྱས་ཡོད། རྒྱལ་ཁབ་ལྕགས་ལམ་ཚོགས་པའི་འགན་འཁུར་བས། ལག་རྩལ་གསར་པ་སྤྱད་པ་དེས་མྱུར་བགྲོད་ལྕགས་ལམ་གྱི་བདེ་འཇགས་དང་། ནུས་པ། ནུས་རྒྱུ་ཟད་གྲོན། འཁྲུག་ཐེབས་ཚད། གཡོ་འགུལ། མགྱོགས་གཏོང་ནུས་པ། འཁོར་བཀག་གི་བརྟན་པོའི་རང་བཞིན་སོགས་ཀྱི་ཚད་གཞི་གལ་ཆེན་མཐོ་རུ་གཏོང་ཐུབ་ཅིང་། རབས་གསར་པའི་ཤུགས་འགྲེམས་མེ་འཁོར་གྱིས་འགྲོ་སྐྱོད་དེ་བས་མགྱོགས་པ་དང་བདེ་འཇགས་ཡོང་ཐུབ་ཅེས་བརྗོད།

—— སིང་ཀ་ཕོར་གྱི《མཉམ་འབྲེལ་ཞོགས་པའི་ཚགས་པར》ཐོག་སྤེལ་བའི་གནས་ཚུལ་གཞིར་བཟུང་།