ཀྲུང་གོའི་ཁྲོམ་ར་ནས་འཕེལ་རྒྱས་ཀྱི་མི་མངོན་པའི་སྟོབས་ཤུགས་དང་སྒུལ་ཤུགས་ཟམ་མི་ཆད་པར་མངོན་པ།
—— སོ་ཏི་ཨ་རབ་ཀྱི་ཨ་ཅི་ལན་གཅེན་གཅུང་མ་རྐང་ཚོད་འཛིན་ཚོགས་པའི་ཏུང་ཧྲི་ཀྲང་གཞོན་པ་ཨ་ཅི་ལན་ལ་བཅར་འདྲི་བྱས་པ།
སོ་ཏི་ཨ་རབ་དང་ཀྲུང་གོའི་ཚོང་དོན་ལས་འཛིན་ལྷན་ཚོགས་ཀྱི་ཀྲུའུ་ཞི་སོ་ཏི་ཨ་རབ་ཀྱི་ཨ་ཅི་ལན་གཅེན་གཅུང་མ་རྐང་ཚོད་འཛིན་ཚོགས་པའི་ཏུང་ཀྲི་ཀྲང་གཞོན་པ་མུའུ་ཧན་མོ་ཏེ·ཨེར·ཨ་ཅི་ལན་གྱིས་ཉེ་དུས་ཤིན་ཧྭ་གསར་འགྱུར་ཁང་གི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས། ཀྲུང་གོའི་ཁྲོམ་རར་གོ་སྐབས་ཆེན་པོ་ལྡན་པས་འཕེལ་རྒྱས་མགྱོགས་པའི་མི་མངོན་པའི་སྟོབས་ཤུགས་ཟམ་མི་ཆད་པར་མངོན་ནས་འཛམ་གླིང་གི་དཔལ་འབྱོར་འཕེལ་རྒྱས་དང་མཉམ་འདྲེས་ཐུབ་རྒྱུ་རེད་ཅེས་བརྗོད།
ཨ་ཅི་ལན་གྱིས་ཀྲུང་གོའི་ཕྱི་ཕྱོགས་སྒོ་དབྱེའི་སྲིད་ཇུས་ལ་བསྔགས་བརྗོད་ཆེན་པོ་བྱེད་ཅིང་། ཁོང་གིས་ཀྲུང་གོའི་དཔལ་འབྱོར་འཕེལ་རྒྱས་དེ་འཛམ་གླིང་གི་དཔལ་འབྱོར་འཕེལ་རྒྱས་དང་ཁ་འབྲལ་ཐབས་མེད་པས། ཀྲུང་གོས་ཆུ་ཚད་མཐོ་བའི“ནང་དུ་འདྲེན་པ”དང“ཕྱིར་བསྐྱོད་རྒྱུ”རྒྱུན་འཁྱོངས་བྱས་པ་དེས་ཀྲུང་གོའི་དཔལ་འབྱོར་འཕེལ་རྒྱས་ལ་སྒུལ་ཤུགས་ཆེན་པོ་སྦྱིན་ཡོད་ཅེས་བརྗོད།
ཨ་ཅི་ལན་གྱིས། ཀྲུང་གོས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བའི་ཐད་དངོས་སྒྲུབ་ཀྱི་བྱ་ཐབས་བཏོན་པས་རྒྱལ་སྤྱིའི་མཉམ་ལས་ཟབ་ཏུ་ཕྱིན་ཡོད། ལོ་བཅུ་ཕྲག་རིང་འཕེལ་རྒྱས་ཕྱིན་པ་བརྒྱུད་ཀྲུང་གོའི་དཔལ་འབྱོར་འདི་འཕར་ཚད་མགྱོགས་པའི་དུས་མཚམས་ནས་སྤུས་ཚད་མཐོ་བའི་འཕེལ་རྒྱས་ཀྱི་དུས་མཚམས་སུ་བསྒྱུར་བ་དང་། དེ་འདྲའི་འགྱུར་ལྡོག་ལས་ཀྲུང་གོའི་དུས་ཡུན་རིང་པོའི་འཕེལ་རྒྱས་ལ་བསམ་གཞིག་བྱེད་པ་དང་འཆར་གཞི་འགོད་པ་མངོན་ཡོད་ཅེས་བརྗོད།
ཨ་ཅི་ལན་གྱིས། 5Gདང་། ནུས་རྒྱུ་གསར་པ། མི་ཐབས་རིག་ནུས་སོགས་ཀྱི་ཁྱབ་ཁྱོངས་ཐད་ཀྲུང་གོའི་ཁེ་ལས་ལ་འགྲན་རྩོད་ནུས་པ་ཆེན་པོ་དང་མདུན་གྲལ་དུ་སྐྱོད་པའི་ཐོབ་ཐང་ལྡན་པ་ཀུན་གྱི་མཐོང་ཆོས་སུ་གྱུར་ཡོད། གསར་གཏོད་སྒུལ་ཤུགས་སུ་བྱེད་པའི་ཚན་རྩལ་གྲུབ་འབྲས་ཀྱིས་ཀྲུང་གོའི་དམངས་ཚོགས་ཀྱི་འཚོ་བའི་ཆུ་ཚོད་མཐོ་རུ་གཏོང་བ་དང་ཆབས་ཅིག་རྒྱལ་ཁབ་གཞན་དང་མཉམ་ལས་བྱ་རྒྱུར་ཡང་གོ་སྐབས་སྦྱིན་ནས་འཛམ་གླིང་གི་རྒྱལ་ཁབ་ཁག་མཉམ་དུ་དར་རྒྱས་དང་ཡར་རྒྱས་ཡོང་བར་རམ་འདེགས་ཐུབ་ཡོད་ཅེས་བརྗོད།
ཨ་ཅི་ལན་གྱིས“ང་ཚོས་ཀྲུང་གོའི་དཔལ་འབྱོར་ལ་སྤུས་ཚད་མཐོ་བའི་འཕེལ་རྒྱས་ཀྱི་མདུན་ལམ་ཆེན་པོ་ལྡན་པ་མཐོང་བྱུང་། ལོ་དེ་དག་རིང་། ཀྲུང་གོའི་དཔལ་འབྱོར་འཕེལ་རྒྱས་བྱུང་བ་སྐྱེ་བོ་ཀུན་གྱིས་མིག་མཐོང་ལག་ཟིན་ཐུབ་པ་ཞིག་རེད། ཀྲུང་གོས་བརྟན་ལ་དྲང་གཞག་དང་། ཕྱི་གསལ་ནང་གསལ་གྱི་ཚོང་གཉེར་ཁོར་ཡུག་ཅིག་ཧུར་ཐག་བཏོད་པས་འཛམ་གླིང་ལ་ཀྲུང་གོས་སྒོ་མོ་འབྱེད་རྒྱ་རྒྱུན་ཆད་མེད་པར་ཆེ་རུ་གཏོང་བའི་ཆོད་སེམས་མངོན་ཡོད། སོ་ཏི་ཨ་རབ་ཀྱི་ཁེ་ལས་ཤིག་གི་ངོས་ནས་ང་ཚོས་ཀྲུང་གོའི་དཔལ་འབྱོར་གྱི་གཞི་རྩ་ཡུན་རིང་ལེགས་པའི་ཕྱོགས་སུ་འཕེལ་རྒྱས་འགྲོ་ཚུལ་ལ་ཡིད་ཆེས་བརྟན་པོ་ཡོད”ཅེས་བརྗོད།
(ཤིན་ཧྭ་གསར་འགྱུར་ཁང་རི་ཡ་ཏེ་ནས་འབྱོར་པའི་གློག་འཕྲིན་གཞིར་བཟུང)