ཤིན་ཧྭ་གསར་འགྱུར་ཁང་གི་གསར་འགོད་པ། ཞུའེ་ཡུས་པིན་དང་། ལི་ལིན་ཧའེ། ཝང་ཅིན་ཅིན།

ལོ་ལྟར་གཙོད་མ་ཁྲི་3ལྷག་ཙམ་མཚོ་སྔོན་གཙང་གསུམ་ཆུ་འགོ་དང་། བོད་བྱང་ཐང་། ཤིན་ཅང་ཨའར་ཅིན་ཧྲན་རི་བོ་སོགས་ནས་རྩོ་ནག་མཚོར་གཙོད་ཕྲུག་བཙའ་བར་ཡོང་གི་ཡོད།

གཙོད་ནི་བློ་ཁོག་ཆུང་ཞིང་ལྷག་པར་དུ་གནས་སྤོ་སྐབས་ཉེ་འཁོར་གྱི་མིའི་རིགས་ཀྱི་འགུལ་སྐྱོད་དང་རང་བྱུང་གི་དགྲ་ཡར་དོགས་ཟོན་ཆེན་པོ་བྱེད་ཀྱི་ཡོད། མཚོ་བོད་ལྕགས་ལམ་ཇུས་འགོད་བྱེད་པའི་ཐོག་མའི་དུས་སུ་གཙོད་གནས་སྤོའི་བགྲོད་ལམ་ལ་བསམ་གཞིག་བྱས་པས། མེ་འཁོར་ཤར་གཏོང་ཐུབ་ཚུན་གཙོད་སྔར་བཞིན་བག་ཕེབས་ངང་འཚོ་སྡོད་ཐུབ་ནས་འགྲུལ་པར་ཡང་རི་དྭགས་་གནས་སྤོའི་ངོ་མཚར་ལ་ལྟད་མོ་ལྟ་རྒྱུ་བྱུང་ཡོད།

དུས་རབས་20པའི་ལོ་རབས་80པའི་སྐབས“ཧྲ་ཐུའུ་ཧྲེ”ཞེས་པའི་རིན་གོང་མཐོ་བའི་སྟོད་ལྷེ་ཞིག་ཡོ་རོབ་དང་ཨ་མེ་རི་ཁ་གླིང་གི་ཁྲོམ་རར་བྲིན་ཁ་རྒྱུག་པ་དང་དེའི་རྒྱུ་ཆ་ནི་གཙོད་ཀྱི་ཁུ་ལུ་རེད། ལྐོག་རྔོན་པ་མང་པོ་ཞིག་གིས་བཀག་རྒྱར་མ་འཛེམས་པར་ཁུ་ཁུ་ཤིས་རིར་སོང་ནས་གཙོད་གསོད་ཀྱི་ཡོད།

ཁུ་ཁུ་ཤིས་རིའི་སྐྱེ་ཁམས་ཀྱི་ཉམས་ཉེན་སེལ་ཆེད། སྐབས་དེ་དུས་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཀྲོའུ་འབྲི་སྟོད་རྫོང་ཨུད་ཀྱི་ཧྲུའུ་ཅི་གཞོན་པའི་འགན་བཞེས་པའི་བསོད་ནམས་དར་རྒྱས་ཀྱིས་ལྐོག་རྔོན་རྒྱག་མཁན་དང་ཤི་གསོན་འཐབ་རྩོད་བྱས་ཏེ་ཁྲིམས་འགལ་ངང་མེ་མདའ་ཁྱེར་བའི་ལྐོག་རྔོན་ཚོགས་པ་བཟུང་བ་རེད།

འོན་ཀྱང་1994ལོའི་ཟླ་1ཚེས་18ཉིན་བསོད་ནམས་དར་རྒྱས་དང་རུ་མི་4ཡིས་ལྐོག་རྔོན་པ་ལྟ་སྐྱེལ་བྱེད་པའི་ལམ་བར་དུ་འཇབ་རྒོལ་ཕོག་པ་རེད། མི་རྣམས་ལ་ཁོང་རྙེད་སྐབས། ཁོང་ཁ་སྦུབ་ཏུ་འགྱེལ་བ། ལག་གཡས་པར་མེ་མདའ་འཁྱེར་བ་དང་ལག་གཡོན་མས་མེ་མདའི་སྤོར་ཏོག་དཀྲོག་བཞིན་མིག་གཉིས་ལྡིར་ལྡིར་ངང་ནས་སྔ་ས་ནས་གངས་རླུང་ཁྲོད་དུ་འཁྱགས་བརྐོས་ཤིག་ཏུ་གྱུར། དཔའ་བོ་ཁོང་ལ་དྲན་གསོ་ཞུ་ཆེད་མི་རྣམས་ཀྱིས་ཁུ་ཁུ་ཤིས་རིར་གཙོད་སྲུང་སྐྱོང་ས་ཚིགས་ཐོག་མ་དེ་བཙུགས་པ་མ་ཟད། ཁོང་གི་མིང་ཐོག་ནས་ས་ཚོགས་ལ་མིང་བཏགས་པ་རེད།

ད་ཆ་ཉམས་ཞན་གྱི་ས་གཙང་དེར་མེ་མདའི་སྒྲ་ཐོས་རྒྱུ་མེད་པ་དང་གཙོད་ཀྱི་གྲངས་འབོར་དུས་རབས་20པའི་ལོ་རབས་80པའི་དུས་མཇུག་ཏུ་ཁྲི་2མ་ཟིན་པ་ནས་ཁྲི་7ལྷག་ཙམ་བར་མང་དུ་ཕྱིན་ཡོད། ཁུ་ཁུ་ཤིས་རིའི་རང་བྱུང་སྲུང་སྐྱོང་ཁུལ་གྱི་རི་སྐོར་རུ་ཁག་ཁག་དང་པོའི་རུ་མི་ལུའོ་ཡན་ཧའེ་ཡིས་འདས་དོན་ལ་ཕྱིར་དྲན་བྱེད་བཞིན་སྐྱོ་གདུང་ཚད་མེད་སྐྱེས།

1996ལོར་མཚོ་སྔོན་ཞིང་ཆེན་གྱིས་ཁུ་ཁུ་ཤིས་རིའི་ཞིང་ཆེན་རིམ་པའི་རང་བྱུང་སྲུང་སྐྱོང་ཁུལ་བཙུགས་པ་རེད།

1997ལོར་རྒྱལ་སྲིད་སྤྱི་ཁྱབ་ཁང་གིས་ཁུ་ཁུ་ཤིས་རི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ཡིན་པའི་ཁྱབ་བསྒྲགས་བྱས་པ་རེད།

2016ལོར་ཀྲུང་གོའི་རྒྱལ་ཁབ་སྤྱི་གླིང་གི་སྒྲིག་སྲོལ་ཚོད་ལྟ་ལག་བསྟར་བྱ་ཡུལ་གཙང་གསུམ་ཆུ་འགོ་རྒྱལ་ཁབ་སྤྱི་གླིང་ཐོག་མ་དེ་དངོས་སུ་བཙུགས་པ་དང་ཁུ་ཁུ་ཤིས་རི་དེའི་ནང་ཚུད་པ་རེད།

2017ལོར་ཁུ་ཁུ་ཤིས་རི་མཚོ་བོད་ས་མཐོའི་འཛམ་གླིང་གི་རང་བྱུང་ཤུལ་བཞག་ཁུལ་དང་པོར་གྱུར།

2021ལོར་རང་རྒྱལ་གྱི་ཁག་དང་པོ་དང་ཨང་དང་པོ་ཡིན་པའི་གཞི་ཁྱོན་ཆེ་ཤོས་དང་འཛམ་གླིང་གི་ས་བབ་མཐོ་ཤོས་ཀྱི་རྒྱལ་ཁབ་སྤྱི་གླིང་སྟེ། གཙང་གསུམ་ཆུ་འགོ་རྒྱལ་ཁབ་སྤྱི་གླིང་དངོས་སུ་བཙུགས་པ་རེད།

“ཁུ་ཁུ་ཤིས་རིའི་གནས་ས་གསར་དུ་བརྗེས་ཟིན”ཞེས་གཙང་གསུམ་ཆུ་འགོ་རྒྱལ་ཁབ་སྤྱི་གླིང་དོ་དམ་ཅུས་ཀྱི་ཅུས་ཀྲང་འབྲི་ཆུའི་ཆུ་འགོ་ཁུལ་ཁུ་ཁུ་ཤིས་རི་དོ་དམ་ཁྲུའི་ཀྲུའུ་རེན་པུ་འབྲུག་གིས་བཤད།

ཁུ་ཁུ་ཤིས་རི་དོ་དམ་ཁྲུའུ་རྩོ་ནག་མཚོ་སྲུང་སྐྱོང་ས་ཚིགས་ཀྱི་ཀྲན་ཀྲང་གཞོན་པ་ཀུའོ་ཞུའེ་ཧུའུ་ཡིས་ལོ་18རིང་དེར་བརྟན་སྲུང་བྱས་པ་རེད།

ས་བབ་མཐོ་ཚད་སྨི་4800ལྷག་ཙམ་ཡོད་པའི་རྩོ་ནག་མཚོ་ནི་གཙོད་འཚོ་གནས་ཁུལ་ཆེན་པོ་ཞིག་ཡིན་ལ་ལྐོག་རྔོན་མང་ཤོས་རྒྱག་ས་ཞིག་ཀྱང་རེད། བསོད་ནམས་དར་རྒྱས་གྲོངས་རྗེས་ས་གནས་དེས་རྩོ་ནག་མཚོའི་འགྲམ་དུ་དུས་ཚིགས་རང་བཞིན་གྱི་སྲུང་སྐྱོང་ས་ཚིགས་ཐོག་མ་དེ་བཙུགས་པ་རེད།

ཁུ་ཁུ་ཤིས་རི་རང་བྱུང་སྲུང་སྐྱོང་ཁུལ་བཙུགས་པ་ནས་བཟུང་སྔ་རྗེས་སུ་སྲུང་སྐྱོང་ས་ཚིགས་6བཙུགས་ཡོད། ལས་དོན་པ་ཁག་བགོས་བྱས་ཏེ་ས་ཚིགས་སུ་རེས་མོས་ཀྱིས་བཅའ་སྡོད་བྱེད་པ་ཕུད། ད་དུང་དུས་ངེས་མེད་དུ་ལྟེ་བའི་ཁུལ་དུ་བསྐྱོད་ཀྱི་ཡོད། ཉིན་གསུམ་ནང་གཞི་ཁྱོན་ཆུང་བའི་སྐོར་ཞིབ་ཐེངས་རེ་དང་ཟླ་རེར་གཞི་ཁྱོན་ཆེ་བའི་སྐོར་ཞིབ་ཉུང་མཐར་ཡང་ཐེངས་རེ་བྱེད་ཀྱི་ཡོད་ཅིང་། གངས་རླུང་ལ་མི་འཛེམས་ལ་ལོ་ཧྲིལ་པོར་ངལ་གསོ་ཉིན་གཅིག་ཀྱང་མེད།

ཉིན་ནས་ཟླ་དང་ཟླ་ནས་ལོ་བཟུང་དེ་སྤྱི་ཚོགས་ལས་རིགས་ཁག་གི་གཅེས་སེམས་རྒྱབ་སྐྱོར་འོག ས་རྒྱ་མུའུ་550ཟིན་པའི་གཙོད་ཕྲུག་བཙའ་ཁུལ་བཙུགས་པ་རེད། 2002ལོ་ནས་ད་བར་དེར་གཙོད་ཕྲུག་50ལྷག་ཙམ་སྐྱེས་པ་དང་སླར་ཡང་རང་བྱུང་ཁམས་སུ་གློད་པ་རེད།

གཙང་གསུམ་ཆུ་འགོ་རྒྱལ་ཁབ་སྤྱི་གླིང་དོ་དམ་ཅུས་ཀྱི་ཅུས་ཀྲང་གཞོན་པ་སུན་ལི་ཅུན་གྱིས། ཚན་རྩལ་གྱི་བྱ་ཐབས་ཇི་ཙམ་དར་རྒྱས་ཆེ་ཡང་དུས་ཐུང་ནང་མི་ཤུགས་ཀྱི་སྐོར་ཞིབ་ནུས་པའི་ཚབ་བྱེད་མི་ཐུབ། གང་ལགས་ཤེ་ན། ཁུ་ཁུ་ཤིས་རིའི་ས་དབྱིབས་དམིགས་བསལ་ཆེ་བ་དང་སྐྱེ་ཁམས་ཀྱི་རིན་ཐང་ཧ་ཅང་རྩ་ཆེན་པོ་ཡིན་ཞེས་བཤད།

2017ལོའི་ཟླ་9པར་སྨུག་པ་ལ་སྒང་སྲུང་སྐྱོང་ས་ཚིགས་ཀྱི་ཉེ་འཁོར་དུ་སྐོར་ཞིབ་བྱེད་བཞིན་པའི་ཏེང་ཧའེ་ཕིང་གིས་རྨས་སྐྱོན་ཕོག་པའི་གཙོད་ཅིག་མཚོ་བོད་གཞུང་ལམ་སྒྲོལ་རྩིས་བྱེད་པ་མཐོང་ནས་གཞུང་ལམ་དུ་གཙོད་ཕྲུག་སྐྱོབ་པར་བསྐྱོད་པས་མཐར་འཇིབ་ཆུང་གཉིས་ཀྱིས་བརྡུངས་ཏེ་མཇིང་པར་རྨས་སྐྱོན་ཚབས་ཆེན་ཕོག་པ་དང་མཛུབ་མོར་ཆག་སྐྱོན་བྱུང་བ་རེད།

གཙོད་གཅིག་གི་ཆེད་དུ་དེ་ལྟར་བྱེད་རིན་ཡོད་དམ། དེའི་ཐད་ཏེང་ཧའེ་ཕིང་འགྱོད་པ་སྤུ་ཙམ་ཡང་སྐྱེ་མྱོང་མེད། “གལ་ཏེ་སླར་ཡང་གནས་ཚུལ་དེ་རིགས་འཕྲད་ཚེ་ངས་སྔར་བཞིན་སྐྱོབ་པར་འགྲོ་ངེས་ཡིན”ཞེས་ཁོང་གིས་བཤད།

ཉེ་བའི་ལོ་ཤས་རིང་། སྐྱེ་ཁམས་ཤེས་དཔལ་འཛུགས་སྐྱོང་གི་འདུ་ཤེས་མི་སེམས་ལ་གཏིང་ཟབ་ཟུག་པ་དང་བསྟུན་ནས་ཁུ་ཁུ་ཤིས་རིར་སྤྱི་ཚོགས་ཀྱི་དོ་ཁུར་དེ་བས་མང་བ་ཐོབ་ཡོད། རི་སྐྱེས་སྲོག་ཆགས་རོགས་སྐྱོབ་ལྟེ་གནས་གཅིག་རྗེས་གཉིས་མཐུད་ངང་བཙུགས་པ་དང་སྲུང་སྐྱོང་བྱ་སྤྱོད་ལ་ཞུགས་མཁན་ཡང་ཇེ་མང་དུ་འགྲོ་བཞིན་ཡོད།

“པའེ་ལིང་། མགྱོགས་པོ་ཤོག་དང”ཞེས་འབོད་མ་ཐག་ལོ་གཅིག་ལ་སླེབས་པའི་གཙོད་ཕྲུག་དེས་སྐོར་སྲུང་བ་བཀྲ་ཤིས་བསམ་གྲུབ་ཀྱི་འགྲམ་དུ་རྒྱུག་འོངས།

“ང་ཚོ་ནི་གཙོད་ཕྲུག་དེ་དག་གི་པ་ཕ་ཡིན”གཉེན་སྒྲིག་བྱས་མེད་པའི་90ནང་སྐྱེས་ཀྱི་གཞོན་ནུ་བཀྲ་ཤིས་བསམ་གྲུབ་ཀྱིས་གཙོད་ཀྱི་མགོ་ལ་བྱིལ་བྱིལ་བྱེད་ཀྱིན་གད་མོ་དགོད་བཞིན་དུ་དེ་ལྟར་བཤད།

རླངས་འཁོར་བཏང་ནས་སླར་ཡང་རི་སྐོར་རྒྱག་འགོ་ཚུགས། རུ་མི་ཚོས་རང་ཉིད་ཀྱི་འཚོ་བའི་མཁོ་ཆས་ཉུང་ཉུང་ཞིག་ལས་མ་འཁྱེར་བར་གཙོད་ཕྲུག་ལ་སྟེར་བྱེད་ཀྱི་འོ་མ་སྒམ་20འཐོལ་པ་བླུགས་པ་རེད།

“འོ་མ་འདི་དག་ནི་གཙོད་ཀྱི་ཨ་མ་དང་ཡ་ཐོར་བའི་གཙོད་ཕྲུག་ལ་གྲ་སྒྲིག་བྱས་པ་ཞིག་རེད”གཙོད་ཕྲུག་ཇི་ལྟར་གསོ་བའི་སྐོར་གླེང་རིམ་བཞིན་བཀྲ་ཤིས་བསམ་གྲུབ་དགའ་སྤྲོ་རབ་ཏུ་འཕེལ་ཞིང་། ཆེད་སྤྱོད་འཇིབ་རུ་བེད་སྤྱོད་ཇི་ལྟར་གཏོང་བ་ནས་འོ་མའི་ཚ་གྲང་ཇི་ལྟར་ལྟ་བའི་བར་དང་གཙོད་ཕྲུག་གི་རིལ་མར་ལྟ་ཞིབ་ཇི་ལྟར་བྱེད་པའི་བར་ཁོང་ལ་མྱོང་བ་ཤིན་ཏུ་ཟབ།

ཉིན་མཚན་ཀུན་ཏུ་གངས་ཁྲོད་དུ་སྐྱོད་དགོས་ཤིང་། སྐོར་སྲུང་བ་60ལྷག་ཙམ་དུས་དང་རྣམ་པ་ཀུན་ཏུ་རྡོག་ཐོན་བྱ་རྒྱུའི་གྲ་སྒྲིག་བྱེད་བཞིན་ཡོད། “ཁུ་ཁུ་ཤིས་རིར་མི་ཚང་མ་ནུས་མེད་ཉམས་ཞན་ལྟར་དུ་སྣང་མོད། འོན་ཀྱང་ཁོང་ཚོའི་ཕུགས་འདུན་ནི་གནས་འདིའི་ནམ་མཁའ་ལ་ཡངས”ཞེས་པུ་འབྲུག་གིས་བཤད།

འདི་ནི་ཁུ་ཁུ་ཤིས་རིའི་རྩོ་ནག་མཚོའི་ཟུར་ཞིག་ཡིན་པ།

འདི་ནི་ཁུ་ཁུ་ཤིས་རིའི་དོ་དམ་ཁྲུའུ་རྩོ་ནག་མཚོའི་སྲུང་སྐྱོང་ས་ཚིགས་ཀྱི་སྐོར་སྲུང་བ་དཀོན་མཆོག་བློ་གྲོས་དང་། སྐར་མ་འཕྲིན་ལས། ཀུའོ་ཞུའེ་ཧུའུ། ཚེ་བསོད་རྒྱལ། ཀུན་བཟང་རྡོ་རྗེ། སྐར་མ་འཕྲིན་ལས་བཅས（གཡོན་ནས་གཡས་བར）ཀྱིས་ཁུ་ཁུ་ཤིས་རིའི་རྩོ་ནག་མཚོའི་སྲུང་སྐྱོང་ས་ཚིགས་ཀྱི་ལམ་བར་དུ་བརྒྱབ་པའི་པར་ཡིན་པ（ཟླ་6ཚེས་16ཉིན་པར་བླངས།）

འདི་ནི་ཁུ་ཁུ་ཤིས་རིར་གཙོད་མ་ཁྱུ་གཅིག་མཚོ་བོད་གཞུང་ལམ་སྒྲོལ་བཞིན་པ（ཟླ་5ཚེས་29ཉིན་པར་བླངས།）

འདི་ནི་ཁུ་ཁུ་ཤིས་རིའི་རྩོ་ནག་མཚོའི་ཁྱབ་ཁོངས་སུ་གཙོད་གཉིས་རྒྱུག་བཞིན་པ།

འདི་ནི་དཔའ་བོ་བསོད་རྣམས་དར་རྒྱས་ཀྱི་དྲན་གསོའི་རྡོ་རིང་ཡིན་པ།

འདི་ནི་ཁུ་ཁུ་ཤིས་རི་དོ་དམ་ཁྲུའུ་རྩོ་ནག་མཚོའི་སྲུང་སྐྱོང་ས་ཚིགས་ཀྱི་སྐོར་སྲུང་བ་སྐར་མ་བཀྲ་ཤིས་རི་སྐོར་རྒྱག་བཞིན་པ（ཟླ་6ཚེས་17ཉིན་པར་བླངས།）

འདི་ནི་ཁུ་ཁུ་ཤིས་རི་དོ་དམ་ཁྲུའུ་བསོད་ནམས་དར་རྒྱས་སྲུང་སྐྱོང་ས་ཚིགས་ཀྱི་རུ་མི་ཚེ་དབང་རྡོ་རྗེས་ཁོང་ཚོས་བསྐྱབས་པའི་གཙོད་ཀྱི་ལུས་པོའི་གནས་ཚུལ་ལ་ལྟ་བཞིན་པ།

འདི་ནི་ཁུ་ཁུ་ཤིས་རི་དོ་དམ་ཁྲུའུ་རྩོ་ནག་མཚོའི་སྲུང་སྐྱོང་ས་ཚིགས་ཀྱི་ཀྲན་ཀྲང་གཞོན་པ་ཀུའོ་ཞུའེ་ཧུའུ་ཡིན་པ（ཟླ་6ཚེས་17ཉིན་པར་བླངས།）