ཚེས་20ཉིན། ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཨ་རིའི་ཙུང་ཐུང་གི་གནམ་གཤིས་གནད་དོན་གྱི་ཆེད་བསྐོས་ཕོ་ཉ་ཁེ་ལི་ཀྲུང་གོར་འཚམས་འདྲི་བྱེད་པའི་འབྲེལ་ཡོད་གནས་ཚུལ་ཐད་གསར་འགོད་པའི་དྲི་བར་ལན་རྒྱག་སྐབས། ཀྲུང་གོ་ནི་སྐྱེ་ཁམས་ཤེས་དཔལ་གྱི་ལག་ལེན་པ་དང་གནམ་གཤིས་བཅོས་སྐྱོང་གི་བྱ་སྤྱོད་པ་ཞིག་ཡིན་ལ། གོ་ལ་ཧྲིལ་པོའི་ཁོར་ཡུག་བཅོས་སྐྱོང་གི་སྣེ་ཁྲིད་མཁན་ཞིག་ཀྱང་རེད། ཀྲུང་གོས་སྐྱེ་ཁམས་ཤེས་དཔལ་འཛུགས་སྐྱོང་ལ་མུ་མཐུད་ཤུགས་སྣོན་བརྒྱབ་སྟེ་རྒྱལ་ཁབ་ཁག་དང་ལག་གདང་སྦྲེལ་ནས་དྭངས་གཙང་དང་མཛེས་སྡུག་ལྡན་པའི་འཛམ་གླིང་བསྐྲུན་རྒྱུ་རེད་ཅེས་བརྗོད།

ཉིན་དེའི་གསར་འགོད་པའི་འཆར་ཅན་ཚོགས་འདུའི་ཐོག གསར་འགོད་པ་ཞིག་གིས། ཚེས་19ཉིན་ཨ་རིའི་ཙུང་ཐུང་གི་གནམ་གཤིས་གནད་དོན་གྱི་ཆེད་བསྐོས་ཕོ་ཉ་ཁེ་ལི་ཡིས་བརྡ་གཏོང་ཚོགས་འདུ་འཚོགས་ནས། ངས་ཀྲུང་གོ་ཕྱོགས་དང་མཐུན་འགྲིག་ཕན་འབྲས་ལྡན་པའི་གྲོས་མོལ་བྱས་པ་ཡིན། འབྱུང་འགྱུར་གཟའ་འཁོར་ཁ་ཤས་ནང་ཨ་ཀྲུང་མཉམ་ལས་དམ་ཟབ་བྱས་ཏེ《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་བརྒྱད་པའི(COP28)གྲོས་མོལ་གལ་ཆེན་ལ་གྲ་སྒྲིག་བྱེད་ཀྱི་ཡོད་ཅེས་བརྗོད་ཡོད། མགྲིན་ཚབ་པས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས་པར།

མའོ་ཉིང་གིས། གནམ་གཤིས་འགྱུར་ལྡོག་ནི་གོ་ལ་ཧྲིལ་པོའི་འགྲན་སློང་ཞིག་ཡིན་པས་རྒྱལ་ཁབ་ཁག་གིས་ལག་གདང་སྦྲེལ་ནས་ཁ་གཏད་གཅོག་དགོས་ངེས་རེད། ཀྲུང་གོ་ནི་སྐྱེ་ཁམས་ཤེས་དཔལ་གྱི་ལག་ལེན་པ་ཞིག་དང་གནམ་གཤིས་བཅོས་སྐྱོང་གི་བྱ་སྤྱོད་པ་ཞིག་རེད། ཀྲུང་གོས་དུས་རབས་འདི་ཚུན་དུ་གོ་ལ་ཧྲིལ་པོར་སྔོ་འགྱུར་རྒྱ་ཁྱོན་25%ལེགས་སྐྱེས་ཕུལ་ནས་གོ་ལ་ཧྲིལ་པོ་ནས་སྔོན་ལ་ས་ཞིང་ཞན་འགྱུར“མི་འཕར་བ”དང་། ཐང་རྒོད་ཅན་དང་བྱེ་འགྱུར་ས་ཆའི་རྒྱ་ཁྱོན“ཉུང་གཏོང་གཉིས” ནགས་ཚལ་ཁྱབ་ཚད་དང་ནགས་ཚལ་གསོག་ཚད“འཕར་བ་གཉིས”བཅས་མངོན་འགྱུར་བྱུང་ཡོད། ཀྲུང་གོས་འཛམ་གླིང་ཐོག་གི་ནུས་རྒྱུ་གཙང་མའི་གློག་འདོན་མ་ལག་ཆེ་ཤོས་བཙུགས་པ་དང་། ཆུ་གློག་དང་། རླུང་གློག ཉི་གློག་བཅས་ཀྱི་གློག་འདོན་འཕྲུལ་ཙུའུ་ནས་གློག་འདོན་ཚད་སྤྱིར་ན་འཛམ་གླིང་གི་ཨང་དང་པོར་སླེབས་ཡོད། ཀྲུང་གོས་ལོ་རེར་ཆ་སྙོམས་3%གྱི་ནུས་རྒྱུའི་འཛད་སྤྱོད་འཕར་ཚད་ཀྱིས་ལོ་རེར་ཆ་སྙོམས་6.2%ཀྱི་དཔལ་འབྱོར་འཕར་རྒྱུར་འདེགས་སྐྱོར་བྱས་ནས་གོ་ལ་ཧྲིལ་པོའི་ནུས་རྒྱུ་ཟད་གྲོན་ཆག་མགྱོགས་ཤོས་ཀྱི་རྒྱལ་ཁབ་ཀྱི་གྲས་ཤིག་ཏུ་གྱུར་ཡོད་ཅེས་བརྗོད།

མའོ་ཉིང་གིས། ཉིན་ཤས་གོང་འཚོགས་པའི་རྒྱལ་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོང་ཚོགས་ཆེན་ཐོག ཀྲུའུ་ཞི་ཞི་ཅིན་ཕིང་གིས་གསུང་བཤད་གལ་ཆེན་གནང་ནས་སྐྱེ་ཁམས་ཁོར་ཡུག་སྲུང་སྐྱོང་ལ་སྔར་བས་ཤུགས་སྣོན་རྒྱག་པ་དང་སྐྱེ་ཁམས་ཤེས་དཔལ་འཛུགས་སྐྱོང་ལ་སྐུལ་འདེད་གཏོང་ཆེད་ཁ་ཕྱོགས་ཀྱི་ཁྲིད་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད། ཀྲུང་གོས་སྐྱེ་ཁམས་ཤེས་དཔལ་འཛུགས་སྐྱོང་ལ་མུ་མཐུད་ཤུགས་སྣོན་བརྒྱབ་སྟེ་རྒྱལ་ཁབ་ཁག་དང་ལག་གདང་སྦྲེལ་ནས་དྭངས་གཙང་དང་མཛེས་སྡུག་ལྡན་པའི་འཛམ་གླིང་ཞིག་བསྐྲུན་གྱི་ཡིན་ཞེས་བརྗོད།