གོ་ལ་ཧྲིལ་པོའི་མ་དངུལ་འཇོག་མཁན་གྱིས་ཀྲུང་གོའི་དངུལ་རྩའི་ཁྲོམ་རར་སྔར་བཞིན་ལྟ་སྟངས་ཡག་པོ་འཛིན་པ།
—— ཕེང་པོ་ཨེ་ཤེ་ཡ་དང་ཞི་བདེ་རྒྱ་མཚོ་ཁུལ་གྱི་ཙུང་ཚའེ་ལི་པིང་ལ་བཅར་འདྲི་བྱས་པ།
ཉིན་ཤས་གོང་། ཚོང་ལས་དང་དངུལ་རྩའི་ཆ་འཕྲིན་མཁོ་འདོན་བྱེད་མཁན་ཚོང་པ་ཕེང་པོ་ཨེ་ཤེ་ཡ་དང་ཞི་བདེ་རྒྱ་མཚོ་ཁུལ་གྱི་ཙུང་ཚའེ་ལི་པིང་གིས་ལོན་ཏོན་དུ་ཤིན་ཧྭ་གསར་འགྱུར་ཁང་གི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས། དེང་སྐབས་གོ་ལ་ཧྲིལ་པོའི་ཁྲོམ་རར་འགྲན་སློང་རབ་དང་རིམ་པ་འཕྲད་ཀྱང་ཕྱི་རྒྱལ་གྱི་མ་དངུལ་འཇོག་མཁན་གྱིས་ཀྲུང་གོའི་དངུལ་རྩའི་ཁྲོམ་རར་སྔར་བཞིན་ལྟ་སྟངས་ཡག་པོ་འཛིན་གྱི་ཡོད་ཅེས་བརྗོད་པ་རེད།
ལི་པིང་གིས། འཛམ་གླིང་གི་དཔལ་འབྱོར་སྡེ་གཞི་ཆེ་གྲས་གཉིས་པ་ཡིན་པའི་ཀྲུང་གོ་འདི་ཉིད་གོ་ལ་ཧྲིལ་པོའི་མ་དངུལ་འཇོག་མཁན་གྱིས་སྣང་མེད་འཇོག་ཐབས་བྲལ་བའི་ཁྲོམ་ར་གལ་ཆེན་ཞིག་ཏུ་གྱུར་ཡོད། ཕེང་པོས་ཉེ་དུས་ཀྲུང་གོའི་ཤང་ཀང་དང་དབྱིན་ཇིའི་ལོན་ཏོན་དངུལ་རྩའི་ལྟེ་གནས་ཆེན་པོ་གཉིས་སུ“དར་གོས་ལམ་བུ་གསར་པས་མཐོང་རྒྱ་གསར་པ་འབྱེད”ཅེས་པའི་བགྲོ་གླེང་ཚོགས་འདུ་འཚོགས་པ་དེས་ཀྲུང་གོའི་དངུལ་རྩའི་ཁྲོམ་རའི་འཕེལ་རྒྱས་གསར་ཤོས་དང་མི་མངོན་པའི་གོ་སྐབས་ལ་དམིགས་ནས་བགྲོ་གླེང་བྱས་ཡོད་ཅེས་བརྗོད་པ་རེད།
ལི་པིང་གིས་ངོ་སྤྲོད་བྱས་པར་གཞིགས་ན། ཤང་ཀང་གི་བགྲོ་གླེང་ཚོགས་འདུའི་རིང་། ཕེང་པོས་དངུལ་རྩའི་སྒྲིག་གཞི་150ལྷག་ཙམ་ལ་བརྟག་དཔྱད་བྱས་པ་དང་། དེའི་ནང་གི་སྒྲིག་གཞི་ཕྱེད་ཀ་ཙམ་གྱིས་ཀྲུང་གོའི་ཁྲོམ་རར་ལྟ་སྟངས་ཡག་པོ་འཛིན་པའམ་ཡང་ན་གཟབ་ནན་གྱི་རྣམ་འགྱུར་འཛིན་གྱི་ཡོད།
ལི་པིང་གིས། དེ་སྔོན་བཏོན་པའི“རྐང་དངུལ་ཤར་གཏོང”དང“བུན་འཛིན་ཤར་གཏོང” ཡང་ན་དངོས་སུ་དྲ་ཐོག་ཏུ་འཁོར་རྒྱུག་བྱེད་བཞིན་པའི“བརྗེ་རེས་ཤར་བགྲོད”གང་ཞིག་ཡིན་རུང་། དེ་དག་ཚང་མས་གོ་ལ་ཧྲིལ་པོའི་དངུལ་རྩའི་ལས་དོན་པས་ཀྲུང་གོར་མ་དངུལ་འཇོག་པར་མི་མངོན་པའི་སྟོབས་ཤུགས་ཆེན་པོ་སྦྱིན་ཡོད། “ཀྲུང་གོའི་ཁྲོམ་ར་ཆེན་པོ་འདིར་ཞུགས་པར་སྔར་བས་སྟབས་བདེ་རུ་འགྲོ་བཞིན་ཡོད”ཅེས་བརྗོད།
ལི་པིང་གིས་མིག་སྔར་ཀྲུང་གོ་ཚུད་པའི་གོ་ལ་ཧྲིལ་པོའི་ཁྲོམ་རར་འགྲན་སློང་རབ་དང་རིམ་པ་འཕྲད་པ་དང་། ལྷག་པར་དུ་རིམས་ནད་རྗེས་ཀྱི་དུས་སྐབས་སུ་འབྲེལ་གཏུག་དང་སྤེལ་རེས་ལ་ཤུགས་སྣོན་ཟམ་མི་ཆད་པར་བརྒྱབ་ཚེ་གོ་ལ་ཧྲིལ་པོའི་མ་དངུལ་འཇོག་མཁན་གྱིས་ཀྲུང་གོའི་ཁྲོམ་རར་འཛིན་པའི་ཡིད་ཆེས་འཕེལ་བར་ཕན་པ་ཡོད་ཅེས་བརྗོད། ཁོང་གིས་ཕྱི་རྒྱལ་གྱི་མ་དངུལ་འཇོག་མཁན་མང་པོས“ཤེས་བྱ་གསར་པ་གསབ་སྦྱོང”ཧུར་ཐག་བྱས་ནས་ཀྲུང་གོའི་དངུལ་རྩའི་ཁྲོམ་རའི་འཕེལ་ཕྱོགས་གསར་པ་ཁོང་དུ་ཆུད་པ་བྱེད་བཞིན་ཡོད་ཅེས་བརྗོད།
ལི་པིང་གིས་ད་དུང་གོ་ལ་ཧྲིལ་པོའི་གྲགས་ཅན་ཁེ་ལས་ཡིན་པའི་ཕེང་པོས་ཀྲུང་གོའི་ཁྲོམ་རར་མཐོང་ཧ་ཅང་ཆེན་པོ་བྱས་ནས་ཀྲུང་གོའི་དངུལ་རྩའི་ཁྲོམ་རའི་ནང་གི་རང་ཉིད་ཀྱི་ནུས་པར་གཅེས་འཛིན་བྱེད་ཀྱི་ཡོད་པ་དང་འབྲེལ་གོ་ལ་ཧྲིལ་པོའི་ཁྲོམ་ར་དང་དེ་བཞིན་མ་དངུལ་འཇོག་མཁན་དང་འབྲེལ་བ་དམ་ཟབ་ཡོང་བར་སྐུལ་འདེད་གཏོང་བའི་ཐད་རྩེ་གཅིག་ཏུ་གཞོལ་བཞིན་ཡོད། “ཕན་ཚུན་སྦྲེལ་མཐུད་དང་ཤར་གཏོང་གི་རྒྱལ་སྤྱིའི་ཁྲོམ་ར་ལས་མི་ཚང་མར་ཕན་པ་ཐོབ་རྒྱུ་ཡིན་པ་ང་ཚོར་ཡིད་ཆེས་བརྟན་པོ་ཡོད”ཅེས་བརྗོད་པ་རེད།