འདི་ནི་ཟླ་7ཚེས་15ཉིན། ཁོང་ཀོ(པུའུ)ཡི་ཧེ་ཅའོ་ཞིང་ཆེན་ལུའུ་ཝང་ཅི་ལི་སྨན་ཁང་དུ་ཀྲུང་གོའི་མཚོ་དམག་གི་སྲུང་སྐྱེལ་དཔུང་རུ་ཁག་43པའི་སྨན་བཅོས་རུ་ཁག་དང་ཁོང་ཀོ(པུའུ)ཡི་ཧེ་ཅའོ་ལ་རོགས་སྐྱོར་བྱེད་མཁན་ཀྲུང་གོའི་སྨན་བཅོས་རུ་ཁག་ཁག་29པས་མཉམ་འབྲེལ་འོས་འགན་སྨན་བཅོས་བྱེད་སྒོ་སྤེལ་བཞིན་པ།

ཤིན་ཧྭ་གསར་འགྱུར་ཁང་གྲོང་ཁྱེར་པུ་ར་ཙ་ཝེར་ནས་ཟླ་7ཚེས་19ཉིན་གློག་འཕྲིན་འབྱོར་གསལ། ཚེས་18ཉིན། ཀྲུང་གོའི་མཚོ་དམག་གི་སྲུང་སྐྱེལ་དཔུང་རུ་ཁག་43པས་ཁོང་ཀོ(པུའུ)རུ་མཛའ་གྲོགས་ཀྱི་འཚམས་འདྲི་བྱེད་མཇུག་འགྲིལ་ནས། ཉིན་དེའི་སྔ་དྲོའི་ཆུ་ཚོད་10པར་ཧེ་ཅའོ་གྲུ་ཁ་ནས་ཐོན་པ་ལས། ཀྲུང་གོའི་མཚོ་དམག་གི་སྲུང་སྐྱེལ་དཔུང་རུ་ཁག་43པས་ཨ་ཧྥེ་རི་ཁ་ནུབ་མའི་རྒྱལ་ཁབ་5ལ་འཚམས་འདྲི་བྱེད་པའི་ལས་འགན་བདེ་བླག་ངང་ལེགས་སྒྲུབ་བྱས་པ་མཚོན་གྱི་ཡོད།

ཁོང་ཀོ(པུའུ)རུ་འཚམས་འདྲི་བྱེད་རིང་། དཔུང་རུའི་བཀོད་འདོམས་པ་དང་དཔོན་དམག་གི་འཐུས་ཚབ་ཁག་གཅིག་གིས་ཁོང་ཀོ(པུའུ)ཡི་དྲག་ཆས་སྟོབས་ཤུགས་ཀྱི་སྤྱི་ཁྱབ་ཚན་མོའུ་ཀྲང་གཞོན་པ་ཧྲའོ་ཅང་དམག་དཔོན་པུའུ་ཁ་ཁ་དང་ཧེ་ཅའོ་གྲོང་ཁྱེར་གྱི་ཧྲི་ཀྲང་སོགས་དམག་དཔུང་དང་ས་ཁུལ་གྱི་མཐོ་རིམ་དཔོན་རིགས་དང་ཐུག་འཕྲད་བྱས་པ་མ་ཟད་ཁོང་ཀོ(པུའུ)ཡི་མཚོ་དམག་གི་དགའ་བསུ་ཞུ་བའི་དགོང་ཚོགས་ལའང་ཞུགས་པ་རེད། དཔུང་རུས་ཁོང་ཀོ(པུའུ)ཡི་མཚོ་དམག་གི་དཔོན་དམག་འཐུས་ཚབ་སན་ཡ་དམག་གྲུར་ལྟ་སྐོར་བྱེད་པ་དང་གོ་མཚོན་སྒྲིག་ཆས་ཀྱི་གནས་ཚུལ་ཉན་པར་གདན་དྲངས་པ་རེད། དེ་དང་ཆབས་ཅིག་ཕྱོགས་གཉིས་པོའི་མཚོ་དམག་གི་དཔོན་དམག་གིས་ད་དུང་མཉམ་འབྲེལ་ནང་སྦྱོང་མཐུན་སྦྱོར་དང་། འཇིགས་སྐུལ་དང་མཚོ་ཇག་ལ་རྒོལ་བའི་འཐབ་ཇུས་ཞིབ་བསྡུར། ལན་ཆིའུ་སྤོ་ལོ་དང་རྐང་རྩེད་སྤོ་ལོ་སོགས་ལུས་རྩལ་གྱི་མཛའ་གྲོགས་འགྲན་བསྡུར་བཅས་བྱས་པ་རེད།

གཞན་ཡང་། ཀྲུང་གོའི་མཚོ་དམག་གི་སྲུང་སྐྱེལ་དཔུང་རུ་ཁག་43པའི་སྨན་བཅོས་རུ་ཁག་དང་ཁོང་ཀོ(པུའུ)ཡི་ཧེ་ཅའོ་ལ་རོགས་སྐྱོར་བྱེད་མཁན་ཀྲུང་གོའི་སྨན་བཅོས་རུ་ཁག་ཁག་29པས་ཧེ་ཅའོ་ཞིང་ཆེན་ལུའུ་ཝང་ཅི་ལི་སྨན་ཁང་དུ་མཉམ་འབྲེལ་འོས་འགན་སྨན་བཅོས་བྱེད་སྒོ་སྤེལ་བ་མ་ཟད། ཁོང་ཀོ(པུའུ)ཡི་དམག་དཔུང་སྤྱི་ཁྱབ་སྨན་ཁང་དང་ལུའུ་ཝང་ཅི་ལི་སྨན་ཁང་གི་སྨན་པ་དང་མཉམ་དུ་རྒྱུན་མཐོང་ནད་རིགས་འགོག་བཅོས་དང་། དྲག་སྐྱེད་བྱུང་རྗེས་ཀྱི་ལུས་གསོ། སྨན་བཅོས་སྒྲིག་ཆས་ཉམས་གསོ་དང་བདག་སྐྱོང་སོགས་ཐད་སྤེལ་རེས་གཏིང་ཟབ་བྱས་པ་རེད། ནན་ཉིང་དམག་གྲུས་སྣེ་ལེན་ཚོགས་འདུ་འཚོགས་པ་རེད།