མཚོ་སྐོར་འགྲན་བསྡུར་གྱི་མིང་ཐོག་ནས་སླར་ཡང་རྡོག་ཐོན་བྱེད།
འགྲན་མཚམས་བརྒྱད་བརྒྱུད་ཁྱོན་བར་ཐག་སྤྱི་ལེ་1384ཡོད་པའི་2023ལོའི་མཚོ་སྔོན་པོ་སྐོར་བའི་རྒྱལ་སྤྱིའི་གཞུང་ལམ་གྱི་རྐང་འཁོར་འགྲན་བསྡུར་སྐབས་ཉེར་གཉིས་པ་ཚེས་16ཉིན་མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཀྲོའུ་ཨུ་ལན་རྫོང་དུ་མཇུག་འགྲིལ་བ་རེད།
སྐབས་འདིའི་འགྲན་བསྡུར་ནི་མཚོ་སྐོར་འགྲན་བསྡུར་དེ་རྒྱལ་སྤྱིའི་རྐང་འཁོར་མནའ་འབྲེལ་ལས་རིགས་ཀྱི་རིམ་སྤེལ་འགྲན་བསྡུར་ལ་རིམ་སྤོར་བྱུང་རྗེས་ཀྱི“ཐོག་མའི་འགྲན་བསྡུར”ཡིན་པ་དེ་ཐོག་ནས་རང་བརྟེན་ལུས་རྩལ་སྤུས་རྟགས་འགྲན་བསྡུར་དེ་འགོ་འཛུགས་ས་གསར་པར་སླེབས་པ་མཚོན་ལ། དེ་བས་གཏིང་ཟབ་པའི་དོན་སྙིང་ལྡན་པའང་མཚོན་གྱི་ཡོད།
བགྲང་བྱ་ཉི་ཤུ་ལྷག་ཙམ་རིང་དཀའ་སྤྱད་འབད་འཐབ་བྱས་པ་བརྒྱུད། མཚོ་སྐོར་འགྲན་བསྡུར་དེ་ལས་རིགས་འགྲན་བསྡུར་སྒུལ་ཤུགས་སུ་བྱེད་པ་དང་། འཕེལ་འགྱུར་འགྲན་དོན་ཁག་རྒྱ་སྐྱེད་དུ་གཏོང་བ། ཐོན་ལས་འཕེལ་རྒྱས་དང་རིག་གནས་བརྒྱུད་སྤེལ་གཉིས་གཤོག་ཟུང་དུ་བྱེད་པ། དམངས་ཡོངས་ལུས་སྦྱོང་དང་སྤྱི་དམངས་ཞུགས་རྒྱུ་འདེགས་སྐྱོར་དུ་བྱེད་པ་བཅས་ཀྱི་འཕེལ་རྒྱས་རྣམ་པ་ཞིག་ཆགས་ཡོད་ཅིང་། དེའི་ཐུན་མོང་མ་ཡིན་པའི་གསར་གཏོད་ནུས་པ་དང་། ཤུགས་རྐྱེན་ཟབ་པའི་ནུས་པ། སྤུས་རྟགས་ཤུགས་ཆེན་བཅས་ཀྲུང་གོའི་རྐང་འཁོར་འགྲན་བསྡུར་གྱི་ཚད་གཞི་དང་དར་ཆ་ལྟ་བུར་གྱུར་ཡོད།
བགྲང་བྱ་ཉི་ཤུ་ལྷག་ཙམ་གཉེར་བ་བརྒྱུད། མཚོ་སྐོར་འགྲན་བསྡུར་གྱིས་མིག་རྒྱང་རྒྱལ་སྤྱིར་ཕྱོགས་རྒྱུ་མཐའ་འཁྱོངས་དང་། འཛམ་གླིང་གི་ཆུ་ཚད་མཚོན་པ། ཀྲུང་གོའི་ཁྱད་ཆོས་ལྡན་པའི་ལོ་བརྒྱའི་སྤུས་རྟགས་གཏོད་པ་བཅས་དམིགས་ཚད་དུ་བྱས་ནས་རྒྱལ་སྤྱི་ཅན་དང་། ཆེད་ལས་ཅན། ཁྲོམ་ར་ཅན་བཅས་ཀྱི་ཁ་ཕྱོགས་མཐའ་འཁྱོངས་ཀྱིས་རྒྱལ་སྤྱིའི་སྤེལ་རེས་རྒྱ་ཆེར་གཏོང་བ་དང་། ཕྱོགས་བསྡུས་འཕེལ་རྒྱས་ལ་སྐུལ་འདེད་གཏོང་བ། སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་དང་ཐོན་ལས་ཀྱི“ཁུལ་བཞི”འཛུགས་སྐྲུན་ནང་ཧུར་ཐག་ཞུགས་པ་བཅས་བྱས་ནས་འགྲན་བསྡུར་དེ“ལུས་རྩལ་གྱི་འདུ་ཚོགས་གཟབ་རྒྱས་དང་མི་དམངས་ཀྱི་དུས་ཆེན”ཞིག་ཏུ་ཧུར་ཐག་གཉེར་བ་རེད།
བགྲང་བྱ་ཉི་ཤུ་ལྷག་ཙམ་རིང་འཕེལ་རྒྱས་བཏང་བ་བརྒྱུད། མཚོ་སྐོར་འགྲན་བསྡུར་ལ་མི་མང་པོ་འཛོམས་པ་དང་། སྐྱེ་སྟོབས་ཀྱི་དཔལ་འབར་བ། མང་ཚོགས་དང་འབྲེལ་འདྲིས་ཟབ་པ་བཅས་བྱུང་ཡོད། མཚོ་སྐོར་འགྲན་བསྡུར་གྱི་སྐུལ་ཁྲིད་འོག་མཚོ་སྔོན་གྱིས་མཚོ་སྔོན་པོ་སྐོར་བའི་སློབ་གྲྭ་ཆེ་མོ་བའི་འགྲན་བསྡུར་དང་དམངས་ཡོངས་དྲ་ཐོག་རྐང་འཁོར་སོགས་ཀྱི་འགྲན་བསྡུར་བསྟུད་མར་གཉེར་ནས། དམངས་ཡོངས་མཚོ་སྐོར་འགྲན་བསྡུར་ནང་ཞུགས་པ་དང་། མཚོ་སྐོར་འགྲན་བསྡུར་ལ་རྒྱབ་སྐྱོར་བྱེད་པ། མཚོ་སྐོར་འགྲན་བསྡུར་མཉམ་སྤྱོད་བཅས་ཀྱི་སྤྲོ་སེམས་འཁོལ་བའི་རྣམ་པ་བཏོད་དེ། དམངས་ཡོངས་ཀྱི་ལུས་སྦྱོང་བྱེད་སྒོ་གཏིང་ཟབ་སྤེལ་བར་སྐུལ་ཁྲིད་བྱས་པ་རེད།
མཚོ་སྔོན་པོ་སྐོར་བའི་འགྲན་བསྡུར་གྱི་འགྲན་མཚམས་བརྒྱད་གཉེར་སྐབས་ཚོན་མདངས་རྣམ་པར་བཀྲ་བའི་དགོན་ལུང་དང་། སུམ་རྩེན་གནས་ལ་འགྲན་པའི་ཆུ་ལེན། གསེར་དངུལ་ཐང་རྩྭ་ཐང་། མཚོ་སྔོན་པོ། ཚྭ་ཁའི་ཚྭ་མཚོ་སོགས་མཚོ་སྔོན་གྱི་གྲགས་ཅན་ཡུལ་སྐོར་མཛེས་ལྗོངས་ཁུལ་བརྒྱུད་དགོས་ཀྱི་ཡོད་པ་དང་། དེ་དག་ནས་འཛམ་གླིང་སྐྱེ་བོ་ཀུན་ལ་ས་མཐོའི་ས་གཞི་ཆེན་པོའི་རྩྭ་ཐང་དང་། མཚོ། ནགས་ཚལ། ཚྭ་མཚོ། པད་ཁའི་མེ་ཏོག གངས་རི་སོགས་ལྷུན་གྱིས་གྲུབ་པའི་ཡིད་འོང་རི་མོ་མིག་ལམ་དུ་བཤམས་ནས་མཚོ་སྔོན་གྱིས་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་སའི་ཁུལ་གཏོད་པར་རམ་འདེགས་བྱེད་བཞིན་ཡོད།
ད་ཆ་མཚོ་སྐོར་འགྲན་བསྡུར་གྱིས་རྐང་འཁོར་རྩལ་འགྲན་ལུས་རྩལ་ལ་གསོན་ཤུགས་ཟམ་མི་ཆད་པར་བསྣན་ནས་ཀྲུང་གོའི་རྐང་འཁོར་གྱི་འགྲན་བསྡུར་ལའང་རྒྱང་ལམ་གསར་པ་ཞིག་བཏོད་ཡོད། དམངས་ཡོངས་ཀྱི་ལུས་སྦྱོང་དེ་རྒྱལ་ཁབ་ཀྱི་འཐབ་ཇུས་ལ་རིམ་སྤོར་བྱུང་བའི་རྒྱབ་ལྗོངས་འོག་རྐང་འཁོར་འགྲན་བསྡུར་ཁྲིད་སྟོན་དུ་བྱས་ཏེ་མི་དེ་བས་མང་བ་ལྗང་མདོག་བདེ་ཐང་གི་རྐང་འཁོར་ལུས་རྩལ་རྣམ་གྲངས་ནང་ཞུགས་ནས་ལུས་རྩལ་རྒྱལ་ཁབ་སྟོབས་ཆེན་བསྐྲུན་པར་སྒུལ་ཤུགས་དེ་བས་ཆེ་བ་སྣོན་རྒྱུ་རེད།