ནགས་ཚལ་སྲུང་སྐྱོང་ཁུལ་ལ“བསྐོར་ནས་བསྐྱོད་པ”

ཨ་ཧྥེ་རི་ཁའི་རྒྱལ་ཁབ་པེ་ནི་ནའི་ས་མཐོའི་ཞིང་ཆེན་སཱ་ཁའེ་ཐའེ་གྲོང་ཁྱེར་ཉེ་འགྲམ་དུ་སྨི་ངོས་གྲུ་ཁྲི་60ཟིན་པའི་ནགས་ཚལ་སྲུང་སྐྱོང་ཁུལ་ཞིག་ཡོད། འདི་ལོའི་ཟླ་5པར། ཀྲུང་གོ་རྡོ་སྣུམ་རང་བྱུང་སོལ་རླངས་ཚོགས་པས་མ་དངུལ་བཏང་ནས་སྐྲུན་པའི་ཉི་པེ་མདོང་ལམ་རྣམ་གྲངས་འཛུགས་སྐྲུན་ལ་རྒྱུན་ཆད་མེད་པར་སྐུལ་འདེད་བཏང་བས། མདོང་ལམ་གྱི་ལམ་ཐིག་དང་སྲུང་སྐྱོང་ཁུལ་ཐུག་གི་ཡོད།

“སྔོན་གཏན་འཁེལ་བའི་འཆར་གཞིའི་ཇུས་འགོད་ལ་གཞིགས་ན་མདོང་ལམ་དང་ནགས་ཚལ་སྲུང་སྐྱོང་ཁུལ་གྱི་སྣོལ་འདྲེས་ས་ཁོངས་ཀྱི་རྒྱ་ཁྱོན་སྨི་ངོས་གྲུ་9600ཟིན་རྒྱུ་རེད”ཅེས་ཉི་པེ་མདོང་ལམ་རྣམ་གྲངས་ཀྱི་ཨར་སྐྲུན་མཐུན་སྦྱོར་པ་ཨ་ལ་པི·ཨ་ཏུའོ་ཉི་སི་ཡིས་བཤད་པ་དང་། ཁོང་གིས་ངོ་སྤྲོད་བྱས་པར། རྣམ་གྲངས་ཚོགས་ཆུང་གིས་ས་ཆ་དངོས་སུ་བསྐྱོད་ནས་རྩད་ཞིབ་བྱས་པ་བརྒྱུད། སྣོལ་འདྲེས་ས་ཁོངས་སུ་ས་གནས་དེ་གའི་ཁྱད་ལྡན་རྩི་ཤིང་སྡོང་རྐང་120ལྷག་ཙམ་དང་རྩ་ཆེ་ཞིང་དཀོན་པའི་རྩི་ཤིང་སྡོང་རྐང་300ལྷག་ཙམ་སྐྱེས་ཡོད་པ་དེར་ཚན་ཞིབ་དང་སྐྱེ་ཁམས་སྲུང་སྐྱོང་གི་རིན་ཐང་ཆེན་པོ་ལྡན་པ་ཤེས་རྟོགས་བྱུང་ཡོད།

ཨར་སྐྲུན་གྱི་དུས་ཚོད་ཐུང་བ་དང་འཛུགས་སྐྲུན་གྱི་མ་གནས་མཐོ་རུ་འགྲོ་གི་ཡོད་མོད། རྣམ་གྲངས་ཚོགས་ཆུང་གིས་སྔར་བཞིན་ཨར་སྐྲུན་གྱི་མྱུར་ཚད་ལ་ཤུགས་རྐྱེན་མི་ཕོག་པ་བྱེད་པའི་སྔོན་འགྲོའི་ཆ་རྐྱེན་འོག་མདོང་ལམ་ལམ་ཐིག་བསྒྱུར་ནས་སྨི་310རིང་དུ་བཏང་སྟེ་ནགས་ཚལ་སྲུང་སྐྱོང་ཁུལ་ནས་སྒྲོལ་མི་དགོས་པ་བྱས་ཡོད། ལམ་ཐིག་གསར་པ་དེ་སྲུང་སྐྱོང་ཁུལ་དང་བར་ཐག་སྨི་60ཙམ་ཆོད་ཡོད་པས་ནགས་ཚལ་ཁྲོད་ཀྱི་རི་སྐྱེས་སྲོག་ཆགས་དང་རྩི་ཤིང་ལ་བར་མཐོངས་དེ་བས་ཆེ་བ་བཏོད་ནས་རྣམ་གྲངས་འཛུགས་སྐྲུན་ལས་སྲུང་སྐྱོང་ཁུལ་ལ་གནོད་འཚེ་ཕོག་ཤུཌ་སྔར་བས་ཆུང་དུ་བཏང་ཡོད་པ་རེད།

རྩི་སྦྲང་ཡང“མགྲོན་ཁང”དུ་སྡོད་རྒྱུ་ཡོང་བར་བྱས་པ།

ཡུན་རིང་མ་སོང་གོང་། པར་ཙིར་གྱི་ཧྲེང་པའོ་ལུའོ་ཀྲོའུ་ཡི་དབྱི་པི་ལཱ་གྲོང་ཁྱེར་དུ་འཛམ་གླིང་གི་རྩི་སྦྲང་ཉིན་མོའི་དྲིལ་བསྒྲགས་བྱེད་སྒོ་སྤེལ་ཞིང་། ཀྲུང་གོ་འབྲུ་རིགས་རྒྱལ་སྤྱིའི་པར་ཙིར་ཀུང་སིས་སྦྲང་རྩིའི་རིགས་མི་འདྲ་བ་འགྲེམས་སྟོན་དང་སྦྲང་ཚང་བཟོ་སྟངས་འགྲེལ་བཤད་བྱེད་པ་སོགས་ཀྱི་བྱེད་སྒོ་རབ་དང་རིམ་པ་སྤེལ་ནས་ཞིང་ལས་ཐོན་སྐྱེད་དང་སྐྱེ་ཁམས་དོ་སྙོམས་ཁྲོད་ཀྱི་རྩི་སྦྲང་གི་གལ་ཆེའི་རང་བཞིན་དྲིལ་བསྒྲགས་བྱས་ནས། ས་གནས་ཀྱི་མང་ཚོགས་དེ་བས་མང་བ“ཟེའུ་འབྲུ་སྡེབ་སྦྱོར་འཆར་གཞིའི”ནང་ཞུགས་པའི་ཡིད་དབང་བཀུག་པ་རེད།

2016ལོ་ནས་བཟུང་ཀྲུང་གོ་འབྲུ་རིགས་རྒྱལ་སྤྱིའི་པར་ཙིར་ཀུང་སིས་ཧྲེང་པའོ་ལུའོ་ཀྲོའུ་ཡི་ཁ་ཐན་ཏུའུ་ཝ་གྲོང་ཁྱེར་དུ་གནས་པའི་ཤིང་མངར་གླིང་གི་མཐའ་འཁོར་དུ“ཟེའུ་འབྲུ་སྡེབ་སྦྱོར་གྱི་འཆར་གཞི”ལག་ལེན་བསྟར་བ་དང་ཚན་རྩལ་གྱི་བྱ་ཐབས་སྤྱད་དེ་སྦྲང་རྩིར་ཞིང་སྨན་གྱི་སྦགས་བཙོག་ཕོག་ཚད་ཉུང་དུ་གཏོང་གང་ཐུབ་བྱས་ཡོད།

སློབ་གྲྭར་ཚན་རྩལ་ཁྱབ་གདལ་གྱི་སྦྲང་རྩིའི་སྐོར་གྱི་འབྲེལ་ཡོད་ཤེས་བྱ་ཁྱབ་གདལ་གཏོང་བ་དང་། འཛམ་གླིང་རྩི་སྦྲང་ཉིན་མོའི་དྲིལ་བསྒྲགས་བྱེད་སྒོ་སྤེལ་བ། “རྩི་སྦྲང་མགྲོན་ཁང”ཞེས་འབོད་པའི་སྦྲང་ཚང་བཙུགས་ནས་གྲོང་ཁྱེར་ནང་གཅིག་པུར་སྡོད་པའི་རྩི་སྦྲང་ལ་འཚོ་གནས་བྱ་ཡུལ་སོགས་མཁོ་འདོན་བྱས་ཡོད། ཉེ་བའི་ལོ་ཤས་རིང་། “ཟེའུ་འབྲུ་སྡེབ་སྦྱོར་གྱི་འཆར་གཞིའི”ནང་དོན་སྔར་བས་ཕུན་སུམ་ཚོགས་སུ་ཕྱིན་ཡོད། ད་ཆ་ཀུང་སིའི་ཉེ་འགྲམ་གྱི་སློབ་གྲྭར་ཕྲུ་གུ་ཚོས་རྩི་སྦྲང་སྣ་ཚོགས་མཐོང་ཐུབ་ལ་སྦྲང་ཚང་གི་གྲུབ་ཆར་ལྟ་ཐུབ་པ་མ་ཟད་རིགས་མི་འདྲ་བའི་སྦྲང་རྩིའི་བྲོ་བ་མྱོང་ཐུབ་ཀྱི་ཡོད། ད་དུང་མཉམ་འགུལ་ཁྲོད་འབྲེལ་ཡོད་ཤེས་བྱ་སློབ་སྦྱོང་བྱས་ཏེ། རང་བྱུང་ཁམས་ལ་བརྩི་འཇོག་དང་སྐྱེ་དངོས་སྣ་མང་རང་བཞིན་ལ་སྲུང་སྐྱོང་བྱེད་པའི་འདུ་ཤེས་འཛུགས་ཐུབ་པ་བྱུང་ཡོད།

རྩ་ཆེ་ལ་དཀོན་པའི་སྲོག་ཆགས་ལ་ཚང་སྤོ་རོགས་བྱས་པ།

མོ་ཞི་ཁོའི་ཁོའོ་ལི་མཱ་ཀྲོའུ་མན་སཱ་ཉི་ཡཱ་གྲོང་ཁྱེར་དུ་ལོ་འཁོར་མོ་གནམ་གཤིས་དྲོ་ལ་བཞའ་ཚན་ཆེ་བ་དང་། ཤིང་དམར་གྱི་ནགས་ཚལ་སྟུག་པོའི་ཁྲོད་དུ་རྩ་ཆེ་ལ་སྟོངས་ལ་ཉེ་བའི་སྲོག་ཆགས་མང་པོ་འཚོ་སྡོད་བྱེད་ཀྱི་ཡོད། དེ་གར་རྩ་ཆེ་ལ་སྟོངས་ལ་ཉེ་བའི་སྲོག་ཆགས་དང་རྩི་ཤིང་རིགས་35ཙམ་ཡོད་པ་དང་གཞན་ཡང་སྲོག་ཆགས་དང་རྩི་ཤིང་རིགས་74ཙམ་ལ་དམིགས་བསལ་སྲུང་སྐྱོང་བྱེད་དགོས་ཀྱི་ཡོད།

2022ལོའི་ཟླ་12པར་མན་སཱ་ཉི་ཡཱ་གྲོང་ཁྱེར་གྱི་གློག་སྤྱོད་པའི་གནད་དོན་ཐག་གཅོད་བྱེད་རོགས་བྱ་ཆེད། ཧར་པིན་གློག་རླངས་རྒྱལ་སྤྱིའི་ལས་གྲྭ་ཀུང་སིས་སྐྲུན་འགན་འཁུར་བའི་མོ་ཞི་ཁོའི་མན་སཱ་ཉི་ཡཱའི་དུས་ཐེངས་གསུམ་པའི་རྣམ་གྲངས་ལས་འགོ་བཙུགས་ཡོད། ལས་ཡུལ་གྲྭ་སྒྲིག་བྱེད་རིང་རྣམ་གྲངས་ཚོགས་ཆུང་གིས་རྩངས་པ་ཁ་རལ་ཚུད་པའི་སྲུང་སྐྱོང་སྲོག་ཆགས་རིགས་འགའ་ཤས་ཡོད་པ་ཤེས་པས། འཕྲལ་དུ་ས་གནས་ས་ཐོག་ཏུ་ཚོགས་འདུ་འཚོགས་ནས་ཡུལ་དེའི་ལས་དོན་མི་སྣར་འབྲེལ་ཡོད་གནས་ཚུལ་ངོ་སྤྲོད་བྱས་པ་མ་ཟད། བྱ་ཐབས་སྤྱད་ནས་སྲོག་ཆགས་དེ་དག་ལ་སྲུང་སྐྱོང་གང་ལེགས་བྱས་པ་རེད།

དེ་རྗེས་རྣམ་གྲངས་ཚོགས་ཆུང་གིས་ཆེད་མངགས་རི་སྐྱེས་སྲོག་ཆགས་ལ་ཞིབ་འཇུག་བྱེད་མཁན་ཕྱུགས་རིགས་སྨན་པ་གདན་དྲངས་ནས་རྣམ་གྲངས་འཛུགས་སྐྲུན་ཁུལ་གྱི་རྩ་ཆེ་ལ་དཀོན་པའི་རི་སྐྱེས་སྲོག་ཆགས་བཟུང་འགོ་ཚུགས། ཕོ་མོ་དང་། ལོ་ཚོད། ཆེ་ཆུང་སོགས་ཆ་འཕྲིན་ཞིབ་ཕྲ་ཐོ་འགོད་བྱས་རྗེས་དེ་དག་ཁྲོད་ནས་ཁག་གཅིག་རྣམ་གྲངས་ཚོགས་ཆུང་དང་བར་ཐག་སྨི་800ཡོད་པའི་རི་ཆུང་ཆུང་ཞིག་ཏུ་བསྐྱལ་བ་དང་། གཞན་དག་རྣམས་སྤྱི་ལེ་གཅིག་གི་སར་གནས་པའི་རྒྱལ་ཕྲན་མཉམ་འབྲེལ་གློག་ཤུགས་ཨུ་ལྷན་གྱི་སྒར་སར་བསྐྱལ་ནས་བསྐྱར་དུ་བཀོད་སྒྲིག་བྱས་པ་རེད། ས་ཆ་དེ་གཉིས་ཀྱི་རང་བྱུང་ཆ་རྐྱེན་དེ་སྔའི་འཚོ་སྡོད་བྱེད་སའི་རང་བྱུང་ཆ་རྐྱེན་དང་འདྲ་པོ་ཡོད་པས་ཚང་སྤོས་པའི་སྲོག་ཆགས་ཡུན་རིང་མ་འགོར་བར་ཁོར་ཡུག་གསར་པར་འཕྲོད་པོ་བྱུང་ཡོད།