འདི་ནི་ཟླ་6ཚེས་8ཉིན། ཀོང་ཤིས་ལིའུ་ཀྲོའུ་ཝུའུ་ལིང་ནུས་རྒྱུ་གསར་པའི་རླངས་འཁོར་ཚད་ཡོད་ཀུང་སིའི་རྩིས་སྤྲོད་འཁོར་ཁང་དུ་བཟོ་པས་ཕྱིར་གཏོང་བྱེད་ཉེར་ཡོད་པའི་ནུས་རྒྱུ་གསར་པའི་རླངས་འཁོར་ལ་ཞིབ་བཤེར་བྱེད་བཞིན་པ།

ཀྲུང་གོ་ནས་ཨེ་ཤེ་ཡ་ཤར་ལྷོར་ཕྱིར་གཏོང་བྱེད་ཚད་མགྱོགས་མྱུར་འཕར་བའི་སྐབས་སུ་ཀྲུང་གོའི་ལྷོ་རྒྱུད་དུ་གནས་པའི་ཀོང་ཤིས་ཀྲོང་རིགས་རང་སྐྱོང་ལྗོངས་ཀྱིས་ཨེ་ཤེ་ཡ་ཤར་ལྷོའི་ཁྲོམ་ར་རྒྱ་སྐྱེད་ཤུགས་ཆེན་བྱེད་བཞིན་ཡོད་ཅིང་། ས་གནས་དེ་གས་འཐུས་ཚབ་ཚོགས་པ་ཨེ་ཤེ་ཡ་ཤར་ལྷོའི་རྒྱལ་ཁབ་ལ་འཚམས་འདྲིར་ཐེངས་མང་བཏང་བ་དང་། འདི་ལོའི་ཟླ་དང་པོ་ནས་ལྔ་པའི་བར་ཨེ་ཤེ་ཡ་ཤར་ལྷོའི་མནའ་འབྲེལ་ལ་ཕྱིར་གཏོང་བྱེད་ཚད་དེ་ན་ནིང་གི་དུས་མཚུངས་ཀྱི་ལྡབ་2ལྷག་ཙམ་ཟིན་ཡོད་པ་རེད། ཀོང་ཤིས་ཀྱིས་ཝེ་ཐེ་ནམ་དང་ས་འབྲེལ་ཡིན་པའི་ས་བབ་ཀྱི་ལེགས་ཆ་སྤྱད་དེ་རང་ངོས་ཀྲུང་གོ་དང་ཨེ་ཤེ་ཡ་ཤར་ལྷོའི་ཚོང་དོན་ལྟེ་གནས་སུ་བསྐྲུན་འདོད་བྱེད་ཀྱི་ཡོད་པ་རེད།

ཀོང་ཤིས་འདི་ཉིད་ཧྲང་ཧའེ་དང་པེ་ཅིང་སོགས་ས་ཁུལ་དང་བསྡུར་ན་དཔལ་འབྱོར་གཞི་ཁྱོན་ཅུང་ཆུང་ཡང་ཀྲུང་གོ་དང་ཨེ་ཤེ་ཡ་ཤར་ལྷོའི་ཚོང་དོན་ལྟེ་གནས་གྲས་ཤིག་ཡིན། བསྡོམས་རྩིས་བྱས་པར་གཞིགས་ན། ཀོང་ཤིས་ཀྱི་ཕྱིར་གཏོང་དངུལ་འབོར་གྱི་བཅུ་ཆ་དྲུག་ལྷག་ཙམ་ཨེ་ཤེ་ཡ་ཤར་ལྷོའི་མནའ་འབྲེལ་ལ་ཕྱོགས་པ་དང་། འདི་ལོའི་ཟླ་དང་པོ་ནས་ལྔ་པའི་བར་རིམ་རྩིས་བྱས་ན་ཕྱིར་གཏོང་དངུལ་འབོར་མི་དམངས་ཤོག་སྒོར་དུང་ཕྱུར་945ཟིན་ནས་ན་ནིང་གི་དུས་མཚུངས་ཀྱི་ལྡབ་2.2བར་འཕར་ཡོད་པ་རེད། ཕྱིར་གཏོང་ཚོང་ཟོག་ནི་གློག་རྡུལ་ལྷུ་ལག་དང་། རླངས་འཁོར། གྱོན་ཆས་བཅས་གཙོ་བོ་ཡིན་པས་སྣ་ཁ་ཧ་ཅང་ཕུན་སུམ་ཚོགས་པོ་ཡོད་པ་རེད།

ཀྲུང་གོས“རྒྱུད་གཅིག་ལམ་གཅིག”གི་གྲོས་འགོ་བརྒྱུད་ཨེ་ཤེ་ཡ་ཤར་ལྷོའི་ས་ཁུལ་སོགས་ལ་ཤུགས་རྐྱེན་ཆེ་རུ་གཏོང་རྒྱུའི་རེ་བ་བྱེད་ཀྱི་ཡོད་པ་དང་ཀོང་ཤིས་དེ་ཡང་ཏག་ཏག་འགག་རྩའི་གནས་སུ་འཁེལ་ཡོད། ས་གནས་དེ་གས་ཨེ་ཤེ་ཡ་ཤར་ལྷོའི་དབར་གྱི་ཚོང་དོན་གཞི་ཁྱོན་ཆེ་རུ་བཏང་བ་དེས་སྐམ་སའི་ས་ཁུལ་གྱི་འཕེལ་རྒྱས་ལ་སྐུལ་ཁྲིད་ཀྱི་ནུས་པ་ཐོན་ཡོད་པ་རེད།

—— 《རི་པིན་གྱི་དཔལ་འབྱོར་གསར་འགྱུར》ཐོག་སྤེལ་བའི་གནས་ཚུལ་གཞིར་བཟུང་།