མི་དམངས་སློབ་ཆེན་ཞོར་གཏོགས་སློབ་འབྲིང་ལྷ་ས་སློབ་གྲྭའི་རྣམ་གྲངས་ནི་2021ལོའི་ཟླ་11ཚེས་15ཉིན་ལས་འགོ་བཙུགས་པ་དང་། འཆར་གཞི་ལྟར་ན་ད་ལོའི་ལོ་མཇུག་ཏུ་ཨར་ལས་གཙོ་བོ་དང་དེ་བཞིན་མཛེས་རྒྱན་སྤྲོས་པ་དང་མཛེས་བཟོ་ལེགས་སྒྲུབ་བྱས་ནས་ཞིབ་བཤེར་དང་རྩིས་སྤྲོད་ཀྱི་ཡོད་པ་དང་། 2024ལོའི་ལོ་སྟོད་ལ་སྔོ་ལྗང་འདེབས་པ་དང་། 2024ལོའི་ཟླ་5ཚེས་30ཉིན་རྣམ་གྲངས་ཡོངས་ལས་མཇུག་འགྲིལ་ནས་ཞིབ་བཤེར་དང་རྩིས་སྤྲོད་ཀྱི་ཡོད་པ། ཟླ་7ཚེས་30ཉིན་གོང་སློབ་མ་དུས་བཀག་ལྟར་བདེ་འཇགས་དང་གོ་རིམ་ལྡན་པའི་སྒོ་ནས་སློབ་འགོ་འཛུགས་པར་ནུས་ཤུགས་ཡོད་རྒུས་འགན་ལེན་བྱེད་ཀྱི་ཡོད།

མི་དམངས་སློབ་ཆེན་ཞོར་གཏོགས་སློབ་འབྲིང་ལྷ་ས་སློབ་གྲྭ་ནི་རང་ལྗོངས་ཀྱི་2023ལོའི་དམངས་འཚོའི་དོན་དངོས་ཆེན་པོ་བཅུའི་གྲས་ཤིག་རེད། ཤེས་རྟོགས་བྱུང་བར་གཞིགས་ན། རྣམ་གྲངས་འདི་ཀྲུང་གོ་ལྕགས་ལམ་ཅུས་21ཚོགས་པ་ལས་གྲྭ་ཚད་ཡོད་ཀུང་སི་བཞི་པས་སྐྲུན་འགན་འཁུར་བ་ཞིག་ཡིན་པ་དང་། རྣམ་གྲངས་ཀྱི་ཨར་པོར་ཁྱོན་མ་དངུལ་སྒོར་དུང་ཕྱུར་6．648བཏང་བ་དང་། མིག་སྔར་ཨར་ལས་གཙོ་བོའི་ལེགས་སྒྲུབ་བྱེད་ཚད་96％ཟིན་ཡོད་པ་རེད།

ཉེ་ཆར། གསར་འགོད་པ་ཨར་པོ་རྒྱག་ཡུལ་དུ་སྐྱོད་སྐབས། ཨར་པོ་བ་རྣམས་ཚ་ཚ་འུར་འུར་ངང་ཨར་ལས་ལ་བྲེལ་བཞིན་ཡོད་པ་དང་། རྣམ་གྲངས་བསྐྲུན་ཟིན་རྗེས་སློབ་གནས་ཚད་ལྡན་5040ཐག་གཅོད་ཐུབ་སྟེ། ལྷ་ས་ཙམ་མ་ཟད་ཐ་ན་བོད་ཀྱི་སློབ་སྦྱོང་དུས་མཚམས་ཁག་གི་མཁོ་སྤྲོད་ནུས་པ་ཆེ་རུ་ནུས་ལྡན་འགྲོ་བ་དང་ཆབས་ཅིག གྲོང་མིའི་སློབ་གསོའི་ཐོན་ཁུངས་སྤུས་ལེགས་ཀྱི་དགོས་མཁོ་སྔར་བས་སྐོང་ཐུབ།

རྣམ་གྲངས་ཀྱི་འགན་འཁུར་བ་ཅིང་ལི་ལི་ཞང་གིས་སླད་མར་ཨར་པོའི་ལས་ཕྱོད་ཆེ་རུ་གཏོང་བ་དང་མཛེས་རྒྱན་སྤྲོས་པ་སོགས་ཀྱི་ལས་དོན་ཡག་པོ་བསྒྲུབས་ཏེ། དུས་སང་ཟླ་ལྔ་པའི་ཟླ་མཇུག་ཏུ་ལས་གྲྭ་ཚང་མ་ལས་མཇུག་འགྲིལ་ནས་ཞིབ་བཤེར་དང་རྩིས་སྤྲོད་པའི་འགན་ལེན་བྱེད་ཀྱི་ཡིན་ཞེས་བཤད།