ཉེ་ཆར། ལྷ་ས་གྲོང་ཁྱེར་ཚོང་དོན་ཅུས་ཀྱིས་2022ལོའི་ལོ་འཁོར་གྱི་མཚན་མོའི་དཔལ་འབྱོར་དཔེ་སྟོན་ཁུལ་གཏན་འཁེལ་བྱེད་པའི་དཔྱད་ཞིབ་ཚོགས་འདུ་སྒྲིག་འཛུགས་བྱས་ནས་འཚོགས་ཤིང་། ཚོགས་ཞུགས་ཚན་པ་16གིས་ཁེ་ལས་ཀྱིས་ཕུལ་བའི་དཔྱད་གཞི་ལྟ་བཤེར་དང་། ཕྱོགས་གསུམ་པའི་རྩིས་བཤེར་ཀུང་སིའི་འབྲེལ་ཡོད་གནད་དོན་འདྲི་རྩད། ཕྱོགས་གསུམ་པའི་རྩིས་བཤེར་སྙན་ཞུར་མགྲིན་གཅིག་ཏུ་ཁས་ལེན་བཅས་བྱས་ནས་མཐར་ཁྲེང་ཀོན་དབན་ཏ་དང་། བོད་སྐོར་དཀྱིལ་འཁོར། ཀུན་བདེ་གླིང་མཁའ་ཁྲོམ་བཅས་མཚན་མོའི་དཔལ་འབྱོར་དཔེ་སྟོན་ཁུལ་ལ་གཏན་འཁེལ་བྱས་པ་རེད།

《ལྷ་ས་གྲོང་ཁྱེར་གྱི་མཚན་མོའི་དཔལ་འབྱོར་དཔེ་སྟོན་ཁུལ་གཏན་འཁེལ་དང་བྱ་དགའ་སྤྲོད་ཐབས》ཀྱི་བླང་བྱ་གཞིར་བཟུང་། རྫོང（ཆུས）དང་དཔལ་འབྱོར་བྱེད་ནུས་ཁུལ་གྱི་ཚོང་དོན་གཙོ་གཉེར་སྡེ་ཚན་གྱིས་ཐོག་མའི་ཞིབ་བཤེར་བྱས་པ་བརྒྱུད། ཁྱོན་ཚོང་ལས་ཕྱོགས་བསྡུས་སྡེ་ཚན་4ཡིས་མཚན་མོའི་དཔལ་འབྱོར་དཔེ་སྟོན་ཁུལ་སྙན་ཞུ་བྱས་པ་ནི་ལྷ་ས་ཡར་ཀླུང་གཡག་ཚོང་དོན་ཚད་ཡོད་ཀུང་སི་དང་། བོད་ལྗོངས་བོད་སྐོར་ཡུལ་སྐོར་གསར་སྤེལ་ཚད་ཡོད་ཀུང་སི། ལྷ་ས་དབན་ཏ་ཐང་ཆེན་ཚོང་ལས་དོ་དམ་ཚད་ཡོད་ཀུང་སི། ལྷ་ས་སྣེའུ་དབན་ཏ་ཐང་ཆེན་ཚོང་ལས་དོ་དམ་ཚད་ཡོད་ཀུང་སི（གཤམ་ལ་ཀུན་བདེ་གླིང་མཁའ་ཁྲོམ་དང་། བོད་སྐོར་དཀྱིལ་འཁོར། ཁྲེང་ཀོན་དབན་ཏ། སྣེའུ་དབན་ཏ་ཞེས་བསྡུ་རྒྱུ）བཅས་རེད། ཕྱོགས་གསུམ་པའི་ཀུང་སིས་སྙན་ཞུ་འབུལ་མཁན་ཁེ་ལས་ཀྱི་དཔྱད་གཞིར་ཞིབ་བཤེར་དང་ས་ཡུལ་དངོས་སུ་ཞིབ་བཤེར་བྱེད་པ་སོགས་ཀྱི་བྱ་ཐབས་བརྒྱུད་ཆེད་དམིགས་རྩིས་བཤེར་བྱས་པ་དང་འབྲེལ་རྩིས་བཤེར་སྙན་ཞུ་བཏོན་པ་རེད། དཔྱད་ཞིབ་ཚོགས་འདུར། ཕྱོགས་གསུམ་པའི་ཀུང་སིས་རྩིས་བཤེར་སྙན་ཞུ་འདོན་སྤྲོད་བྱས་པ་མ་ཟད་ཚོགས་ཞུགས་སྡེ་ཚན་ལ་ཞིབ་བཤེར་བྱས་ཚུལ་སྙན་སེང་ཞུས་ཏེ། ཀུན་བདེ་གླིང་མཁའ་ཁྲོམ་དང་། བོད་སྐོར་དཀྱིལ་འཁོར། ཁྲེང་ཀོན་དབན་ཏ་བཅས་ཚོང་ལས་ཕྱོགས་བསྡུས་སྡེ་ཚན་3མཚན་མོའི་དཔལ་འབྱོར་འཕེལ་རྒྱས་གཏོང་བར་ལེགས་ཆ་དེ་བས་ཆེ་བ་ལྡན་པའི་ངོས་འཛིན་བྱས་ཤིང་། མཚན་མོའི་དཔལ་འབྱོར་དཔེ་སྟོན་ཁུལ་དུ་གཏན་འཁེལ་བྱེད་པའི་གྲོས་འགོ་བཏོན་པ་རེད།