འདི་ནི་ཟླ་6ཚེས་30ཉིན་ལྷ་ས་གྲོང་ཁྱེར་དོག་སྡེ་ཁྲོམ་གཞུང་ཏང་གི་ལས་དོན་ཨུ་ལྷན་གྱིས་ལྷ་ས་གྲོང་ཁྱེར་མཉམ་འདྲེས་སྨྱན་སྦྱོར་ལྟེ་གནས་དང་མཉམ་དུ“བསྟོད་གླུ་བླངས་ནས་ཏང་ལ་འབུལ། དུས་རབས་གསར་པར་སྣེ་ཁྲིད་བྱེད། འོད་སྟོང་གསར་པ་མཉམ་དུ་གཏོད”ཅེས་པ་བརྗོད་དོན་གཙོ་བོར་བྱས་པའི་ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུ་བའི་རིག་རྩལ་བྱེད་སྒོ་སྤེལ་ཞིང་། འདི་ནི་བྱེད་སྒོར་ཞུགས་མཁན་གྱིས“མི་རིགས་མཐུན་སྒྲིལ་ལ་ཤུགས་སྣོན་དང་མི་རིགས་ཁ་ཕྲལ་ལ་ངོ་རྒོལ”གྱི་ཁས་ལེན་གྱང་སྟེང་དུ་མིང་འགོད་བཞིན་པ།

ལྗོངས་ཡོངས་ཀྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་ཏན་ཏིག་སྤེལ་བའི་སྐབས་སུ། ང་ཚོས་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་102འཁོར་བའི་འཁྲུངས་སྐར་བསུས་ཡོད། ཉིན་ཤས་བསྟུད་མར་རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་སྣ་མང་ཕུན་སུམ་ཚོགས་པའི་བྱེད་སྒོ་སྤེལ་ཏེ། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུས་པ་དང་། རྒྱ་ཆེའི་ཏང་ཡོན་ཚོར་དངོས་སྒྲུབ་འགན་ཁུར་ལ་བརྟེན་ནས་ཐོག་མའི་བསམ་འདུན་དང་འགན་འཁྲིར་གསལ་འགྲེལ་བྱས་ཏེ། དུས་རབས་གསར་པའི་རྒྱུགས་འབུལ་ལམ་བུའི་ཐོག་འབད་འབུངས་སྟོབས་བརྩོན་དང་ཞུམ་མེད་མདུན་སྐྱོད་བྱེད་དགོས་པའི་ལྕག་སྐུལ་བྱས་པ་རེད།

ཉེ་ཆར། བོད་ལྗོངས་ཉིན་རེའི་ཚགས་པར་ལས་ཁུངས་རྒྱ་ཡིག་རྩོམ་སྒྲིག་ཁང་གི་ཏང་ཀྲི་པུའུ་དང་འཆར་གཞི་ནོར་དོན་ཁྲུའུ་ཏང་ཀྲི་པུའུ་ཡིས་བོད་ལྗོངས་དམག་དོན་ལོ་རྒྱུས་ཁང་དུ་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་སྤེལ་བ་རེད། གསལ་འགྲེལ་པའི་སྣེ་ཁྲིད་འོག་ཚང་མས་ཡུལ་དངོས་སུ་ལོ་རྒྱུས་ཀྱི་དངོས་རྫས་ལ་ལྟ་བ་དང་། ཡིག་རིས་ཀྱི་དཔྱད་གཞི་ཞིབ་ཕྲ་ལྟ་བ། མི་དམངས་བཅིངས་འགྲོལ་དམག་གིས་བོད་དུ་དཔུང་སྐྱོད་དང་། བོད་ལ་བཅིངས་འགྲོལ། བོད་སྲུང་སྐྱོབ། བོད་འཛུགས་སྐྲུན་བཅས་ལ་གཟེངས་སུ་ཐོན་པའི་ལེགས་སྐྱེས་དང་རླབས་ཆེན་གྱི་མཛད་རྗེས་བཞག་པ་མྱོང་ཚོར་ཟབ་མོ་བྱུང་ཡོད། ལྟ་སྐོར་མཇུག་འགྲིལ་རྗེས་བྱེད་སྒོར་ཞུགས་མཁན་ཏང་ཡོན་ཡོངས་ཀྱིས་ཏང་དར་མདུན་དུ་ཏང་ཞུགས་དམ་བཅའ་བསྐྱར་འཇོག་བྱས་ཏེ་གསར་བརྗེའི་སྔོན་བྱོན་པའི་ཕུགས་བསམ་རྒྱུན་འཛིན་དང་། “ལམ་གཉིས”ཀྱི་སྙིང་སྟོབས་དང་བོད་སྐྱོད་པ་རྒན་གྲས་ཀྱི་སྙིང་སྟོབས་དར་སྤེལ་གཏོང་བ་དང་། ཕུགས་བསམ་དང་དད་སེམས་བརྟན་དུ་གཏོང་བ། འགན་འཁྲི་འཁུར་ཕོད་པ་དང་བྱས་རྗེས་འཇོག་ཕོད་པ་བཅས་བྱས་ནས་བརྗོད་དོན་གཙོ་བོའི་སློབ་གསོ་གོ་སྐབས་སུ་བྱས་ཏེ་དགོངས་པ་སློབ་སྦྱོང་དང་། ཏང་གཤིས་བརྟན་གཏོང་། ལག་ལེན་ལ་མཐོང་ཆེན། བྱས་རྗེས་གསར་འཇོག་བཅས་བྱས་ཏེ་མཛེས་སྡུག་ལྡན་པའི་བོད་གསར་འཛུགས་སྐྲུན་ཆེད་ལེགས་སྐྱེས་འབུལ་གྱི་ཡིན་ཞེས་བཤད་པ་རེད།

ཟླ་7ཚེས་1ཉིན། གཞིས་རྩེ་གྲོང་ཁྱེར་ངམ་རིང་རྫོང་ཆུ་འོག་ཤང་ངམ་ཕྱར་གྲོང་ཚོར་བཅའ་སྡོད་རང་སྐྱོང་ལྗོངས་མི་དམངས་ཞིབ་དཔྱོད་ཁང་གི་ལས་དོན་རུ་ཁག་གིས་གྲོང་ཚོའི“ཨུ་ལྷན་གཉིས”དང་མཉམ་དུ་རྒྱལ་དར་བསྒྲེངས་བ་དང་། རྒྱལ་གླུ་གཏོང་བ། ཏང་གི་སློབ་ཚན་ཁྲིད་པ། ཏང་གི་སྒྲིག་ཡིག་ཀློག་པ། རིག་རྩལ་མཉམ་སྤྲོ་སོགས་ཀྱི་བྱེད་སྒོ་རབ་དང་རིམ་པ་སྤེལ་ཏེ། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུས་པ་རེད། བྱེད་སྒོ་སྤེལ་རིང་ཏང་ཡོན་ཡོངས་ཀྱིས་རང་ཉིད་ཏང་ལ་ཞུགས་པའི་གཏམ་རྒྱུད་དང་། འཚར་ལོངས་ཀྱི་བརྒྱུད་རིམ། བསམ་བློའི་འགྱུར་ལྡོག ལས་ཀའི་མཚོན་ཚུལ་སོགས་དང་ཟུང་འབྲེལ་གྱིས་སྤེལ་རེས་གཏམ་བཤད་བྱས་པ་རེད། ཚང་མས་གསར་བརྗེའི་ས་བོན་རྒྱུན་འཛིན་དང་གསར་བརྗེའི་ཁྲག་རྒྱུན་རྒྱུན་འཛིན་བྱས་ཏེ། ལོ་རྒྱུས་ཀྱི་ལས་འགན་སྒྲུབ་སེམས་དང་། འགན་འཁྲི་འཁུར་སེམས། གཟི་བརྗིད་ཀྱི་བསམ་པ་བཅས་ལ་ཤུགས་སྣོན་ཟམ་མི་ཆད་པར་བརྒྱབ་ནས། མང་ཚོགས་ཀྱི་འཕྲལ་མཁོ་དང་། དཀའ་ངལ། རེ་སྒུག སེམས་ཁྲལ་བཅས་ཀྱི་གནད་དོན་ཐག་གཅོད་ཡག་པོ་བྱས་ཏེ། གྲོང་གསེབ་དར་རྒྱས་ལ་རམ་འདེགས་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།

ཉེ་ཆར་ཉིང་ཁྲི་གྲོང་ཁྱེར་རྫ་ཡུལ་རྫོང་སྲང་ཐ་གྲོང་ཚོའི་ཏང་ཀྲི་པུའི་ཏང་ཡོན་ཡོངས་དང་གྲོང་མི་རྣམས་གྲོང་ཚོའི་རིག་གནས་བྱེད་སྒོ་ལྟེ་གནས་སུ་འཛོམས་ནས་སྣ་མང་ཕུན་སུམ་ཚོགས་པའི་བྱེད་སྒོ་སྤེལ་ཏེ“བདུན་གཅིག”ལ་རྟེན་འབྲེལ་ཞུས་པ་རེད། བྱེད་སྒོའི་ཐོག་ཕུལ་བྱུང་གུང་ཁྲན་ཏང་ཡོན་ལ་གཟེངས་བསྟོད་བྱས་ཏེ་ཏང་ཡོན་ལས་བྱེད་པའི་ལས་སྒྲུབ་ལས་གཏོད་ཀྱི་ཡིད་ཆེས་སྔར་བས་འཕེལ་བར་བྱས་པ་དང་། “ཏང་ལ་སྙིང་གཏམ་ཞིག་ཞུ”ཞེས་པའི་བྱེད་སྒོ་སྤེལ་ནས་མང་ཚོགས་ཚོའི་ཏང་གཅེས་རྒྱལ་ཞེན་གྱི་བསམ་པ་མཚོན་པར་བྱས་པ། མི་རིགས་ཀྱི་ཁྱད་ཆོས་ལྡན་པའི་ཞབས་བྲོ་འཁྲབ་ནས་མི་རིགས་ཁག་གི་མང་ཚོགས་ཀྱིས་མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དང་མེས་རྒྱལ་གཅིག་གྱུར་ལ་སྲུང་སྐྱོང་བྱེད་པའི་དམངས་སེམས་ཕྱོགས་ས་མཚོན་པར་བྱས་པ། “གསར་བརྗེའི་གླུ་དབྱངས་བླངས་ནས་ཏང་ལ་འབུལ”ཞེས་པའི་བྱེད་སྒོར་མང་ཚོགས་ཚོས་བློ་བརྟན་འགྱུར་མེད་ངང་ཏང་གི་རྗེས་སུ་འབྲང་བའི་ཆོད་སེམས་བརྟན་པོ་མཚོན་པར་བྱས་ཡོད། སྲང་ཐ་གྲོང་ཚོའི་ཕྱུག་འགྱུར་འཇོན་ཐང་ཅན་བསོད་ནམས་ཀྱིས་སྒམ་ནན་ངང་ཏང་ཀྲི་པུའུ་ལ་ཏང་ལ་ཞུགས་པའི་ཞུ་ཡིག་ཕུལ་ཞིང་། ཁོང་གིས། “ང་ནི་ལོ་རབས་90པའི་རྗེས་སུ་སྐྱེས་པ་ཞིག་ཡིན། སྒྱུར་བཅོས་སྒོ་དབྱེའི་དཔྱིད་རླུང་དྲོན་མོའི་ཁྲོད་དུ་ངས་ཕ་ཡུལ་གྱི་འགྱུར་ལྡོག་མིག་མཐོང་ལག་ཟིན་བྱུང་བས་ཏང་གི་བཀའ་དྲིན་ཤིན་ཏུ་ཆེན་པོ་ཡིན། དེ་རིང་ངས་གཟི་བརྗིད་ལྡན་པའི་ངང་ཏང་ལ་ཞུགས་པའི་ཞུ་ཡིག་འབུལ་དོན་ནི་ང་རང་ཡང་གཟི་བརྗིད་ལྡན་པའི་གུང་ཁྲན་ཏང་གི་ཆ་ཤས་ཤིག་ཏུ་འགྱུར་བ་བྱས་ནས། གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་སུ་འབུལ་ཐུབ་ན་བསམ་གྱི་འདུག”ཅེས་སེམས་འགུལ་ཐེབས་བཞིན་དུ་བཤད།

ཉེ་ཆར་ལྷོ་ཁ་གྲོང་ཁྱེར་སྣེ་གདོང་ཆུས་ཕོ་བྲང་ཤང་གིས“ནམ་ཡང་ཏང་གི་རྗེས་སུ་འབྲངས—སེམས་པ་ཏང་ལ་ཕྱོགས་ནས་རྒྱང་ལམ་བསྐྱར་དྲན་བྱེད། ལག་གདང་དཔུང་སྦྲེལ་ལེའུ་གསར་པ་རྩོམ་པའི‘བདུན་གཅིག’གཟེངས་བསྟོད་ཚོགས་ཆེན་དང་ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུ་བའི་རིག་རྩལ་སྐོང་འཁྲབ”བྱེད་སྒོ་སྤེལ་ཞིང་། ཞབས་བྲོ་དང་། ལྷ་མོ། སྙན་ངག་གྱེར་འདོན། མཉམ་གཞས་བཅས་ཀྱི་རྣམ་པ་སྣ་ཚོགས་བརྒྱུད་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཏང་དང་མེས་རྒྱལ་ལ་ཕུལ་བའི་སྨོན་འདུན་བཟང་པོ་མཚོན་པར་བྱས་ཡོད།

འདི་ནི་ལྷོ་ཁ་གྲོང་ཁྱེར་སྣེ་གདོང་ཆུས་ཕོ་བྲང་ཤང་གིས“ནམ་ཡང་ཏང་གི་རྗེས་སུ་འབྲངས—སེམས་པ་ཏང་ལ་ཕྱོགས་ནས་རྒྱང་ལམ་བསྐྱར་དྲན་བྱེད། ལག་གདང་དཔུང་སྦྲེལ་ལེའུ་གསར་པ་རྩོམ་པའི‘བདུན་གཅིག’གཟེངས་བསྟོད་ཚོགས་ཆེན་དང་ཏང་དབུ་བརྙེས་ནས་ལོ་102འཁོར་བར་རྟེན་འབྲེལ་ཞུ་བའི་རིག་རྩལ་སྐོང་འཁྲབ”བྱེད་སྒོ་སྤེལ་ཞིང་། འདི་ནི་བྱེད་སྒོ་སྤེལ་ཡུལ་ཡིན་པ།