འདི་ནི་རྒྱལ་ཡོངས་ཀྱི“མི་དམངས་བློ་ཡིད་ཚིམ་པའི་གཞུང་ལས་པའི”མཚན་སྙན་ཐོབ་པའི་མཚོ་སྣ་རྫོང་སླད་མོན་པ་མི་རིགས་ཤང་གི་མི་དམངས་འཐུས་ཚོགས་ཀྱི་ཀྲུའུ་རེན་སྐལ་བཟང་བསྟན་འཛིན་ཡིན་པ།

མཚོ་སྣ་རྫོང་སླད་མོན་པ་མི་རིགས་ཤང་གི་ཡུལ་མིའི་སྡོད་ཁང་གི་ཟུར་ཞིག

མཚོ་སྣ་རྫོང་སླད་མོན་པ་མི་རིགས་ཤང་ཇ་ལོའི་ཞིང་འབྲོག་པའི་ཆེད་ལས་མཉམ་ལས་ཁང་།

མཚོ་སྣ་རྫོང་སླད་མོན་པ་མི་རིགས་ཤང་ཇ་ལོའི་ཞིང་འབྲོག་པའི་ཆེད་ལས་མཉམ་ལས་ཁང་གི་ཇ་ཞིང་།

2022ལོའི་ཟླ་8ཚེས་30ཉིན་གྱི་སྔ་དྲོར། པེ་ཅིང་དུ་རྒྱལ་ཡོངས་ཀྱི“མི་དམངས་བློ་ཡིད་ཚིམ་པའི་གཞུང་ལས་པ”དང“མི་དམངས་བློ་ཡིད་ཚིམ་པའི་གཞུང་ལས་པའི་མཉམ་སྡེབ”ལ་གཟེངས་བསྟོད་བྱེད་པའི་ཚོགས་ཆེན་འཚོགས་པ་དང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་གཟེངས་བསྟོད་ཐོབ་པའི་འཐུས་མིར་བྱམས་བརྩེའི་མཇལ་འཕྲད་གནང་བ་རེད། མཚོ་སྣ་རྫོང་སླད་མོན་པ་མི་རིཌ་ཤང་ཏང་ཨུད་ཀྱི་ཧྲུའུ་ཅི་གཞོན་པ་དང་མི་དམངས་འཐུས་ཚོཌ་ཀྱི་ཀྲུའུ་རེན་བློ་བཟང་བསྟན་འཛིན་ནི་རྒྱལ་ཡོངས་ཀྱི“མི་དམངས་བློ་ཡིད་ཚིམ་པའི་གཞུང་ལས་པ”397གྱི་གྲས་ཤིག་རེད།

མཐའ་སྲུང་མཐའ་བརྟན།

སླད་མོན་པ་མི་རིགས་ཤང་ལ་དུད་ཚང་56དང་མི་151ཡོད་ཅིང་། རྒྱ་གར་དང་འབྲུག་པ་དང་ས་སྦྲེལ་ཡིན་པས། རྒྱལ་ཡོངས་ཀྱི་མཐའ་མཚམས་ཤང་དང་གྲོང་རྡལ་གལ་ཆེན་ཞིག་ཡིན་ལ། ཀྲུང་གོའི་ཆེས་གྲངས་ཉུང་མི་རིགས་མོན་པ་རིགས་ཀྱི་འདུས་སྡོད་ཁུལ་ཡང་རེད། སྐལ་བཟང་བསྟན་འཛིན་གྱི་ཕ་ཚེ་རིང་བསྟན་འཛིན་གུང་ཁྲན་ཏང་ཡོན་ཞིག་ཡིན་ལ། སླད་མོན་པ་མི་རིགས་ཤང་གི་ཏང་ཀྲི་པུའི་ཧྲུའུ་ཅིའི་འགན་བཞེས་མྱོང་ཡོད། 1962ལོར་ཀྲུང་གོ་དང་རྒྱ་གར་གྱི་རང་སྲུང་འགོག་རྒོལ་དམག་འཐབ་སྐབས་དེ་གའི་ས་ཆར་རྒྱུས་མངའ་ཆེ་བའི་ཚེ་རིང་བསྟན་འཛིན་དང་གཞོན་ནུ་དགུ་ཡིས་རང་འགུལ་ངང་བཅིངས་འགྲོལ་དམག་མིར་ལམ་སྣེ་འཁྲིད་ཞོར་དུ་དངོས་ཟོག་སྐྱེལ་བ་དང་གསང་འཕྲིན་འཚོལ་བ་སོགས་རྒྱབ་སྐྱོར་ཤུགས་ཆེན་བྱས་པས། དཔའ་ངར་ཆེ་བའི་དམག་དཔུང་གིས་ཉིན་གསུམ་ལ་དགྲ་བོ་མཐར་སྤྲོད་བཏང་ནས་བླ་ན་མེད་པའི་རྒྱལ་ཁྱབ་ཀྱི་མངའ་ཁོངས་ཆ་ཚང་བསྲུངས་པ་རེད། ཕས་རྟག་ཏུ“ཀྲུང་གོ་གུང་ཁྲན་ཏང་གིས་ང་ཚོ་སྡུག་བསྔལ་གྱི་འོབ་དོངས་ནས་བསྐྱབས་ཏེ་བདེ་སྐྱིད་ལྡན་པའི་འཚོ་བར་རོལ་དུ་བཅུགས་པས། ཆུ་འཐུང་དུས་ཁྲོན་པ་འབྲུ་མཁན་བརྗེད་མི་རུང”ཞེས་རྒྱལ་གཅེས་སློབ་གསོ་བསྐྱོན་གྱི་ཡོད། ཁྱིམ་ཚང་ནི་བྱིས་པའི་སློབ་གྲྭ་དང་པོ་དང་ཕ་མ་ནི་བྱིས་པའི་དགེ་རྒན་ཐོག་མ་རེད་ཟེར་བ་ཅིས་མ་བདེན། ངོ་མཚར་ཆེ་བའི་ཕའི་ལོ་རྒྱུས་དེས་ལོ་ན་གཞོན་པའི་སྐལ་བཟང་བསྟན་འཛིན་གྱིས་གཙོས་པའི་ཕྲུ་གུ་རྣམས་ལ་སེམས་འགུལ་དང་སྐུལ་ལྕག་ཆེན་པོ་ཐེབས།

ལོ་13ལ་སླེབས་སྐབས་སྐལ་བཟང་བསྟན་འཛིན་ཕ་དང་མཉམ་དུ་ཕྱུགས་འཚོ་མཐའ་སྲུང་གི་ལམ་ལ་བཞུད། དུས་དེ་ནས་བཟུང་དབྱར་དགུན་སྟོན་དཔྱིད་དང་། དྲག་ཆར་རླུང་འཚུབ། ཚ་གྲང་ལ་མ་བལྟོས་པར་ཚེ་གང་མཐའ་མཚམས་སྲུང་བའི་དམ་བཅའ་བརྟན་པོ་བཞག 1989ལོར་ལོ་18ལ་སླེབས་མ་ཐག་པའི་སྐལ་བཟང་བསྟན་འཛིན་ཡུལ་མི་ཚོས་གྲོང་མི་ཨུ་ཡོན་ལྷན་ཁང་གི་ཨུ་ཡོན་ལ་བདམས། ཁོང་གིས“མེས་རྒྱལ་གྱི་ས་ཆ་སྦར་མཐིལ་ཙམ་ཡང་སྲུང་བ་ནི་ང་ཚོ་མཐའ་མཚམས་མི་སེར་ཡོངས་ཀྱི་འགན་འཁྲི་རེད་ལ། ང་ནི་གྲོང་མི་ཨུ་ཡོན་ལྷན་ཁང་གི་ཨུ་ཡོན་ཡིན་པས། དེ་བས་ཀྱང་གཡོལ་ཐབས་མེད་པའི་འགན་འཁྲི་ལྕི་པོ་ཡོད”དེ་ནི་སྐབས་དེ་དུས་སྐལ་བཟང་བསྟན་འཛིན་གྱིས་རྒྱུན་དུ་ཤོད་པའི་སྐད་ཆ་རེད་ལ། རྒྱལ་མཚམས་སུ་སྐོར་གཡེང་བྱེད་ཐེངས་རེར། གངས་དཀར་གྱི་ཅོད་པན་བཅིངས་ཤིང་སྔོ་ལྗང་གོས་ཀྱིས་བརྒྱན་པའི་མེས་རྒྱལ་གྱི་རི་ཀླུང་མིག་ལམ་དུ་འཆར་རིམ་བཞིན། མེས་རྒྱལ་ལ་བཅངས་པའི་དགའ་ཞེན་དང་བརྩེ་སེམས་ཟབ་ཏུ་འགྲོ་གི་ཡོད། 1989ལོ་ནས་སྐོམ་པ་ཆུ་འདོད་དང་ལྟོགས་པ་ཟས་ལ་བརྔམས་པ་ལྟར་ཏང་རྩ་འཛུགས་ལ་ཞུགས་པའི་རེ་འདུན་ཞུ་ཡིག་བཅུ་གྲངས་ཙམ་བསྐྱལ། ཁོང་གི་དམ་བཅའ་བརྟན་པོ་དང་བྱ་སྤྱོད་ལ་ཏང་རྩ་འཛུགས་ཀྱིས་ཁས་བླངས་ནས། 1991ལོར་ཏང་ལ་ཞུགས་པའི་རེ་བ་ཡོངས་སུ་མངོན་འགྱུར་བྱུང་ཞིང་། ཁོང་གིས“དེ་ནི་ངའི་མི་ཚེ་འདིར་གཟི་བརྗིད་ཆེ་ཤོས་དང་དོན་སྙིང་ཆེ་ཤོས་ཀྱི་བྱ་བ་རེད”ཅེས་དགའ་ཚོར་ཆེན་པོ་བྱེད།

ལེགས་པོ་རོང་དུ་ཆར་ཞོད་ཆེ་བས། རས་ལྷམ་རྟག་ཏུ་བརློན་པར་འགྱུར་བ་དང་རྐང་མཐིལ་ཆུ་ཡིས་འཚོས་ནས་པགས་པ་ཡང་སེ་ཞུས་ཀྱི་ཡོད། རི་མཐོ་གཡང་གཟར་དུ་འདྲེད་བརྡར་ཤོར་བའི་ཉེན་ཁ་ཤིན་ཏུ་ཆེ་བས། གཟབ་གཟབ་ནན་ནན་བྱེད་དགོས་ཀྱི་ཡོད། སྐོར་གཡེང་གི་ལམ་ཐག་རིང་ཤོས་ལ་སྤྱི་ལེ་40ཙམ་ཡོད་པས། གཟའ་འཁོར་གཅིག་ཙམ་འགོར་གྱི་ཡོད། སྐབས་དེ་དུས་ལུས་ཤེད་ཆེ་ལ་ཐང་བའི་སྟག་ཤར་གཞོན་པ་ཡིན་པས་ཉིན་མོ་ངལ་བས་མནར་ཀྱང་མཚན་གཅིག་ངལ་གསོས་རྗེས་ཉིན་གཉིས་པར་སྔར་བཞིན་སྐྱོད་ཐུབ་ཀྱི་ཡོད། ཡིན་ནའང་ད་ལྟ་བཞིན་འཚོ་བ་ཡག་པོ་མེད་པས། ལྷམ་གསར་པ་དང་ཡག་པོ་མང་པོ་ཉོ་བའི་ཆ་རྐྱེན་མེད་སྟབས། རྐང་མཐིལ་ན་ན་དང་རལ་རལ་བར་གྱོན་གྱི་ཡོད། སྐོར་གཡེང་གི་ལམ་དུ་ལྷམ་རལ་ན་སྨྱུག་མས་ལྷམ་མཐིལ་དང་ལྷམ་རས་བཙེམས་ནས་གྱོན་རྒྱུ་ལས་མ་འདས།

ད་ཆ་ཁོང་གི་བུ་མོ་ཚེ་རིང་དབང་མོ་ཡང་སློབ་ཆེན་ཐོན་ནས་གྲོང་ཚོར་ལོག་སྟེ་མཐའ་མཚམས་སྲུང་བའི་མཉམ་འགོག་རུ་ཆེན་ལ་ཞུགས་ཡོད་པ་དང་། ལོ་16ནས་65མན་གྱི་སྐྱེས་པ་ཚང་མ་མཐའ་མཚམས་སྐོར་གཡེང་རུ་ཁག་ལ་ཞུགས་ཡོད། དེ་སྔ་དང་བསྡུར་ན། སྐོར་གཡེང་ལམ་བུ་སྤྱི་ལེ་40ཙམ་ལ་གཞུང་ལམ་ཡོད་ལ། ཆར་གོས་དང་། ཉལ་གོས། སྟབས་ཟས། ལག་བཞུ། འཕྲིན་གཏོང་སོགས་མཁོ་ཆས་འཛོམས་པས། ཟས་གོས་སྡོད་གསུམ་ལ་སེམས་ཁྲལ་མེད། ཁོང་གིས་གང་ལྟར་ངའི་རྐང་པས་ལུས་པོ་འཁྱོགས་ན་ངས་སྐོར་གཡེང་ནམ་ཡང་མཚམས་འཇོག་མི་སྲིད་ལ། ངའི་དབུགས་ཀྱི་རྒྱུ་བ་མ་ཆད་བར་དུ་མུ་མཐུད་བྱ་གཞག་འདི་མཐའ་འཁྱོངས་བྱེད་ངེས་ཡིན། འདི་ནི་ངའི་དད་སེམས་ཡིན་ཞེས་གྲུང་ཤ་དོད་པའི་མིག་ཟུང་ལས་རེ་བའི་འོད་སྣང་འཁྱུག་བཞིན་བློ་རྩ་བརྟན་པོས་བཤད། ཁོང་གིས་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱེད་པའི་དམ་བཅའ་བརྟན་པོ་འཇོག་མྱོང་ལ། དེ་བས་བྱ་སྤྱོད་དུ་འཁྱོལ་བར་བྱེད་ཀྱི་ཡོད།

སྲོལ་རྒྱུན་རིག་གནས་མི་ཉམས་རྒྱུན་འཛིན།

མོན་པའི་ཨ་ཅེ་ལྷ་མོ་ནི་བོད་ཀྱི་ལྷ་མོའི་གྲུབ་ཆ་གལ་ཆེན་ཞིག་རེད་ལ། ཞབས་བྲོའི་ཕྱག་རྒྱ་སྲོག་ཆགས་ལ་ལད་ཟློས་དང་། རྣམ་ཐར་གཏོང་སྐབས་རམ་སྐྱོར་བྱེད་མཁན་མེད་པར་ཁེར་གཞས་གཏོང་དགོས་པ་སོགས་ས་གནས་ཀྱི་ཁྱད་ཆོས་མངོན་པར་གསལ། སྲོལ་རྒྱུན་གྱི་རིག་གནས་མི་ཉམས་གོང་འཕེལ་གཏོང་ཆེད། ལྷོ་ཁ་གྲོང་ཁྱེར་གྱིས་1986ལོར་མང་ཚོགས་སྒྱུ་རྩལ་ཁང་དུ་སྒྱུ་རྩལ་བ་རྒན་གྲས་གདན་དྲངས་ནས་མོན་པའི་ན་གཞོན་ཁག་གཅིག་ལ་གསོ་སྦྱོང་བྱས་པ་དང་སྐལ་བཟང་བསྟན་འཛིན་སྒྱུ་རྩལ་གྱི་སྐྱེས་སྟོབས་ཤེས་རབ་ལྡན་ལ་བརྩོན་འགྲུས་ཆེ་བས་གྲུབ་འབྲས་གཟེངས་སུ་ཐོན། 2007ལོར་མོན་པའི་ཨ་ཅེ་ལྷ་མོ་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་ལ་ཚུད་པ་དང་། 2008ལོར་སྐལ་བཟང་བསྟན་འཛིན་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་སྟེ། མོན་པའི་ཨ་ཅེ་ལྷ་མོའི་རྒྱལ་ཁབ་རིམ་པའི་རྒྱུན་འཛིན་པར་བདམས། སྐལ་བཟང་བསྟན་འཛིན་སྲོལ་རྒྱུན་གྱི་སྒྱུ་རྩལ་འདི་ལ་དུང་བ་ཟབ་པས། ཕྱིས་འབྱུང་གི་རྒྱུན་འཛིན་ལ་བསམ་བློ་ཡང་ཡང་གཏོང་གི་ཡོད་ལ། རྒྱུན་དུ་སློབ་མ་མི་ཉུང་བ་ཞིག་བསྐྱངས་མཐར། 2017ལོར་མི་16ལས་གྲུབ་པའི་སླད་མོན་པ་མི་རིགས་ཤང་གི་མོན་པའི་ལྷ་མོ་ཚོགས་པ་བཙུགས་པས། གཞི་ནས་སེམས་པ་ལྷོད་ལ་བབས་པ་དང་། སྔ་རྗེས་སུ་ལྷ་སའི་མངོན་མིན་རིག་གནས་ཤུལ་བཞག་འཁྲབ་སྟོན་དང་། ཅང་སུའུ་ཁུན་ལུན་ཁྲང་ཞི་བརྒྱ་ཡི་སྟོན་མོ་སོགས་ལ་ཞུགས་ནས་མི་རྣམས་ལ་མིག་གི་སྟོན་མོ་བཤམས།

སླད་མོན་པ་མི་རིགས་ཤང་གི་རང་བྱུང་ཡུལ་ལྗོངས་ཤིན་ཏུ་མཛེས་ལ། སྲིན་མོ་བྲག་དང་མཁའ་ལྡིང་རྦབ་ཆུ་སོགས་ཡུལ་སྐོར་མཛེས་ལྗོངས་གྲགས་ཅན་ཡང་ཡོད་པས། ཕྱོགས་བཞིའི་ཡུལ་སྐོར་བ་བུང་བའི་ཚོགས་དྲི་ལྡན་མེ་ཏོག་ལ་འཁོར་བ་བཞིན་མ་བོས་མགྲོན་དུ་འཁོར་ནས། གནས་ཚང་ཡང་རག་ཁག་པོ་ཡོད། དུས་ཚོད་དེ་ནི་མོན་པའི་ཨ་ཅེ་ལྷ་མོ་ཚོགས་པར་མཚོན་ན། འཁྲབ་རྩལ་ངོམ་པའི་གོ་སྐབས་བཟང་པོ་ཞིག་རེད་ལ། ཁོ་ཚོས་ཀྱང་ཡུལ་སྐོར་བར་ལྷ་མོའི་སྟོན་མོ་གྲ་རྒྱས་ཤིག་བཤམས་ནས་མོན་པའི་རིག་གནས་ལ་རྒྱུས་མངའ་ལོན་པའི་སྐར་ཁུང་ལྟ་བུར་གྱུར་ཡོད། གཞན་ཡང་། དུས་རྒྱུན་དུས་ཆེན་འཆར་རིམ་བཞིན། མོན་པའི་ཨ་ཅེ་ལྷ་མོ་འཁྲབ་ནས་མོན་པའི་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བ་དང་བཅའ་སྡོད་དཔུང་སྡེར་འཁྲབ་སྟོན་བྱས་ནས་དམག་དམངས་དབར་གྱི་ཉ་ཆུ་ལྟ་བུའི་བརྩེ་སེམས་སྔར་བས་ཟབ་ཏུ་གཏོང་གི་ཡོད།

ད་ཆ་སླད་མོན་པ་མི་རིགས་ཤང་གི་མོན་པའི་ཨ་ཅེ་ལྷ་མོ་ཚོགས་པར་འཁྲབ་ཁང་ཡོད་ལ། མི་རིང་བའི་གོང་སྐལ་བཟང་བསྟན་འཛིན་གྱིས་ལྷོ་ཁ་གྲོང་ཁྱེར་མང་ཚོགས་སྒྱུ་རྩལ་ཁང་གི་སྒྱུ་རྩལ་བ་གྲགས་ཅན་དགེ་རྒན་པ་སངས་ལགས་གདན་དྲངས་ནས《འགྲོ་བ་བཟང་མོའི་རྣམ་ཐར》སྦྱངས་པ་རེད། དེ་ནི་མོན་པའི་ལྷ་མོའི་ལོ་རྒྱུས་སུ་གླེང་རིན་དང་ངོམ་རིན་ཆེན་པོ་ལྡན་པའི་བྱ་བ་ཞིག་ཡིན་ཏེ། ལོ་རྒྱུས་སུ་མོན་པའི་ལྷ་མོར《ཆོས་རྒྱལ་ནོར་བཟང》གི་འཁྲབ་གཞུང་གཅིག་པུ་ལས་མེད་པའི་ལོ་རྒྱུས་མཇུག་འགྲིལ་བས་རེད།

ཁྱད་ལྡན་ཐོན་ལས་དར་སྤེལ།

ད་ཆ་སླད་མོན་པ་མི་རིགས་ཤང་གི་མོན་པ་མི་རིགས་ཀྱི་འཚོ་བ་འབྱོར་ཕྱུག་ལྡན་ཞིང་། 2021ལོར་ཤང་གི་མི་རེའི་ཆ་སྙོམས་ཡོང་འབབ་25000ཟིན་པ་དང་། རྒྱལ་ཁབ་ནས་མཐའ་སྲུང་ནགས་སྲུང་སོགས་ཀྱི་ཁ་གསབ་ཉུང་མཐར་ཡང་22000ལྷག་ཙམ་ཡོད་པས། མཐའ་མཚམས་སུ་གཞིས་ཆགས་ནས་བདེ་སྐྱིད་ལྡན་པའི་འཚོ་བར་རོལ་བ་ལས། ཕྱིར་གླ་པར་འགྲོ་མཁན་གཅིག་ཀྱང་མེད། སྐལ་བཟང་བསྟན་འཛིན་གྱི་སྐད་ཆ་གཡར་ནས་བཤད་ན། འདི་གའི་ཐོན་ལས་གཉེར་མཁན་ཡང་མི་འདང་བས་ཕྱི་ལ་གླ་པ་ཟེར་བ་བསམ་པའི་ཁོ་ཐག་རེད།

དེ་གར་ཆར་ཞོད་ཆེ་ལ། ནགས་ཚལ་སྟུག་པས། རང་བྱུང་ཐོན་ཁུངས་ཕུན་སུམ་ཚོགས་པོ་ཡོད། བྲ་བོའི་སྔས་མགོ་དང་། བྲ་ཆང་། ཤིང་ཕོར། སྨྱུག་མའི་སློ་མ་དང་གཟེབ། ཇ། ཤ་མོ་སོགས་ཁྱད་ལྡན་ཐོན་རྫས་ལ་སྐུ་མགྲོན་ཚོས་དགའ་པོ་བྱེད་ཀྱི་ཡོད་ལ། ཡང་སྒོས་སུ་མོན་པའི་གསོལ་ཇ་རྣམ་གསུམ་དུ་གྲགས་པའི་མོན་ཡུལ་གྱི་ཇ་གཡུ་ལོ་རྐང་གཅིག་གི་སྙན་པའི་བ་དན་ཕྱོགས་བཞིར་བསྒྲགས་ནས། མཁོ་སྤྲོད་མི་འདང་བའི་སྣང་ཚུལ་རྒྱུན་དུ་ཐོན་གྱི་ཡོད། 1968ལོར་རྒྱལ་ཁབ་ནས་མ་དངུལ་བཏང་ནས་ཇ་ཤིང་འདེབས་པའི་ཚོད་ལྟ་ལམ་ལྷོངས་བྱུང་བ་དང་། 1971ལོར་ཇ་བཟོ་གྲྭ་དངོས་སུ་བཙུགས། དམངས་གཙོའི་བཅོས་སྒྱུར་གྱི་རྗེས་སུ། ཇ་བཟོ་གྲྭ་ཐོར་བ་དང་ཇ་ཞིང་ཐེམ་དུད་ལ་བགོས། ལག་རྩལ་ཡག་པོ་ཁོང་དུ་མ་ཆུད་པ་དང་གཡོག་བྱེད་ཡག་པོ་མ་བྱུང་བ་སོགས་ཀྱིས་རྐྱེན་པས་དུད་ཚང་སོ་སོའི་ཇ་ཡི་སྤུས་ཚད་མི་འདྲ་ལ། ཚོང་རྟགས་དང་གོང་ཚད་ཀྱང་གཅིག་གྱུར་མེད་པས། ཁྲོམ་རའི་འགྲན་རྩོད་ལས་ཕམ།

2013ལོར་སླད་མོན་པ་མི་རིགས་ཤང་ཞིང་འབྲོག་པའི་ཇ་ལོ་ཆེད་ལས་མཉམ་ལས་ཁང་བཙུགས་པ་དང་། ཐོག་མའི་དུས་སུ་མི་མང་པོ་ཞིག་ལ་གདེང་ཚོད་དང་ཡིད་ཆེས་དེ་ཙམ་མེད་པས། མཉམ་ལས་ཁང་ལ་ཞུགས་འདོད་དེ་ཙམ་བྱེད་ཀྱི་མེད། སྐལ་བཟང་བསྟན་འཛིན་གྱིས་ཐེ་ཚོམ་སྤུ་ཙམ་མེད་པར་རང་ཁྱིམ་གྱི་ཇ་ཞིང་མུའུ་གཅིག་མཉམ་ལས་ལ་བཞག་པར་བཟའ་ཟླས་འཁང་ར་བྱེད་ནའང་། ང་ནི་འགོ་ཁྲིད་ལས་བྱེད་པ་ཡིན་པས། ངས་མིག་དཔེ་མ་བསྟན་ན་ག་ལ་འགྲིག་ཅེས་ཁ་ཏ་བསླབ་བྱ་བྱས།

ད་ཆ་མཉམ་ལས་ཁང་ལ་ཞུགས་པའི་མང་ཚོགས་151ཡོད་པ་དང་། ཇ་ཞིང་མུའུ་210ཙམ་ཟིན་ཞིང་། ཨན་ཧུའེ་ཡི་བོད་སྐྱོར་ལག་རྩལ་བའི་བརྒྱུད་རོགས་འཁྲིད་གསུམ་གྱི་འོག ཇ་འདེབས་ལག་རྩལ་རྐང་འཛིན་པ་གསུམ་གསོ་སྐྱོང་ཐུབ་པ་དང་། མཉམ་ལས་ཁང་གི་ལས་མི་ཡང་ཁག་དང་ཁག་བྱས་ནས་ཨན་ཧུའེ་ཧོང་ཧྲན་དུ་སློབ་སྦྱོང་ལ་བཏང་བས། ལག་རྩལ་ཡག་ཏུ་ཕྱིན་ནས། ཇའི་ཐོན་རྫས་མི་འདྲ་བ་བཞི་ཙམ་ཁྲོམ་རར་བཏོན་ཡོད་པ་རེད། 2021ལོར་ཇ་ལོ་མཉམ་ལས་ཁང་ལ་ཡོང་འབབ་སྒོར་ཁྲི་321.55བྱུང་བ་ལས། མང་ཚོགས་ལ་གླ་ཆ་སྒོར་ཁྲི་103སྤྲད་པ་དང་། ཇ་ཞིང་གི་ས་གླ་དང་བགོ་འགྲེམས་ལ་སྒོར་ཁྲི་104སྤྲད་པ། སློབ་ཆེན་སློབ་མར་སྐུལ་ལྕག་དང་དཀའ་ངལ་ཡོད་པའི་མང་ཚོགས་ལ་འཚམས་འདྲི་སོགས་ལ་སྒོར་ཁྲི་10.5བཏང་བ་རེད།

2012ལོའི་ཟླ་དགུ་པར་སྐལ་བཟང་བསྟན་འཛིན་རང་སྐྱོང་ལྗོངས་ཀྱི་གྲོང་ཚོའི་ལས་བྱེད་པ་ཕུལ་བྱུང་ཤང་དང་གྲོང་རྡལ་གྱི་གཞུང་ལས་པར་བསྒྱུར་བའི་གཞུང་ལས་པ་ཁག་དང་པོའི་གྲས་སུ་ཚུད་པ་དང་། ཕྲག་གི་འགན་འཁྲི་མང་དུ་དང་ལྕི་རུ་ཕྱིན་ནའང་། གྲོང་ཚོ་དང་ཤང་གི་དོན་དག་ཆེ་ཆུང་ཚང་མར་དོ་ཁུར་བྱེད་ཀྱི་ཡོད་ལ། ཡང་སྒོས་སུ་མཐའ་མཚམས་སྐོར་གཡེང་གི་དོན་ཆེན་ལ་ལྷོད་གཡེང་གཏན་ནས་གཏོང་གི་མེད། གང་ལྟར་ཁོང་སླད་མོན་པ་མི་རིགས་ཤང་ལ་ཡོད་ན། ཞོགས་པ་ལངས་མ་ཐག་གནས་ངེས་མེད་དུ་རི་ལམ་ཀྱག་ཀྱོག་བརྒྱུད་ནས་སྤྱི་ལེ་བཞི་ལྔ་ཡི་སར་སྐོར་གཡེང་དུ་འགྲོ་གི་ཡོད།

ད་ལོ་ལོ་50ལྷག་ཙམ་ལ་སླེབས་པའི་སྐལ་བཟང་བསྟན་འཛིན་གཟུགས་སྟོབས་དེ་ཙམ་ཆེན་པོ་མེད་ནའང་། རྐང་པ་ཚུགས་ཤིང་གོམ་པ་བརྟན་ལ། གྲུང་ཤ་དོད་པའི་མིག་ཟུང་ལས་ཡིད་ཆེས་དང་རེ་བའི་འོད་སྣང་གིས་ཁེངས། ཁོང་གི་ཆ་སྒམ་གྱི་སྟེང་དུ་གཟེངས་རྟགས་དང་གཟེངས་བསྟོད་ལག་ཁྱེར་གྲངས་ལས་འདས་པ་བརྩིགས་ཡོད་ལ། དཀྱིལ་དུ་བཞག་པའི་རྒྱལ་ཡོངས་ཀྱི“མི་དམངས་བློ་ཡིད་ཚིམ་པའི་གཞུང་ལས་པ”ཡི་གཟེངས་རྟགས་དེ་ནི་རྒྱུ་སྐར་དབུས་ཀྱི་ཀུན་གསལ་ཟླ་བ་བཞིན་འོད་མདངས་རྣམ་པར་བཀྲ