གྲོང་གསེབ་དར་རྒྱས་ལ་རམ་འདེགས་ནུས་ལྡན་བྱས་ནས་ཞིང་འབྲོག་པར་རྒྱུན་མཐུད་འབབ་འཕར་ཡོང་བར་སྐུལ་ཁྲིད་བྱ་ཆེད། ཉིན་ཤས་གོང་ལྷ་ས་གྲོང་ཁྱེར་ཚོང་དོན་ཅུས་ཀྱིས་གཙོ་གཉེར་བྱས་པ་དང་། ལྷ་ས་གྲོང་ཁྱེར་མཁོ་འཚོང་མཉམ་ལས་ཁང་དང་ཅང་སུའུ་ཞིང་ཆེན་ཞིང་ཞོར་ཐོན་རྫས་འགྲེམས་སྟོན་འགྲེམས་འཚོང་ལྟེ་གནས་ཀྱིས་གཉེར་འགན་འཁུར་བའི“ལྷ་སའི་ཅ་དངོས་དག་པོའི”ཐོན་ཚོང་སྦྲེལ་མཐུད་ཚོགས་འདུ་ཅང་སུའུ་ཞིང་ཆེན་ཞིང་ཞོར་ཐོན་རྫས་ཀྱི་འགྲེམས་སྟོན་འགྲེམས་འཚོང་ལྟེ་གནས་སུ་འཚོགས་པ་རེད།

བོད་སྐྱོར་ཞིང་ཆེན་དང་གྲོང་ཁྱེར་དུ“ལྷ་སའི་ཅ་དངོས་དག་པོའི”བྲིན་འཚོང་ཐབས་ལམ་ཕྱོགས་ཡོངས་ནས་ཡངས་སུ་གཏོང་ཆེད། ད་ཐེངས་ཀྱི་སྦྲེལ་མཐུད་ཚོགས་འདུ་འཚོགས་རིང་ལྷ་སའི་གཙང་ཨ་རྨ་ཚོང་དོན་ཚད་ཡོད་ཀུང་སི་དང་། བོད་ལྗོངས་སའི་གོ་ལའི་སྣེ་གསུམ་པའི་ཚོང་གཉེར་ཚད་ཡོད་ཀུང་སི། བོད་ལྗོངས་ཆེས་བྲིན་ནས་བདེ་ཐང་ཚན་རྩལ་ཚད་ཡོད་ཀུང་སི་སོགས་ལྷ་སའི་ཁེ་ལས་12ཀྱི་ཐོན་རྫས་རིགས་150ལྷག་ཙམ་ས་གནས་ས་ཐོག་ཏུ་ངོ་སྦྱོར་བྱས་པ་དང་ཅང་སུའུ་ཅིན་དབྱིང་ཚོགས་པ་དང་། ཅང་སུའུ་སུའུ་མེ་ཏ་ཚོགས་པ། ཅང་སུའུ་ཧུའེ་ཧུང་ཚོགས་པ། ཅང་སུའུ་འགྲིམ་འགྲུལ་མ་རྐང་ཚོད་འཛིན་སོགས་གྲགས་ཅན་ཁེ་ལས་30ལྷག་ཙམ་གདན་ཞུས་ལྟར་ཚོགས་འདུར་ཞུགས་ཡོད་པ་རེད།

ལྷ་ས་གྲོང་ཁྱེར་ཚོང་དོན་ཅུས་ཀྱི་ཏང་ཙུའུ་ཡི་ཁོངས་མི་དང་ཅུས་ཀྲང་གཞོན་པ་སུན་ཀོང་ཡའོ་ཡིས། ད་ཐེངས་ཀྱི་ཐོན་ཚོང་སྦྲེལ་མཐུད་ཚོགས་འདུས་ལྟེ་བའི་གྲོང་ཁྱེར་གྱི“ལྟེ་བ་སྟོབས་ཆེར་གཏོང་བའི”འཐབ་ཇུས་ལ་དམིགས་ཏེ། ཚོགས་སྒྲིག་རྣམ་པའི་ཁྲོམ་རའི་བོད་སྐྱོར་ལ་བརྟེན་ནས་ལྷ་ས་གྲོང་ཁྱེར་གྱི་ཁྱད་ལྡན་ཐོན་རྫས་དང་གྲོང་ཁྱེར་གྱི་མིང་བྱང་གསར་པ་གཏོད་པའི་ལས་དོན་ལ་རམ་འདེགས་བྱ་རྒྱུ་དམ་འཛིན་བྱ་གཞིར་བྱས་ནས། ལྷ་སའི་ཞིང་ལས་ཐོན་རྫས་དྲིལ་བསྒྲགས་ཡག་པོ་བྱེད་པ་དང་འཚོང་ལམ་གནད་འཁེལ་བཙལ་བ་མ་ཟད། ད་དུང་ཞིང་ལས་ཐོན་རྫས་ལ་ཁྲོམ་རའི་ལས་སྟེགས་མཁོ་འདོན་ཡང་བྱས་ནས་གྲོང་གསེབ་དར་རྒྱས་ལ་རམ་འདེགས་བྱས་ཡོད་པ་རེད།

ཤེས་རྟོགས་བྱུང་བར་གཞིགས་ན། འདི་ལོའི་ཟླ་5པ་ནས་བཟུང་ལྷ་སའི་འགྲེམས་ཁང་ཅང་སུའུ་ཞིང་ཆེན་ཞིང་ཞོར་ཐོན་རྫས་འགྲེམས་སྟོན་འགྲེམས་འཚོང་ལྟེ་གནས་སུ་བཅའ་བཞུགས་བྱས་ཚུན། ས་གནས་གཉིས་དབར་གྱི་ཞིང་ལས་ཐོན་རྫས་མཉམ་སྦྲེལ་མཉམ་མཐུད་མངོན་འགྱུར་བྱུང་ཡོད། བོད་ཀྱི་ཞིང་ལས་ཐོན་རྫས་ཀྱི་བྲིན་འཚོང་ཐབས་ལམ་སྔར་བས་ཡངས་སུ་བཏང་ནས། བོད་ཀྱི་སྤུས་ལེགས་ཁྱད་ལྡན་ཞིང་ལས་ཐོན་རྫས་ཀྱི་སྐད་གྲགས་ཆོད་ཚད་དང་ཤུགས་རྐྱེན་ཐེབས་ཚད་ཆེ་རུ་བཏང་སྟེ། སྐུ་མགྲོན་དེ་བས་མང་བའི་ཡིད་དབང་འགུག་ཆེད། དྲ་ཐོག་ནས“སོས་ལ་སྣ་ཁ་འཛོམས་པའི་ཐོན་རྫས”ཀྱི་ལས་སྟེགས་བཏོད་དེ་བོད་ལྗོངས་ཞིང་ལས་ཐོན་རྫས་བཙོངས་ནས། ཞིང་འབྲོག་མང་ཚོགས་འབབ་འཕར་ཕྱུག་འགྱུར་ཡོང་བར་རྒྱུན་མཐུད་སྐུལ་ཁྲིད་བྱེད་རྒྱུ་རེད།

བྱེད་སྒོ་སྤེལ་ཉིན། ཚོགས་ཞུགས་མི་སྣ་དང་ཁེ་ལས་ཀྱི་འཐུས་མིས་ཞིང་ཆེན་དང་གྲོང་ཁྱེར་ཁག་གི་འགྲེམས་སྟོན་འགྲེམས་འཚོང་ཁང་དང་དེ་བཞིན“ལྷ་སའི་ཅ་དངོས་དག་པོའི”འགྲེམས་ཁང་ལ་སོ་སོར་ལྟ་སྐོར་བྱས་པ་དང་། ཚོགས་ཞུགས་ཁེ་ལས་ཀྱིས་ད་ཐེངས་ཀྱི་སྦྲེལ་མཐུད་ཚོགས་འདུར་ཞུགས་ནས་ཉམས་མྱོང་མང་པོ་ཐོབ་བྱུང་། སྲིད་གཞུང་དང་ཁེ་ལས་བློ་སེམས་གཅིག་མཐུན་གྱི་རྣམ་པ་བཟང་པོ་དེས་མི་ཚང་མས་མཉམ་དུ་འབད་བརྩོན་བྱས་ཏེ་ལྷ་ས་གྲོང་ཁྱེར་གྱི་ཁྱད་ལྡན་ཐོན་རྫས་ཁྲོམ་རར་འདོན་ཐུབ་པའི་ཡིད་ཆེས་དེ་བས་ཆེ་རུ་ཕྱིན་སོང་ཞེས་གཅིག་རྗེས་གཉིས་མཐུད་ངང་བཤད།