ལྷུན་གྲུབ་རྫོང་ར་སྒྲེང་རྒྱལ་ཁབ་ནགས་ཚལ་སྤྱི་གླིང་ནི་སྤྱི་ལེ་30ལྷག་ཙམ་མུ་ཁྱུད་དུ་ཆགས་པའི་ར་སྒྲེང་ལུང་ཤུར་གྱི་དམིགས་བསལ་མཛེས་ལྗོངས་ཤིག་ཡིན་ཞིང་། རི་སྔོན་ཆུ་དྭངས་བ་དང་གནའ་བོའི་ཤུག་པས་བསྐོར་བ། ཁོར་ཡུག་སྐྱིད་སྣང་དོད་པས། དེ་ནི་བོད་དུ་མཐོང་དཀོན་པའི་རང་བྱུང་ཡུལ་སྐོར་མཛེས་ལྗོངས་ཁུལ་ཞིག་ཡིན། སྤྱི་གླིང་དུ་ཤུག་པའི་སྡོང་རྒན་ཁྲི་22ཡོད་པ་དེ་དག་ལ་ལོ་ངོ་300ནས་500བར་གྱི་ལོ་ཚད་ལྡན་པས་དེ་ནི་རང་བྱུང་སྲུང་སྐྱོབ་ཁུལ་གལ་ཆེན་ཞིག་ཡིན།

ལྷུན་གྲུབ་རྫོང་ར་སྒྲེང་རྒྱལ་ཁབ་ནགས་ཚལ་སྤྱི་གླིང་གི་རྩ་ཆེའི་སྲོག་ཆགས་དང་རྩྭ་རྩི་ཤིང་གི་ཐོན་ཁུངས་ལ་སྲུང་སྐྱོང་ཡག་པོ་བྱ་ཆེད། ཐང་མགོ་ཤང་གིས་ནགས་སྲུང་བའི་དཔུང་ཁག་བཙུགས་ནས་ཉིན་ལྟར་སྐོར་གཡེང་ཐེངས་གཉིས་བྱེད་ཀྱི་ཡོད། “ར་སྒྲེང་རྒྱལ་ཁབ་ནགས་ཚལ་སྤྱི་གླིང་ལ་སྲུང་སྐྱོང་ཡག་པོ་བྱེད་པ་ནི་ང་ཚོ་ཚང་མའི་འགན་འཁྲི་ཡིན”འདུ་ཤེས་དེ་ནགས་སྲུང་བ་ཚང་མའི་སེམས་ནང་བརྟན་པོར་བཟུང་ཡོད་ལ་ཁོང་ཚོས་རང་ཉིད་ཀྱི་བྱ་སྤྱོད་དངོས་ཀྱི་ཐོག་ནས་རང་བྱུང་ཁམས་ཆེ་མོ་སྲུང་སྐྱོང་བྱེད་བཞིན་ཡོད།

མིག་སྔར་ཐང་མགོ་ཤང་དུ་ཆེད་བསྐོས་ནགས་སྲུང་བ་194ཡོད་པ་ཕུད་ད་དུང་སྐྱེ་ཁམས་ལས་གནས་147དང་། ཤང་རིམ་པའི་སྤྱི་ཁྱབ་ཆུ་དཔོན་1དང་ཆུ་དཔོན་1 གྲོང་ཚོ་རིམ་པའི་ཆུ་དཔོན་4 ཤང་གི་ཆུ་ལམ་བདག་སྐྱོང་བ་50བཅས་ཡོད་པ་རེད།

ཐང་མགོ་ཤང་ཐང་མགོ་གྲོང་ཚོའི་ཏང་གི་སྤྱི་ཁྱབ་ཀྲི་པུའི་ཧྲུའུ་ཅི་གཞོན་པ་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་སངས་རྒྱས་ཀྱིས“ང་ཚོ་ཐང་མགོ་གྲོང་ཚོར་ཆུ་ལམ་བདག་སྐྱོང་བ་16ཡོད། ཁོང་ཚོས་རྟག་པར་ཆུ་འགྲམ་དུ་གཙང་སྦྲ་བྱེད་ཀྱི་ཡོད་པ་དང་གཟའ་འཁོར་རེར་མི་གཉིས་བཀོད་སྒྲིག་བྱས་ནས་ལྟ་སྐུལ་དོ་དམ་བྱེད་ཀྱི་ཡོད། ནམ་རྒྱུན་གཙོ་བོ་གཙང་ཆུ་རྒྱས་ཚུལ་ལ་སྐོར་ཞིབ་དང་གད་སྙིགས་གཙང་སེལ་བྱེད་ཀྱི་ཡོད”ཅེས་བཤད།

ཉེ་བའི་ལོ་ཤས་རིང་། ཐང་མགོ་ཤང་གིས་ཏང་འཛུགས་སྐྱོང་གིས་སྐྱེ་ཁམས་ཤེས་དཔལ་འཛུགས་སྐྱོང་ལ་ཁྲིད་སྟོན་བྱ་རྒྱུ་མཐའ་འཁྱོངས་བྱས་ཏེ། “རི་གཉིས”ཀྱི་འདུ་ཤེས་བརྟན་པོ་འཛུགས་པ་དང་ལག་ལེན་བསྟར་ཏེ་ཁྱད་ཆོས་མངོན་གསལ་དོད་དུ་བཏང་བ་དང་ཞན་ཆ་གསབ་ནས་རྒྱུན་གཏན་གྱི་མེ་ཟོན་ཤེས་བྱ་སྒྲོག་འགྲེལ་དང་། བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར། རི་སྐྱེས་སྲོག་ཆགས་སྐྱོབ་བཅོས་སོགས་ཀྱི་ལས་དོན་ཁྱོན་ཡོངས་ནས་ཡག་པོ་བསྒྲུབས་ཡོད། “འགྲམ་བཞིར་ཤིང་འཛུགས་པ”དང“མཛེས་སྡུག་ལྡན་པའི་གྲོང་གསེབ·བདེ་སྐྱིད་ལྡན་པའི་ཁྱིམ་གཞིས”བསྐྲུན་རྒྱུ་དམ་འཛིན་བྱ་གཞིར་བྱས་ཏེ། ཤིང་སྡོང་རྐང་4000ལྷག་ཙམ་བཙུགས་པ་དང་གད་སྙིགས་ཏུན་20ལྷག་ཙམ་གཙང་སེལ་བྱས་ཡོད། མིག་སྔར་ལག་ལེན་བསྟར་བཞིན་པའི་ཐང་མགོ་གྲོང་ཚོའི་གྲོང་གསེབ་དར་རྒྱས་ཀྱི་རྣམ་གྲངས་ཀྱིས་བཟའ་བཏུང་དང་། ཞག་སྡོད། གླིང་ཁ་གཏོང་བ། དམངས་སྲོལ་གོམས་འདྲིས་ཉམས་ལེན་བཅས་ཟུང་འབྲེལ་བྱས་ཏེ་ཐང་མགོ་ཡུལ་སྐོར་གྲོང་རྡལ་ཆུང་ངུ་ཧུར་ཐག་བཏོད་ནས་ས་ཁོངས་ཧྲིལ་པོའི་ཡུལ་སྐོར་འཕེལ་རྒྱས་ཀྱི་རྣམ་པ་གསར་པ་སྔར་བས་རྒྱ་ཆེར་བཏང་ཡོད། 2022ལོར་ཐང་མགོ་ཤང་གིས་ཡུལ་སྐོར་བ་མི་ཐེངས་ཁྲི་1ལྷག་ཙམ་ལ་སྣེ་ལེན་ཞུས་པར་ཡོང་འབབ་ཁེ་གཙང་སྒོར་ཁྲི་200ལྷག་ཙམ་བྱུང་ཡོད།

ཐང་མགོ་ཤང་ཏང་ཨུད་ཀྱི་ཧྲུའུ་ཅི་གཞོན་པ་ཤང་ཀྲང་ཐུབ་བསྟན་དགེ་ལེགས་ཀྱིས“ང་ཚོ་ཐང་མགོ་ཤང་དུ་སྐྱེ་ཁམས་ཁོར་ཡུག་ཕྱོགས་བསྡུས་བཅོས་སྐྱོང་གི་བྱ་ཐབས་བཟོས་ནས་གཙོ་གནད་ཁྱབ་ཁོངས་ཀྱི་སྐྱེ་ཁམས་སླར་གསོ་བྱས་ཡོད་པ་དང་། ཤང་ཡོངས་ཀྱིས་ཤུགས་བརྒྱབ་ནས‘རི་གཉིས’ཀྱི་ལག་ལེན་རྟེན་གཞི་འཛུགས་གཏོད་ལས་དོན་འདུན་ཞུ་བྱས་ཡོད། མིག་སྔར་ཁོངས་གཏོགས་ཁུལ་གྱི་སྲིད་འཛིན་གྲོང་ཚོ་4དང་དེ་བཞིན་ཤང་ཡོངས་རང་སྐྱོང་ལྗོངས་རིམ་པའི་སྐྱེ་ཁམས་ཤེས་དཔལ་འཛུགས་གཏོད་ཀྱི་དཔེ་སྟོན་ཁུལ་དུ་གྱུར་ཡོད”ཅེས་ངོ་སྤྲོད་བྱས།

2022ལོའི་ཚུན་དུ་ལྷ་ས་གྲོང་ཁྱེར་གྱིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སློབ་སྦྱོང་དང་གསོ་སྦྱོང་བྱ་སྤྱོད་དང་། སྐྱེ་ཁམས་སྲུང་སྐྱོང་སླར་གསོའི་བྱ་སྤྱོད། ཐཱན་ཚད་སྙོམ་སྦྱོར་གྱི་དཔེ་སྟོན་འཛུགས་གཏོད་བྱ་སྤྱོད། སྦགས་བཙོག་འགོག་བཅོས་འགག་སྒྲོལ་བྱ་སྤྱོད། སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་འཛུགས་གཏོད་བྱ་སྤྱོད། སྐྱེ་ཁམས་རིག་གནས་སྐྱེད་སྲིང་བྱ་སྤྱོད། ལྗང་མདོག་ཐོན་ལས་འཕེལ་རྒྱས་བྱ་སྤྱོད། སྐྱེ་དངོས་སྣ་མང་རང་བཞིན་སྲུང་སྐྱོང་བྱ་སྤྱོད། གྲོང་གསེབ་ཀྱི་སྐྱེ་ཁམས་དར་རྒྱས་བྱ་སྤྱོད། ཁོར་ཡུག་བཅོས་སྐྱོང་དེང་རབས་ཅན་གྱི་བྱ་སྤྱོད་བཅས“བྱ་སྤྱོད་ཆེན་པོ་བཅུ”གཙོ་གནད་ཐོག་ལག་བསྟར་བྱས་ཤིང་། བརྗོད་དོན་གཙོ་བོའི་དྲིལ་བསྒྲགས་ཐེངས་340ལྷག་ཙམ་བྱས་པ་དང་། 2022ལོར་རིམ་རྩིས་བྱས་ན་ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭས་སྡོང་ཕྲུག་རྐང་ཁྲི་1700ལྷག་ཙམ་བཙུགས་ཡོད། ལྷ་ས་གྲོང་ཁྱེར་དང་དེ་བཞིན་རྫོང(ཆུས)3གིས་རྒྱལ་ཁབ་དང་རང་སྐྱོང་ལྗོངས་རིམ་པའི་སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་ཁུལ་འཛུགས་གཏོད་བྱས་པ་དང་འབྲེལ་མིང་བཏགས་པ། ཤང(གྲོང་རྡལ)53དང་གྲོང་ཚོ(གྲོང་ལྷན)230ཡིས་རང་སྐྱོང་ལྗོངས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་དཔེ་སྟོན་ཁུལ་འཛུགས་གཏོད་བྱས་པ། རྒྱལ་ཁབ་རིམ་པའི་ལྗང་མདོག་བཟོ་གྲྭ་4དང་ལྗང་མདོག་མཁོ་སྤྲོད་འཁོར་འབྲེལ་གྱི་དོ་དམ་ཁེ་ལས་1ཁ་སྣོན་བྱས་པ། རིམ་རྩིས་བྱས་ན་རྒྱལ་ཁབ་རིམ་པའི“ལྗང་མདོག་ཚོང་ར”2བསྐྲུན་པ་དང་། 2022ལོའི་སྐྱེ་ཁམས་ཁ་གསབ་མ་དངུལ་སྒོར་དུང་ཕྱུར་1.97དོན་འཁྱོལ་བྱས་པ། རྩྭ་ཐང་སྐྱེ་ཁམས་སྲུང་སྐྱོང་གི་ཁ་གསབ་བྱ་དགའི་དངུལ་སྒོར་དུང་ཕྱུར་1.06དོན་འཁྱོལ་བཅས་བྱས་ནས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ལས་དོན་ལ་དུས་མཚམས་རང་བཞིན་གྱི་གྲུབ་འབྲས་ཐོབ་ཡོད་པ་རེད།