2023ལོའི་བོད་ལུགས་གསོ་རིག་གི་ཚད་ལྡན་ཅན་གྱི་ལས་དོན་ལ་སྐུལ་འདེད་གཏོང་ཆེད། ཉེ་ཆར་བོད་རང་སྐྱོང་ལྗོངས་བོད་ལུགས་གསོ་རིག་གི་ཚད་ལྡན་ཅན་ལག་རྩལ་ཨུ་ལྷན་གྱིས་2023ལོའི་ཚོགས་འདུ་ཐེངས་དང་པོ་འཚོགས་ནས་ལྗོངས་ཡོངས་ཀྱི་བོད་ལུགས་གསོ་རིག་གི་ཚད་ལྡན་ཅན་གྱི་ལས་དོན་སྤེལ་འགོ་ཚུགས་ཚུན་ཐོབ་པའི་གྲུབ་འབྲས་གཙོ་བོར་ཕྱོགས་སྡོམ་བྱས་ནས། གོམ་སྟབས་རྗེས་མའི་ལས་དོན་གྱི་བསམ་ཕྱོགས་དང་ཉེ་དུས་ཀྱི་གཙོ་གནད་ལས་དོན་དང་ལས་འགན་བཀོད་སྒྲིག་བྱས་པ་རེད། ཚོགས་འདུའི་ཐོག་2023ལོའི་ལོ་འཁོར་གྱི་ཚད་ལྡན་ཅན་གྱི་གཙོ་གནད་རྣམ་གྲངས《བོད་ལུགས་གསོ་རིག་གི་ཁྱད་ལྡན་ནད་བརྟག་སྨན་བཅོས་ཀྱི་ལག་རྩལ་ཚད་གཞི་16》སོགས་ཞིབ་འཇུག་རྣམ་གྲངས་ཁག་5ཞིབ་འཇུག་གཏན་འཁེལ་བྱས་ཏེ། བོད་ལུགས་གསོ་རིག་གི་ཚད་ལྡན་མ་ལག་རིམ་བཞིན་འཛུགས་པ་དང་འཐུས་སྒོ་ཚང་དུ་གཏོང་བ་དང་བོད་ལུགས་གསོ་རིག་རྒྱལ་སྤྱི་ཅན་གྱི་གོམ་སྟབས་ལ་སྐུལ་འདེད་གཏོང་ཆེད་རམ་འདེགས་བྱས་ཡོད་པ་རེད།