དར་ཞིང་རྒྱས་པའི་བོད་ལྗོངས་གསར་པར་སྐལ་བཟང་མེ་ཏོག་རབ་ཏུ་བཞད། ལག་ཏུ་བཀྲ་ཤིས་མཇལ་དར་ཁྱེར་ནས་ཕྱོགས་བཞི་མཚམས་བརྒྱད་ཀྱི་སྐུ་མགྲོན་བསུ། ལྗོངས་ཡོངས་ཀྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་གཏིང་ཟབ་སྤེལ་བའི་མཚམས་སུ། ས་མཐོའི་བུ་ཕྲུག་གིས་རེ་སྒུག་ཟབ་མོ་དང་ཕྱོགས་བཞི་མཚམས་བརྒྱད་ཀྱི་སྐུ་མགྲོན་གྱིས་བརྩེ་སེམས་ཟབ་མོ་བཅངས་ཤིང་། ཀུན་གྱིས་དོ་སྣང་ཆེན་པོ་བྱེད་པའི་ཀྲུང་གོའི་བོད་ལྗོངས་ཡུལ་སྐོར་དང་རིག་གནས་ཀྱི་རྒྱལ་སྤྱིའི་འགྲེམས་ཚོགས་སྐབས་ལྔ་པ་གཟབ་རྒྱས་ངང་འགོ་ཚུགས་པ་རེད། ང་ཚོས་འགྲེམས་ཚོགས་གཟབ་རྒྱས་ངང་འགོ་ཚུགས་པར་སྤྲོ་སེམས་འཁོལ་པོས་རྟེན་འབྲེལ་ཞུས་ནས་སྒོ་དབྱེའི་ཁ་ཆད་དང་། མཉམ་ལས་ཀྱི་ཁ་ཆད། གཉིས་ཕན་གྱི་ཁ་ཆད་བཅས་ལ་མཉམ་དུ་ཞུགས་མཁན་གྱི་རྒྱལ་ཁབ་ཕྱི་ནང་གི་སྐུ་མགྲོན་རྣམས་ལ་ཟོལ་མེད་ཀྱི་འཚམས་འདྲི་དང་སྨོན་འདུན་བཟང་པོ་ཞུ་རྒྱུ་ཡིན།

བོད་ལྗོངས་འགྲེམས་ཚོགས་ནི་སྤྱི་ཚོགས་རིང་ལུགས་ཀྱི་བོད་ལྗོངས་གསར་པའི་ཡིད་དབང་འཕྲོག་ཤུགས་ཕྱོགས་ཡོངས་ནས་མངོན་པའི་གསེར་གྱི་མིང་བྱང་ཞིག་དང་། ཀྲུང་གོའི་བོད་ལྗོངས་ཀྱི་རྒྱལ་སྤྱིའི་རང་བཞིན་གྱི་རྩེར་སོན་འགྲེམས་ཚོགས་གལ་ཆེན་དང་ཕྱི་ཕྱོགས་སྒོ་དབྱེའི་ལས་སྟེགས་གལ་ཆེན་ཞིག་རེད། 2014ལོ་ཚུན། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། དེ་བཞིན་ཀྲུང་དབྱང་གི་འབྲེལ་ཡོད་སྡེ་ཚན་གྱི་ཐུགས་ཁུར་དང་མཛུབ་ཁྲིད་འོག་བོད་ལྗོངས་འགྲེམས་ཚོགས་སྐབས་བཞི་རྒྱལ་ཁའི་ངང་གཉེར་བར་གཡུར་དུ་ཟ་བའི་གྲུབ་འབྲས་ཐོབ་སྟེ། འཛམ་གླིང་གིས་བོད་ལྗོངས་ཤེས་རྟོགས་ཐུབ་པ་དང་བོད་ལྗོངས་འཛམ་གླིང་དང་མཉམ་དུ་འདྲེས་པའི་སྐར་ཁུང་གལ་ཆེན་ཞིག་ཏུ་གྱུར་ནས་བོད་ཀྱི་འཕེལ་རྒྱས་དང་ཡར་ཐོན་ལ་སྐུལ་འདེད་གཏོང་བར་དམིགས་བསལ་གྱི་ནུས་པ་བཏོན་ཡོད། སྐབས་འདིའི་བོད་ལྗོངས་འགྲེམས་ཚོགས་ཀྱིས“བདེ་སྐྱིད་ལྡན་པའི་བོད་ལྗོངས་གསར་པར་ཅི་དགར་རོལ། ལག་གདང་སྦྲེལ་ནས་རྒྱང་སྐྱོད་ལམ་བུ་གསར་པ་གཏོད”ཅེས་པ་བརྗོད་དོན་གཙོ་བོར་བྱས་ཏེ་གཙོ་དོན་གླེང་སྟེགས་དང་། འགྲེམས་སྟོན་དང་བཤམས་སྟོན། དཔལ་འབྱོར་ཚོང་དོན་དང་ངོ་འཕྲད་གྲོས་མོལ་བཅས་གཞི་གཅིག་ཏུ་འདུས་ནས་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་ལྷག་པར་དུ་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་། དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་བྱས་པའི་གསོན་ཉམས་དོད་པའི་ལག་ལེན་དང་འོད་སྟོང་འཕྲོ་བའི་གྲུབ་འབྲས་གང་ལེགས་མངོན་པ་དང་། ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་ཀྱི་བོད་ཀྱི་མི་རིགས་ཁག་གི་མི་དམངས་ཀྱི་ཡིད་ཆེས་དང་ཆོད་སེམས། བོད་ཀྱི་རང་བྱུང་ཡུལ་ལྗོངས་མཛེས་པ་དང་། ལོ་རྒྱུས་མི་ཆོས་རིག་གནས་ཟབ་པ། མི་རིགས་ཀྱི་ཡུལ་སྲོལ་གོམས་གཤིས་བཟང་བ། བསྟུན་མཁས་སྒོ་དབྱེ་ཡག་པ་བཅས་མངོན་པར་བྱས་ཡོད།

ང་ཚོ་ལྷན་དུ་འཛོམས་ནས་མི་ཡུལ་གྱི་ངོ་མཚར་བྱས་རྗེས་དོན་དུ་གཉེར་བར་དཔང་པོ་བྱེད། བོད་ཞི་བས་བཅིངས་འགྲོལ་བཏང་ནས་ལོ་ངོ་70ལྷག་ཙམ་སོང་རིང་ཀྲུང་གོ་གུང་ཁྲན་ཏང་གིས་བོད་ཀྱི་མི་རིགས་ཁག་གི་མི་དམངས་ལ་མཐུན་སྒྲིལ་སྣེ་ཁྲིད་བྱས་ཏེ་བློ་བརྟན་འགྱུར་མེད་ངང་གསར་བརྗེ་དང་། འཛུགས་སྐྲུན། སྒྱུར་བཅོས་བཅས་ཀྱི་ལོ་རྒྱུས་ཀྱི་རླབས་རྒྱུན་ཁྲོད་ཞུགས་ནས་ཞི་བའི་བཅིངས་འགྲོལ་བཏང་བ་ནས་དམངས་གཙོའི་བཅོས་སྒྱུར་བྱས་པའི་བར་དང་། སྤྱི་ཚོགས་རིང་ལུགས་ཀྱི་ཡངས་ཤིང་རྒྱ་ཆེ་བའི་འགྲོ་ལམ་ཐོག་བསྐྱོད་པ་ནས་སྒྱུར་བཅོས་སྒོ་དབྱེ་དང་དེང་རབས་ཅན་འཛུགས་སྐྲུན་ལ་སྐུལ་འདེད་བཏང་བའི་བར་འཛམ་གླིང་ཡང་རྩེར་ཟིལ་རླབས་དགུང་འཕྱུར་དང་སྤོབས་པས་རི་ཀླུང་འགུལ་བའི་ལོ་རྒྱུས་ཀྱི་སྙན་ངག་བརྩམས་ཡོད། དུས་རབས་གསར་པར་སླེབས་རྗེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བོད་ཀྱི་ལས་དོན་ལ་ཁ་ཕྱོགས་གཏན་འཁེལ་དང་ཐབས་འགོད་ཇུས་འདོན་གནང་བ་དང་། དུས་རབས་གསར་པའི་ཏང་གི་བོད་སྐྱོང་མཛད་ཇུས་གསལ་སྟོན་གནང་ནས་ང་ཚོར་ཡུན་རིང་ཐག་གཅོད་བྱེད་དགོས་བསམས་ཀྱང་ཐག་གཅོད་བྱེད་མ་ཐུབ་པའི་དཀའ་གནད་མང་པོ་ཞིག་ཐག་གཅོད་བྱས་པ་དང་། སྔོན་ཆད་སྒྲུབ་དགོས་བསམས་ཀྱང་འགྲུབ་མ་ཐུབ་པའི་དོན་ཆེན་མང་པོ་ཞིག་བསྒྲུབས་པར་ཁྲིད་སྟོན་གྱིས་བྱ་གཞག་ཁག་ལ་ཕྱོགས་ཡོངས་ནས་ཡར་རྒྱས་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་པར་སྐུལ་འདེད་བཏང་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་ནི་མཁས་མཛངས་ལྡན་ལ་རླབས་ཆེ་ཞིང་། ཐབས་ཇུས་མཁས་པ་དང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་དང་བྱམས་བརྩེའི་ཐུགས་ཁུར། མེས་རྒྱལ་ཁྱིམ་ཚང་ཆེན་པོའི་དྲོ་སྐྱིད་དང་སྤྱི་ཚོགས་རིང་ལུགས་ལམ་ལུགས་ཀྱི་འགྲན་ཟླ་བྲལ་བའི་ཁྱད་འཕགས་རང་བཞིན་བཅས་བོད་ཀྱི་མི་རིགས་ཁག་གི་མི་དམངས་ལ་མྱོང་ཚོར་ཟབ་མོ་བྱུང་ཡོད།

ང་ཚོ་ལྷན་དུ་འཛོམས་ནས་མཉམ་དུ་གསོན་ཤུགས་རབ་ཏུ་རྒྱས་པའི་དུས་རབས་ཀྱི་རོལ་དབྱངས་ཉན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལ་གཏན་འཁེལ་གནང་བའི“དོན་ཆེན་བཞི”དོན་ཐོག་ཏུ་ཏན་ཏིག་འཁྱོལ་བར་དམིགས་པ་དང་ཤུགས་བརྒྱབ་ནས་རང་སྐྱོང་ལྗོངས་ཏང་ཨུད་སྐབས་བཅུ་པས“ཚང་དགོས་པ་གསུམ་དང་ཕན་འདོགས་པ་གཅིག”མཐའ་འཁྱོངས་དང་། ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ལས་དོན་ཁག་ཚན་རིག་དང་མཐུན་པའི་ངང་ཇུས་འགོད། “འཛུགས་གཏོད་བཞི”དང“མདུན་གྲལ་དུ་སླེབས་པ་བཞིའི”སྣེ་ཁྲིད་རང་བཞིན་གྱི་གསར་གཏོད་དང་གསར་གཏོད་རང་བཞིན་གྱི་ལག་ལེན་ལ་བརྟེན་པ་བཅས་བྱས་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་ཡངས་ཤིང་བརྗིད་ཆགས་པའི་རྒྱང་ལམ་གསར་པ་ཕྱོགས་ཡོངས་ནས་བཏོད་ཡོད། དུས་རབས་གསར་པ་དང་བོད་ལྗོངས་གསར་པར་ཞི་མཐུན་བརྟན་ལྷིང་གི་རྣམ་པ་རྒྱུན་མཐུད་སྲ་བརྟན་ཐུབ་པ་དང་། སྤུས་ཚད་མཐོ་བའི་འཕེལ་རྒྱས་ཀྱི་གོམ་སྟབས་བརྟན་ལ་ཤུགས་དང་ལྡན་པ། སྐྱེ་ཁམས་བདེ་འཇགས་ཀྱི་སྲུང་བཅད་ཉིན་རེ་བཞིན་བརྟན་དུ་ཕྱིན་པ། མཐའ་དར་དམངས་ཕྱུག་གི་འཐབ་ཇུས་ལ་སྐུལ་འདེད་བརྟན་པོ་ཐེབས་པ། སྒྱུར་བཅོས་སྒོ་དབྱེ་བྱེད་ཤུགས་ཟམ་མི་ཆད་པར་ཆེ་རུ་ཕྱིན་པ་བཅས་ལས་རེ་བས་ཁེངས་ཤིང་། མངོན་མེད་སྟོབས་ཤུགས་ཆེན་པོ་ལྡན་པའི་བརྗིད་ཆེའི་འཆར་གཞི་ཞིག་འཛམ་གླིང་ཡང་རྩེར་རིམ་གྱིས་བཀོད་ནས་འཛམ་གླིང་སྐྱེ་བོ་ཀུན་གྱི་མིག་ལམ་དུ་མངོན་བཞིན་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གྱི་ཁ་ཕྱོཌ་བརྒྱུད་མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་འཛུཌ་སྐྲུན་གྱིས་ཐུན་མོང་ཐོག་བསྐྱར་དར་རླབས་པོ་ཆེའི་ཕུགས་འདུན་མངོན་འགྱུར་བྱེད་པར་བོད་ཀྱི་མི་དམངས་ལ་གདེང་ཤུགས་དང་གདེང་ཚོད་ཚད་མེད་ལྡན་ཡོད།

ང་ཚོ་ལྷན་དུ་འཛོམས་ནས་ལག་གདང་སྦྲེལ་ཏེ་མཉམ་ལས་གཉིས་ཕན་གྱི་མཛེས་སྡུག་ལྡན་པའི་འབྱུང་འགྱུར་བསུ། བོད་ནི་ལོ་རྒྱུས་ཐོག་གི“ལྷོ་ཕྱོགས་དར་གོས་ལམ་བུ”དང་། “ཐང་བོད་གནའ་ལམ” “ཇ་རྟའི་གནའ་ལམ”བཅས་ལ་ཞུགས་མཁན་གལ་ཆེན་ཞིག་དང་། ཀྲུང་གོ་དང་ཨེ་ཤེ་ཡ་ལྷོ་མའི་རྒྱལ་ཁབ་དབར་འགྲོ་འོང་བྱེད་སའི་སྒོ་མོ་གལ་ཆེན་ཞིག་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། “རྒྱུད་གཅིག་ལམ་གཅིག”གི་གྲོས་འགོས་བོད་ལ་དེ་བས་གལ་འགངས་ཆེ་བའི་འཐབ་ཇུས་ཀྱི་གནས་བབ་བཏོད་ནས་བོད་ཀྱིས་རྒྱལ་ཁབ་ཕྱི་ནང་ལ་སྒོ་མོ་གང་མགྱོགས་འབྱེད་པར་སྔར་བྱུང་མྱོང་མེད་པའི་གོ་སྐབས་བསྐྲུན་ཡོད། སྐབས་འདིའི་བོད་ལྗོངས་འགྲེམས་ཚོགས་ཀྱི་ཤར་རླུང་ལ་བརྟེན་ནས་ཀྲུང་གོའི་བོད་ལྗོངས་ཀྱིས་སྒོ་དབྱེ་དང་། མཉམ་ལས། མཐུན་སྒྲིལ། གཉིས་ཕན་བཅས་ཀྱི་འདུ་ཤེས་མུ་མཐུད་བཟུང་སྟེ་བློ་བརྟན་འགྱུར་མེད་ངང་སྒོ་མོ་འབྱེད་རྒྱ་ཆེ་རུ་གཏོང་བ་དང་ཚོང་གཉེར་ཁོར་ཡུག་རྒྱུན་མཐུད་ལེགས་སུ་བཏང་ནས་འཛམ་གླིང་རྒྱལ་ཁབ་ཁག་གི་གྲོགས་པོ་བོད་དུ་ཡུལ་སྐོར་དང་། ལྟ་སྐོར། མ་འཇོག བྱ་གཞག་གཏོད་པ་བཅས་ལ་ཡོང་བར་དེ་བས་སྟབས་བདེ་བའི་ཆ་རྐྱེན་དང་དེ་བས་རྒྱ་ཆེ་བའི་བར་མཐོངས་གཏོད་རྒྱུ་ཡིན།

བྱེད་སྒོ་ཁག་8དང་། འགྲེམས་ཁུལ་9 འགྲེམས་གནས་253 ཐོན་རྫས་རིགས་ཁྲི་གཅིག་ལྷག་ཙམ་བཅས་ཡོད་པ་དང་། རྒྱལ་ཁབ་ཕྱི་ནང་གི་སྐུ་མགྲོན་360ལྷག་ཙམ་དགའ་སྤྲོའི་ངང་འགྲེམས་ཚོགས་ལ་ཞུགས་ནས་མཉམ་དུ་བོད་ཀྱི་འཕེལ་རྒྱས་སྐོར་གླེང་ཞིང་། རྒྱལ་ཁབ་ཕྱི་ནང་གི་ཁེ་ལས་612འགྲེམས་ཚོགས་ལ་ཞུགས་ནས་མཉམ་དུ་འཕེལ་རྒྱས་ཀྱི་འཆར་གཞི་འགོད་བཞིན་ཡོད། སྐབས་འདིའི་བོད་ལྗོངས་འགྲེམས་ཚོགས་ནི་ཏང་གི་ཚོགས་ཆེན་ཉི་ཤུ་པ་འཚོགས་ཚུན་རང་ལྗོངས་ཀྱིས་གཉེར་བའི་ཕྱི་ཕྱོགས་སུ་སྒོ་མོ་འབྱེད་པ་དང་དཔལ་འབྱོར་ཚོང་དོན་སྤེལ་རེས་བྱེད་པའི་འདུ་ཚོགས་ཆེ་གྲས་ཐེངས་དང་པོ་དེ་ཡིན་ཞིང་། ཁྱབ་ཁོངས་དང་། རིམ་པ། བྱ་ཐབས། ཐབས་ལམ་བཅས་མང་བའི་མཉམ་ལས་ངོ་འཕྲད་གྲོས་མོལ་གྱི་བྱེད་སྒོ་སྤེལ་རྒྱུ་ཡིན་པས། རང་ལྗོངས་ཀྱིས་འཕེལ་རྒྱས་ཀྱི་རྣམ་པ་གསར་པར་ཞབས་འདེགས་ཞུ་བ་དང་དེར་ཞུགས་པའི་བླང་བྱ་སྟངས་འཛིན་ནན་པོ་བྱེད་པ་དང“རྒྱུན་འཁོར་གཉིས”ལ་དེ་བས་ནུས་ལྡན་ངང་ཞུགས་པར་སྐུལ་འདེད་ཤུགས་ཆེན་གཏོང་ཐུབ་པ་དང་། སྤེལ་རེས་དང་མཉམ་ལས་རྒྱ་ཁྱབ་བྱེད་རིང་ཐུན་མོང་འཕེལ་རྒྱས་ལ་སྐུལ་འདེད་གཏོང་ཐུབ་ངེས་རེད།

ང་ཚོས་སྐབས་འདིའི་བོད་ལྗོངས་འགྲེམས་ཚོགས་གོ་སྐབས་སུ་བྱས་ཏེ་སྤྲོ་སེམས་འཁོལ་ལ་མཛའ་གྲོགས་དང་། སྒོ་དབྱེ་བསྟུན་མཁས། བག་ཕེབས་དང་ཡིད་ཆེས་བཅས་ཀྱི་རྣམ་འགྱུར་ཐོག་ནས་དཔལ་འབྱོར་ཚོང་དོན་མཉམ་ལས་དང་མི་ཆོས་རིག་གནས་སྤེལ་རེས་ལ་ཐུན་མོང་ཐོག་སྐུལ་འདེད་གཏོང་རྒྱུ་མཐའ་འཁྱོངས་བྱས་ཏེ། འགྲེམས་སྟོན་ཁག་ཡག་པོ་གཉེར་བ་དང་བརྗོད་དོན་གཙོ་བོའི་བྱེད་སྒོ་ཁག་ཡག་པོ་སྤེལ་ནས་བོད་ལྗོངས་འགྲེམས་ཚོགས་དེ་ཉིད་ཀྱིས་ཤུགས་རྐྱེན་ཐེབས་ནུས་དང་། ཁྱབ་འགྱེད་ནུས་པ། སྐུལ་ཁྲིད་ནུས་པ་བཅས་ལྡན་པའི་དྲིལ་བསྒྲགས་འོས་སྦྱོར་ལས་སྟེགས་ཤིག་ཏུ་དངོས་སུ་འགྱུར་བར་བྱེད་དགོས།

ཉི་འོད་རབ་ཏུ་འཕྲོ། མེ་ཏོག་རྣམ་པར་བཞད། སྒོ་དབྱེ་བསྟུན་མཁས་དང་སྐྱེ་སྟོབས་ཀྱི་དཔལ་འབར་བའི་བོད་ལྗོངས་གསར་པས་ཕྱོགས་བཞི་མཚམས་བརྒྱད་ནས་ཡོང་བའི་སྐུ་མགྲོན་ཚོར“འཛམ་གླིང་ཡང་རྩེའི”དམིགས་བསལ་གྱི་ཡིད་དབང་འཕྲོག་ཤུགས་དང་། གསོན་ཤུགས་ཆེན་པོ། མངོན་མེད་སྟོབས་ཤུགས་ཆེན་པོ་བཅས་མྱོང་རོལ་བྱེད་པར་སྤྲོ་སེམས་འཁོལ་བའི་དགའ་བསུ་ཞུས་ཏེ་བོད་ཀྱི་འབྱུང་འགྱུར་འཕེལ་རྒྱས་ཀྱི་ལག་ལེན་དང་ཐབས་ལམ་ལ་མཉམ་དུ་གྲོས་བསྡུར་བྱེད་ཀྱི་ཡོད། སྐབས་འདིའི་བོད་ལྗོངས་འགྲེམས་ཚོགས་འགོ་འཛུགས་ས་གསར་པར་བྱས་ནས་བོད་ཀྱི་སྒོ་དབྱེ་འཕེལ་རྒྱས་ཀྱི་གོམ་སྟབས་སྔར་བས་མགྱོགས་སུ་གཏོང་བ་དང་། ཕྱོགས་ཁག་དང་ཞི་བདེ་མཛའ་གྲོགས་ཀྱི་འབྲེལ་ཐག་སྔར་བས་ཟབ་ཏུ་གཏོང་བ། མཉམ་ལས་གཉིས་ཕན་གྱི་འགྲོ་ལམ་སྔར་བས་ཡངས་སུ་གཏོང་བ་བཅས་བྱས་ནས་མཉམ་གྲོས་མཉམ་སྐྲུན་མཉམ་སྤྱོད་བཅས་ཀྱི་ཁྲོད་དུ་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པའི་འཛུགས་སྐྲུན་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་རྒྱུར་ང་ཚོས་རེ་སྒུག་བྱེད་ཀྱི་ཡོད།

སྐབས་འདིའི་བོད་ལྗོངས་འགྲེམས་ཚོགས་ཐུགས་གྲ་ལེགས་འགྲིག་ཡོང་བའི་སྨོན་འདུན་ཞུ།