ཉེ་ཆར་གསར་འགོད་པས་བོད་ལྗོངས་འགྲེམས་ཚོགས་སྐབས་ལྔ་པའི་སྒྲིག་འཛུགས་ཨུ་ལྷན་གཞུང་དོན་ཁང་ནས་ཤེས་རྟོགས་བྱས་པར། བོད་ལྗོངས་འགྲེམས་ཚོགས་སྐབས་ལྔ་པ་ཟླ་6ཚེས་16ནས་18ཉིན་བར་ལྷ་སར་གཉེར་རྒྱུ་ཡིན་ཞིང་། འགྲེམས་སྟོན་དང་བརྗོད་དོན་གཙོ་བོའི་བྱེད་སྒོ་སྣ་ཚོགས་གཏན་འཁེལ་ཟིན་འདུག

ཟླ་6ཚེས་16ཉིན་བོད་ལྗོངས་འགྲེམས་ཚོགས་སྐབས་ལྔ་པའི་འགོ་ཚུགས་མཛད་སྒོ《བོད་ལྗོངས་གསར་པར་དགའ་ཞེན་བྱེད》ཅེས་པ་གཉེར་རྒྱུ་རེད། 

ཟླ་6ཚེས་17ཉིན“དུས་རབས་གསར་པ་དང་། འགོ་འཛུགས་ས་གསར་པ། གོ་སྐབས་གསར་པ། ‘ཁུལ་གསུམ་དང་མཐོ་ས་གཅིག’གི་འཛུགས་སྐྲུན་ལ་སྒུལ་ནུས་བསྣན་ནས་རྣམ་པ་གསར་པ་གཏོད”ཅེས་པ་བརྗོད་དོན་གཙོ་བོར་བྱས་པའི་བཞེད་དོན་གཙོ་བོའི་གླེང་སྟེགས་དང་། “འཛུགས་གཏོད་བཞི”ནང་དོན་གཙོ་བོར་བྱས་པའི་འགྲེམས་སྟོན་གྱི་བྱེད་སྒོ བོད་ཀྱི་ཡུལ་སྐོར་ཚོང་གཉེར་ཁྱབ་གདལ་འདུ་ཚོགས། ཚོང་འགུགས་མ་འདྲེན་འོས་སྦྱོར་ཚོགས་འདུ་དང་རྣམ་གྲངས་ལ་གཅིག་སྡུད་ཐོག་གན་རྒྱ་འཇོག་པའི་མཛད་སྒོ་བཅས་གཉེར་རྒྱུ་ཡིན་པ་རེད། 

ཟླ་6ཚེས་18ཉིན་ཕོ་བྲང་པོ་ཏ་ལ་དང་། གཙུག་ལག་ཁང་། བར་སྐོར། ནོར་བུ་གླིང་ག་སོགས་བོད་ཀྱི་རྩེར་སོན་ཡུལ་སྐོར་བྱ་ཡུལ་དུ་ཉམས་ལེན་ལ་སྐྱོད་པ་དང་། རྗེ་འབུམ་སྒང་སྒྱུ་རྩལ་ལྟེ་གནས་སུ་རིག་གནས་དང་ཡུལ་སྐོར་མཉམ་འདྲེས་ཀྱི་ཐོན་རྫས་སོགས་ལ་ཉམས་སུ་ལེན་པར་སྐྱོད་པ། ཁེ་ལས་མཁས་ཅན་གྱི་འཐུས་མི་ལྷ་སའི་ཉེ་འཁོར་གྱི་ཐོན་ལས་གླིང་དུ་ལྟ་སྐོར་ལ་སྐྱོད་པ། གསར་འགྱུར་ཡོངས་བསྒྲགས་ཚོགས་འདུ་དང་མཇུག་སྒྲིལ་མཛད་སྒོ་འཚོག་པ་བཅས་བྱ་རྒྱུ་རེད་འདུག