ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་བྱེད་རྒྱུ་དེ་དཔལ་འབྱོར་དང་སྤྱི་ཚོགས་གོང་འཕེལ་གཏོང་བའི་འགོ་འཛུགས་ས་དང་དོན་ལ་བབས་སར་བརྩིས་པས་མི་དམངས་མང་ཚོགས་ཀྱི་འཚོ་བའི་སྤུས་ཚད་མངོན་གསལ་དོད་པོས་ལེགས་སུ་ཕྱིན་ཡོད།

སྡོད་སའི་ཁང་པ་ཡག་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱིས་སྡོད་ཁང་འགན་སྲུང་མ་ལག་ཟམ་མི་ཆད་པར་འཐུས་སྒོ་ཚང་དུ་བཏང་བ་དང་སྡོད་ཁང་འགན་སྲུང་བྱེད་ནུས་ཟམ་མི་ཆད་པར་ཆེ་རུ་བཏང་ནས་སྤྱི་པའི་བོགས་གཏོང་ཁང་པ(ཁང་གླ་ཁེ་བའི་ཁང་པ)དང་ལས་ཤག་གིས་གཙོ་བོར་བྱས་པའི་གྲོང་ཁྱེར་དང་གྲོང་རྡལ་གྱི་སྡོད་ཁང་སྐྱོ་ཁུལ་སྒྱུར་བཀོད་དང་གྲོང་ཁྱེར་དང་གྲོང་རྡལ་གྱི་གྲོང་ཁུལ་རྙིང་པ་སྒྱུར་བཀོད་ཀྱི་སྡོད་ཁང་འགན་སྲུང་མ་ལག་ཅིག་རགས་ཙམ་བཏོད་ཡོད། ལྗོངས་ཡོངས་ཀྱི་གྲོང་ཁྱེར་དང་ས་ཁུལ་དང་། རྫོང་དང་ཆུས། ཤང་དང་གྲོང་རྡལ་བཅས་ཚང་མར་སྡོད་ཁང་འགན་སྲུང་ཁྱབ་པ་དང་། གྲོང་ཁྱེར་དང་གྲོང་རྡལ་གྱི་མ་མཐའི་འཚོ་བ་འགན་ལེན་དང་སྡོད་ཁང་ལ་དཀའ་ངལ་ཡོད་པའི་ཡོང་འབབ་དམའ་བའི་ཁྱིམ་ཚང་ལ་གཞི་རྩའི་ཆ་ནས་འགན་ལེན་བྱེད་དགོས་རིགས་ཚང་མར་འགན་ལེན་བྱེད་ཐུབ་ཡོད།

2022ལོའི་བར་ལྗོངས་ཡོངས་ཀྱི་གྲོང་ཁྱེར་དང་གྲོང་རྡལ་གྱི་གྲོང་མི་མི་རེའི་ཆ་སྙོམས་སྡོད་ཁང་གི་འཛུགས་སྐྲུན་རྒྱ་ཁྱོན་སྨི་ངོས་གྲུ་45.62ཟིན་ཡོད། གཞན་ཡང་རང་ལྗོངས་ཀྱིས་མང་ཚོགས་ཀྱི་སྡོད་ཁང་ཆ་རྐྱེན་མུ་མཐུད་ལེགས་སུ་གཏོང་རྒྱུ་ཡིན་ཞིང་། 2023ལོར་སྔོན་དཔག་བྱས་ན་མ་དངུལ་སྒོར་དུང་ཕྱུར་13.79བཏང་སྟེ་རྫོང་གྲོང་11ལ་དྲོད་རླངས་མཁོ་འདོན་རྣམ་གྲངས་ལག་བསྟར་བྱ་རྒྱུ་རེད།

སྨན་བཅོས་འགན་བཅོལ་བཟང་བ།

2020ལོར་སླེབས་སྐབས་རང་ལྗོངས་ཀྱིས་གཅིག་གྱུར་གྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་ལམ་ལུགས་དངོས་སུ་ལག་བསྟར་བྱས་ནས་མི་རེའི་ལོ་རེའི་ཆ་སྙོམས་ཁ་གསབ་ཚད་གཞི་སྒོར་585བར་མཐོ་རུ་བཏང་བ་དང་། གྲོང་ཁྱེར་དང་གྲོང་གསེབ་ཀྱི་གྲོང་མིའི་ལོ་འཁོར་གྱི་སྨན་རིན་རྩིས་ཞུ་བྱེད་ཚད་མཐོ་ཤོས་སྒོར་ཁྲི་14ཟིན་ཡོད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱི་སྨན་བཅོས་འཕྲོད་བསྟེན་ཆ་རྐྱེན་ཟམ་མི་ཆད་པར་གོང་མཐོར་སོང་བ་དང་སྨན་བཅོས་འགན་སྲུང་རིམ་བཞིན་འཐུས་སྒོ་ཚང་དུ་སོང་ཞིང་། མིག་སྔར་གཅིག་གྱུར་གྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་ལམ་ལུཌ་རྨང་གཞིར་བྱས་པ་དང་། ནད་ཆེན་གྱི་འགན་བཅོལ་ཁ་གསབ་ཏུ་བྱས་པ། སྨན་བཅོས་རོགས་སྐྱོབ་ཐ་སྐྱོང་དུ་བྱས་པ་བཅས་ཀྱི་བང་རིམ་མང་བའི་སྨན་བཅོས་འགན་སྲུང་མ་ལག་ཅིག་གྲུབ་ནས། མི་རིཌ་ཁག་གི་མི་དམངས་མང་ཚོགས་ཀྱི་བདེ་ཐང་ལ་འགན་སྲུང་ནུས་ལྡན་བྱུང་ཡོད།

ད་ཆ་རང་ལྗོངས་ཀྱི་སྨན་བཅོས་འཕྲོད་བསྟེན་དྲ་བ་གྲོང་ཁྱེར་དང་གྲོང་གསེབ་ཏུ་ཁྱབ་ནས་རིམ་པ་ཁག་དང་རིགས་ཁག་གི་སྨན་བཅོས་འཕྲོད་བསྟེན་སྒྲིག་གཞི་1642ཟིན་པ་དང་མི་སྟོང་རེར་འཕྲོད་བསྟེན་ལག་རྩལ་པ་5.89ཡོད། རྒྱལ་ཁབ་ཀྱིས་སྒྲིག་འཛུགས་དང་ལག་བསྟར་བྱས་པའི་སྨན་བཅོས་ཤེས་ལྡན་མི་སྣའི་ཚོགས་སྒྲིག་རྣམ་པའི་བོད་སྐྱོར་ལས་རང་ལྗོངས་ཀྱི་མི་རིགས་ཁག་གི་མང་ཚོགས་ལ་ཁྱིམ་གྱི་སྒོ་རྩ་ནས་ཆུ་ཚད་མཐོ་བའི་སྨན་བཅོས་ཞབས་ཞུ་ལོངས་སུ་སྤྱོད་རྒྱུ་བྱུང་ཡོད།

རྒས་དུས་འཚོ་རྟེན་ལེགས་པ།

ཉེ་བའི་ལོ་ཤས་རིང་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱིས་རྒན་གསོའི་ཞབས་ཞུའི་མ་ལག་དང་ནུས་པ་འཛུགས་སྐྱོང་བྱེད་རྒྱུར་རྒྱུན་མཐུད་སྐུལ་འདེད་བཏང་བས་གྲུབ་འབྲས་མངོན་གསལ་དོད་པོ་ཐོབ་ཡོད།

2021ལོར་རང་ལྗོངས་ཀྱི་སྤྱི་ཚོགས་འགན་བཅོལ་ཁྱབ་ཚད་100%ཟིན་ཞིང་། རྒན་གསོ་དང་། སྨན་བཅོས། ལས་ཤོར། ལས་རྨས། བུ་བཙའ་བཅས་འགན་བཅོལ་ཆེ་གྲས་ལྔ་གཙོ་བོར་བྱས་པའི་གྲོང་ཁྱེར་དང་གྲོང་གསེབ་ཀྱི་གྲོང་མི་ཡོངས་ལ་ཁྱབ་པའི་སྤྱི་ཚོགས་འགན་སྲུང་མ་ལག་ཁྱོན་ཡོངས་ནས་བཙུགས་ཡོད།

རྒན་གསོའི་ཞབས་ཞུར་དམིགས་ནས་ཉེ་བའི་ལོ་ཤས་རིང་རང་ལྗོངས་ཀྱིས《ཁྱིམ་སྡོད་དང་སྡེ་ཁུལ་གྱི་རྒན་གསོའི་ཞབས་ཞུའི་ལག་བསྟར་ཇུས་གཞི》དང《སྡེ་ཁུལ་རྒན་རྒོན་གྱི་ཉིན་མོའི་ལྟ་རྟོག་ལྟེ་གནས་ཀྱི་གཉེར་སྐྱོང་དོ་དམ་བྱ་ཐབས》སོགས་སྔ་རྗེས་སུ་བཀྲམ་སྟེ་རྒན་གསོའི་ཞབས་ཞུར་སྒྲིག་སྲོལ་གྱི་གཞི་འཛིན་ས་ཡོད་པ་དང་དུས་མཚུངས་འབྲེལ་ཡོད་སྡེ་ཚན་ཁག་གིས་ཁུར་མཉམ་ལེན་དང་དོན་སྤྱི་སྒྲུབ་བྱེད་པའི་རྣམ་པ་བཟང་པོ་ཞིག་ཆགས་ཡོད། དེའི་ཁྲོད་ཀྱི་རྒན་གསོའི་ཞབས་ཞུའི་ཁ་གསབ་ལམ་ལུཌ་ཁོ་ནས་ཁ་ཐོར་བསྙེན་བཀུར་གྱི་དམིགས་བསལ་དཀའ་ངལ་ཡོད་པའི་རྒན་རྒོན་དང་། དབང་པོ་སྐྱོན་ཅན་གྱི་རྒན་རྒོན། མ་མཐའི་འཚོ་བའི་འགན་ལེན་གྱི་རྒན་རྒོན། མི་ཧྲེང་རྒན་རྒོན་སོགས་རྒན་གསོའི་ཞབས་འདེགས་གཙོ་བོར་ཞུ་ཡུལ་ཁྲི་6ལྷག་ཙམ་ལ་ཕན་པ་ཐོབ་ཡོད།

གཞན་ཡང་རང་ལྗོངས་ཀྱིས་རིམ་རྩིས་བྱས་ན་སྒོར་དུང་ཕྱུར་30ལྷག་ཙམ་བཏང་ནས་དམིགས་བསལ་དཀའ་ངལ་ཡོད་པའི་མི་སྣའི་གཅིག་སྡུད་བསྙེན་བཀུར་ལྟེ་གནས་80དང་བྱིས་པའི་ཕན་བདེའི་སྒྲིག་གཞི་11བསྐྲུན་པ་དང་སྦྲགས། བསྙེན་བཀུར་ལྟེ་གནས་ཁག་གཅིག་བསྐྱར་སྐྲུན་རྒྱས་སྐྲུན་དང་ཉམས་བཟོ་སྒྱུར་བཀོད་བྱས་ཏེ་རྒན་གསོའི་ཞབས་ཞུའི་རྨང་གཞིའི་སྒྲིག་བཀོད་ཟམ་མི་ཆད་པར་ལེགས་སུ་བཏང་ཡོད། མིག་སྔར“གཅིག་སྡུད་གཉིས”ཀྱི་སྒྲིག་གཞིར་དམིགས་བསལ་དཀའ་ངལ་ཡོད་པའི་རྒན་རྒོན་5800ལྷག་ཙམ་དང་དྭ་ཕྲུག་4200ལྷག་ཙམ་གཅིག་སྡུད་བསྙེན་བཀུར་དང་གསོ་ཉར་བྱེད་བཞིན་ཡོད།