ཀྲུང་གོའི་བོད་ལྗོངས་གསར་འགྱུར་དྲ་བར་གནས་ཚུལ་སྤེལ་བ་ལྟར་ན། ཉེ་ཆར། བོད་རང་སྐྱོང་ལྗོངས་ཚན་རྩལ་ཐིང་གིས་བོད་རང་སྐྱོང་ལྗོངས་སྐྱེ་ཁམས་ཁོར་ཡུག་ཐིང་དང་ནགས་ལས་རྩྭ་ཐང་ཅུས་སོགས་ཚན་པ་དང་ལྷན་ཅིག་བོད་དུ་ཚན་རྩལ་འདེགས་སྐྱོར་བྱས་རྗེས་སྐྱེ་འཚར་ཐུབ་པའི་རྩྭའི་སྣ་ཁ་འདེམས་གསོའི（ནང་འདྲེན）གྲུབ་འབྲས་འོས་སྦྱོར་ངོ་སྤྲོད་ཀྱི་སྤེལ་རེས་ཚོགས་འདུ་འཚོགས་པ་མ་ཟད། 《བོད་ཀྱི་སྐྱེ་ཁམས་དང་ས་ཁམས་མི་འདྲ་བའི་ས་ཁོངས་སུ་སྐྱེ་འཚར་ཐུབ་པའི་རྩྭའི་སྣ་ཁ་དང་དེ་བཞིན་འདེབས་འཛུགས་གཡོག་བྱེད་ལག་རྩལ་གྱི་ལག་དེབ》ཡོངས་བསྒྲགས་བྱས་ཏེ་ལྗོངས་ཡོངས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་ལ་རམ་འདེགས་སྔར་ལས་ལྷག་པ་བྱས་ཡོད།

ཕྱི་རོལ་ནས་ས་བོན་འཚོལ་བསྡུ་དང་འདེབས་པ་ནས་གཟན་རྩྭ་བརྔ་བསྡུའི་བར་དང་། དེ་ནས་ཡང་བསྐྱར་འདེབས་པ་དང་བསྡུ་བའི་བར་གཟན་རྩྭའི་སྣ་ཁ་ཡག་པོ་ཞིག་འདེམས་གསོ་བྱེད་པར་ལོ་བཅུ་གྲངས་ཁ་ཤས་དང་ཐ་ན་དེ་ལས་རིང་བ་དགོས། ཡུས་ཁྲེང་ཆུན་གྱིས་ལོ་བཅུ་ཕྲག་ཉི་མ་གཅིག་ལྟར་གྱི་ལས་ཀ་བྱེད་རིང་ཤོད་མང་ཤོས་ནི“བོད་དུ་གཟན་རྩྭའི་སྣ་ཁ་སྤུས་ལེགས་འདེབས་པ་ནི་ངས་ཚེ་གང་བྱེད་དགོས་པའི་ལས་ཀ་ཞིག་རེད”ཅེས་པ་འདི་རེད།

བོད་རང་སྐྱོང་ལྗོངས་ཚན་རྩལ་ཐིང་གི་འབྲེལ་ཡོད་འགན་འཁུར་བས། ཡུས་ཁྲེང་ཆུན་གྱིས་བོད་ཀྱི་རི་སྐྱེས་གཟན་རྩྭ་འདུལ་གསོ་དང་དེ་བཞིན་གཟན་རྩྭ་གཙོ་བོ་འདེབས་པའི་ས་བོན་གསོ་འདེབས་དང་། ཐོན་རྫས་ལས་སྣོན་སོགས་གཟན་རྩྭ་དང་འབྲོག་ལས་ཀྱི་འགག་རྩའི་ལག་རྩལ་གྱི་དཀའ་གནད་བསལ་ཡོད། ད་བར་ལྗོངས་ཡོངས་ཀྱི་སྐྱེ་ཁམས་དང་ས་ཁམས་ཀྱི་རིགས་མི་འདྲ་བར་འཕྲོད་ཅིང་ཁྱབ་གདལ་བེད་སྤྱོད་གཏང་ཆོག་པའི་རྩྭའི་སྣ་ཁ་ཁྱོན་བསྡོམས་59ཟིན་ཡོད་ཅེས་བརྗོད།

ཤེས་རྟོགས་བྱུང་བར་གཞིགས་ན། “ལོ་ལྔ་ཚན་བཅུ་གསུམ་པའི”མཇུག་ཏུ་རྩྭའི་སྣ་ཁ་5ལ་བོད་རང་སྐྱོང་ལྗོངས་ཀྱི་རྩྭའི་སྣ་ཁ་ཨུ་ཡོན་ལྷན་ཁང་གི་ཞིབ་བཤེར་གཏན་འབེབས་ཐོབ་ནས་བོད་དུ་རང་རྟེན་འདེམས་གསོ་བྱེད་པའི་རྩྭའི་སྣ་ཁ་མེད་པའི་སྟོང་ཆ་བསྐངས་ཡོད། འདི་ལོ་བོད་རང་སྐྱོང་ལྗོངས་ནགས་ཚལ་རྩྭ་ཐང་ཅུས་ཀྱིས་ས་སྐྱ་རྫོང་དུ་མུའུ་ཁྲི་3ཟིན་པའི་ཡུལ་རྩྭ་གསོ་སྤེལ་རྟེན་གཞི་སྐྲུན་རྩིས་ཡོད་པ་དང་། མིག་སྔའི་བར་རིམ་རྩིས་བྱས་ན་མ་དངུལ་སྒོར་དུང་ཕྱུར་1.48དོན་འཁྱོལ་བྱས་ཡོད། དེ་དང་ཆབས་ཅིག བོད་རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས་འདི་ལོ་ཡུག་སྦྲེལ་མི་ཐབས་རྩྭ་མུའུ་ཁྲི་11.68དང་། བསྐྱར་འདེབས་དང་ཁང་པའི་རྒྱབ་མདུན་དུ་རྩྭ་མུའུ་ཁྲི་45.49འདེབས་རྩིས་ཡོད་པ་རེད།