ཟླ་6ཚེས་13ཉིན། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་སྤེལ་བའི་སྤྱི་བསྒྲགས་ལྟར་ན། ཀྲུང་གོའི་བོད་ལྗོངས་ཡུལ་སྐོར་དང་རིག་གནས་ཀྱི་རྒྱལ་སྤྱིའི་འགྲེམས་ཚོགས་སྐབས་ལྔ་པའི་འགོ་ཚུགས་མཛད་སྒོ་2023ལོའི་ཟླ་6ཚེས་16ཉིན་ལྷ་ས་གྲོང་ཁྱེར་གྱི་ཀྲོའུ་ཅི་ཐང་ཆེན་དུ་འཚོག་རྒྱུ་ཡིན་པ་དང་། དེ་ཉིན་གྲོང་ཁུལ་གྱི་ལམ་དུམ་ཁག་གཅིག་ལ་འགྲིམ་འགྲུལ་བཀག་སྡོམ་བྱ་རྒྱུ་ཡིན་པ་དང་། བཀག་སྡོམ་བྱེད་པའི་དུས་ཚོད་ནི། 2023ལོའི་ཟླ་6ཚེས་16ཉིན་གྱི་ཆུ་ཚོད་14པ་ནས་མཛད་སྒོ་མཇུག་མ་འགྲིལ་པའི་བར་རེད་འདུག

སྤྱི་བསྒྲགས་ནང་བསྟན་དོན། དེ་ཉིན་འགྲིམ་འགྲུལ་བཀག་སྡོམ་བྱེད་པའི་ལམ་དུམ་ནི། རྔ་ཆེན་ལམ་ཁྲེང་བདེ་གླིང་Tདབྱིབས་ལམ་མདོ་ནས་འཁོར་རིགས་ཚང་མ་བྱང་ནས་ལྷོ་སྟེ་ཀྲོའུ་ཅི་གསོལ་མགྲོན་ཁང་གི་ཕྱོགས་སུ་བསྐྱོད་མི་ཆོག་པ་དང་། བོད་ལྗོངས་སློབ་ཆེན་ཤར་ལམ་དང་ཆོས་གླིང་ལམ་གྱི་Tདབྱིབས་ལམ་མདོ་ནས་འཁོར་རིགས་ཚང་མ་ནུབ་ནས་ཤར་གྱི་ཕྱོགས་སུ་བསྐྱོད་མི་ཆོག་པ། ཆོས་གླིང་ལམ་དང་ཅང་སུའུ་ལམ་ཆེན་གྱི་ལམ་མདོ་ནས་འཁོར་རིགས་ཚང་མ་ནུབ་ནས་ཤར་གྱི་ཕྱོགས་སུ་བསྐྱོད་མི་ཆོག་པ། ཆོས་གླིང་ལམ་དབན་ཏཱ་ཚོང་གྲོང་གི་ས་འོག་རླངས་འཁོར་འཇོག་སའི་སྒོའི་ལྷོ་ངོས་ཀྱི་Tདབྱིབས་ལམ་མདོ་ནས་འཁོར་རིགས་ཚང་མ་བྱང་ནས་ལྷོ་དང་ནུབ་ནས་ཤར་གྱི་ཕྱོགས་སུ་བསྐྱོད་མི་ཆོག་པ། བོད་ལྗོངས་སློབ་ཆེན་ཤར་ལམ་དང་གཙང་འགྲམ་ལམ་གྱིTདབྱིབས་ལམ་མདོ་ནས་འཁོར་རིགས་ཚང་མ་ཤར་ནས་ནུབ་ཀྱི་ཕྱོགས་སུ་བསྐྱོད་མི་ཆོག་པ་བཅས་རེད།

སྤྱི་བསྒྲགས་ནང་དྲན་སྐུལ་བྱས་དོན། སྤྱི་བདེ་ལས་ཁུངས་འགྲིམ་འགྲུལ་དོ་དམ་སྡེ་ཚན་གྱིས་དོན་དངོས་ལ་གཞིགས་ཏེ་མཛད་སྒོའི་རིང་བཅིངས་འགྲོལ་ལམ་དང་། ཅང་སུའུ་ལམ། བོད་ལྗོངས་སློབ་ཆེན་ལམ་བཅས་སུ་རླངས་འཁོར་ཁག་བགོས་ནས་གཏོང་རྒྱུ་ཡིན་པས། གྲོང་མི་ཚོས་རང་འགུལ་ངང་འགྲིམ་འགྲུལ་ཉེན་རྟོག་པའི་ལས་ཀར་གཞོགས་འདེགས་ཡག་པོ་བྱེད་དགོས།