ཉེ་ཆར། རང་སྐྱོང་ལྗོངས་རླུང་འཕྲིན་བརྙན་འཕྲིན་ཅུས་ཀྱིས་ལྷ་ས་གྲོང་ཁྱེར་རླུང་འཕྲིན་བརྙན་འཕྲིན་ཅུས་དང་། ལྷ་ས་གྲོང་ཁྱེར་རིག་གནས་ཕྱོགས་བསྡུས་སྲིད་འཛིན་ཁྲིམས་སྒྱུར་རུ་ཁག ཁྲེང་ཀོན་ཆུས་རླུང་འཕྲིན་བརྙན་འཕྲིན་ཅུས། རྗེ་འབུམ་སྒང་མངགས་གཏོང་ཁང་བཅས་དང་མཉམ་འབྲེལ་ཐོག་ཁྲིམས་འགལ་གྱི་སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས（རྒྱུན་དུ་མི་མང་པོས་དུང་བན་ཞེས་འབོད）ལ་ཆེད་དོན་བཅོས་སྒྲིག་ཞིབ་བཤེར་བྱས་པ་རེད། 

དེ་ཉིན་ཞིབ་བཤེར་མི་སྣས་སྔ་རྗེས་སུ་དབུན་ཀྲོའུ་ཚོང་དོན་གྲོང་གི་ལན་ཙེ་གློག་ཆས་དང་། འགྲུལ་ཁང་། གྲོང་མིའི་སྒོ་ར་བཅས་སུ་ཕྱིན་ནས། སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་ཁྲིམས་འགལ་ངང་འཚོང་བ་དང་། བསྒར་བ། སྤྱོད་པ་བཅས་བྱེད་ཀྱི་ཡོད་མེད་ལ་ཞིབ་བཤེར་བྱེད་པ་དང་སྦྲགས། ཚོང་པ་དང་གྲོང་མིར་སྤྱི་ཕན་བརྡ་ཁྱབ་བསྟན་པ་མ་ཟད། དྲིལ་བསྒྲགས་བརྡ་ཁྱབ་སྦྱོར་བ་དང་། འབྲེལ་ཡོད་བཅའ་ཁྲིམས་དང་ཁྲིམས་སྲོལ་འགྲེལ་བཤད་དང་དྲིལ་བསྒྲགས་ཀྱང་བྱས་པ་རེད། དྲིལ་བསྒྲགས་དང་ཞིབ་བཤེར་ཐབས་གཉིས་མཉམ་སྤྱོད་བྱས་པས་ཚོང་པ་དང་གྲོང་མི་མང་ཚོགས་ཀྱི་ཁྲིམས་སྲུང་འདུ་ཤེས་ཟབ་ཏུ་ཕྱིན་ནས། ཁྲིམས་འགལ་ངང་སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་བཟོ་བ་དང་། འཚོང་བ། བསྒར་བ། སྤྱོད་པ་སོགས་ཀྱི་བྱེད་སྤྱོད་རང་འགུལ་ངང་བཀག་འགོག་ཐུབ་ཡོད། 

ཞིབ་བཤེར་བྱེད་རིང་། ཞིབ་བཤེར་མི་སྣས་ཁྲིམས་འགལ་ངང་སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་འཚོང་མཁན་ཡོད་པ་ཤེས་རྟོགས་བྱུང་མེད། འོན་ཀྱང“དུང་བན”ཆ་ཚང་3དང་། འགུལ་ཚད་མྱུར་བའི་འབྲེལ་ཡོད་སྒྲིག་ཆས་ཆ་ཚང་1བསྒར་ནས་སྤྱོད་བཞིན་ཡོད་པ་ཤེས་རྟོགས་བྱུང་བས། ཞིབ་བཤེར་མི་སྣས་ཡུལ་དངོས་ནས་བཤིག་པ་མ་ཟད་གཞུང་བཞེས་ཀྱང་བཏང་བ་རེད། 

ལྷ་ས་གྲོང་ཁྱེར་རླུང་འཕྲིན་བརྙན་འཕྲིན་ཅུས་དྲིལ་བསྒྲགས་དོ་དམ་ཁོའོ་ཡི་བཟོ་བཀོད་པ་སྤེན་པ་བཀྲ་ཤིས་ཀྱིས་བརྗོད་དོན།

འདི་ལོ་མིག་སྔའི་བར། ཁྲིམས་འགལ་གྱི་སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་ཆ་ཚང་50ལྷག་ཙམ་གཞུང་བཞེས་བཏང་ཞིང་། ཕྱིན་ཆད། རང་སྐྱོང་ལྗོངས་དང་། ལྷ་ས་གྲོང་ཁྱེར། ཁྲེང་ཀོན་ཆུས་བཅས་ཀྱིས་ལས་ཀའི་འགན་འཁྲི་སྔར་བས་དོན་འཁྱོལ་བྱས་ནས། མཉམ་འགུལ་ལས་ཀའི་ལམ་སྲོལ་འཛུགས་པ་དང་། ཁྲོམ་རར་སྐོར་ཞིབ་བྱེད་ཤུགས་མུ་མཐུད་ཆེ་རུ་གཏོང་བ། ཕྱོགས་ཡོངས་ནས་གྲལ་བཤེར་ཞིབ་བཤེར་བཅས་བྱས་ཏེ། སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་ཁྲིམས་འགལ་ངང་འཚོང་བ་དང་། བསྒར་བ། སྤྱོད་པ་བཅས་ཀྱི་བྱེད་སྤྱོད་ལ་ཁྲིམས་ལྟར་རྡུང་རྡེག་ཚ་ནན་གཏོང་རྒྱུ་ཡིན། 

གལ་ཏེ་གྲོང་མི་མང་ཚོགས་ཚོས་སྲུང་སྐར་བརྡ་རྟགས་བསྡུ་ལེན་ས་ངོས་སྒྲིག་ཆས་ཁྲིམས་འགལ་ངང་འཚོང་བ་དང་། བསྒར་བ། སྤྱོད་པ་སོགས་ཤེས་རྟོགས་བྱུང་ཚེ། ཁ་པར་ཨང་གྲངས་6403012བརྒྱབ་ནས་ཐེར་འདོན་བྱས་ཏེ། རླུང་འཕྲིན་ཉན་པ་དང་བརྙན་འཕྲིན་ལྟ་བར་ཁོར་ཡུག་བཟང་པོ་ཞིག་ཐུན་མོང་ཐོག་གཏོད་དགོས།