ཉེ་ཆར་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་གསར་འགྱུར་ཡོངས་བསྒྲཌ་ཚོགས་འདུ་འཚོགས་ནས་རང་སྐྱོང་ལྗོངས་ཀྱིས་སྤུས་ཚད་ལ་བརྟེན་ནས་ལྗོངས་སྟོབས་ཆེར་གཏོང་ཚུལ་ངོ་སྤྲོད་བྱས་པ་རེད། ཉེ་བའི་ལོ་ཤས་རིང་བོད་ཀྱིས“ཁུལ་གསུམ་དང་མཐོ་ས་གཅིག”གཏོད་རྒྱུར་དམ་པོར་དམིགས་ནས་སྤུས་ཚད་ལ་བརྟེན་ནས་ལྗོངས་སྟོབས་ཆེར་གཏོང་བའི་འཐབ་ཇུས་ལག་བསྟར་ཤུགས་ཆེན་བྱས་ཏེ་བོད་ཀྱི་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཡོང་བར་རམ་འདེགས་བྱས་ཡོད། ད་བར་ལྗོངས་ཡོངས་སུ་སྤུས་ཚད་ལ་བརྟེན་ནས་གྲོང་ཁྱེར་སྟོབས་ཆེར་གཏོང་ཚད་100%ཟིན་ཡོད་པ་རེད།

སྤུས་ཚད་ལེགས་སུ་གཏོང་བ་དང་སྲིད་ཇུས་མཁོ་འདོན་ལ་ཤུགས་སྣོན་རྒྱག་པའི་ཐད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས《སྤུས་ཚད་ལ་བརྟེན་ནས་རྒྱལ་ཁབ་སྟོབས་ཆེར་གཏོང་བའི་རྩ་གནད》ལག་བསྟར་དོན་འཁྱོལ་བྱེད་པའི་ལག་བསྟར་བསམ་འཆར་དང་། 《བོད་རང་སྐྱོང་ལྗོངས་ཀྱི་ཐོན་རྫས་སྤུས་ཚད་ལ་ལྟ་སྐུལ་དོ་དམ་བྱེད་པའི་གནས་སྐབས་ལག་བསྟར་བྱ་ཐབས》《བོད་རང་སྐྱོང་ལྗོངས་ཀྱི“ལོ་ལྔ་ཚན་བཅུ་བཞི་པའི”བཟོ་ལས་སྤུས་ཚད་མཐོ་བའི་འཕེལ་རྒྱས་ཀྱི་འཆར་འགོད》སོགས་སྲིད་ཇུས་དང་ཡིག་ཆ་བཏོན་པ་དང་། སྤུས་ཚད་ལས་དོན་ལ་སྤྱི་འདོམས་མཐུན་སྦྱོར་བྱེད་པའི་ལམ་སྲོལ་བཙུགས་པ། ནོར་སྲིད་དངུལ་རྩའི་རོགས་སྐྱོར་བྱེད་ཤུགས་ཆེ་རུ་བཏང་བ། ཤེས་ལྡན་པའི་སློབ་གསོ་གསོ་སྐྱོང་ལ་ཤུགས་སྣོན་བརྒྱབ་པ། ལས་གྲྭའི་སྤུས་ཚད་དང་བདེ་འཇགས་ཀྱི་ལག་དེབ་བཟོ་བའི་ལམ་ལུགས་དོན་འཁྱོལ་བྱས་པ། གཞུང་དྲང་འགྲན་རྩོད་ཀྱི་ཞིབ་བཤེར་ལམ་ལུགས་འཐུས་སྒོ་ཚང་དུ་བཏང་བ། བོད་ཀྱི་སྤུས་ཚད་ཀྱི་བྱ་དགའི་ལམ་ལུགས་བཙུགས་ཏེ་སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་བའི་འཇོན་ཐང་དང་ཆུ་ཚད་མཐོ་རུ་བཏང་ཡོད།

སྤུས་ཚད་ལ་བརྟེན་ནས་ལྗོངས་སྟོབས་ཆེར་གཏོང་བར་སྐུལ་འདེད་གཏོང་བའི་ཐད་སྤུས་ཚད་ལེགས་སུ་གཏོང་བའི་བྱ་སྤྱོད་གཏིང་ཟབ་སྤེལ་ནས་ཐོན་རྫས་དང་། ལས་གྲྭ ཞབས་ཞུའི་སྤུས་ཚད་བཅས་ལེགས་སུ་གཏོང་རྒྱུར་སྐུལ་འདེད་བཏང་བས། བཟའ་བཅའི་བདེ་འཇགས་ལ་གདེང་འཇོག་རང་བཞིན་གྱི་འཐེན་བཤེར་བྱས་པར་ཚད་ལོན་ཚད་98%ཡན་ཟིན་པ་དང་། ཞིང་ལས་ཐོན་རྫས་ཀྱི་སྤུས་ཚད་བདེ་འཇགས་ལ་འཆར་ཅན་ལྟ་ཞིབ་ཚད་ལེན་བྱས་པར་ཚད་ལོན་ཚད་97.7%ཟིན་པ། བཟོ་ལས་ཐོན་རྫས་ཀྱི་སྤུས་ཚད་ལྟ་སྐུལ་འཐེན་བཤེར་བྱས་པར་ཚད་ལོན་ཚད་85.9%ཟིན་པ། ལས་གྲྭའི་སྤུས་ཚད་ཀྱི“ལག་ཁྱེར་གཉིས་དང་བྱང་བུ་གཅིག”ཁྱབ་ཚད་100%ཟིན་པ། ལས་གྲྭའི་རྣམ་གྲངས་ཆེ་འབྲིང་ཞིབ་བཤེར་རྩིས་ལེན་བྱེད་ཐེངས་གཅིག་ལ་ཚད་ལོན་ཚད་100%ཟིན་ཡོད། གྲོང་གསེབ་ཡུལ་སྐོར་དང་གསར་བརྗེའི་ཡུལ་སྐོར་སོགས་ཡུལ་སྐོར་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་བཏང་བ་དང་། སྤྱི་པའི་ཞབས་ཞུའི་སྤུས་ཚད་ལྟ་ཞིབ་ཚད་ལེན་བྱས་འབྲས་བཀོལ་སྤྱོད་ལ་ཤུགས་སྣོན་བརྒྱབ་པས་ཉེ་བའི་ལོ་གསུམ་རིང་རྒྱལ་ཡོངས་ཀྱི་སྤྱི་པའི་ཞབས་ཞུའི་སྤུས་ཚད་ལྟ་ཞིབ་ཚད་ལེན་ནང་རང་ལྗོངས་ཀྱི་བང་རིམ་རྒྱལ་ཡོངས་ཀྱི་མདུན་གྱི་ཨང་བཅུ་པར་རྒྱུན་འཁྱོངས་ཐུབ་ཡོད།

སྤུས་ཚད་ལག་རྩལ་གྱི་ཞབས་ཞུ་འཐུས་སྒོ་ཚང་དུ་གཏོང་བའི་ཐད་སྤྱི་ཚོགས་ཀྱི་སྤྱི་སྤྱོད་ཚད་འཇལ་ཚད་གཞི་119བཙུགས་པ་དང་། ཞིང་འབྲོག་དང་། བོད་སྨན། གནམ་གཤིས་སོགས་བོད་ཀྱི་ཁྱད་ལྡན་ཆེད་ལས་ཚད་ལྡན་ཅན་གྱི་ལག་རྩལ་ཨུ་ལྷན་6བཙུགས་ནས་རིམ་རྩིས་བྱས་ན་ས་གནས་ཀྱི་ཚད་གཞི་ཁག་306ཁྱབ་བསྒྲགས་བྱས་པ་དང་། རྒྱལ་ཁབ་རིམ་པའི་ཚད་ལྡན་ཅན་གྱི་དཔེ་སྟོན་ཁུལ་53དང་རང་སྐྱོང་ལྗོངས་རིམ་པའི་ཚད་ལྡན་ཅན་གྱི་དཔེ་སྟོན་ཁུལ་13བསྐྲུན་པ། ཁེ་ལས་ལ་སྤུས་ཚད་དོ་དམ་མ་ལག་གི་ཁས་ལེན་དཔང་འདོན་ལག་ཁྱེར་ལེན་པར་ལྕག་སྐུལ་དང་ཁྲིད་སྟོན་བྱས་པས་ISO9001ཁས་ལེན་དཔང་འདོན་ཐོབ་པའི་སྒྲིག་གཞི་678ཟིན་ཡོད།

2022ལོའི་ལོ་མཇུག་བར་ལྗོངས་ཡོངས་སུ་གསར་གཏོད་ཀྱི་ཁེ་བེད་བདག་ཐོབ་1065ཟིན་ཏེ་དུས་མཚུངས་ལས་16%འཕར་བ་དང་། ཚོང་རྟགས་ཐོ་འགོད་ནུས་ལྡན་བྱེད་ཚད་55810ཟིན་ཏེ་དུས་མཚུངས་ལས་17.6%འཕར་ཡོད། ད་བར་ལྗོངས་ཡོངས་སུ་ས་ཁམས་མཚོན་རྟགས་ཀྱི་སྲུང་སྐྱོང་ཐོན་རྫས་36དང་། ས་ཁམས་མཚོན་རྟགས་ཀྱི་ཞིང་ལས་ཐོན་རྫས་39 ས་ཁམས་མཚོན་རྟགས་ཀྱི་ར་སྤྲོད་ཚོང་རྟགས་དང་མཉམ་སྡེབ་ཚོང་རྟགས་146བཅས་ཡོད་པ་རེད།

དེ་དང་ཆབས་ཅིག སྤུས་ཚད་ཀྱི་ལྟ་སྐུལ་དོ་དམ་ལ་ཕྱོགས་ཡོངས་ནས་ཤུགས་སྣོན་བརྒྱབ་སྟེ་བཟའ་བཅའི་བདེ་འཇགས་ཀྱི་ཆེད་དོན་བཅོས་སྒྲིག་བྱ་སྤྱོད་སྣ་ཚོགས་སྤེལ་ནས་གཙོ་གནད་ཐོག་བཟོ་ལས་ཐོན་རྫས་ཀྱི་སྤུས་ཚད་བདེ་འཇགས་ཀྱི“ཉེན་ཁ་དང་མངོན་མེད་རྐྱེན་ངན་སེལ་བའི”འགག་སྒྲོལ་དམག་འཐབ་རྒྱག་པ་སོགས་བྱས་ཡོད། ལྗོངས་ཡོངས་ཀྱི་སློབ་གྲྭའི་ཟ་ཁང་གི“ཐབ་ཚང་ཕྱི་གསལ་ནང་གསལ”ཡོང་ཚད་100%ཟིན་པ་དང་། 2021ལོ་ནས་ད་བར་འཛད་སྤྱོད་པའི་ཞུ་གཏུག་ཐེར་འདོན་གནད་དོན་ཁྲི་2.28བདག་སྤྲོད་བྱས་པ་དང་དཔལ་འབྱོར་གྱོང་གུན་སྒོར་ཁྲི་3059.04གསབ་ཡོད་པ་རེད།