བརྗོད་དོན་གཙོ་བོའི་སློབ་གསོ་སྤེལ་ཚུན། བོད་ཀྱི་སྒྲིག་བཤེར་ལྟ་ཞིབ་ལས་ཁུངས་ཀྱིས་བརྟག་དཔྱད་ཞིབ་འཇུག་བྱ་རྒྱུ་དེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོའི་ནང་དོན་གལ་ཆེན་ཞིག་ཏུ་བརྩིས་ནས་བརྟག་དཔྱད་ཞིབ་འཇུག་གཏིང་ཟབ་བྱས་ཏེ་འཕེལ་རྒྱས་ཀྱི་དཀའ་གནད་སེལ་བ་དང་བརྗོད་དོན་གཙོ་བོའི་སློབ་གསོ་གཏིང་ཟབ་དང་ཏན་ཏིག་ངང་སྤེལ་བར་སྐུལ་འདེད་བཏང་བ་རེད།

རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱིས་ཚད་མཐོའི་མཐོང་ཆེན་བྱས་ནས་དུས་ཐོག་ཏུ་རྒྱུན་ལས་ཨུ་ལྷན་གྱི་ཚོགས་འདུ་འཚོགས་ཏེ་བརྟག་དཔྱད་ཞིབ་འཇུག་བྱེད་པའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་ལྗོངས་ཏང་ཨུད་ཀྱི་ལག་བསྟར་ཇུས་གཞིའི་དགོངས་དོན་སློབ་སྦྱོང་ནན་ཏན་བྱས་ནས་ལག་བསྟར་དང་དོན་འཁྱོལ་བྱེད་ཐབས་ཞིབ་འཇུག་བྱས་ཤིང་། 《བོད་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་ཚན་ཁག་གི་ཁོངས་མིས་བརྟག་དཔྱད་ཞིབ་འཇུག་ལས་དོན་གཏིང་ཟབ་སྤེལ་བའི་ཇུས་གཞི》བཟོས་ནས་ཆབ་སྲིད་ལྟ་སྐུལ་དང་། རྫོང་རིམ་པའི་སྒྲིག་ཨུད་ལྟ་ཞིབ་ཨུ་ལྷན་ནང་ཁུལ་དུ་བཙུགས་པའི་ལས་ཁུངས་སྒྱུར་བཅོས། བརྟག་དཔྱད་བདེ་འཇགས་ལ་ཞིབ་བཤེར་སོགས་ཕྱོགས་12ཐད་ཀྱི་བརྟག་ཞིབ་ལས་འགན་ལ་དམིགས་ནས་བརྟག་དཔྱད་ཞིབ་འཇུག་བྱ་གཞི་10གཏན་འཁེལ་བྱས་པ་དང་། འགོ་ཁྲིད་ཚན་པའི་ཁོངས་མིས་སློབ་སྦྱོང་བྱེད་ཀྱིན་དུ་ལས་ཀ་དང་བརྟག་དཔྱད་ཞིབ་འཇུག་བྱེད་པ་མཐའ་འཁྱོངས་ཀྱིས་སོ་སོས་རུ་སྣེ་ཁྲིད་དེ་གྲོང་ཁྱེར་དང་། ས་ཁུལ། དེ་བཞིན་རྫོང་། ཆུས། ཤང་། གྲོང་རྡལ་བཅས་སུ་བསྐྱོད་དེ་སྒྲིག་བཤེར་ལྟ་ཞིབ་ལས་དོན་ལ་བརྟག་དཔྱད་ཞིབ་འཇུག་བྱས་ནས་སྒྲིག་བསྟར་ཁྲིམས་བསྟར་དང་སྒྲིག་བཤེར་ལྟ་ཞིབ་སྒྲིག་སྲོལ་སྒྱུར་བཅོས་སོགས་ཀྱི་ལས་དོན་སྤེལ་ཚུལ་གཙོ་གནད་ཐོག་ཤེས་རྟོགས་བྱས་ཏེ། མང་ཚོགས་ཀྱི་བསམ་འཆར་ཉན་པ་དང་། མང་ཚོགས་ཀྱི་དཀའ་ངལ་སེལ་བ། མང་ཚོགས་ཀྱི་སེམས་ཁྲལ་སེལ་བ་བཅས་བྱས་པ་རེད།

རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱིས་མངགས་གཏོང་བྱས་པའི་སྒྲིག་བཤེར་ལྟ་ཞིབ་ཚོགས་ཆུང་ཁག་དང་། རང་སྐྱོང་ལྗོངས་ཀྱིས་དོ་དམ་བྱེད་པའི་གཞུང་ཁོངས་ཁེ་ལས། ལྗོངས་ཁོངས་གཏོགས་ཀྱི་མཐོ་སློབ་སྒྲིག་བཤེར་ལྟ་ཞིབ་ལས་ཁུངས་བཅས་སུ་བཅའ་སྡོད་བྱས་ཏེ་ལས་ཀའི་དོན་དངོས་ལ་གཞི་ཚུགས་པ་དང་བརྟག་དཔྱད་ཞིབ་འཇུག་ཁྲོད་གནས་ཚུལ་གསར་པར་ཞིབ་འཇུག་དང་དཀའ་གནད་གསར་པ་སེལ་རྒྱུ་མཐའ་འཁྱོངས་ཀྱིས་མངགས་གཏོང་བཅའ་སྡོད་ཀྱི་ལྟ་སྐུལ་ཏན་ཏིག་བྱས་པ་དང་། བརྟག་དཔྱད་ཞིབ་འཇུག་གི་སྐུལ་འདེད་ནུས་པ་གང་ལེགས་བཏོན་ནས་གྱོད་དོན་ཞིབ་གཅོད་ཀྱི་མཇུག་འཕྲོའི་ལས་དོན་གཏིང་ཟབ་དང་ཏན་ཏིག་སྒྲུབ་པར་སྐུལ་འདེད་བཏང་ཡོད། ལྗོངས་ཏང་ཨུད་རྩ་འཛུགས་པུའུ་རུ་བཅའ་སྡོད་བྱས་པའི་སྒྲིག་བཤེར་ལྟ་ཞིབ་ཚོགས་ཆུང་གིས་ཕྱོགས་བསྡུས་ལྟ་སྐུལ་ཚན་པ་6གི་སྲིད་གཙང་ཉམས་ཉེན་སྔོན་འགོག་ཚོད་དང་འཛིན་ལས་དོན་གྱི་ད་ཆའི་གནས་ཚུལ་ལ་དམིགས་ཏེ། 《ལྗོངས་ཏང་ཨུད་རྩ་འཛུགས་པུའུ་རུ་བཅའ་སྡོད་སྒྲིག་བཤེར་ལྟ་ཞིབ་ཚོགས་ཆུང་གིས་སྲིད་གཙང་ཉམས་ཉེན་གྱི་མངོན་མེད་རྐྱེན་ངན་ལ་བརྟག་ཞིབ་བྱེད་པའི་ལས་ཀའི་ཇུས་གཞི》ཞིབ་འཇུག་བྱས་ནས་བཟོས་པ་དང་། ཕྱོགས་བསྡུས་ལྟ་སྐུལ་ཚན་པ་6དང་། ཚན་ཁག་གི་ཁོངས་མི་10ལྷག་ཙམ། འགན་ནུས་ཁྲུའུ་དང་ཁང（སྡེ་ཚན）50ལྷག་ཙམ་དང་དེ་བཞིན་ཐད་གཏོགས་བྱ་གཞག་ཚན་པ་མང་པོའི་འགན་འཁུར་བ་བཅས་དང་གླེང་མོལ་བྱས་པ། སྲིད་གཙང་ཉམས་ཉེན་ལས་དོན་གྱི་དཔྱད་གཞིའི་ཡིག་ཆ་20ལྷག་ཙམ་ལྟ་བཤེར་བྱས་པ། སྲིད་གཙང་ཉམས་ཉེན་ཁག་242གསེད་བཀྲོལ་བཅས་བྱས་ནས《ཕྱོགས་བསྡུས་ལྟ་སྐུལ་གྱི་ཚན་པས་སྲིད་གཙང་ཉམས་ཉེན་སྔོན་འགོག་དང་ཚོད་འཛིན་ལས་དོན་སྤེལ་བའི་ད་ཆའི་གནས་ཚུལ་སྐོར་གྱི་བརྟག་དཔྱད་སྙན་ཞུ》གྲུབ་ཡོད།

གནད་དོན་ནི་འབད་བརྩོན་གྱི་ཁ་ཕྱོགས་དང་ལས་ཀའི་སྟོན་ཕྱོགས་ཡིན་ཞིང་། བརྟག་དཔྱད་ཞིབ་འཇུག་གི་ལས་དོན་རགས་ཙམ་སྤེལ་བ་ཙམ་མ་ཡིན་པར་གནད་དོན་དང་དཀའ་གནད་ལ་དམིགས་ཏེ་སྤེལ་དགོས། བོད་ལྗོངས་སློབ་ཆེན་སྒྲིག་ཨུད་ཀྱིས《སྒྲིག་བཤེར་ལས་བྱེད་པའི“བརྟག་ཞིབ་ཆེ་མོ་དང་ཞིབ་བཤེར་ཆེ་མོའི”ལས་དོན་སྤེལ་བའི་སྐོར་གྱི་བརྡ་ཐོ》བཏང་སྟེ། ཕྱོགས་ཡོངས་ནས་ཏང་ནན་པོས་སྐྱོང་བ་སོགས་ཀྱི་ཞིབ་འཇུག་བྱ་གཞི་5ལ་དམིགས་ནས་སློབ་གླིང་ཁག་དང་སྡེ་ཚན་ཁག་ཏུ་བརྗོད་དོན་ལ་དམིགས་པའི་བརྟག་དཔྱད་ཞིབ་འཇུག་དང་། ལྟ་ཞིབ་རྣམ་པའི་བརྟག་དཔྱད་ཞིབ་འཇུག དབྱེ་ཞིབ་རྣམ་པའི་བརྟག་དཔྱད་ཞིབ་འཇུག་བཅས་བྱས་ཏེ་ཤེས་རྟོགས་བྱུང་བའི་གནད་དོན་ལ་དམིགས་ནས་རྒྱུ་རྐྱེན་ལ་དབྱེ་ཞིབ་ནན་ཏན་དང་། བགྲོ་གླེང་དང་རིགས་པས་ཁུངས་སྐྱེལ་གང་ལེགས་བྱེད་པ། གནད་དོན་གྱི་འགག་རྩ་བཙལ་འཚོལ་འཕྱུགས་པ་མེད་པ་བཅས་བྱས་ཏེ་བསམ་འཆར་དང་གྲོས་འགོ་ཁག་26བཏོན་ཡོད། བོད་ལྗོངས་མི་རིགས་སློབ་ཆེན་སྒྲིག་ཨུད་ཀྱིས《“ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི”རྩ་བའི་ལས་འགན་དོན་འཁྱོལ་ལ་དམ་པོར་དམིགས་ཏེ། ཆབ་སྲིད་ཀྱི་ལྟ་སྐུལ་ལ་བརྟེན་ནས་སློབ་གྲྭའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས》ཞེས་པའི་ཆེད་དོན་བརྟག་ཞིབ་འཆར་གཞི་བཟོས་པ་དང་། མངོན་གསལ་དོད་པའི་གནད་དོན་དང་དམིགས་ཚད་སྟོན་ཕྱོགས་སུ་བྱས་ཏེ་ཆབ་སྲིད་ཀྱི་ལྟ་སྐུལ་དང་། རྒྱུན་གཏན་གྱི་ལྟ་སྐུལ། བརྗོད་དོན་གཙོ་བོའི་སློབ་གསོའི་ལས་དོན་བཅས་བརྟག་དཔྱད་ཞིབ་འཇུག་ལས་དོན་གྱི་བརྒྱུད་རིམ་ཧྲིལ་པོར་ནུས་ལྡན་ངང་ཁྱབ་པར་བྱས་ཤིང་། མིག་སྔར་སློབ་གྲྭ་ཡོངས་ཀྱི་ཚན་པ（སྡེ་ཚན）8ལ་དངོས་སུ་བཅར་འདྲི་བྱས་པར་གནད་དོན་ཁག་4ཤེས་རྟོགས་བྱུང་ནས་དག་ཐེར་བསམ་འཆར་ཁག་4བཏོན་པ་དང་ཆབས་ཅིག་སྲིད་གཙང་ཉམས་ཉེན་སྔོན་འགོག་དང་ཚོད་འཛིན་ལ་ཤུགས་རྒྱག་པ་དང་དབང་ཆ་འཁོར་རྒྱུག་ཚད་ལྡན་དུ་བཏང་ནས་སློབ་གྲྭ་ཡོངས་སུ་2023ལོའི་སྲིད་གཙང་ཉམས་ཉེན་སྔོན་འགོག་དང་ཚོད་འཛིན་དང་གྲལ་བཤེར་ལས་དོན་སྤེལ་བ་རེད།

བརྟག་དཔྱད་ཞིབ་འཇུག་ནི་སློབ་སྦྱོང་དང་ལས་ཀ་ཟུང་འབྲེལ་བྱེད་པའི་འབྲེལ་ཐག་ལྟ་བུ་རེད། བོད་ལྗོངས་དངུལ་ཁང་མ་རྐང་ཚད་ཡོད་ཀུང་སིར་བཅའ་སྡོད་སྒྲིག་བཤེར་ལྟ་ཞིབ་ཚོགས་ཆུང་གིས་ལས་ཀའི་དོན་དངོས་དང་ཟུང་འབྲེལ་བྱས་ནས《བོད་ལྗོངས་དངུལ་ཁང་དུ་བཅའ་སྡོད་སྒྲིག་བཤེར་ལྟ་ཞིབ་ཚོགས་ཆུང་གིས་བཅར་འདྲི་དང་བརྟག་ཞིབ་བྱེད་སྒོ་སྤེལ་བའི་ལག་བསྟར་ཇུས་གཞི》འཐུས་སྒོ་ཚང་དུ་བཏང་ཞིང་། བཞུགས་མོལ་སྤེལ་རེས་དང་། དཔྱད་ཡིག་ལྟ་བཤེར། མི་རེ་ཟུང་དང་གླེང་མོལ། ས་གནས་ས་ཐོག་ཏུ་འཐེན་བཤེར། ས་གནས་ས་ཐོག་ཏུ་ལྟ་སྦྱོང་སོགས་ཀྱི་བྱེད་ཐབས་སྤྱི་འདོམས་ངང་སྤྱད་དེ་སྔ་རྗེས་སུ་བོད་ལྗོངས་དངུལ་ཁང་སྤྱི་ཁྱབ་དངུལ་ཁང་གི་སྡེ་ཚན་དང་། ཡན་ལག་དང་ཡན་ལག་ལས་ཁུངས། བོད་ལྗོངས་དངུལ་ཁང་གི་ཚོང་ཤག་གཙོ་བོ། རྐང་བདག་ཚན་པ་སོགས་སུ་བསྐྱོད་དེ་བཅར་འདྲི་དང་བརྟག་ཞིབ་བྱས་པ་རེད།