ཉེ་བའི་ལོ་ཤས་རིང་། ཆབ་མདོ་གྲོང་ཁྱེར་སྒར་ཐོག་གྲོང་རྡལ་སྒར་ཐོག་གྲོང་ཚོའི་ཏང་ཀྲི་པུས་ཐོག་མཐའ་བར་གསུམ་དུ་ལྗོངས་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་གཞི་རིམ་ཏང་རྩ་འཛུགས་ཀྱི་དཔེ་སྟོན་ཁུལ་གྱི་འཛུགས་གཏོད་མི་རིགས་མཐུན་སྒྲིལ་ལ་སྐུལ་འདེད་དང་། སྤྱི་ཚོགས་བརྟན་ལྷིང་སྲུང་སྐྱོང་། དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་གཞི་རྟེན་གཙོ་བོ་ཞིག་ཏུ་བརྩིས་ཤིང་། “མཉམ་དུ་མཐུན་སྒྲིལ་འབད་འཐབ་བྱེད། མཉམ་དུ་དར་རྒྱས་གོང་འཕེལ་གཏོང”བའི་བརྗོད་དོན་གཙོ་བོར་དམིགས་ཏེ་ཕྱོགས་གཅིག་ནས་མི་རིགས་མཐུན་སྒྲིལ་འཛུགས་གཏོད་ལ་དམ་འཛིན་དང་ཕྱོགས་གཅིག་ནས་དཔལ་འབྱོར་འཕེལ་རྒྱས་ལ་དམ་འཛིན་མཐའ་འཁྱོངས་བྱས་ཏེ། ལས་དོན་སྒྲུབ་རིང“དོན་འཁྱོལ་གསུམ”སྒྲུབ་ཐུབ་པར་བྱས་པས། གོང་རིམ་ཏང་སྲིད་སྡེ་ཚན་དང་དེ་བཞིན་གྲོང་མི་ཚོའི་གདེང་འཇོག་བཟང་པོ་ཐོབ་པ་རེད།

ཉེ་བའི་ལོ་ཤས་རིང་། སྒར་ཐོག་གྲོང་ཚོའི་མི་རིགས་མི་འདྲ་བའི་གྲོང་མིའི་དབར་སྤེལ་རེས་ཇེ་མང་དུ་ཕྱིན་པ་དང་། མང་ཚོགས་ཀྱི་གཉེན་སྒྲིག་ལྟ་བ་ལའང་རིམ་གྱིས་འགྱུར་ལྡོག་བྱུང་ཡོད། མིག་སྔར། གྲོང་ཚོ་ཡོངས་སུ་ཁྱོན་མི་རིགས་མི་འདྲ་བ་གཉེན་སྒྲིག་བྱས་པའི་ཁྱིམ་ཚང་6ཡོད་ཅིང་། ཡུལ་མི་རྣམས་ཞི་མཐུན་མཉམ་གནས་དང་། མཛའ་མཐུན་རོགས་རེས། ཐུན་མོང་འཕེལ་རྒྱས་བཅས་བྱུང་ཡོད།

“སྒར་ཐོག་གྲོང་ཚོ་ནི་ཇ་རྟའི་གནའ་ལམ་རྒྱུད་ཀྱི་གྲོང་རྡལ་གལ་ཆེན་ཞིག་ཡིན་པ་དང་སྔོན་དུས་ནས་མི་རིགས་མང་པོ་མཉམ་དུ་འཚོ་སྡོད་བྱ་ཡུལ་ཞིག་རེད། མི་རིགས་མཐུན་སྒྲིལ་གྱི་ལས་དོན་ལ་དམ་འཛིན་ཡག་པོ་བྱེད་པར་དང་ཐོག་དཔལ་འབྱོར་འཕེལ་རྒྱས་གཏོང་བར་དམ་འཛིན་བྱེད་དགོས” སྒར་ཐོག་གྲོང་ཚོའི་ཏང་ཀྲི་པུའི་ཧྲུའུ་ཅི་གནམ་གང་གིས་མི་རིགས་མཐུན་སྒྲིལ་ནི་འབོད་ཚིག་སྒྲོག་པ་ལྟ་བུ་མ་ཡིན་པར་མང་ཚོགས་ཀྱི་ཐོན་སྐྱེད་དང་འཚོ་བ་ནས་དེ་བས་མངོན་པར་བྱེད་དགོས་པའི་ངོས་འཛིན་བྱེད་ཀྱི་ཡོད།

དམིགས་ཡུལ་འདི་འདྲ་ཞིག་བཅངས་ནས་སྒར་ཐོག་གྲོང་ཚོའི་ཏང་ཀྲི་པུའུ་ཡིས་ཐབས་བརྒྱ་ཇུས་སྟོང་ངང་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་གཏོང་བཞིན་ཡོད་པ་རེད།

2012ལོའི་ཟླ་4པར་སྒར་ཐོག་གྲོང་ཚོའི་ཨར་འདམ་ས་ཚིགས་བཙུགས་པ་རེད། ལོ་འགའ་ཤས་སོང་རྗེས་ཁེ་ལས་དེ་རིམ་གྱིས་གྲོང་ཚོའི་མང་ཚོགས་ཀྱིས་ཐག་ཉེ་ས་ནས་ཡོང་འབབ་འཚོལ་བའི་ཐབས་ལམ་གལ་ཆེན་ཞིག་ཏུ་འཕེལ་རྒྱས་བྱུང་ཡོད། 2021ལོར་གྲོང་ཚོའི་ཨར་འདམ་ས་ཚིགས་ནས་གྲོང་ཚོར་ཁེ་སྤོགས་སྒོར་ཁྲི་818.4རག་པ་དང་འདི་ལོའི་ཟླ་དང་པོ་ནས་གཉིས་པའི་བར་ཁེ་སྤོགས་སྒོར་ཁྲི་99.6བྱུང་ཡོད། གནམ་གང་གི་སེམས་སུ་གྲོང་ཚོའི་ཨར་འདམ་ས་ཚིགས་ནས་བྱུང་བ་ནི་དཔལ་འབྱོར་གྱི་ཕན་འབྲས་ཙམ་མིན་པར་ད་དུང་ཤུགས་རྐྱེན་ཆེ་བའི་སྤྱི་ཚོགས་ཀྱི་ཕན་འབྲས་ཀྱང་ཡོད་པ་རེད། “གྲོང་ཚོའི་ཨར་འདམ་ས་ཚིགས་ཀྱི་འཛུགས་སྐྲུན་ལ་ཞུགས་པའི་གྲོང་མིའི་ཧུར་སེམས་ཧ་ཅང་ཆེན་པོ་འདུག ཁོ་ཚོས་གྲོང་ཚོའི་ཨར་འདམ་ས་ཚིགས་ཚུད་པའི་མཉམ་སྡེབ་དཔལ་འབྱོར་འབབ་ཁུངས་དང་འཇོན་ཐང་ཆེ་རུ་གཏོང་བའི་ལས་སྟེགས་ལ་བརྩིས་ཀྱི་ཡོད། དེ་སྔོན་རྒྱལ་ཁབ་ཀྱི་སྤྱི་སྤྱོད་སྐད་ཡིག་མི་ཤེས་པའི་གྲོང་མི་ཚོ་གྲོང་ཚོའི་ཁེ་ལས་ལ་ལས་ཀར་ཕྱིན་པ་བརྒྱུད་ཡི་གེ་ཤེས་པ་དང་། དེ་སྔོན་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཤོད་མི་ཤེས་པའི་གྲོང་མིས་དུས་རྒྱུན་གྱི་སྤེལ་རེས་བརྒྱུད་སྤྱི་སྐད་ཤོད་ཤེས་ཀྱི་ཡོད”ཅེས་གནམ་གང་གིས་བཤད།

ཉེ་བའི་ལོ་ཤས་རིང་། སྒར་ཐོག་གྲོང་ཚོའི་ཏང་ཀྲི་པུས་གྲོང་ཚོའི་མཉམ་སྡེབ་དཔལ་འབྱོར་གྱི་ཕྱོགས་སྒྱུར་ལ་མུ་མཐུད་སྐུལ་འདེད་བཏང་སྟེ་འཕེལ་རྒྱས་ཀྱི་གོམ་སྟབས་མགྱོགས་སུ་བཏང་ཞིང་། སྔ་རྗེས་སུ་སྟག་ལུང་རླངས་འཁོར་འཁྲུད་ས་དང་ལྕགས་ཐག་རླངས་འཁོར་འཁྲུད་ས་བཙུགས་པ་དང་། ནགས་ཁྲོད་ཐོན་ལས་འཚོལ་ཞིབ་དང་འཕེལ་རྒྱས་བཏང་བ། ཨ་བི་ཁ་ཚོད་འདེབས་ཧུར་ཐག་བྱས་པ་རེད། དེ་དང་ཆབས་ཅིག་ས་བབ་ཀྱི་ལེགས་ཆ་གང་ལེགས་སྤྱད་དེ་དཔལ་འབྱོར་ནགས་ཚལ་དང་མཛེས་ལྗོངས་ནགས་ཚལ་འདེབས་འཛུགས་ཤུགས་ཆེན་བྱས་པ་དང་མང་ཚོགས་ལ་ཚོང་ཁང་དང་བོད་ཁྱིམ་སྤྲོ་ཁང་སོགས་གཉེར་བའི་ལྕག་སྐུལ་དང་ཁྲིད་སྟོན་བྱས་པར་མང་ཚོགས་ལ་ཡུལ་སྐོར་ཡོང་འབབ་རག་ཡོད། 2022ལོར་གྲོང་ཚོ་ཡོངས་ཀྱི་ཞིང་འབྲོག་པ་མི་རེའི་ཆ་སྙོམས་ཡོང་འབབ་ཁེ་གཙང་སྒོར་23844ཟིན་པ་དང་། མཉམ་སྡེབ་དཔལ་འབྱོར་འཕེལ་རྒྱས་བཏང་བ་བརྒྱུད་མང་ཚོགས་ཀྱི་ཡོང་འབབ་མང་དུ་འགྲོ་བའི་དམིགས་ཡུལ་མངོན་འགྱུར་ཐུབ་ཡོད།

ཕྱུག་པོ་ཆགས་པའི་སྒར་ཐོག་གྲོང་ཚོའི་མང་ཚོགས་ཀྱིས་མིག་མདུན་གྱི་འབྱོར་ཕྱུག་ལྡན་པའི་དངོས་པོའི་འཚོ་བར་བློ་ཡིད་ཚིམས་ནས་མ་བསྡད་པར་བསམ་པའི་འཚོ་བར་ཡང་རེ་བ་དེ་བས་མཐོ་བ་བཏོན་ཡོད། གྲོང་ཚོའི་ཏང་ཀྲི་པུས་གྲོང་ཚོའི་མཉམ་སྡེབ་བྱེད་སྒོ་ཡག་པོ་གཉེར་བ་ཉིན་རེའི་གྲོས་རིམ་གལ་ཆེན་དུ་བཅུག་ནས་མང་ཚོགས་ཀྱི་བསམ་པའི་དགོས་མཁོ་སྐོང་ཐུབ་པར་བྱས་ཡོད། ད་ཆ་སྒར་ཐོག་གྲོང་ཚོར“ཀྲི་པུའི་བྱེད་སྒོ་དང་དམངས་སྲོལ་དུས་ཆེན་ཟུང་འབྲེལ”དང“ཕུལ་བྱུང་སྲོལ་རྒྱུན་རིག་གནས་དར་སྤེལ་དང་མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བ”སོགས་ཀྱི་བྱེད་སྒོ་གྲོང་ཚོ་ཡོངས་ཀྱི་མང་ཚོགས་ཀྱིས་ཤེས་དཔལ་གོང་མཐོར་གཏོང་བ་དང་ཉམས་འགྱུར་མངོན་པའི་གཞི་རྟེན་གལ་ཆེན་ཞིག་ཏུ་གྱུར་ཡོད།