ཚེས་2ཉིན་གསར་འགོད་པར་ཚོང་དོན་པུའུ་ནས་ཤེས་རྟོགས་བྱུང་བར། འདི་ལོའི་ཟླ་དང་པོ་ནས་བཞི་པའི་བར་རང་རྒྱལ་གྱི་ཞབས་ཞུའི་ཚོང་དོན་སྤྱིའི་ཆ་ནས་འཕར་བའི་རྣམ་པ་རྒྱུན་འཁྱོངས་ཐུབ་ཡོད་པ་རེད། ཞབས་ཞུའི་ཕྱིར་གཏོང་ནང་འདྲེན་གྱི་བསྡོམས་འབོར་སྒོར་དུང་ཕྱུར་20816.5ཟིན་པ་དེ་དུས་མཚུངས་ལས་9.1%འཕར་ཡོད་ཅིང་། དེའི་ཁྲོད་ནས་ཕྱིར་གཏོང་སྒོར་དུང་ཕྱུར་8871.3ཟིན་ནས་4.9%ཆག་པ་དང་། ནང་འདྲེན་སྒོར་དུང་ཕྱུར་11945.2ཟིན་ནས་22.6%འཕར་བ། ཞབས་ཞུའི་ཚོང་དོན་ལྡོག་ཁྱད་སྒོར་དུང་ཕྱུར་3073.9ཟིན་ཡོད་པ་རེད།

ཤེས་བྱ་འདུས་ཆེའི་ཞབས་ཞུའི་ཚོང་དོན་གྱིས་བཟུང་ཚད་མཐོ་རུ་ཕྱིན་ཞིང་། ཟླ་དང་པོ་ནས་བཞི་པའི་བར་ཤེས་བྱ་འདུས་ཆེའི་ཞབས་ཞུའི་ཕྱིར་གཏོང་ནང་འདྲེན་སྒོར་དུང་ཕྱུར་9057.9ཟིན་པ་དེ་དུས་མཚུངས་ལས་13.1%འཕར་ཞིང་དེས་ཞབས་ཞུའི་ཕྱིར་གཏོང་ནང་འདྲེན་བསྡོམས་འབོར་གྱི་43.5%བཟུང་བ་དེ་ལོ་གོང་མའི་དུས་མཚུངས་ལས་བརྒྱ་ཆའི་གྲངས་1.5འཕར་ཡོད་པ་རེད།

ཡུལ་སྐོར་ཞབས་ཞུའི་ཕྱིར་གཏོང་ནང་འདྲེན་སླར་གསོ་མངོན་གསལ་དོད་པོ་བྱུང་ཞིང་། ཟླ་དང་པོ་ནས་བཞི་པའི་བར་སྒོར་དུང་ཕྱུར་4441.9ཟིན་པ་དེ་དུས་མཚུངས་ལས་63.4%འཕར་བ་དང་དེའི་ནང་ནས་ཕྱིར་གཏོང་48.5%འཕར་བ་དང་ནང་འདྲེན་64.5%འཕར་ཡོད་པ་རེད།