ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། གསར་འགོད་པར་ཀྲུང་གོ་ཚན་རིག་ཁང་གནའ་བོའི་སྒལ་ཚིགས་སྲོག་ཆགས་དང་གནའ་བོའི་མིའི་རིགས་ཞིབ་འཇུག་སུའོ་ནས་ཤེས་རྟོགས་བྱུང་བར་གཞིགས་ན། མཚོ་བོད་ས་མཐོའི་ཕྱོགས་བསྡུས་ཚན་རིག་རྟོག་ཞིབ་ཞིབ་འཇུག་ཐེངས་གཉིས་པའི་ཚན་ཞིབ་པས་ཉེ་དུས་ཇོ་མོ་གླང་མའི་ཁུལ་ནས་སླར་ཡང་ཧི་མ་ལ་ཡའི་འབྲུག་ཉའི་འགྱུར་རྡོ་རྙེད་པ་རེད། དེས་མཚོ་བོད་ས་མཐོར་ད་བར་ཤེས་རྟོགས་བྱུང་བའི་ཡི་གེ་མ་བྱུང་གོང་གི་ལོ་རྒྱུས་ཀྱི་སྲོག་ཆགས་ཆེ་ཤོས་ལ་ཚན་རིག་དང་མཐུན་པའི་སྒོ་ནས་ཤེས་རྟོགས་གཏིང་ཟབ་དང་ཞིབ་ཚགས་བྱེད་ཐུབ་པ་མ་ཟད། ས་ཁུལ་དེའི་བར་ཐོན་དུས་རབས་ཀྱི་ཚེ་སྲོག་འཕེལ་འགྱུར་གྱི་ཞིབ་འཇུག་ལ་ཕན་ཐོགས་ཡོད།