“སྦྲེལ་མཐུད་བཞི་དང་འགན་ལེན་བཞིའི”ལས་ཀའི་ལམ་སྲོལ་ལ་སྐུལ་འདེད་གཏིང་ཟབ་བཏང་སྟེ། སྔར་ལས་ལྷག་པའི་སྒོ་ནས་ལས་ཀའི་སྤྱོད་ཚུལ་ལེགས་སུ་གཏོང་བ་དང་མང་ཚོགས་ལ་ཞབས་འདེགས་ཞུ་ནུས་ཆེ་རུ་གཏོང་ཆེད། ཉིན་ཤས་གོང་ཀརྨ་དགོན་གསར་སྡེ་ཁུལ་གྱིས་ཁྲེང་ཀོན་ཆུས་སློབ་གསོ་ཅུས་དང་མཉམ་དུ་སྡེ་ཁུལ་དུ་སློབ་གསོའི་བྱེད་སྒོ་སྤེལ་བའི་ཞབས་ཞུའི་འཛིན་གྲྭའི་སློབ་འགོ་ཚུགས་པ་རེད།

དེ་གོང་སྡེ་ཁུལ་གྱི་ལས་དོན་པ་དང་ཁྲེང་ཀོན་ཆུས་སློབ་གསོ་ཅུས་ཀྱི་གྲོང་སྡོད་ལས་དོན་རུ་ཁག་གི་རུ་མིས་ཁོངས་གཏོགས་ཁུལ་གྱི་ཁྱིམ་ཚང་གི་སློབ་ཆུང་དང་དམའ་རིམ་སློབ་འབྲིང་གི་སློབ་མར་སློབ་སྦྱོང་ཟུར་ཁྲིད་ཀྱི་ཆ་རྐྱེན་དེ་ཙམ་ཡག་པོ་མེད་པའི་གནས་ཚུལ་ཕྱོགས་ཡོངས་ནས་གྲལ་བཤེར་བྱས་པ་དང་། ལྷག་པར་དུ་རྒན་རྒོན་གྱིས་ཕྲུ་གུ་ལྟ་སྐྱོང་བྱེད་དགོས་པ་དང་ན་གཞོན་དུས་ཡུན་རིང་པོ་ཁྱིམ་ལ་སྡོད་ཁོམ་མེད་པའི་ཁྱིམ་ཚང་ལ་དམིགས་ཏེ། ཁྲེང་ཀོན་ཆུས་སློབ་གསོ་ཅུས་ཀྱིས་འདི་ལོའི་རེས་གཟའ་སྤེན་པ་ཚང་མར་ཕུལ་བྱུང་དགེ་རྒན་བདམས་ནས་སློབ་མར་གཅིག་གཏད་གཅིག་གི་གཅིག་སྡུད་སློབ་སྦྱོང་ཟུར་ཁྲིད་བྱེད་པར་བཏང་སྟེ། སློབ་མའི་སློབ་སྦྱོང་གི་སྤྲོ་སེམས་འཕེལ་བ་དང་སྦྱངས་འབྲས་ཡག་ཏུ་གཏོང་གང་ཐུབ་བྱས་ཡོད། བསྡོམས་རྩིས་ལྟར་ན། ཁྱོན་སློབ་མ་21ཡོད་པའི་ནང་སློབ་ཆུང་སློབ་མ་19དང་སློབ་འབྲིང་སློབ་མ་2ཡོད་པ་རེད།

སློབ་འགོ་ཚུགས་པའི་མཛད་སྒོར་ཀརྨ་དགོན་གསར་སྡེ་ཁུལ་གྱི་ལས་དོན་པས་ཕྲུ་གུ་ཚང་མར་ཡིག་ཆས་ཁུག་མ་དང་། བོད་སྨྱུག ཞྭ་སྨྱུག་སོགས་ཉོས་ནས་སྤྲད་པ་རེད། ཟུར་ཁྲིད་བྱེད་རིང་། དགེ་རྒན་གྱིས་རྒྱ་ཡིག་དང་། རྩིས་རིག བོད་ཡིག དབྱིན་ཡིག་བཅས་ཀྱི་སློབ་ཚན་གཅིག་གཏད་གཅིག་གི་གཅིག་སྡུད་ཟུར་ཁྲིད་ནན་ཏན་བྱས་ནས་སློབ་མའི་དོགས་གནད་སེལ་གང་ཐུབ་བྱས་པ་དང་སློབ་མ་ཚོས་ཀྱང་སློབ་ཚན་ཡག་པོ་ཉན་གྱི་ཡོད་པ་རེད།

“ཏང་དང་སྲིད་གཞུང་གིས་ང་ཚོར་ཐུགས་ཁུར་དང་བྱམས་སྐྱོང་གནང་བ་དང་། སློབ་གསོ་ཅུས་དང་སྡེ་ཁུལ་གྱིས་ང་ཚོར་ཁ་ཡོད་ལག་ཡོད་ཀྱི་བྱ་བཟང་བསྒྲུབས་པར་ཐུགས་རྗེ་ཆེ་ཞུ། རང་ཉིད་ཀྱི་ཡོན་ཚད་མཐོ་པོ་མེད་པས་ཕྲུ་གུའི་སྦྱོང་ཚན་ཟུར་ཁྲིད་བྱེད་ཐབས་བྲལ། ད་ལྟ་གཅིག་གཏད་གཅིག་གི་གཅིག་སྡུད་ཟུར་ཁྲིད་བྱས་པ་ལས་ཕྲུ་གུར་ཕན་འབྲས་ཆེན་པོ་ཐོན་ནས་ཁོ་ཚོའི་སློབ་སྦྱོང་བྱེད་སེམས་ཀྱང་ཆེ་རུ་ཕྱིན་འདུག རིམ་ཁག་སྡེ་ཚན་དང་རྒན་ལགས་ཀྱིས་སྐུ་ལས་མང་པོ་བསྐྱོན་པར་ཐུགས་རྗེ་ཆེ་ཞུ”ཞེས་སློབ་མའི་ཁྱིམ་བདག་པ་སངས་ཀྱིས་བཤད།

ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར་ཁྲེང་ཀོན་ཆུས་སློབ་གསོ་ཅུས་ཀྱིས་སྡེ་ཁུལ་དུ་སློབ་གསོའི་བྱེད་སྒོ་སྤེལ་བའི་ལས་སྟེགས་མུ་མཐུད་སྤྱོད་པ་དང་ཆབས་ཅིག སྡེ་ཁུལ་དུ་སློབ་གསོའི་བྱེད་སྒོ་སྤེལ་བའི་ཞབས་ཞུའི་ཕུགས་ཕན་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་སྟེ། འདི་ལོའི་གཟའ་མཇུག་ཚང་མར་སྡེ་ཁུལ་དུ་སློབ་གསོའི་བྱེད་སྒོ་སྤེལ་ནས་སློབ་མའི་དོགས་གནད་དང་སློབ་སྦྱོང་གི་དཀའ་ངལ་སེལ་རོགས་བྱས་ཏེ་དགེ་རྒན་ཏང་ཡོན་གྱི་གདོང་ལེན་དཔེ་བཟང་གི་ནུས་པ་བཏོན་ནས་སློབ་སྦྱོང་གི་རྣམ་པ་ཟབ་མོ་གཏོད་ཀྱི་ཡོད་་པ་རེད།