ཉེ་ཆར། ཨུ་ཟ་བྷེ་ཁི་སི་ཐན་གྱི་ཕྱི་འབྲེལ་པུའུ་རྒྱལ་སྤྱིའི་འབྲེལ་བའི་ཆ་འཕྲིན་དབྱེ་ཞིབ་ལྟེ་གནས་ཀྱི་ཀྲུའུ་རེན་ཏ་ཉི་ཡར·ཁུར་པན་ནུའོ་ཕུའུ་ཡིས་ཤིན་ཧྭ་གསར་འགྱུར་ཁང་གི་གསར་འགོད་པའི་བཅར་འདྲི་དང་ལེན་བྱེད་སྐབས། ད་ཐེངས་ཀྱི་ཀྲུང་གོ་དང་ཨེ་ཤེ་ཡ་དབུས་མའི་དབུ་ཚོགས་ཀྱིས་ཨུ་ཟ་བྷེ་ཁི་སི་ཐན་དང་ཀྲུང་གོའི་དབར་གྱི་མཉམ་ལས་ཀྱི་མི་མངོན་པའི་སྟོབས་ཤུགས་སྔོག་འདོན་གང་ལེགས་ཐུབ་ནས་དུས་རབས་གསར་པའི་ཨུ་ཀྲུང་གི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་འཕེལ་རྒྱས་ལ་མུ་མཐུད་སྐུལ་འདེད་གཏོང་བར་ཕན་ཐོགས་ཡོད་པ་ནི་སྨོས་མི་དགོས་པ་ཞིག་རེད་ཅེས་བརྗོད་པ་རེད།

ཁོང་གིས། 2016ལོ་ནས་བཟུང་ཨུ་ཟ་བྷེ་ཁི་སི་ཐན་གྱི་ཙུང་ཐུང་སྨིར་ཅི་གཡོད་ཡེ་ཕུའུ་ཡི་འགོ་ཁྲིད་འོག་ཨུ་ཟ་བྷེ་ཁི་སི་ཐན་གྱིས་ཕྱོགས་ཡོངས་ནས་སྒྱུར་བཅོས་བྱེད་འགོ་བཙུགས་ཏེ་ཨུ་ཟ་བྷེ་ཁི་སི་ཐན་འཕེལ་རྒྱས་དང་དེང་རབས་ཅན་གྱི་འགྲོ་ལམ་གསར་པར་སྐྱོད་པས་ཕྱི་ནང་སྲིད་ཇུས་ལ་ཕན་འབྲས་མངོན་གསལ་དོད་པོ་ཐོན་ཡོད་ཅེས་བརྗོད་པ་རེད།

ཁོང་གིས། ཨུ་ཟ་བྷེ་ཁི་སི་ཐན་གྱིས“ཨུ་ཟ་བྷེ་ཁི་སི་ཐན་གསར་པའི”2022ལོ་ནས་2026ལོའི་བར་གྱི་འཕེལ་རྒྱས་ཀྱི་འཐབ་ཇུས་ལག་ལེན་བསྟར་བཞིན་ཡོད་ལ། འཕེལ་རྒྱས་ཀྱི་འཐབ་ཇུས་ཀྱི་སྒྲོམ་གཞིའི་འོག་ཨུ་ཟ་བྷེ་ཁི་སི་ཐན་གྱིས་དངོས་སྒྲུབ་དང་དགེ་མཚན་ལྡན་པའི་ཕྱི་ཕྱོགས་སྲིད་ཇུས་ལག་ལེན་བསྟར་ནས་མཐའ་འཁོར་རྒྱལ་ཁབ་དང་མཉམ་དུ་ས་ཁུལ་གྱི་བདེ་འཇགས་འགན་ལེན་དང་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཆེད་རྒྱུན་མཐུད་མཉམ་ལས་གཏིང་ཟབ་བྱེད་བཞིན་ཡོད་ཅེས་བརྗོད་པ་རེད།

ཁོང་གིས། ཉེ་བའི་ལོ་བཅུའི་རིང་རྒྱལ་ཁབ་དེང་རབས་ཅན་དང་འཕེལ་རྒྱས་ཐད་ཀྲུང་གོར་ཧང་སངས་དགོས་པའི་གྲུབ་འབྲས་ཆེན་པོ་ཐོབ་ཡོད། ཀྲུང་གོའི་འགོ་ཁྲིད་པས་བཏོན་པའི་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་། གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཅས་ལས་ཀྲུང་གོ་ཕྱོགས་ཀྱིས་དེང་སྐབས་མིའི་རིགས་ལ་འཕྲད་པའི་གནད་དོན་ཐག་གཅོད་བྱེད་པར་གཞོལ་བའི་ཆོད་སེམས་མངོན་པ་དང་། གྲོས་འགོ་དེ་དག་ལ་རྒྱལ་སྤྱིའི་སྤྱི་ཚོགས་ཀྱིས་ཡོངས་ཁྱབ་ངང་མཐོང་ཆེན་བྱེད་པའི་ངོས་འཛིན་བྱེད་ཀྱི་ཡོད་པ་རེད།

ཁོང་གིས། ཨེ་ཤེ་ཡ་དབུས་མའི་ས་ཁུལ་ནི་ཀྲུང་གོའི་ཕྱི་འབྲེལ་དང་ཕྱི་ཕྱོགས་དཔལ་འབྱོར་མཉམ་ལས་ཀྱི་ཁ་ཕྱོགས་གལ་ཆེན་ཞིག་ཡིན་ལ། ཉེ་བའི་ལོ་ཤས་རིང་ཀྲུང་གོ་ཡང་ཨེ་ཤེ་ཡ་དབུས་མའི་རྒྱལ་ཁབ་ཀྱི་ཚོང་དོན་དང་མ་འཇོག་རོགས་ཟླ་གཙོ་བོར་གྱུར་ཡོད་ཅེས་བརྗོད་པ་རེད།