ཉེ་ཆར། དྲ་གྲོགས་ཤིག་གིས་དྲ་ཚུགས་ག་གེ་མོ་ཞིག་ཏུ་ལྷ་ས་གྲོང་ཁྱེར་གྲོང་སྐོར་ལྷོ་ལམ་གྱི་ལམ་དུམ་ཞིག་གི་མི་འགྲུལ་ལམ་གྱི་བརྡ་གཏོང་གློག་སྒྲོན་གྱི་གློག་ལྗང་ཁུར་སྐར་ཆ་བཞི་ལས་མི་འདུག་ཅེས་པའི་ཆ་འཕྲིན་བསྐུར་ཡོད།
གནས་ཚུལ་འདི་ཤེས་རྟོགས་བྱུང་རྗེས། ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་འཕྲལ་དུ་གནད་དོན་འདིར་གྲལ་བཤེར་བྱས་པ་དང་། གྲལ་བཤེར་བྱས་པ་བརྒྱུད་གློག་སྐུད་རྙིང་པ་ཆགས་པའི་དབང་གིས་བརྡ་གཏོང་གློག་སྒྲོན་གྱི་མ་ལག་ལ་སྐྱོན་ཤོར་ཡོད་པ་ཤེས། དེ་རྗེས་ཉིང་ལག་རུ་ཁག་གིས་དུས་ཐོག་ལ་བཟོས་པ་རེད།
ལྷ་སའི་འགྲིམ་འགྲུལ་ཉེན་རྟོག་པས་གྲོང་ཁྱེར་ཡོངས་ཀྱི་ལམ་ཐིག་ལ་སླར་ཡང་གྲལ་བཤེར་བྱས་ནས་སྐྱོན་འདི་ལྟ་བུ་མི་ཐོན་པ་བྱ་རྒྱུ་ཡིན་ལ། གྲོང་མིའི་འགྲོ་སྐྱོད་ལ་འགོག་རྐྱེན་བཟོས་པར་དགོངས་དག་ཞུ་རྒྱུ་མ་ཟད། གྲོང་མི་ཚོས་ལྷ་སའི་འགྲིམ་འགྲུལ་དོ་དམ་ལས་དོན་ལ་ལྟ་སྐུལ་བྱེད་པར་དགའ་བསུ་ཞུ་རྒྱུ་ཡིན་ཞེས་བཤད།