ཟླ་3ཚེས་9ཉིན། གསར་འགོད་པས་རང་སྐྱོང་ལྗོངས་གནམ་གཤིས་ལས་ཁུངས་ནས་ཤེས་རྟོགས་བྱས་པར། སྔོན་དཔག་བྱས་ན་མ་འོངས་ཉིན་གཉིས་རིང་རང་ལྗོངས་ཀྱི་ས་ཆ་མང་པོར་གངས་མ་ཆར་འབབ་རྒྱུ་རེད་འདུག་པས། དྲོད་ཚད་འགྱུར་བ་འགྲོ་ཡི་ཡོད།

ལྷོ་རྒྱུད་གནམ་གཤིས་ཀྱི་ཤུགས་རྐྱེན་ཕོག་པའི་དབང་གིས་སྔོན་དཔག་བྱས་ན་ཚེས་10ནས་11ཉིན་བར་ནག་ཆུའི་དབུས་ཤར་རྒྱུད་དང་། ཆབ་མདོ། ཉིང་ཁྲི་བཅས་སུ་གངས(ཆར་པ)ཆུང་བ་ནས་འབྲིང་བའི་བར་འབབ་རྒྱུ་དང་ས་ཆ་ཁག་གཅིག་ལ་གངས་ཆེན་པོ་འབབ་རྒྱུ་རེད། ལྷོ་ཁ་དང་། ལྷ་ས། གཞིས་རྩེ་བཅས་ལ་སྤྲིན་པ་མང་པོ་འཁོར་ནས་གངས(ཆར་པ)ཆུང་བ་འབབ་རྒྱུ་དང་། ས་ཆ་ཁག་གཅིག་ལ་གངས་འབྲིང་བ་འབབ་རྒྱུ་རེད་ཅེས་རང་སྐྱོང་ལྗོངས་གནམ་གཤིས་ལས་ཁུངས་ཀྱི་དབུ་བཞུགས་སྔོན་བརྡ་བ་སྤེན་པ་སྒྲོལ་དཀར་གྱིས་བརྗོད།

ཆར་པ་བབས་པ་ལས་ཞིང་ལ་སེར་ལངས་བར་ཕན་པ་དང་མཁའ་རླུང་ལ་བཞའ་ཚན་འདུས་ཚད་མང་དུ་འགྲོ་ཡི་ཡོད། ཆར་པ་བབས་རྗེས་རང་ལྗོངས་ཀྱི་ནུབ་ནས་ཤར་བར་དྲོད་ཚད་ཧྲེ་ཧྲི་ཏུའུ་3ནས་6བར་ཆག་གི་ཡོད་པ་དང་དྲོད་ཚད་འཕར་ཆག་ཆེ་བས། ཚང་མས་གྱོན་གོས་སྲབ་མཐུག་ལ་དོ་སྣང་དང་ཕྱིར་སྐྱོད་སྐབས་ཁ་རས་བརྒྱབ་ནས་མི་སྒེར་གྱི་འགོག་སྲུང་ཡག་པོ་བྱེད་དགོས་ཞེས་སྤེན་པ་སྒྲོལ་དཀར་གྱིས་གྲོས་འགོ་བཏོན།

རང་སྐྱོང་ལྗོངས་གནམ་གཤིས་ལས་ཁུངས་ཀྱི་དབུ་བཞུགས་སྔོན་བརྡ་བ་སྤེན་པ་སྒྲོལ་དཀར་གྱིས་ལས་ཀ་བྱེད་བཞིན་པ།

སྤེན་པ་སྒྲོལ་དཀར་གྱིས་གསར་འགོད་པར་ལོ་རྒྱུས་ཀྱི(1991ལོ་ནས་2020བར)དུས་མཚུངས་དང་བསྡུར་ན་ཉིང་ཁྲིའི་བྱང་རྒྱུད་དང་། ཆབ་མདོའི་བྱང་རྒྱུད། ནག་ཆུའི་ནུབ་རྒྱུད། གཞིས་རྩེའི་ལྷོ་ནུབ་རྒྱུད། མངའ་རིས་ཀྱི་ནུབ་བྱང་རྒྱུད་བཅས་སུ་ཆར་པ་འབབ་ཚད་རྒྱུན་གཏན་ལས་ཅུང་མང་བ་ཡོད་པ་དང་ས་ཆ་གཞན་དག་ལ་གཅིག་མཚུངས་རེད། ཆར་པ་འབབ་རིང་ལྷགས་ཤུགས་ཆུང་དུ་འགྲོ་ཡི་ཡོད། གནམ་གཤིས་དྲོ་རུ་འགྲོ་བ་དང་བསྟུན་ནས་བོད་ཀྱི་བྱང་ཐང་དང་ལྷོ་རྒྱུད་ཀྱི་མཐའ་མཚམས་སུ་ལྷགས་པ་ཆེན་པོ་རྒྱག་རྒྱུ་དང་གཙང་པོ་རྒྱུག་ཁུལ་དུ་ལྷགས་པ་རིམ་པ་3ཡས་མས་རྒྱག་རྒྱུ་རེད་ཅེས་བརྗོད་བྱུང་།