ཉེ་ཆར། ལྷ་ས་གྲོང་ཁྱེར་ཁྲེང་ཀོན་ཆུས་གྲོང་ཁྱེར་དོ་དམ་ཅུས་ཀྱིས《གྲོང་ཁུལ་དུ་སྒོ་ཕྱུགས་གློད་མི་ཆོག་པ་དང་དེ་བཞིན་གནས་སྐབས་བཀག་ཉར་བྱས་པའི་སྒོ་ཕྱུགས་ཐག་གཅོད་བྱེད་པའི་སྐོར་གྱི་བརྡ་ཁྱབ》བཀྲམ་ནས་ཚན་པ་དང་མི་སྒེར་གང་རུང་གིས་ནོར་ལུག་སོགས་སྒོ་ཕྱུགས་རང་དགར་གྲོང་ཁུལ་དུ་གློད་མི་ཆོག་པ་གསལ་པོ་བཏོན་པ་མ་ཟད། ཉེ་དུས་བཀག་ཉར་བྱས་པའི་སྒོ་ཕྱུགས་མགོ་གྲངས་60དོ་བདག་གིས་དུས་ཐོག་ཏུ་རྩིས་ལེན་པར་ཡོང་དགོས་པའི་དྲན་སྐུལ་ཡང་བྱས་པ་རེད།
གྲོང་ཁྱེར་དོ་དམ་ལས་དོན་པས་གྲོང་ཁུལ་དུ་གློད་པའི་འབྲི་གཡག་འདེད་བཞིན་པ།
ཁྲེང་ཀོན་ཆུས་གྲོང་ཁྱེར་དོ་དམ་ཅུས་ཀྱིས་2022ལོའི་ཟླ་12པར《གྲོང་ཁུལ་དང་ཉེ་འཁོར་དུ་སྒོ་ཕྱུགས་གློད་མི་ཆོག་པའི་སྐོར་གྱི་བརྡ་ཁྱབ》བཀྲམ་ཞིང་། གྲོང་མི་མང་ཆེ་བས་ལས་དོན་དེར་རྒྱབ་སྐྱོར་ཆེན་པོ་བྱེད་པ་དང་ཆབས་ཅིག རང་ཁྱིམ་གྱི་ནོར་ལུག་ལ་བདག་པོ་ཡག་པོ་རྒྱག་གི་ཡོད། ཞིང་འབྲེལ་ཁྲོམ་གཞུང་ཁག་གཅིག་གིས་ཀྱང་དོན་དངོས་ཀྱི་གནས་ཚུལ་ལ་གཞིགས་ནས་དོ་དམ་བྱེད་སྟངས་འཚོལ་ཞིབ་དང་ཚོད་ལྟ་བྱས་པ་དཔེར་ན། ཚལ་གུང་ཐང་ཁྲོམ་གཞུང་གིས་ཆེད་མངགས་ཕྱུགས་རིགས་འཛིན་མཁན་དང་གནས་སྐབས་ཀྱི་བ་ཚང་ཡོད་པའི་ཕུང་གསུམ་པའི་ཀུང་སིར་མངགས་ནས་ཁོངས་གཏོགས་ཁུལ་དུ་སྒོ་ཕྱུགས་འཚོ་རུ་བཅུག་ཡོད་པས། ཁྲོམ་གཞུང་དུ་སྒོ་ཕྱུགས་ཐོན་པའི་གནས་ཚུལ་མངོན་གསལ་དོད་པོས་ཉུང་དུ་ཕྱིན་ཡོད།
ཟླ་3ཚེས་6ཉིན། ཁྲེང་ཀོན་ཆུས་གྲོང་ཁྱེར་དོ་དམ་ཅུས་ཀྱིས《གྲོང་ཁུལ་དུ་སྒོ་ཕྱུགས་གློད་མི་ཆོག་པ་དང་གནས་སྐབས་བཀག་ཉར་བྱས་པའི་སྒོ་ཕྱུགས་ཐག་གཅོད་བྱེད་པའི་སྐོར་གྱི་བརྡ་ཁྱབ》ཡང་བསྐྱར་བཀྲམ་ནས། ཚན་པ་དང་མི་སྒེར་གང་རུང་གིས་ནོར་ལུག་སོགས་སྒོ་ཕྱུགས་རང་མཚམས་ངང་གྲོང་ཁུལ་དུ་གློད་མི་ཆོག་པའི་བླང་བྱ་བཏོན་ཡོད། གལ་ཏེ་གྲོང་ཁུལ་དུ་སྒོ་ཕྱུགས་གང་བྱུང་དུ་གློད་པ་མཐོང་ཚེ། ཁྲེང་ཀོན་ཆུས་གྲོང་ཁྱེར་དོ་དམ་ཅུས་ཀྱིས་གཅིག་གྱུར་ཐོག་དོ་དམ་བྱེད་ཀྱི་ཡོད་པ་དང་། དེའི་རིང་གི་འགྲོ་སོང་སྒོ་ཕྱུགས་ཀྱི་བདག་པོས་བཏོན་དགོས་ལ། མཇུག་འབྲས་ཀྱང་བདག་པོས་འཁུར་དགོས། དེ་དང་ ཆབས་ཅིག གྲོང་ཁྱེར་དོ་དམ་སྡེ་ཚན་གྱིས《ལྷ་ས་གྲོང་ཁྱེར་གྱི་གྲོང་ཁྱེར་རྣམ་པ་དང་ཁོར་ཡུག་གཙང་སྦྲའི་དོ་དམ་སྲོལ་ཡིག》དང《ལྷ་ས་གྲོང་ཁྱེར་གྱི་གྲོང་ཁྱེར་སྔོ་འགྱུར་སྲོལ་ཡིག》སོགས་ཀྱི་འབྲེལ་ཡོད་ཁྲིམས་སྲོལ་དང་སྲོལ་ཡིག་ལ་གཞིགས་ནས། སྒོ་ཕྱུགས་གང་བྱུང་དུ་གློད་པའི་བྱེད་སྤྱོད་ལ་ཆད་པ་གཅོད་པའམ་འབྲེལ་ཡོད་གཙོ་གཉེར་སྡེ་ཚན་ལ་ཐག་གཅོད་བྱེད་པར་རྩིས་སྤྲོད་ཀྱི་ཡོད། ད་དུང་ཉེས་གསོག་གི་ཚད་ལ་སླེབས་ཚེ་ཁྲིམས་ལྟར་ཉེས་དོན་འགན་འཁྲི་བདའ་འདེད་གཏོང་རྒྱུ་ཡིན་པ་རེད།
གཞན་ཡང་། གསར་འགོད་པར་ཤེས་རྟོགས་བྱུང་བར། ཉེ་ཆར་གྲོང་ཁྱེར་དོ་དམ་སྡེ་ཚན་གྱིས་གཙང་འགྲམ་ལམ་དང་། རྔ་ཆེན། དོག་སྡེ་སོགས་ཀྱི་སྤྱི་པའི་ས་ཁོངས་སུ་ཐོན་པའི་སྒོ་ཕྱུགས་མགོ་གྲངས་60འདེད་ནས། དོག་སྡེ་དང་ཚལ་གུང་ཐང་ཁྲོམ་གཞུང་གི་གནས་སྐབས་ཀྱི་བ་ཚང་དུ་བཅུག་ཡོད། སྒོ་ཕྱུགས་ཀྱི་བདག་པོས་བརྡ་ཁྱབ་བཀྲམ་པའི་ཉིན་བདུན་ནང་ཚུན་དུ་ཁྲེང་ཀོན་ཆུས་གྲོང་ཁྱེར་དོ་དམ་ཅུས་སུ་སྒོ་ཕྱུགས་རྩིས་ལེན་དང་ཐག་གཅོད་དང་ལེན་བྱེད་པར་ཡོང་དགོས་པ་དང་། གལ་ཏེ་ཉིན་བདུན་སོང་ཡང་རྩིས་ལེན་མཁན་མ་བྱུང་ཚེ། འབྲེལ་ཡོད་སྡེ་ཚན་གྱིས་ཧབ་འཚོང་གློད་ནས། བཙོངས་པའི་དངུལ་དག་སྒོ་ཕྱུགས་ཀྱིས་གྲོང་ཁྱེར་གྱི་ཁོར་ཡུག་ལ་གཏོར་སྐྱོན་བཏང་བའི་གྱོང་གུན་གསབ་རྒྱུར་སྤྱོད་རྒྱུ་ཡིན་པ་རེད།
