ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཅིང་གིས་བུད་མེད་ལས་དོན་ལ་ཚད་མཐོའིམཐོང་ཆེན་གནང་སྟེ་ལས་རིགས་ཁག་གི་དཔའ་མོར་བསྔགས་བརྗོད་གནང་བ་རེད། “གསུམ་བརྒྱད”རྒྱལ་སྤྱིའི་ངལ་རྩོལ་བུད་མེད་དུས་ཆེན་སླེབས་མཚམས་སུ་ཤིན་ཧྭ་གསར་འགྱུར་ཁང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་ལེགས་བསྡུས་བྱས་ཏེ་དུས་རབས་གསར་པའི་དཔའ་མོ་ཚོའི་ངོ་མཚར་གྱི་མི་ཚེར་མཉམ་དུ་མྱོང་རོལ་བྱེད།

འཇིག་རྟེན་འཕུར་སྐྱོད་པ་དཔའ་མོ་ལིའུ་དབྱང་ལ“ཀྲུང་གོའི་བུད་མེད་ཀྱི་གཟུགས་བརྙན་ཕོ་ཉ”ཞེས་བསྔགས་བརྗོད་གནང་བ།

2023ལོའི་ཟླ་2ཚེས་17ཉིན། ལྷ་གྲུ་ཨང་བཅུ་བཞི་པའི་འཇིག་རྟེན་འཕུར་སྐྱོད་ཚོ་ཆུང་དང་གསར་འགོད་པའི་ངོ་འཕྲད་ཚོགས་འདུ་དེ་པེ་ཅིང་དུ་འཚོགས་ཤིང་། འདི་ནི་འཇིག་རྟེན་འཕུར་སྐྱོད་པ་ལིའུ་དབྱང་གིས་གསར་འགོད་པའི་འདྲི་བར་ལན་འདེབས་བཞིན་པ།

2012ལོར་ལིའུ་དབྱང་ལྷ་གྲུ་ཨང་དགུ་པར་བསྡད་ནས་བར་སྣང་ཁམས་སུ་བསྐྱོད་མཁན་གྱི་ཀྲུང་གོའི་བུད་མེད་འཇིག་རྟེན་འཕུར་སྐྱོད་པ་ཐོག་མ་དེར་གྱུར། ལོ་བཅུ་ཡི་རྗེས་ལིའུ་དབྱང་གིས་ལྷ་གྲུ་ཨང་བཅུ་བཞི་པའི་མི་བཞུགས་འཕུར་གྲུར་བསྡད་དེ་སླར་ཡང་བར་སྣང་ཁམས་ལ་བསྐྱོད་པ་རེད།

2013ལོའི་རྒྱལ་ཡོངས་ཚོགས་འདུ་གཉིས་ཀྱི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐབས་བཅུ་གཉིས་པའི་རྒྱལ་ཡོངས་འཐུས་མི་ཚོགས་ཆེན་ཐེངས་དང་པོའི་ཚོགས་འདུ་བཅིངས་འགྲོལ་དམག་འཐུས་མི་ཚོགས་པའི་ཚང་འཛོམས་གྲོས་ཚོགས་ལ་ཞུགས་རྗེས། ལིའུ་དབྱང་ལ་སོགས་གཞི་རིམ་ནས་ཡོང་བའི་དམག་དཔུང་མི་དམངས་འཐུས་ཚོགས་ཀྱི་འཐུས་མིར་མཇལ་འཕྲད་གནང་བ་རེད། ཁོང་གིས་ལིའུ་དབྱང་དང་མཛའ་བརྩེའི་བཀའ་མོལ་གནང་བ་མ་ཟད་ལིའུ་དབྱང་ལ“དཔའ་མོ”རེད་ཅེས་བསྔགས་བརྗོད་གནང་།

ཞི་ཅིན་ཕིང་གིས་ལིའུ་དབྱང་ལ“ཁྱོད་ནི་དཔའ་མོ་ཡིན་པ་མ་ཟད། བུད་མེད་ཀྱིས་གནམ་ཕྱེད་ཀ་འདེགས་མཁན་གྱི་འཐུས་མི་ཡང་རེད། ད་ལྟ་ཀྲུང་གོའི་བུད་མེད་ཀྱི‘གཟུགས་བརྙན་ཕོ་ཉར’ཡང་གྱུར་བ་རེད”ཅེས་གསུངས།

“ང་ཚོ་སྟབས་ལེགས་ནས་རྒྱལ་ཁབ་འཕེལ་རྒྱས་ཀྱི་དུས་རབས་ཀྱི་རྗེས་ཟིན་ཡོད་པས་ང་ཚོས་ངེས་པར་དུ་མེས་རྒྱལ་གྱི་གཟི་བརྗིད་དེ་བར་སྣང་ཁམས་སུ་འབྲི་ངེས་ཡིན”ཞེས་ལིའུ་དབྱང་གིས་ཡིད་ཆེས་བརྟན་པོས་ལན་བཏབ།

རྒན་མོ་ཀུང་ཆོན་ཀྲེན་ལ“ང་ཚོས་དཀའ་སྤྱད་འབད་བརྩོན་གྱི་སྙིང་སྟོབས་འདི་ལྟ་བུ་དར་སྤེལ་གཏོང་དགོས”ཞེས་བསྔགས་བརྗོད་གནང་བ།

འདི་ནི་ཀན་ཙུའུ་ཁྲང(གཡས)དང་ཀུང་ཆོན་ཀྲེན་ཁྱོ་ཤུག་གཉིས་ཡིན་པ། (དཔྱད་གཞིའི་པར)

2013ལོའི་ཟླ་9ཚེས་26ཉིན། སྐབས་བཞི་པའི་རྒྱལ་ཡོངས་ཀུན་སྤྱོད་དཔེ་བཟང་དང་མིང་འདོན་བྱ་དགའ་ཐོབ་མཁན་དང་མཇལ་འཕྲད་གནང་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྤྱན་གྱི་འཁོར་ཕྱོགས་སྟར་པ་དང་པོའི་གཡོན་ངོས་སུ་བཞུགས་པའི་རྒན་མོ་ཞིག་ལ་གཟིགས། ཁོང་གིས་བརྩེ་བ་ཟབ་མོས་གསུངས་དོན། ངས་ད་གིན་རྒན་རབས་པ་ཁོང་མཐོང་བྱུང་། ཁོང་ནི་ང་ཚོའི་དམག་དཔོན་རྒན་རབས་པ་ཀན་ཙུའུ་ཁྲང་གི་བཟའ་ཟླ་ཀུན་ཆོན་ཀྲེན་རེད། ཁོང་ད་ལོ་ལོ་90ལྷག་ཙམ་ཡིན་པ་དང་། ངས་ཁོང་མཐོང་རྗེས་སེམས་ནང་སེམས་འགུལ་ཆེན་པོ་ཐེབས་བྱུང་ཞེས་གསུངས།

1957ལོར་ཀུན་ཆོན་ཀྲེན་གྱིས་གྲོང་ཁྱེར་གྱི་འཚོ་བ་བསྐྱུར་ནས་བཟའ་ཟླ་དང་མཉམ་དུ་གྲོང་གསེབ་ཏུ་དབུལ་སྐྱོར་སློབ་རོགས་བྱེད་པར་ལོག་ཅིང་། གླ་ཕོགས་ཕྲན་བུར་བརྟེན་ནས་ཕ་ཡུལ་ལ་ཆུ་བེད་འཛུགས་སྐྲུན་དང་། གློག་ཁང་བརྒྱབ་པ། སློབ་གྲྭའི་ཉལ་ཁང་བསྐྲུན་པ། དབུལ་སྐྱོར་དཀའ་སེལ་བཅས་བྱས་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“དུས་རབས་ཕྱེད་ཀ་ཙམ་སོང་ཟིན་ཡོད། བློ་མཐུན་ཀུང་ཆོན་ཀྲེན་གྱིས་ཐོག་མཐའ་བར་གསུམ་དུ་དཀའ་སྤྱད་འབད་བརྩོན་གྱི་སྙིང་སྟོབས་རྒྱུན་འཁྱོངས་གནང་བ་དང་། རྒྱལ་ཡོངས་ཀུན་སྤྱོད་དཔེ་བཟང་བར་བདམས་ཐོན་བྱུང་སྟེ་དེ་རིང་གི་ཚོགས་འདུར་ཞུགས་པས་ང་ཧ་ཅང་དགའ་པོ་བྱུང་། ངས་བློ་མཐུན་ཀུང་ཆོན་ཀྲེན་ལ་བླ་ན་མེད་པའི་གུས་འདུད་ཞུ་རྒྱུ་ཡིན”ཞེས་གསུངས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ང་ཚོས་དཀའ་སྤྱད་འབད་བརྩོན་གྱི་སྙིང་སྟོབས་འདི་ལྟ་བུ་དར་སྤེལ་གཏོང་དགོས། ང་ཚོའི་མི་རབས་འདིས་རྒྱུན་འཛིན་བྱེད་དགོས་པ་མ་ཟད་ང་ཚོའི་མི་རབས་རྗེས་མས་ཀྱང་དར་སྤེལ་གཏང་སྟེ་མི་རབས་ནས་མི་རབས་བར་རྒྱུན་འཛིན་བྱེད་དགོས་ཞེས་ནན་བཤད་གནང་བ་རེད།

རང་རྒྱལ་གྱི་ནོར་པེར་བྱ་དགའ་ཐོབ་མཁན་གྱི་བུད་མེད་ཚན་རིག་པ་ཐོག་མ་ཐུའུ་ཡིའུ་ཡིའུ་ལ“ རྒྱུན་འཁྱོངས་བྱས་ཚེ་ཕུགས་འདུན་མངོན་དུ་གྱུར་ངེས་རེད”ཅེས་བསྔགས་བརྗོད་གནང་བ།

འདི་ནི་ཐུའུ་ཡིའུ་ཡིའུ་ཡིས་པེ་ཅིང་གི་རང་ཁྱིམ་དུ་བཅར་འདྲི་དང་ལེན་བྱས་པ།

ཐུའུ་ཡིའུ་ཡིའུ་ནི་ཀྲུང་གོའི་ཀྲུང་ལུགས་གསོ་རིག་ཚན་རིག་ཁང་གི་ཚེ་གང་ཞིབ་འཇུག་པ་དང་། རྒྱལ་ཁབ་ཀྱི་ཚན་རིག་ལག་རྩལ་བྱ་དགའ་མཐོ་ཤོས་ཐོབ་མཁན། ནོར་པེར་སྐྱེ་ཁམས་རིག་པའམ་གསོརིག་བྱ་དགའ་ཐོབ་མཁན་བཅས་རེད། ཐུའུ་ཡིའུ་ཡིའུ་ཚོགས་པས་ཞིབ་འཇུག་བྱས་ཏེ་ཕུར་ནག་སུའུ་ཤེས་ཚོར་ཐུབ་ནས་འདར་ནད་འགོག་བཅོས་མི་ཐུབ་པའི་དཀའ་ནད་སེལ་ཐུབ་ཡོད་པས། ལོ་60ལྷག་ཙམ་རིང་ཁོང་གིས་ཐོག་མཐའ་བར་གསུམ་དུ་ཀྲུང་ལུགས་གསོ་རིག་ཞིབ་འཇུག་ལག་ལེན་ལ་གཞོལ་བས་མིའི་རིགས་ཀྱི་བདེ་ཐང་བྱ་གཞག་ལ་ལེགས་སྐྱེས་ཆེན་པོ་ཕུལ་ཡོད།

ཐུའ་ཡིའུ་ཡིའུ་ཡིས“ཕུར་ནག་སུའུ་ནི་མིའི་རིགས་ཀྱིས་འདར་ནད་བཅོས་པའི་འཕེལ་རིམ་ཁྲོད་ཀྱི་གོམ་སྟབས་ཆུང་ཆུང་ཞིག་ཡིན་པ་མ་ཟད། ཀྲུང་གོའི་སྲོལ་རྒྱུན་སྨན་དང་སྨན་བཅོས་ཀྱིས་འཛམ་གླིང་ལ་ཕུལ་བའི་ལེགས་སྐྱེས་ཞིག་ཀྱང་རེད”ཅེས་བཤད་མྱོང་ཡོད།

2016ལོའི་ལོ་གསར་ཤིས་ཚིག་ནང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཆེད་དུ་ཐུའུ་ཡིའུ་ཡིའུ་སྐོར་གླེང་གནང་ཡོད་པ་མ་ཟད། རྒྱུན་འཁྱོངས་བྱས་ཚེ་ཕུགས་འདུན་མངོན་དུ་གྱུར་ངེས་ཡིན་པའི་མཛུབ་སྟོན་གནང་། 2019ལོའི་ཟླ་9པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐུའུ་ཡིའུ་ཡིའུ་ལ“སྤྱི་མཐུན་རྒྱལ་ཁབ་ཀྱི་བྱས་རྗེས་གཟེངས་རྟགས”གནང་བ་རེད།

ཕྱུགས་འཚོ་མཐའ་སྲུང་བྱེད་མཁན་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ“ལོ་བཅུ་ཕྲག་ཁ་ཤས་ཉིན་གཅིག་ལྟར་མེས་རྒྱལ་གྱི་མངའ་ཁོངས་ས་ཆ་སྲུང་སྐྱོབ་བྱས་པ”ཞེས་བསྔགས་བརྗོད་གནང་བ།

འདི་ནི་སྒྲོལ་དཀར(གཡོན)དང་གཡང་འཛོམས་གཅེན་གཅུང་གཉིས་མཉམ་དུ་བརྒྱབ་པའི་པར་ཡིན་པ།

བོད་ལྗོངས་ལྷུན་རྩེ་རྫོང་ཡུལ་སྨད་ཤང་ནི་ཧི་མ་ལ་ཡའི་རི་རྒྱུད་ཀྱི་ལྷོ་ངོས་སུ་ཆགས་ཤིང་། རི་གཟར་ལ་འགྲོ་ལམ་དོག་པ་དང་། འགྲིམ་འགྲུལ་ཧ་ཅང་ཞན། དུས་རབས་གོང་མའི་དུས་ཡུན་རིང་པོའི་ནང་ཡུལ་སྨད་ཤང་ལ་སངས་རྒྱས་ཆོས་འཕགས་དང་། ཁོང་གི་བུ་མོ་སྒྲོལ་དཀར་དང་། གཡང་འཛོམས་བཅས་པའི་ཁྱིམ་དུད་གཅིག་རང་ལས་མེད་པས་མི་ཚོས“མི་གསུམ་ཤང”ཞེས་འབོད་ཀྱི་ཡོད། ལོ་བཅུ་ཕྲག་ཁ་ཤས་རིང་། སངས་རྒྱས་ཆོས་འཕགས་དང་། སྒྲོལ་དཀར། གཡང་འཛོམས་བཅས་ཕ་དང་བུ་མོ་མི་རབས་གཉིས་ཀྱིས་བསྟུད་མར་ཡུལ་སྨདབརྟན་སྲུང་བྱེད་པ་དང་། མེས་རྒྱལ་གྱི་མཐའ་མཚམས་བསྲུངས་ནས་རྒྱལ་གཅེས་མཐའ་སྲུང་གི་མི་སེམས་འགུལ་བའི་གཏམ་རྒྱུད་བརྩམས་ཡོད།

ཏང་གི་ཚོགས་ཆེན་བཅུ་དགུ་པ་འཚོགས་མཚམས་སུ། སྒྲོལ་དཀར་དང་གཡང་འཛོམས་གཅེན་གཅུང་གཉིས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་བསྐུར་ཏེ་རྒྱལ་ཁབ་མཐའ་སྲུང་གི་མྱོང་བ་དང་ཕ་ཡུལ་གྱི་འཕེལ་རྒྱས་འགྱུར་ལྡོག་སྙན་སེང་ཞུས་ནས་ཡུལ་མི་སྤུན་ཟླ་ཚོ་དང་མཉམ་དུ་མུ་མཐུད་ཕྱུགས་བཙོས་ནས་མཐའ་མཚམས་བརྟན་པོར་སྲུང་བ་དང་ཏང་གི་བཀའ་དྲིན་གསོལ་བའི་ཆོད་སེམས་མཚོན་པ་བྱས་ཡོད།

2017ལོའི་ཟླ་10ཚེས་28ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ་འཕྲིན་ལན་བཏང་གནང་ནས་ཁོང་ཚོའི་སྙིང་སྟོབས་ལ་བསྔགས་བརྗོད་དང་རྗེས་སུ་ཡི་རངས་ཞུ་རྒྱུ་དང་ཕ་དང་བུ་མོ་མི་རབས་གཉིས་ཀྱིས་ལོ་བཅུ་ཕྲག་ཁ་ཤས་རིང་ཉིན་གཅིག་ལྟར་མེས་རྒྱལ་གྱི་མངའ་ཁོངས་ས་ཆ་སྲུང་བའི་སྔོན་ཐོན་མཛད་རྗེས་ལ་བསྔགས་བརྗོད་གནང་ཞིང་། ཁོང་ཚོ་དང་དེ་བཞིན་ཡུན་རིང་མཐའ་སྲུང་མཐའ་བརྟན་ཆེད་ལྷག་བསམ་རྣམ་དག་གིས་ལེགས་སྐྱེས་ཕུལ་བཞིན་པའི་བློ་མཐུན་ཡོངས་ལ་བླ་ན་མེད་པའི་གུས་འདུད་དང་སྙིང་ཐག་པ་ནས་ཐུགས་རྗེ་ཆེ་ཞུས་གནང་བ་རེད།

2021ལོའི་ཟླ་6ཚེས་29ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྲོལ་དཀར་ལ“བདུན་གཅིག་བྱས་རྗེས་གཟེངས་རྟགས”སྤྲད་གནང་བ་རེད།

“01”བཀོད་འདོམས་པ་ཀྲང་རུན་ཧུངགི“ཕུགས་འདུན་ཆུང་ངུར”བསྔགས་བརྗོད་གནང་ནས“ཁྱེད་ཀྱི་ཕུགས་འདུན་གང་མགྱོགས་མངོན་འགྱུར་ཐུབ་པའི་རེ་བ་ཡོད”ཅེས་གསུངས་པ།

འདི་ནི་ཀྲང་རུན་ཧུང་ཡིན་པ།

“ཀྲུའུ་ཞི་མཆོག་ལ་སྙན་སེང་ཞུ་རྒྱུར་ང་ལ་ཕུགས་འདུན་ཞིག་ཡོད་པ་ནི་རང་རྒྱལ་གྱི“01”བུད་མེད་བཀོད་འདོམས་པ་ཐོག་མ་དེར་འགྱུར་བ་བྱ་རྒྱུ་དེ་ཡིན”ཞེས་ཀྲང་རུན་ཧུང་གིས་སྤྱི་ཁྱབ་ཧྲུའུ་ཅིར་རང་ཉིད་ཀྱི“ཕུགས་འདུན་ཆུང་ངུ”དེ་སྙན་སེང་ཞུས། 2018ལོའི་ཟླ་2ཚེས་10ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དཔྱིད་གསར་དུས་ཆེན་འཆར་ཉེའི་སྐབས་སུ་སི་ཁྲོན་དམག་སྡེར་བཅའ་སྡོད་རྟེན་གཞི་ག་གེ་མོའི་དཔོན་དམག་ལ་འཚམས་འདྲི་གནང་བར་ཕེབས་ཤིང་། ཀྲང་རུན་ཧུང་ནི་རྟེན་གཞིའི་ཚན་རྩལ་ལས་བྱེད་པའི་འཐུས་མི་ཞིག་ཡིན་པའི་ངོས་ནས་མཇལ་འཕྲད་གནང་བ་རེད། བཀོད་འདོམས་ཚོམས་ཆེན་དུ་ཀྲང་རུན་ཧུང་གིས་སྤྱི་ཁྱབ་ཧྲུའུ་ཅིར་རང་ཉིད་ཀྱི“ཕུགས་འདུན་ཆུང་ངུ”དེ་སྙན་སེང་ཞུས།

ཀྲང་རུན་ཧུང་གི་སྙན་ཞུ་གསན་རྗེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“‘01’བཀོད་འདོམས་པས་ཚན་རྩལ་ཞིབ་འཇུག་གི་འགན་འཁྲི་ལྕི་མོ་འདི་འདྲ་འཁུར་ཐུབ་པ་ནི་ང་ཚོའི་རྒྱལ་ཁབ་ཀྱི་བུད་མེད་ལས་དོན་གྱི་མཚོན་རྟགས་ཤིག་ཡིན་པས། ཁྱེད་ཀྱི་ཕུགས་འདུན་དེ་གང་མགྱོགས་མངོན་དུ་གྱུར་རྒྱུའི་རེ་བ་ང་ལའང་ཡོད”ཅེས་གདེང་འཇོག་གནང་།

ད་ཆ་ཀྲང་རུན་ཧུང་ནི་ཀྲུང་གོའི་འཇིག་རྟེན་འཕུར་སྐྱོད་ཀྱི“01”བུད་མེད་བཀོད་འདོམས་པ་ཐོག་མ་དེར་གྱུར་ཟིན་པ་དང་། ཁོང་དང་ལས་རོགས་ཚོས་མཉམ་དུ་འཇིག་རྟེན་འཕུར་སྐྱོད་ཀྱི་འཐབ་ས་དང་པོར་འབད་འཐབ་བྱེད་བཞིན་ཡོད་ལ་འཕུར་གཏོང་གི་ལས་འགན་ཁྲོད་གདོང་མཆོང་གི་འགན་འཁུར་བཞིན་ཡོད་པས་ཀྲུང་གོའི་འཇིག་རྟེན་འཕུར་སྐྱོད་ཀྱི་རྒྱང་ལམ་གསར་པར་སྐད་གསངས་མཐོ་བའི་བཀའ་བརྡ་གཏོང་བཞིན་ཡོད་པ་རེད།

དུས་རབས་གསར་པར་ལང་ཚོའི་སྙན་དབྱངས་རྩོམ་མཁནཧོང་ཝུན་ཤིའུ་ལ“མཛེས་སྡུག་ལྡན་པའི་ལང་ཚོར་བརྟེན་ནས་གུང་ཁྲན་ཏང་མིའི་ཐོག་མའི་བསམ་འདུན་དང་ལས་འགན་མངོན་པར་བྱས་པ”ཞེས་བསྔགས་བརྗོད་གནང་བ།

འདི་ནི་ཧོང་ཝུན་ཤིའུ་འཚོ་དུས་ཀྱི་ལས་ཀའི་པར་ཡིན་པ།

“མི་ཞིག་གི་མི་ཚེ་དོན་དང་ལྡན་ཞིང་རིན་ཐང་དང་ལྡན་པའི་ངང་འཚོ་དགོས་ཚེ། རང་ཉིད་གཅིག་པུའི་ཆེད་དུ་མ་ཡིན་པར། རང་ཉིད་ཀྱི་ནུས་ཤུགས་དེ་རྒྱལ་ཁབ་དང་། མི་རིགས། སྤྱི་ཚོགས་བཅས་ཀྱི་ཆེད་དུ་ལེགས་སྐྱེས་འབུལ་དགོས”ཞེས་པ་དེ་ནི་ཀོང་ཞི་ཀྲོང་རིགས་རང་སྐྱོང་ཁུལ་པའེ་སེ་གྲོང་ཁྱེར་ལའེ་ཡས་རྫོང་ཤིང་ཧའ་གྲོང་རྡལ་པའེ་ནིའི་གྲོང་ཚོའི་ཧྲུའུ་ཅི་ཨང་དང་པོ་ཧོང་ཝུན་ཤིའུ་ཡིས་ཏང་ཞུགས་རེ་འདུན་ཞུ་ཡིག་ནང་བྲིས་པའི་དམ་བཅའ་རེད།

པེ་ཅིང་དགེ་འོས་སློབ་ཆེན་གྱི་ཞིབ་འཇུག་སློབ་མ་ནས་སློབ་གྲྭ་ཐོན་རྗེས། ཧོང་ཝུན་ཤིའུ་ཐེ་ཚོམ་སྤུ་ཙམ་མེད་པར་ཕ་ཡུལ་དུ་ལོག ཁོང་གིས་དབུལ་སྒྲོལ་འགག་སྒྲོལ་གྱི་འཐབ་ས་དང་པོར་འབད་འཐབ་བྱས་ཤིང་། དུད་ཁྱིམ་88མི་གྲངས་418ཀྱི་དཀའ་ངལ་ཡོད་པའི་མང་ཚོགས་དབུལ་སྒྲོལ་གྱི་སྣེ་ཁྲིད་བྱས་སྟབས་གྲོང་ཚོ་དེ་ཡོངས་ཀྱི་མང་ཚོགས་དབུལ་པོར་གྱུར་ཚད་20%ཡན་ཉུང་དུ་སོང་ཡོད། 2019ལོའི་ཟླ་6ཚེས་17ཉིན་གྱི་ཐོ་རེངས་སུ་ཁོ་མོ་པའེ་སེ་གྲོང་ཁྱེར་ནས་ལའེ་ཡས་རྫོང་ལ་ལོག་པའི་ལམ་བར་དུ་ཤྭ་འོད་ཀྱི་གནས་ཚུལ་ཐོན་ནས་སྟབས་མི་ལེགས་པར་འདས་གྲོངས་སོང་བས་ལོ་30ཙམ་སླེབས་མ་ཐག་པའི་ཚེ་སྲོག་དེ་སྐྱེས་སུ་ཕུལ་བ་རེད།

2019ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧོང་ཝུན་ཤིའུ་ཡི་སྔོན་ཐོན་མཛད་རྗེས་སྐོར་ལ་གལ་ཆེའི་མཛུབ་སྟོན་གནང་དོན། བློ་མཐུན་ཧོང་ཝུན་ཤིའུ་ཞིབ་འཇུག་སློབ་མ་ཐོན་རྗེས་གྲོང་ཁྱེར་དུ་ལས་ཀ་བྱེད་པའི་གོ་སྐབས་བློས་བཏང་སྟེ་ཐེ་ཚོམ་སྤུ་ཙམ་ཡང་མེད་པ་ཕ་ཡུལ་དུ་ལོག་ནས་དབུལ་སྒྲོལ་འགག་སྒྲོལ་གྱི་འཐབ་ས་དང་པོར་བློ་ནུས་ཡོད་ཚད་བཏོན་ཡོད་པས་མཛེས་སྡུག་ལྡན་པའི་ལང་ཚོར་བརྟེན་ནས་གུང་ཁྲན་ཏང་མིའི་ཐོག་མའི་བསམ་འདུན་དང་ལས་འགན་གང་ལེགས་མངོན་པར་བྱས་ཏེ་དུས་རབས་གསར་པའི་ལང་ཚོའི་སྙན་དབྱངས་བརྩམས་པ་རེད།

2021ལོའི་ཟླ་2ཚེས་25ཉིན་རྒྱལ་ཡོངས་དབུལ་སྒྲོལ་འགག་སྒྲོལ་གྱི་ཕྱོགས་བསྡོམས་གཟེངས་བསྟོད་ཚོགས་ཆེན་ཐོག སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སླར་ཡང་ཧོང་ཝུན་ཤིའུ་སྐོར་ཆེད་དུ་གླེང་གནང་ཞིང་། ཁོང་གིས་ཕ་ཡུལ་དུ་ལོག་ནས་ལེགས་སྐྱེས་ཕུལ་བ་དང་དུས་རབས་གསར་པའི་ལང་ཚོའི་སྙན་དབྱངས་བརྩམས་པའི་སྔོན་ཐོན་མཛད་རྗེས་ལ་བསྔགས་བརྗོད་གནང་བ་རེད།

“འགྲན་ཕོད་པ་དང་འཐབ་ཕོད་པའི”ཀྲུང་གོའི་བུད་མེད་ཕའེ་ཆིའུ་སྤོ་ལོ་རུ་ཁག་ལ“ཀྲུང་ཧྭ་དར་རྒྱས་ཆེད་འབད་བརྩོན་བྱེད་པའི་དུས་རབས་ཀྱི་སྒྲ་དྲག་ཤོས་དེ་བསྒྲགས་པ”ཞེས་བསྔགས་བརྗོད་གནང་བ།

2019ལོའི་ཟླ་9ཚེས་29ཉིན་སྐབས་བཅུ་གསུམ་པའི་བུད་མེད་ཕའེ་ཆིའུ་སྤོ་ལོའི་འཛམ་གླིང་བུམ་པའི་བྱ་དགའ་སྤྲོད་པའི་མཛད་སྒོ་དེ་འཇར་པན་ཏ་པན་དུ་སྤེལ་བ་རེད། ཀྲུང་གོའི་རུ་ཁག་གིས་སྐབས་དེའི་འགྲན་བསྡུར་ཁྲོད་ལོ་བཅུ་གཅིག་བསྟུད་མར་རྒྱལ་བའི་སྦྱངས་འབྲས་ཐོག་ནས་ཨང་དང་པོ་བླངས།

2019ལོའི་ཟླ་9པར་ཀྲུང་གོའི་བུད་མེད་ཕའེ་ཆིའུ་སྤོ་ལོ་རུ་ཁག་གིས་འཇར་པན་དུ་གཉེར་བའི་སྐབས་བཅུ་གསུམ་པའི་བུད་མེད་ཕའེ་ཆིའུ་སྤོ་ལོའི་འཛམ་གླིང་བུམ་པའི་འགྲན་བསྡུར་ཁྲོད་རྒྱལ་ཁ་ཡོངས་སུ་ཐོབ་པ་དང་། སྐབས་བཅུ་པའི་རུང་ཡིང་འཛམ་གླིང་ཕའེ་ཆིའུ་སྤོ་ལོའི“འགྲན་བསྡུར་ཆེ་མོ་གསུམ”གྱི་ཨང་དང་པོ་ཡང་ཐོབ་པ་རེད།

“ཁྱེད་ཚོས་འགྲན་ཕོད་པ་དང་འཐབ་ཕོད་པ་བྱས་པས་འགྲན་བསྡུར་འཁྲུག་ཆ་དོད་ཅིང་བྱང་ཚད་མཐོ་པོ་མངོན་ཡོད། སྔོན་ལ་ཨང་དང་པོ་བླངས་པའི་གནས་ཚུལ་འོག་ཁྱེད་ཚོས་འགྲན་བསྡུར་མཇུག་ཤོས་སུ་ལྷོད་གཡེང་སྤུ་ཙམ་མེད་པར་འགྲན་ཞུགས་པར་བརྩི་འཇོག་དང་རང་ཉིད་ལ་བརྩི་འཇོག་བྱས་ཏེ་སྤོ་ལོ་ཐེངས་རེ་རེ་ལེགས་པར་རྒྱུན་འཁྱོངས་བྱས་ཏེ་བརྒྱབ་པས་ཨོ་ལིམ་ཕིག་གི་སྙིང་སྟོབས་དང་ཀྲུང་ཧྭའི་ལུས་རྩལ་སྙིང་སྟོབས་ལེགས་པར་མངོན་ཡོད”ཅེས་2019ལོའི་ཟླ་9ཚེས་30ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོའི་བུད་མེད་ཕའེ་ཆིའུ་སྤོ་ལོའི་རུ་མི་དང་སློབ་སྟོན་པའི་འཐུས་མི་ཆེད་མངགས་གདན་ཞུ་བྱས་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་70འཁོར་བའི་སྣེ་ལེན་ཚོགས་འདུར་ཞུགས་པ་མ་ཟད། ཚོགས་འདུའི་མ་འཚོག་གོང་བུད་མེད་ཕའེ་ཆིའུ་སྤོ་ལོའི་རུ་ཁག་གི་འཐུས་མིར་མཇལ་འཕྲད་གནང་སྟེ་ཀྲུང་གོའི་བུད་མེད་ཕའེ་ཆིའུ་སྤོ་ལོ་རུ་ཁག་དང་བུད་མེད་ཕའེ་ཆིའུ་སྤོ་ལོའི་སྙིང་སྟོབས་ལ་བསྔགས་བརྗོད་གནང་བ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བུད་མེད་ཕའེ་ཆིའུ་སྤོ་ལོའི་སྙིང་སྟོབས་ཀྱིས་དུས་རབས་གཅིག་གི་སྙིང་སྟོབས་མཚོན་པ་དང་ཀྲུང་ཧྭ་དར་རྒྱས་ཆེད་འབད་བརྩོན་བྱེད་པའི་དུས་རབས་ཀྱི་སྒྲ་དྲག་ཤོས་དེ་བསྒྲགས་པ་རེད་ཅེས་གསུངས།

གོས་དཀར་ལྷ་རྗེས་ཉེན་ཁར་གདོང་མཆོང་བྱེད་པའི་རིམས་འགོག་གི་དཔའ་མོར“འགན་འཁྲི་དང་ལེགས་སྐྱེས་ཀྱིས་སྣོད་བཅུད་བདེ་བར་བསྲུངས་ཡོད”ཅེས་བསྔགས་བརྗོད་གནང་བ།

འདི་ནི་ལིའུ་ཅའ་བྱིའི་ཡིན་པ།

“ཀྲུང་གོར་ཏོག་གསར་གློ་ཚད་རིམས་ནད་སྔོན་འགོག་བྱེད་པའི་འགག་རྩའི་དུས་སྐབས་སུ་ཀྲུང་གོའི་ས་ཕྱོགས་ཁག་ནས་ཧུའུ་པེར་རོགས་སྐྱོར་དུ་ཡོང་བའི་མྱུར་སྐྱོབ་སྨན་དོན་པ་ཁྲི་4ལྷག་ཙམ་གྱིས་ཁྲོད་གསུམ་ཆ་གཉིས་ནི་བུད་མེད་ཡིན་པ་རེད། དེའི་ཁྲོད་ཀོང་ཏུང་ཞིང་ཆེན་གྱི་སྨན་གཡོག་པ་ཆུང་ཆུང་ཞིག་ལོ་20ཟིན་མེད་པ་རེད། གསར་འགོད་པས་ཁོང་ལ་ཁྱེད་རང་ད་ལྟ་བྱིས་པ་ཞིག་ཡིན་པས་ཁྱེད་རང་ལ་མི་གཞན་གྱི་རོགས་རམ་དགོས་པ་འདུག་ཅེས་ཤོད་སྐབས། ཁོང་གིས་འགོག་སྲུང་གི་གྱོན་ཆས་གོན་ཚེ་ང་ནི་བྱིས་པ་ཞིག་མ་ཡིན་ཞེས་ལན་བཏབ་ཅིང་། སྐད་ཆ་དུམ་བུ་དེས་ཀྲུང་གོ་བ་ཡོངས་སེམས་འགུལ་ཐེབས་ཡོད”ཅེས་2020ལོའི་ཟླ་10ཚེས་1ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཉམ་འབྲེལ་རྒྱལ་ཚོགས་ཚོགས་ཆེན་གྱིས་པེ་ཅིང་འཛམ་གླིང་བུད་མེད་ཚོགས་ཆེན་འཚོགས་ནས་ལོ་25འཁོར་བར་དྲན་གསོ་ཞུ་བའི་རིམ་མཐོའི་ཚོགས་ཆེན་ཐོག་བརྙན་ལམ་བརྒྱུད་ནས་གལ་ཆེའི་གསུང་བཤད་གནང་བ་དང་ཁོང་གིས་བརྩེ་དུང་ཟབ་མོས་ཀྲུང་གོའི“00རྗེས་སུ་སྐྱེས་པའི”སྨན་གཡོག་པ་ཆུང་ཆུང་གི་གཏམ་རྒྱུད་དེ་གསུངས་པ་རེད།

སྨན་གཡོག་པ་ཆུང་ཆུང་འདི་ནི་ལིའུ་ཅའ་དབྱི་ཡིན་པ་དང་། ཀོང་ཏུང་ཞིང་ཆེན་གྱི་ཧུའུ་པེའི་རོགས་སྐྱོར་སྨན་བཅོས་རུ་ཁག་ཁྲོད་ཀྱི་ལོ་ཆུང་ཤོས་ཀྱི་རུ་མི་ཞིག་ཡིན་ལ། ཏོག་གསར་གློ་ཚད་རིམས་ནད་སྔོན་འགོག་གི་འཐབ་ས་ཁག་དུ་འབད་འཐབ་བྱེད་པའི་ཀྲུང་གོའི་བུད་མེད་ཀྱི་བསྡུས་རིས་ཤིག་ཀྱང་ཡིན་པ་རེད།

ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱ་ཆེའི་བུད་མེད་སྨན་དོན་མི་སྣ་དང་། རིམས་འགོག་མི་སྣ། ཚན་རྩལ་མི་སྣ། སྡེ་ཁུལ་ལས་དོན་པ། དང་བླངས་པ་སོགས་ལ“ཀྲུང་གོའི་བུད་མེད་འདི་ཚོ་འདྲ་བ་ཁྲི་སྟོང་མང་པོས་ལུས་ལ་གོས་དཀར་གྱོན་ནས་ཉེན་ཁར་གདོང་མཆོང་བྱས་པ་དང་། བློ་སྟོབས་དང་དཀའ་སྤྱད་ཀྱིས་སྨན་པའི་བྱམས་སྙིང་རྗེ་མངོན་པ་འགན་འཁྲི་དང་ལེགས་སྐྱེས་ཀྱིས་སྣོད་བཅུད་བདེ་བར་སྲུང་ཡོད”ཅེས་བརྩེ་བ་ཟབ་མོས་བསྔགས་བརྗོད་གནང་།

“མུན་སེལ་སློབ་སྤྱི”ཀྲང་ཀུའེ་མའེ་ལ“སློབ་གསོའི་དབུལ་སྐྱོར་ཐད་ལེགས་སྐྱེས་ཕུལ་ནས་རི་གྲོང་བུད་མེད་ཀྱི་ཕུགས་འདུན་མངོན་པ”ཞེས་བསྔགས་བརྗོད་གནང་བ།

ཡུན་ནན་ལི་ཅང་ཧྭ་ཕིང་བུད་མེད་མཐོ་རིམ་སློབ་འབྲིང་གི་ཏང་ཀྲིའི་པུའུ་ཡི་ཧྲུའུ་ཅི་དང་སློབ་སྤྱི་ཀྲང་ཀུའེ་མའེ་ཡིས་སློབ་མ་དང་མཉམ་དུ་སློབ་གསེང་ལུས་རྩལ་རྩེད་བཞིན་ཡོད་པའི་གནས་ཚུལ་ཡིན་པ། (2022ལོའི་ཚེས་9ཉིན་བརྒྱབ་པའི་པར)

“ང་ཉིན་གཅིག་གསོན་པོར་བསྡད་ཚེ་བཤད་སྟེགས་ཐོག་ལངས་ནས་ནུས་ཤུགས་ཡོད་རྒུས་ལེགས་སྐྱེས་ཡོད་ཚད་ཕུལ་ཏེ་ཤི་ཡང་མི་འགྱོད་པ་ཞིག་བྱེད་ཀྱི་ཡིན”ཞེས་2021ལོའི་ཟླ་6ཚེས་26ཉིན་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི“བདུན་གཅིག་བྱས་རྗེས་གཟེངས་རྟགས”སྤྲོད་པའི་ཚོགས་རའི་ཐོག་ཡུན་ནན་ཞིང་ཆེན་ལི་ཅང་ཧྭ་ཕིང་བུད་མེད་མཐོ་རིམ་སློབ་འབྲིང་གི་ཏང་ཀྲི་པུའུ་ཡི་ཧྲུའུ་ཅི་དང་། སློབ་སྤྱི། ཧྭ་ཕིང་རྫོང་བྱིས་པའི་ཕན་བདེ་ཁང་གི་ཡོན་ཀྲང་བཅས་ཡིན་པའི་ཀྲང་ཀུའེ་མའེ་ཡིས་སེམས་གཏིང་གི་སྐད་ཆ་བཤད་ཅིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁོང་ལ་གཟིགས་པ་དང་སྤྱན་ཟུང་ལས་དྲོ་སྐྱིད་དང་བྱམས་བརྩེ་མངོན་བཞིན་ཡོད་པ་རེད།

2021ལོའི་ཟླ་2ཚེས་25ཉིན་རྒྱལ་ཡོངས་དབུལ་སྒྲོལ་འགག་སྒྲོལ་གྱི་ཕྱོགས་བསྡོམས་གཟེངས་བསྟོད་ཚོགས་ཆེན་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒུར་སྒུར་གནང་ནས་རྐུབ་སྟེགས་འཁོར་ལོའི་ཐོག་ཏུ་བསྡད་པའི་ཀྲང་ཀུའེ་མའེ་ལ་གཟབ་གཟབ་ངང་ནས་གཟེངས་རྟགས་གནང་བ་རེད།“སློབ་གསོའི་དབུལ་སྐྱོར་ལ་ལེགས་སྐྱེས་ཕུལ་ནས་རི་གྲོང་བུད་མེད་ཀྱི་ཕུགས་འདུན་མངོན”ཅེས་གལ་ཆེའི་གསུང་བཤད་གནང་སྐབས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཆེད་དུ་ཀྲང་ཀུའེ་མའེ་གླེང་གནང་བ་དང་ཁོ་མོའི་སྔོན་ཐོན་མཛད་རྗེས་ལ་བསྔགས་བརྗོད་གནང་བ་རེད།

ལོ་ངོ་བཅུ་ཡི་རིང་ཀྲང་ཀུའེ་མའེ་ཡིས་དབུལ་པོའི་རི་གྲོང་གི་སློབ་གསོའི་བྱ་གཞག་ལ་སྒེར་སེམས་མེད་པའི་ལེགས་སྐྱེས་ཕུལ་བ་དང་། ཁོང་གིས་རྒྱལ་ཡོངས་ཀྱི་རིན་མེད་བུད་མེད་མཐོ་འབྲིང་སློབ་གྲྭ་ཨང་དང་པོ་དེ་གསར་འཛུགས་བྱས་ནས་ད་བར་དུ་སློབ་མ་2000ལྷག་ཙམ་སློབ་ཆེན་དུ་ཚུད་ཡོད། ཀྲང་ཀུའེ་མའེ་ཀྲུང་གོ་དྲིལ་བསྒྲགས་པུའུ་དང་སློབ་གསོ་པུའུ་ཡིས“རྒྱལ་ཡོངས་དཔེ་ཁྲིད་མི་སྐྱོང་གི་དཔེ་སྟོན”ལ་བདམས་ཡོད་པ་རེད།

( བསོད་ནམས་དབང་འདུས་ཀྱིས་སྒྱུར། ཚེ་རིང་ཆོས་སྒྲོན་གྱིས་ཞུས )