@ཁྱིམ་བདག་ཚོ། ཕྲུ་གུས་ཁ་པར་བལྟས་པའི་གནོད་པ་འདི་དག་ཤེས་ན་ལེགས།

བྱིས་པའི་བདེ་སྲུང་སྒོ་བསྟེན་སྨན་ཁང་ནང་དུ། ཕྲུ་གུས་སྐད་ཆ་མི་ཤོད་པ་དང་སྐད་ཆ་ཤོད་ཁག་པ་སོགས་ཀྱི་སྐོར་བསྟེན་མཁན་གྱི་ཕྲུ་གུ་མང་དུ་འགྲོ་བཞིན་ཡོད། སྨན་པ་བསྟེན་པའི་བརྒྱུད་རིམ་ཁྲོད་སྨན་པས་ཁྱིམ་བདག་ལ་དུས་རྒྱུན་ཕྲུ་གུས་བརྙན་འཕྲིན་དང་ཁ་པར་ལྟ་བའི་དུས་ཚོད་རིང་མིན་སྐད་ཆ་འདྲི་སྐབས། ཁྱིམ་བདག་མང་པོས་འཕྱུག་པ་མེད་པའི་ཐོག་ནས་རང་གི་ཕྲུ་གུས་ཁ་པར་དང་བརྙན་འཕྲིན་ལྟ་རྒྱུར་དགའ་པོ་ཡོད་ཚུལ་དང་ཁ་པར་དེ་བས་སྤྱོད་མཁས་ཚུལ་གླེང་བ་མ་ཟད། ཁ་པར་ལ་དབྱིངས་ཚུད་སྐབས་སྐད་ག་ཚོད་བཏང་ཡང་ཁ་ཡ་བྱེད་ཀྱི་མི་འདུག་ཅེས་ཤོད་ཀྱི་ཡོད། དོན་དངོས་སུ་ཕྲུ་གུ་འདི་དག་སྐད་ཆ་མི་ཤོད་པའམ་སྐད་ཆ་ཤོད་ཁག་པོ་ཁོ་ན་མིན་པར་ཁ་པར་བལྟས་དྲགས་པའི་དབང་གིས་ཕྲུ་གུའི་བསམ་ཤེས་ནུས་པ་དང་སྟངས་འཛིན་ནུས་པ་སོགས་ཐད་ལ་ཡང་སྐྱོན་ཆེན་པོ་བཟོ་གི་ཡོད།

ཁ་པར་སོགས་གློག་རྡུལ་ཐོན་རྫས་ཀྱིས་ཕྲུ་གུར་གནོད་པ་གང་དག་ཡོད་དམ།

རུས་པ་འཚར་བར་ཤུགས་རྐྱེན་བཟོ་བ།

བྱིས་དུས་ནི་ཕྲུ་གུའི་གཟུགས་པོའི་རུས་པ་འཚར་ལོངས་ཡོང་དང་ཡོང་བཞིན་པའི་དུས་ཡིན་པ་དང་། ཕྲུ་གུ་མང་པོས་ཁ་པར་ལྟ་སྐབས་མགོ་བོ་སྒུར་ནས་རྩེད་པ་དང་། འབོལ་ཁྲིའི་སྟེང་ཉལ་ནས་རྩེད་པ། ཡང་ན་གཟུགས་པོ་ཀྱོག་ཀྱོག་བྱས་ནས་རྩེད་པ་སོགས་བྱེད་ཀྱི་ཡོད། སྡོད་སྟངས་དེ་དག་གིས་ཕྲུ་གུའི་མཇིང་པ་དང་ཕྲག་པ། སྒལ་ཚིགས་སོགས་འཚར་ལོངས་ཡོང་བར་ཤུགས་རྐྱེན་བཟོ་གི་ཡོད།

མིག་ཤེད་ཉམས་པ།

བྱིས་པའི་དུས་མིག་ཤེད་འཚར་ལོངས་འཐུས་ཚང་དང་མིག་ཤེད་བརྟན་པོ་མེད་པའི་དུས་སུ་གནས་ཡོད་པས་མིག་ཤེད་དབང་པོའི་སྙོམ་སྒྲིག་ནུས་པ་ཧ་ཅང་ཞན་པོ་ཡོད། ཁ་པར་མིག་དང་ཐག་ཉེ་བ་དང་དུས་ཚོད་རིང་པོ་བེད་སྤྱོད་བྱས་ཚེ་ཕྲུ་གུའི་མིག་ལ་གནོད་པ་ཆེན་པོ་ཡོད་པ་མ་ཟད་རྒྱང་སྒྲིབ་ཀྱི་ནད་ཕོག་གི་ཡོད། སྐབས་འགར་ད་དུང་ཟུག་གཟེར་རྒྱག་པའི་ནད་རྟགས་ཐོན་སྲིད། དཔེར་ན། དུས་ཚོད་རིང་པོ་བརྙན་ཤེལ་ལ་བལྟས་པའི་རྐྱེན་གྱིས་ཕྲུ་གུའི་མིག་གི་སྐྱི་མོར་གནོད་འཚེ་བཟོ་ཡི་ཡོད།

རང་གཅུན་གྱི་ནུས་པ་ཤོར་བ།

ཕྲུ་གུའི་རང་གཅུན་གྱི་ནུས་པ་ཞན་པས། ཁ་པར་གྱིས་ཕྲུ་གུའི་རང་གཅུན་ནུས་པར་ཤུགས་རྐྱེན་ཐེབས་ཏེ་ཕྲུ་གུའི་གཉིད་ཉལ་བ་དང་ཁ་ལག་ཟ་བ་སོགས་ཀྱི་དུས་ཚོད་འཕྲོ་བརླག་གཏོང་གི་ཡོད་ལ། འཚོ་བའི་གོམས་གཤིས་ལ་རིམ་བཞིན་འགྱུར་ལྡོག་འགྲོ་གི་ཡོད།

གཤིས་ཀར་ཤུགས་རྐྱེན་ཐེབས་པ།

ཡུན་རིང་ཁ་པར་ལ་མགོ་འཁོར་ནས་ཕ་མ་བུ་ཕྲུག་དབར་དང་ན་མཉམ་གྱི་ཕྲུ་གུ་གཞན་དབར་གླེང་མོལ་བྱ་རྒྱུ་ཉུང་དུ་ཕྱིན་ནས། གཞན་དང་ཁ་བརྡ་བྱེད་མི་འདོད་པའམ་མི་དང་མིའི་དབར་འབྲེལ་འདྲིས་བྱེད་པའི་ནུས་པ་རིམ་བཞིན་ཞན་དུ་འགྲོ་གི་ཡོད།

སེམས་ཁམས་ལ་ཤུགས་རྐྱེན་ཐེབས་པ།

ཁ་པར་གྱིས་བསྐྲུན་པའི་རྟོག་བཟོའི་འཇིག་རྟེན་ལ་ཡུན་རིང་མགོ་འཁོར་བས་ཕྲུ་གུའི་སེམས་ཁམས་འཚར་ལོངས་ལ་ཤུགས་རྐྱེན་ཐེབས་ཀྱི་ཡོད། ཞིབ་འཇུག་ལས་ཤེས་རྟོགས་བྱུང་བར། ཁ་པར་ལ་དབྱིངས་ཞུགས་མཁན་ཕྲུ་གུ་རྣམས་ན་མཉམ་གྱི་ཕྲུ་གུ་གཞན་ལས་སེམས་ཁམས་མི་བདེ་བ་དང་གཉིད་ཡག་པོ་མི་ཁུག་པ། རླུང་ལངས་བ་སོགས་དེ་བས་ཚབས་ཆེ་བ་ཡོད།

ཕྲུ་གུ་ཞིག་འཕྲོ་བརླག་གཏོང་འདོད་ན། ཁ་པར་གཅིག་སྤྲད་ན་འགྲིག སྐད་ཆ་འདི་ནི་སྒྲོ་འདོགས་དང་འཇིགས་སྐུལ་བྱས་པ་ཞིག་གཏན་ནས་མིན། གློག་རྡུལ་ཐོན་རྫས་ཀྱིས་ཕྲུ་གུར་གནོད་པ་ཆེན་པོ་འདི་འདྲ་ཡོད་དུས་ང་ཚོས་ཇི་འདྲ་བྱེད་དགོས་སམ་ཞེ་ན།

ཁ་པར་ལྟ་ཡུན་ཐུང་དུ་གཏོང་བ།

ཕ་མས་རྒྱུན་དུ་རང་གི་ཕྲུ་གུ་དང་མཉམ་དུ་ཁོང་ཚོས་དགའ་པོ་བྱེད་པའི་དཔེ་དེབ་ལྟ་བ་དང་། རོལ་རྩེད་ལ་རོལ་བ། ཡང་ན་ཕྲུ་གུ་ཁྲིད་ནས་འཆམ་འཆམ་དུ་འགྲོ་བ། གཞན་ཡང་ཕྲུ་གུས་དགའ་པོ་བྱེད་པའི་སྒྲུང་ཤོད་པ་སོགས་བྱེད་དགོས།

འགན་འཁུར་རྩོམ་སྒྲིག་པ།　尼玛曲珍