2022ལོའི་ཚུན་དུ། ལྷ་ས་གྲོང་ཁྱེར་ཁྲེང་ཀོན་ཆུས་མི་སྤྱི་ཅུས་ངལ་རྩོལ་ལྟ་ཞིབ་རུ་ཆེན་གྱིས་ངལ་རྩོལ་འགན་ལེན་ལྟ་ཞིབ་ཞུ་གཏུག་གྱོད་གཞི་107ཐག་གཅོད་བྱས་པ་དག་ངལ་རྩོལ་བ་661དང་འབྲེལ་བ་ཡོད་ལ། ངལ་རྩོལ་གླ་ཆ་སྒོར་ཁྲི་832ཚུར་བླངས་པ་དང་། ཁྲིམས་འགལ་གྱི་བྱེད་སྤྱོད་ཆེ་གྲས་8སྤྱི་ཚོགས་ལ་ཡོངས་བསྒྲགས་བྱས་པ་རེད།

རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་འཚོགས་ཚུན། རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་སྤྱོད་ཚུལ་ལེགས་སུ་བཏང་ཞིང་དོན་འཁྱོལ་ལ་དམ་འཛིན་བྱས་པས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་འགན་ལེན་ནུས་ལྡན་ཐུབ་ཡོད། རང་སྐྱོང་ལྗོངས་མི་སྤྱི་ཐིང་གིས་གླ་ཆ་འགྱངས་ཆད་ཀྱི་གནད་དོན་འབྱུང་རྩ་ནས་ཐག་གཅོད་བྱེད་པ་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ཚད་བརྒལ་སར་བརྩིས་ནས་འགན་འཁྲི་འཁུར་ཤུགས་ཆེ་རུ་གཏོང་བ་དང་། མང་ཚོགས་དང་ཉེ་བཅར། དཀའ་གནད་སེལ་བ་བཅས་བྱས་པས། ལྗོངས་ཡོངས་སུ་གླ་ཆ་འགྱངས་ཆད་བྱེད་མཁན་དང་རིམ་པ་བརྒལ་ནས་ངོ་བཅར་བྱེད་པའི་སྣང་ཚུལ་མེད་པ་མངོན་འགྱུར་བྱུང་ནས། ཞིང་པ་ལས་མིས་མི་སྤྱིའི་སྲིད་དོན་ཞབས་འདེགས་ལ་བློ་ཡིད་ཚིམ་ཚད་ཐོག་མར་100%ཟིན་ནས་རྒྱལ་ཡོངས་ཀྱི་ཨང་དང་པོར་སླེབས་ཡོད་པ་རེད།

སྤྱོད་ཚུལ་ལེགས་སུ་གཏོང་བར་ལས་བྱེད་པས་ལས་དོན་སྤེལ་བ།

ལྗོངས་ཡོངས་ཀྱི་མི་སྤྱི་ཁོངས་གཏོགས་ཀྱིས“གླ་ཆ་འགྱངས་ཆད་རྩ་བཅོས་བྱེད་པའི་གཅིག་སྡུད་འགག་སྒྲོལ་བྱ་སྤྱོད”ཕྱོགས་ཡོངས་ནས་སྤེལ་འགོ་ཚུགས་པ་དང་། རིམ་ཁག་ཏང་ཨུད་དང་སྲིད་གཞུང་གིས་ཆེད་དོན་ཞིབ་འཇུག་བཀོད་སྒྲིག་ཐེངས་220ལྷག་ཙམ་བྱས་ནས། “མིས་རྣམ་གྲངས་ལ་ལྟ་བ”དང“འགོ་ཁྲིད་ཀྱིས་གྱོད་གཞི་སྒྲུབ་འགན་ལེན་པ” གནད་དོན་གང་དུ་གནས་ཚེ་དེ་གར་སྒྲུབ་པར་ལྟ་སྐུལ་གྱིས་ལྗོངས་ཡོངས་སུ“དོ་དམ་དྲ་བ་གཅིག་དང་། གྱོད་གཞིའི་མཛོད་གཅིག ཐག་གཅོད་སྒྲུབ་རིམ་གཅིག”བཅས་ཕྱོགས་བསྡུས་བཅོས་སྐྱོང་གི་རྣམ་པ་ཞིག་ཆགས་ཡོད།

2022ལོར་ལྗོངས་ཡོངས་ཀྱིས་གླ་ཆ་འགྱངས་ཆད་ཀྱི་གྱོད་གཞི་སྣ་ཚོགས་ཁྱོན་1038ཐག་བཅད་པ་དང་ཞིང་པ་ལས་མི་5768ལ་གླ་ཆ་འགྱངས་ཆད་སྒོར་དུང་ཕྱུར་1.1ལེན་རོགས་བྱས་ཤིང་། ལྷག་དོན་དུ་ཏང་གི་ཚོགས་ཆེན་ཉི་ཤུ་པའི་སྔ་རྗེས་སུ་གྱོད་གཞི་ཚང་མ“ཉིན་རེར་གཙང་སེལ”དང“འགུལ་རྣམ་གཙང་སེལ”བྱས་ནས་སྤྱི་ཚོགས་ཀྱི་རྣམ་པ་བཟང་པོ་ཞིག་བཏོད་ཡོད།

དོན་འཁྱོལ་ལ་དམ་འཛིན་དང་མང་ཚོགས་དང་ཉེ་བཅར་གྱིས་ལྷག་བསམ་རྣམ་དག་ངང་རོགས་སྐྱོར་བྱས་པ།

གླ་ཆ་འགྱངས་ཆད་ཀྱི་གནད་དོན་བཅོས་སྒྲིག་ནུས་ལྡན་བྱས་པའི་ཐད་ཀན་སུའུ་ལུང་ནན་གྲོང་ཁྱེར་ནས་སླེབས་པའི་ཝང་གོ་ལིན་ལ་མྱོང་ཚོར་ཟབ་མོ་བྱུང་ཡོད། “དེ་སྔ་ལོ་མཇུག་ཏུ་སླེབས་རིམ་བཞིན་གང་སར་སྐྱོད་དགོས་པ་ནི་ལོ་གསར་གྱི་མཁོ་ཆས་ཉོ་བ་མིན་པར་གླ་ཆ་ལེན་པར་སྐྱོད་དགོས། ད་ཆ་སྲིད་གཞུང་སྡེ་ཚན་གྱིས་གླ་ཆ་འགྱངས་ཆད་ཀྱི་གནད་དོན་བཅོས་སྒྲིག་ལ་སྔར་བས་མཐོང་ཆེན་བྱེད་པ་མ་ཟད། ང་ཚོའི་རེ་འདུན་སྣ་ཚོགས་ལ་ལན་ཧུར་ཐག་བརྒྱབ་ནས་རང་འགུལ་ངང་རོགས་རམ་བྱེད་ཀྱི་ཡོད་པར་བརྟེན་ང་ཚོའི་ལས་ཀ་ཧུར་ཐག་བྱེད་པའི་ངར་ཤུགས་འཕེལ་སོང”ཞེས་ལས་ཡུལ་དུ་ལས་ཀ་ཡུན་རིང་བྱེད་མཁན་ཝང་གོ་ལིན་གྱིས་མཛེས་སྡུག་ལྡན་པའི་འཚོ་བར་ཡིད་ཆེས་ཀྱིས་ཁེངས་ཀྱིན་དུ་བཤད།

ལྗོངས་ཡོངས་ཀྱི་རིམ་བཞིའི་ངལ་རྩོལ་ལྟ་ཞིབ་སྡེ་ཚན་གྱི་ངལ་རྩོལ་ལྟ་ཞིབ་པ་280ལྷག་ཙམ་གྱི་འབྲེལ་གཏུག་ཁ་པར་ལྗོངས་ནང་ཁུལ་གྱི་སྨྱན་སྦྱོར་ཚན་པ་གཙོ་བོ་ཁག་བརྒྱུད་སྤྱི་ཚོགས་སུ་ཡོངས་བསྒྲགས་བྱས་ནས། ཉིན་མཚན་མེད་པར་ཞུ་གཏུག་དང་ཐེར་འདོན་དང་ལེན་བྱས་པ་དང་། མི་སྤྱིའི་12333ཐད་སྦྲེལ་ཁ་པར་ནས་གླ་ཆ་འགྱངས་ཆད་རྩ་འཆོས་ཆེད་སྤྱོད་ཁ་པར་བཙུགས་ཡོད་པ་རེད།

རིམས་ནད་ཐོན་རིང་རང་ལྗོངས་ཀྱིས“ཐུག་འཕྲད་མེད་པའི”དྲ་ཐོག་ཞབས་འདེགས་ཞུས་ནས་ཞིང་པ་ལས་མི་3900ལྷག་ཙམ་ལ་འཚོ་བའི་འགྲོ་གྲོན་དང་ལས་ཐེབས་ཆག་པའི་འགྲོ་གྲོན་སོགས་སྒོར་ཁྲི་1685ཐག་གཅོད་རོགས་བྱས་པ་དང་ཚོང་གཉེར་བ་ཁྲི་20.3བདེ་བླག་ངང་ཕ་ཡུལ་དུ་ལོག་རྒྱུར་རོགས་རམ་བྱས་ཡོད།

“ཞིང་པ་ལས་མིའི་གླ་ཆ་སྤྲོད་ཚུལ་ལ་ལྟ་སྐུལ་ཚོད་འཛིན་དང་ཉེན་ཟོན་ཉེན་བརྡ་གཏོང་བའི་ལས་སྟེགས”ལྗོངས་ཡོངས་ཀྱི་སྐྲུན་བཞིན་པའི་རྣམ་གྲངས་ཚང་མར་ཁྱབ་པ་དང་། ལྷ་གཞིས་མྱུར་བགྲོད་གཞུང་ལམ་རྣམ་གྲངས་ལ་གླ་ཆ་འགྱངས་ཆད་ཀྱི་མངོན་མེད་རྐྱེན་ངན་ཚབས་ཆེན་ཡོད་པ་ལྟ་ཞིབ་ཚད་ལེན་ཐུབ་རྗེས། འཕྲལ་མར་ཆེད་དོན་ཚན་ཁག་བཙུགས་ནས་ས་གནས་ས་ཐོག་ཏུ་བཅའ་སྡོད་ཐག་གཅོད་བྱས་ཏེ་ཞིང་པ་ལས་མི་3342ཀྱི་གླ་ཆ་སྒོར་ཁྲི་6404ཚང་མ་སྤྲོད་དུ་བཅུག་པ་རེད།

ཕུགས་ཕན་དོན་གཉེར་གྱིས་སྤྱོད་གོ་ཆོད་པའི་ལམ་ལུགས་མ་ལག་བཙུགས་པ།

ལྗོངས་ཡོངས་ཀྱི་མི་སྤྱིའི་ཁོངས་གཏོགས་ཀྱིས་སྐྱོན་ཆ་འཚོལ་བ་དང་། ཞན་ཆ་རྩད་གཅོད། དོན་འཁྱོལ་ལ་ཞིབ་བཤེར། ཕན་འབྲས་འདྲི་རྩད་བཅས་བྱས་ཏེ། དམིགས་སའི་རང་བཞིན་ལྡན་པའི་སྒོ་ནས་སྤྱོད་གོ་ཆོད་པའི་ལམ་ལུགས་མ་ལག་བཙུགས་ཏེ་རྐང་བཙུགས་ནས་ཞིང་པ་ལས་མིའི་གླ་ཆ་འགྱངས་ཆད་བྱེད་མཁན་གྱི་ཁེ་ལས་ལ་འོས་བབ་ཐོབ་ཐང་དང་། རྒྱབ་ལྗོངས། རིམ་པ་བཅས་གང་ཡིན་ལ་མ་བལྟོས་པར་གོ་རིམ་ལྟར་ཁེ་ལས་དེ“ཐོ་གཞུང་ནག་པོའི”གྲས་སུ་བཅུག་སྟེ་འོས་སྐུལ་འོས་དཔོད་དང་། ཁྲོམ་རར་འཇུག་འཐུས། འོས་བབ་ཐོབ་ཐང་ཞིབ་བཤེར། དངུལ་ཁང་གི་དངུལ་བུན་སོགས་ཀྱི་ཐད་ཕྱོགས་ཡོངས་ནས་མཉམ་དུ་ཆད་གཅོད་བསླབ་འདོམས་བྱེད་ཀྱི་ཡོད།

2022ལོར་གླ་ཆ་འགྱངས་ཆད་བྱས་ནས་ཡིད་རྟོན་ཤོར་བའི་མཉམ་འབྲེལ་ཆད་གཅོད་བསླབ་འདོམས་བྱ་ཡུལ་དང་ངལ་རྩོལ་འགན་སྲུང་གི་ཁྲིམས་འགལ་བྱེད་སྤྱོད་ཚབས་ཆེན་ལྡན་པའི་ཁེ་ལས་71ཡོངས་བསྒྲགས་བྱས་པ་དང་། ཞིང་པ་ལས་མིའི་གླ་ཆའི་གྱོད་གཞི་68ཁྲིམས་ལྟར་ཞུ་གཏུག་བརྒྱབ་ནས་ཁེ་ལས་ཀྱིས་ཁྲིམས་འགལ་མ་གནས་ཐེག་མི་ཐུབ་པའི་ཆེད་དུ་སྤར་ནས་སྔར་འབྱུང་མྱོང་མེད་པའི་ཟིལ་གནོན་ཞིག་ཆགས་པར་བྱས་ཡོད།

གསར་གཏོད་ཀྱི་རང་བཞིན་ལྡན་པའི་སྒོ་ནས་ཕུགས་ཕན་ལམ་སྲོལ་ཁག་30ལྷག་ཙམ་བཙུགས་པ་དང་། ཞིང་པ་ལས་མི་མི་ཐེངས་ཁྲི་28.6མིང་ངོ་མ་འགོད་པའི་ཐོ་འགོད་བྱས་པ། ཆེད་སྤྱོད་རྩིས་ཐོ་ནས་མ་དངུལ་སྒོར་དུང་ཕྱུར་85སྤྲད་པ། དངུལ་ཁང་ནས་ཚབ་ལ་གླ་ཆ་སྒོར་དུང་ཕྱུར་68.7སྤྱད་པ་བཅས་ལས། ཞིང་པ་ལས་མིས་སྤྱོད་ཚུལ་ལེགས་གཏོང་གིས་དོན་འཁྱོལ་ལ་དམ་འཛིན་བྱས་པའི་རྣམ་པ་གསར་པ་དངོས་སུ་ཚོར་ཐུབ་ཡོད། “ང་ཚོས‘གཞན་དབང་གི་བདག་གཉེར’དེ‘རང་འགུལ་གྱི་ཞབས་འདེགས’ལ་བསྒྱུར་ནས་ཞིང་པ་ལས་མིའི་དཀའ་ལས་བརྒྱབ་པའི་དངུལ་སྐར་མ་གཅིག་ཀྱང་མི་ཤོར་བར་བྱེད་དགོས” ལྗོངས་མི་སྤྱི་ཐིང་གི་འགན་འཁུར་བས་སྤྱོད་ཚུལ་འཛུགས་སྐྱོང་ནམ་ཡང་ཚར་དུས་མེད་པའི་ཆོད་སེམས་དང་བློ་སྟོབས། གླ་ཆ་འགྱངས་ཆད་རྩ་འཆོས་ཀྱི་ཕན་འབྲས་དངོས་ལ་བརྟེན་ནས་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་སྐུལ་འདེད་ཀྱི་གྲུབ་འབྲས་ལ་ཞིབ་དཔྱད་བྱས་ཏེ་ལྗོངས་ཏང་ཨུད་དང་། སྲིད་གཞུང་། མི་རིགས་ཁག་གི་མང་ཚོགས་བཅས་ལ་བློ་ཡིད་ཚིམ་པའི་དམངས་འཚོའི་རྒྱུགས་ལན་ཞིག་འབུལ་གྱི་ཡིན་ཞེས་བཤད་པ་རེད།