བོད་རང་སྐྱོང་ལྗོངས་གནམ་གཤིས་ཅུས་ཀྱིས་ཟླ་1ཚེས་29ཉིན་གནས་ཚུལ་སྤེལ་བར། སྔོན་དཔག་བྱས་ན། གཟའ་འཁོར་འདིའི་ཟླ་1ཚེས་30ཉིན་ནས་ཟླ་2ཚེས་5ཉིན་བར། རང་ལྗོངས་ཀྱི་ལྷོ་ནུབ་རྒྱུད་དུ་གངས་ཆེ་ཙམ་འབབ་རྒྱུ་དང་། ནུབ་རྒྱུད་ནས་ཤར་རྒྱུད་བར་དྲོད་ཚད་ཆག་རྒྱུ་ཡིན་པ་རེད།

ཟླ་1ཚེས་30ཉིན།

མངའ་རིས་ལ་གངས་ཆུང་བ་ནས་འབྲིང་བའི་བར་འབབ་རྒྱུ་དང་། རྩ་མདའ་རྫོང་དང་སྤུ་ཧྲེང་རྫོང་གི་ཤང་དང་གྲོང་རྡལ་ཁག་གཅིག་ལ་གངས་ཆེ་བ་ནས་ཁ་བ་བུ་ཡུག་འཚུབ་རྒྱུ། གཞིས་རྩེའི་ལྷོ་ནུབ་རྒྱུད་ལ་སྤྲིན་པ་མང་པོ་འཁོར་ནས་གནམ་འཐིབ་རྒྱུ་དང་། ས་ཆ་ཁག་གཅིག་ལ་གངས་སིམ་སིམ་འབབ་རྒྱུ། ས་ཁུལ་གཞན་དག་ལ་སྤྲིན་པ་ཉུང་བ་ནས་སྤྲིན་པ་མང་པོ་འཁོར་རྒྱུ། 

ཟླ་1ཚེས་31ཉིན་ནས་ཟླ་2ཚེས་2ཉིན་བར།

གཞིས་རྩེའི་ལྷོ་རྒྱུད་དང་། ལྷོ་ཁ། ཉིང་ཁྲི། ཆབ་མདོ་བཅས་ལ་སྤྲིན་པ་མང་པོ་འཁོར་ནས་གངས་ཆུང་བ(ཆར་པ)འབབ་རྒྱུ་དང་། ས་བབ་མཐོ་བའི་ཤང་དང་གྲོང་རྡལ་ཁག་གཅིག་ལ་གངས་འབྲིང་བ་ནས་ཆེ་བའི་བར་འབབ་རྒྱུ། ནག་ཆུའི་ཤར་རྒྱུད་དང་ལྷ་སའི་ཤར་རྒྱུད་ལ་སྤྲིན་པ་མང་པོ་འཁོར་ནས་གནམ་འཐིབ་རྒྱུ་མ་ཟད། ས་ཆ་ཁ་ཤས་ལ་གངས་འབབ་རྒྱུ། ས་ཁུལ་གཞན་དག་ལ་སྤྲིན་པ་མང་པོ་འཁོར་རྒྱུ། ནུབ་རྒྱུད་ནས་ཤར་རྒྱུད་བར་དྲོད་ཚད་4℃ནས་10℃བར་ཆག་རྒྱུ། 

ཟླ་2ཚེས་3ཉིན་ནས་ཟླ་2ཚེས་5ཉིན་བར།

མངའ་རིས་ཀྱི་ལྷོ་ནུབ་རྒྱུད་དང་ཉིང་ཁྲིར་སྤྲིན་པ་མང་པོ་འཁོར་ནས་གནམ་འཐིབ་རྒྱུ། ས་ཆ་ཁ་ཤས་ལ་གངས་ཆུང་བ(ཆར་པ)འབབ་རྒྱུ། ས་ཁུལ་གཞན་དག་ལ་སྤྲིན་པ་ཉུང་བ་ནས་སྤྲིན་པ་མང་པོ་འཁོར་རྒྱུ།

གཟའ་འཁོར་འདིའི་ནང་བོད་བྱང་ཐང་རྒྱུད་དང་ལྷོ་རྒྱུད་ཀྱི་ས་བབ་མཐོ་བའི་ས་ཁུལ་ལ་ལྷགས་པ་ཆེ་བ་རིམ་པ་7ནས་9བར་རྒྱག་རྒྱུ་དང་། ཉིན་གུང་ཡོལ་རྗེས་ཡར་ཀླུང་གཙང་པོའི་ལུང་ཤུར་རྒྱུད་ལ་ཐོལ་རླུང་རིམ་པ་5ནས་6བར་རྒྱག་རྒྱུ།

བོད་ཀྱི་ས་ཆ་ཁ་ཤས་ལ་གངས་ཆེན་པོ་འབབ་པའམ་ཁ་བ་བུ་ཡུག་འཚུབ་རྒྱུ།

ཀྲུང་གོ་གནམ་གཤིས་དྲ་བའི་ཐོག་སྤེལ་བའི་གནས་ཚུལ་ལ་གཞིགས་ན། ཟླ་1ཚེས་30ཉིན། བོད་ཀྱི་ལྷོ་ནུབ་རྒྱུད་ཀྱི་མངའ་རིས་ས་ཁུལ་ལ་གངས་ཆེན་པོ་འབབ་རྒྱུ་དང་། ས་ཆ་ཁ་ཤས་ལ་ཁ་བ་བུ་ཡུག་འཚུབ་རྒྱུ་དང་གངས་ཆེ་ཤོས་འབབ་རྒྱུ་ཡིན་པ།

གནམ་གཤིས་ཚན་པས་དྲན་སྐུལ་བྱས་དོན།

ཟླ་1ཚེས་31ཉིན་ནས་བཟུང་། རང་རྒྱལ་ལ་སླར་ཡང་མཁའ་རླུང་གྲང་མོའི་ཤུགས་རྐྱེན་ཐེབས་རྒྱུ་དང་གནམ་གཤིས་འགྱུར་ལྡོག་མང་བས། མང་ཚོགས་ཚོས་དྲོད་ཚད་ཆག་པ་དང་། ལྷགས་པ་ཆེན་པོ་རྒྱག་པ། གངས་ཆར་འབབ་པ་སོགས་ཀྱིས་འགྲིམ་འགྲུལ་འགྲོ་སྐྱོད་ལ་ཤུགས་རྐྱེན་ཐེབས་རྒྱུར་དོ་སྣང་བྱེད་དགོས།

དེ་དང་ཆབས་ཅིག་བོད་ཀྱི་ནུབ་རྒྱུད་ས་ཁུལ་ཁག་གཅིག་ལ་གངས་ཆེ་ཙམ་འབབ་རྒྱུ་ཡིན་པས། ས་གནས་དེ་གའི་མང་ཚོགས་ཚོས་སྔོན་ཚུད་ནས་དོགས་ཟོན་གྱི་བྱ་ཐབས་ཡག་པོ་སྤྱད་དེ། ཐོན་སྐྱེད་དང་། འཚོ་བ། འབྲོག་ལས་སོགས་ལ་ཤུགས་རྐྱེན་མི་ཐེབས་པ་བྱེད་དགོས།

གནམ་གཤིས་ཚན་པས་གྲོས་འགོ་བཏོན་པར།

གཟའ་འཁོར་འདིའི་ནང་རང་ལྗོངས་ཀྱི་ལྷོ་ནུབ་རྒྱུད་ལ་གངས་ཆེན་པོ་འབབ་རྒྱུ་ཡིན་པས། གངས་འཁྱགས་ཀྱིས་གཞུང་ལམ་འགྲིམ་འགྲུལ་དང་འབྲོག་ཁུལ་གྱི་ཐོན་སྐྱེད་དང་འཚོ་བར་ཤུགས་རྐྱེན་ངན་པ་ཐེབས་རྒྱུར་སྔོན་འགོག་བྱེད་དགོས་ལ། གངས་བབས་རྗེས་དྲོད་ཚད་འཕར་ཆག་ཆེ་བས་ས་གཤིས་ཀྱི་གནོད་འཚེ་འབྱུང་བར་དོགས་ཟོན་བྱེད་དགོས།

དེ་བཞིན། གཟའ་འཁོར་འདིའི་ནང་རང་ལྗོངས་ཀྱི་ས་ཁུལ་མང་ཆེ་བར་ལྷགས་པ་ཆེ་བའི་གནམ་གཤིས་བསྟུད་མར་བསྟན་སྲིད་པས། གནས་གཤིས་སྐམ་ཤས་ཆེ་བའི་རྐྱེན་གྱིས་ནགས་ཚལ་དང་། རྩྭ་ཐང་། གྲོང་ཁྱེར་བཅས་ཀྱི་མེ་ཟོན་གྱི་ལས་དོན་མུ་མཐུད་ཡག་པོ་སྒྲུབ་དགོས།