མཉམ་སྡེབ་འདི་འདྲ་ཞིག་ཡོད་དེ། ཁོ་ཚོས་ལོ་འཁོར་མོ་ཡུག་ཏུ་མཐའ་མཚམས་འགག་སྒོའི་འཐབ་ས་དང་པོར་གཞི་ཚུགས་ནས་བོད་ཀྱི་བརྟན་ལྷིང་དང་འཕེལ་རྒྱས་ལ་ཐོག་མཐའ་བར་གསུམ་དུ་གཡས་གཞོགས་གཡོན་འདེགས་བྱེད་ཅིང་། དཀའ་ངལ་ཡོད་པའི་ཉམས་ཞན་ཚོགས་སྤྱིར་སེམས་ཁུར་བྱས་ནས་ཐོག་མཐའ་བར་གསུམ་དུ་བརྩེ་བ་ཟོལ་མེད་ཀྱིས་མི་རིགས་མཐུན་སྒྲིལ་གྱི་ས་བོན་གང་སར་གཏོར་བ་མ་ཟད། 2022ལོའི་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མཉམ་སྡེབ་ཀྱི་མཚན་སྙན་ཡང་ཐོབ་ཡོད། ཁོ་ཚོ་ནི་སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱི་མི་དམངས་ཉེན་རྟོག་པ་རེད།

སེམས་ནུས་གཅིག་སྒྲིལ་གྱིས་མི་རིགས་མཐུན་སྒྲིལ་ཡར་ཐོན་གྱི་རྨང་གཞི་བརྟན་དུ་བཏང་བ།

སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱི་མི་དམངས་ཉེན་རྟོག་པ་ནི་རྒྱལ་ཡོངས་ཀྱི་ས་གནས་ཁག་ནས་སླེབས་ཤིང་། མང་ཆེ་བ་ཁྱིམ་མི་དང་རྒྱང་ཐག་རིང་པོ་ཆོད་ཡོད། ཧྲན་ཏུང་ནས་ཡིན་པའི་མི་དམངས་ཉེན་རྟོག་པ་ལི་ཙེང་ཅུན་གྱིས་བོད་དུ་ཉེན་རྟོག་པའི་ལས་ཀ་བྱས་ཏེ་ལོ་10སོང་རིང་ནང་མི་དང་མཉམ་དུ་དཔྱིད་གསར་དུས་ཆེན་ཐེངས་གཉིས་ལས་གཏོང་མྱོང་མེད། གཞིས་རྩེ་གྲོང་ཁྱེར་རྒྱལ་རྩེ་རྫོང་གི་མི་དམངས་ཉེན་རྟོག་པ་མིག་དམར་ཚེ་རིང་དང་ནང་མི་ས་ཆ་གསུམ་དུ་སོ་སོར་སྡོད་ཀྱི་ཡོད་པ་སྟེ། ཕ་མ་གཉིས་ཕ་ཡུལ་རྒྱལ་རྩེ་དང་བཟའ་ཟླ་དང་བུ་མོ་ལྷ་སར་ཡོད་པས། ལོ་གཅིག་ལ་འཁོར་ཞག་སྐབས་མ་གཏོགས་ནང་མི་མཉམ་འཛོམས་ཀྱི་བསྐལ་བ་མེད།

སྤྱིར་ན་སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱི་མི་དམངས་ཉེན་རྟོག་པ་རྣམས་ཕ་ཡུལ་དང་རིང་དུ་གྱེས་ཀྱང་། ཁོ་ཚོའི་ངོས་ནས་བརྗོད་ན་མི་རིགས་མཐུན་སྒྲིལ་གྱི་ལས་དོན་ཡག་པོ་སྒྲུབ་པ་ནི་གོ་རིམ་ལྡན་པའི་ངང་ལས་ཀ་ཁག་བྱེད་ཐུབ་པའི་འགན་ལེན་དང་རྨང་གཞི་ཞིག་རེད།

ཡུན་རིང་ཚུན་དུ་མི་དམངས་ཉེན་རྟོག་པ་ཡོངས་ཀྱིས་ཐོག་མཐའ་བར་གསུམ་དུ་མི་རིགས་མཐུན་སྒྲིལ་ཆེན་པོའི་དར་ཆ་མཐོན་པོར་བསྒྲེངས་ཏེ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟམ་མི་ཆད་པར་བརྟན་པོ་བཙུགས་ནས། རང་ཉིད་ཀྱི་མིག་འབྲས་ལ་གཅེས་སྤྲས་བྱེད་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་སྤྲས་བྱེད་པ་ལྟར་སྤྱི་ཚོགས་བརྟན་ལྷིང་གི་སྲུང་སྐྱོང་བྱེད་པ་མ་ཟད། རང་རྟོགས་ངང་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་འཛུགས་སྐྱོང་བ་དང་སྐུལ་འདེད་པ་ཞིག་བྱས་ཏེ། མི་རིགས་མཐུན་སྒྲིལ་གྱི་དཔེ་མཚོན་གཏོད་པའི་ཐད་མིག་དཔེ་བསྟན་ནས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ་ནུས་ཤུགས་ཡོད་རྒུས་བཏོད་ཡོད།

འཚོ་བའི་ཁྲོད་དུ་ཚང་མས་ཕན་ཚུན་སེམས་ཁུར་དང་གཅེས་སྐྱོང་བྱས་ཏེ་བོད་རྒྱ་ཁྱིམ་ཚང་གཅིག་ལྟར་བརྩེ་བ་ཟབ་ཅིང་། མཉམ་སྡེབ་དེ་ཉིད་རང་ཉིད་ཀྱི་ཁྱིམ་ཚང་དུ་བརྩིས་ནས་ཚང་མ་སྒོ་ར་གཅིག་གི་ནང་དུ་སྡོད་པ་དང་། ལྟོ་སྣོད་གཅིག་ནས་ཟ་མ་ཟ་བ་བཅས་ཕན་ཚུན་རྣམ་དག་སེམས་ཀྱིས་གཅེས་སྐྱོང་བྱེད་བཞིན་ཡོད།

ལས་ཀ་བྱེད་རིང་ཐོག་མཐའ་བར་གསུམ་དུ་ཆབ་སྲིད་ལ་བརྟེན་ནས་ཉེན་རྟོག་པ་འཛུགས་སྐྱོང་དང་ཏང་ལ་ལྷག་བསམ་རྣམ་དག་མཐའ་གཅིག་ཏུ་བྱེད་མཁན་གྱི་ལྐོག་འདྲེན་འཛིན་བཟུང་གི་ཉེན་རྟོག་དཔུང་ཁག་གསོ་སྐྱོང་གཙོ་བོར་བཞག་ནས་ཁ་ཕྲལ་ལ་ངོ་རྒོལ་བྱེད་པའི་འདུ་ཤེས་ཟམ་མི་ཆད་པར་བརྟན་དུ་བཏང་སྟེ། བསམ་བློ་དང་། ཆབ་སྲིད། བྱ་སྤྱོད་བཅས་རང་འགུལ་ངང་ཏཱ་ལ་སྐྱེ་ཕྲེང་བཅུ་བཞི་པའི་རུ་ཚོགས་དང་དབྱེ་མཚམས་གསལ་པོ་ཕྱེ་སྟེ། ཏང་ལ་མཐའ་གཅིག་ཏུ་ལྷག་བསམ་རྣམ་དག་བྱེད་པའི་ཆབ་སྲིད་ཀྱི་རང་མདངས་ནམ་ཡང་གནས་པར་བྱས་ནས་ཏང་ལ་ལྷག་བསམ་རྣམ་དག་ཡིན་པའི་རྒྱལ་སྒོའི་སྲུང་དམག་བྱས་ཡོད།

ཏང་འཛུགས་སྐྱོང་ལ་སྣེ་ཁྲིད་ཀྱིས་མི་རིགས་མཐུན་སྒྲིལ་ཡར་ཐོན་གྱི་རོལ་དབྱངས་དཀྲོལ་བ།

མཐའ་མཚམས་ལ་སྐོར་ཞིབ་བྱེད་ཐེངས་ཤིག་ལ་སྐྱིད་གྲོང་གྲོང་རྡལ་རབ་ལྔ་གྲོང་ཚོའི་གྲོང་མི་སྤེན་པའི་འཚོ་བར་དཀའ་ངལ་ཕྲད་པ་ཤེས་རྗེས། སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱིས་འཕྲལ་མར་ས་གནས་ས་ཐོག་ཏུ་འཚམས་འདྲི་བྱས་པ་དང་འབྲེལ་སྤེན་པའི་ཁྱིམ་གཙོ་གནད་ཆ་སྒྲིག་རོགས་སྐྱོར་བྱ་ཡུལ་དུ་བརྩིས་ནས་རོགས་རམ་བྱས་པ་རེད།

ཉེ་བའི་ལོ་ཤས་རིང་། སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱིས་ཏང་འཛུགས་སྐྱོང་གིས་སྣེ་ཁྲིད་མཐའ་འཁྱོངས་བྱས་ཏེ། “མི་དམངས་སྤྱི་བདེས་མི་དམངས་ཀྱི་ཆེད་དུ་འབད”པའི་དམིགས་ཡུལ་བློ་ལ་བརྟན་པོར་ངེས་ནས་དུས་དང་རྣམ་པ་ཀུན་ཏུ་ཉམས་ཞན་དཀའ་ངལ་ཡོད་པའི་ཚོགས་སྤྱིར་དོ་ཁུར་དང་གཅེས་སྐྱོང་བྱས་ཏེ། བརྩེ་སེམས་ཟོལ་མེད་ཀྱིས་རོགས་སྐྱོར་བྱས་ནས་ཞི་མཐུན་གྱི་མཐའ་མཚམས་མཉམ་དུ་སྐྲུན་བཞིན་མཆིས།

སྐྱིད་གྲོང་འགག་སྒོའི་བཅའ་སྡོད་བྱ་ཡུལ་དུ་སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱི་ཏང་ཀྲི་པུས་དུས་ངེས་མེད་དུ་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་སྤེལ་ནས་ཕན་བདེ་ཁང་གི་རྒན་རྒོན་ལ་གཟིགས་པ་དང་འཚམས་འདྲི་བྱས་ཤིང་། ལོ་གསར་དང་དུས་ཆེན་ལ་རྒན་རྒོན་ཚོར་འཚམས་འདྲིའི་ལག་རྟགས་སྤྲད་པ་དང་ཆབས་ཅིག སྐྱིད་གྲོང་གྲོང་རྡལ་རབ་ལྔ་གྲོང་ཚོ་དང་ས་ལེ་ཤང་ལ་བི་གྲོང་ཚོའི་དཀའ་ངལ་ཡོད་པའི་ཁྱིམ་ཚང་རེར་ཆ་སྒྲིག་རོགས་སྐྱོར་ཡང་བྱས་པ་རེད། བསྡོམས་རྩིས་བྱས་པར་གཞིགས་ན། སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་བཙུགས་པ་ནས་བཟུང“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཐེངས་20ལྷག་ཙམ་སྤེལ་བས་ས་གནས་དེ་གའི་མང་ཚོགས་ཀྱི་གདེང་འཇོག་བཟང་པོ་ཐོབ་ཡོད།

རྒྱལ་སྒོ་བརྟན་སྲུང་གིས་བོད་ཀྱི་བརྟན་ལྷིང་དང་དར་རྒྱས་ལ་གཡས་གཞོགས་གཡོན་འདེགས་བྱས་པ།

ཉེས་དོན་གྱོད་གཞི་ཁག་3གྱོད་ཁོངས་སུ་བཅུག་ནས་མྱུལ་ཞིབ་བྱས་པར་གྱོད་གཞི་དང་འབྲེལ་བའི་རིན་ཐང་བསྡོམས་འབོར་སྒོར་ཁྲི་747.89ཟིན་པ་ལས། ལྐོག་འདྲེན་དང་ཕྱིར་ཚོང་བྱས་པའི་གསེར་སྤྱི་རྒྱ་17དང་རྒྱལ་མཚམས་ནང་དུ་ལྐོག་འདྲེན་བྱས་པའི་དབྱར་རྩྭ་དགུན་འབུ་ཁེ་31150རྩད་ཆོད་པ་སོགས་ནི་སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱིས་ཕུལ་བའི་གྲུབ་འབྲས་རེད།

སྐྱིད་གྲོང་འགག་སྒོ་ཕྱིར་གཏོང་ཁོ་ན་ནས་ཕྱིར་གཏོང་ནང་འདྲེན་ལ་བསྒྱུར་བའི་དུས་བབ་གསར་པའི་མདུན་དུ། སྐྱིད་གྲོང་འགག་སྒོའི་ལྐོག་འདྲེན་འཛིན་བཟུང་ཡན་ལག་ཅུས་ཀྱིས“ཀྲུང་དབྱང་གིས་ཐུགས་ཁུར་དང་། སྤྱི་ཚོགས་ཀྱིས་དོ་ཁུར། མང་ཚོགས་ཀྱིས་སེམས་ཁུར”བཅས་བྱེད་པའི་མངོན་གསལ་དོད་པའི་ལྐོག་འདྲེན་གནད་དོན་ལ་དམ་པོར་དམིགས་ཏེ། ལྐོག་འདྲེན་ལ་རྡུང་རྡེག་གཏོང་བའི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་མཐའ་གཅིག་ཏུ་ལག་བསྟར་དོན་འཁྱོལ་བྱས་ནས་འགག་སྒོའི་དོན་དངོས་ལ་གཞི་ཚུགས་པ་དང་། ལྐོག་འདྲེན་ལ་རྡུང་རྡེག་གཏོང་བའི་ལས་འགན་གཙོ་བོ་སྒྲུབ་པ་མི་རིགས་མཐུན་སྒྲིལ་འགན་ལེན་བྱེད་པའི་འདེགས་སྐྱོར་ནུས་ལྡན་ཞིག་ལ་བརྩིས་ནས་ས་གནས་ཀྱི་དར་རྒྱས་བརྟན་ལྷིང་ལ་སྐུལ་འདེད་གཏོང་ཆེད་སྟོབས་ཤུགས་སྐྱེས་སུ་ཧུར་ཐག་ཕུལ་ཡོད་པ་རེད།