མིག་སྔར། རེས་སྐོར་གསར་པའི་ཚན་རྩལ་གསར་བརྗེ་དང་ཐོན་ལས་འཕོ་འགྱུར་བྱུང་བ་དང་བསྟུན་ནས་ནུས་རྒྱུ་གསར་པའི་རླངས་འཁོར་ཐོན་ལས་མགྱོགས་མྱུར་འཕེལ་རྒྱས་འགྲོ་བའི་དུས་མཚམས་གསར་པར་སླེབས་ཤིང་། དེ་ལས་རྒྱལ་ཁབ་ཁག་གི་དཔལ་འབྱོར་འཕར་རྒྱུར་སྒུལ་ནུས་གསར་པ་ཆེན་པོ་བསྣན་པ་མ་ཟད། གནམ་གཤིས་འགྱུར་ལྡོག་གི་འགྲན་སློང་ལ་ཁ་གཏད་གཅོག་པ་དང་གོ་ལ་ཧྲིལ་པོའི་སྐྱེ་ཁམས་ཁོར་ཡུག་ལེགས་སུ་གཏོང་བར་ཡང་ཕན་པ་ཡོད། རྒྱལ་ཁབ་ཁག་གཅིག་གིས་ནུས་རྒྱུ་གསར་པའི་རླངས་འཁོར་ཐོན་ལས་འཕེལ་རྒྱས་ཀྱི་གོ་སྐབས་གསར་པར་དམ་འཛིན་བྱས་ནས་འཐབ་ཇུས་འཆར་འགོད་ལ་ཤུགས་སྣོན་རྒྱག་པ་དང་། ཚན་རྩལ་ཞིབ་འཇུག་གསར་སྤེལ་བྱེད་ཤུགས་ཆེ་རུ་གཏོང་བ། གཟིགས་སྐྱོང་སྲིད་ཇུས་འདོན་པ་སོགས་ཀྱི་བྱེད་ཐབས་བརྒྱུད་རླངས་འཁོར་ཐོན་ལས་ལྗང་མདོག་ཐཱན་ཉུང་ཕྱོགས་སྒྱུར་ལ་སྐུལ་འདེད་བཏང་བ་རེད།

སིང་ཀ་ཕོར།

ཉེ་བའི་ལོ་ཤས་རིང་། སིང་ཀ་ཕོར་གྱིས་ནུས་རྒྱུ་གསར་པའི་རླངས་འཁོར་ཐོན་ལས་འཕེལ་རྒྱས་ལ་སྐུལ་འདེད་ཤུགས་ཆེན་བཏང་བ་དང་སྲིད་ཇུས་ཕྱོགས་ཤུགས་སོགས་ཀྱི་བྱེད་ཐབས་བརྒྱུད་གློག་སྒུལ་རྐྱང་པའི་རླངས་འཁོར་ཚུད་པའི་ནུས་རྒྱུ་གསར་པའི་རླངས་འཁོར་བདག་ཡོད་གྲངས་ཚད་མང་དུ་ཧུར་ཐག་བཏང་ཡོད།

བསྡོམས་རྩིས་བྱས་པར་གཞིགས་ན། 2021ལོར་སིང་ཀ་ཕོར་གྱི་གློག་སྒུལ་རླངས་འཁོར་ཐོ་འགོད་གྲངས་འབོར་2942ལས་མེད་པ་དེས་སྐབས་དེ་དུས་གོ་ལ་ཧྲིལ་པོའི་གློག་སྒུལ་རླངས་འཁོར་ཐོ་འགོད་བསྡོམས་འབོར་གྱི་0.04%བཟུང་ཡོད། སིང་ཀ་ཕོར་སྲིད་གཞུང་གི་འཆར་གཞི་ལྟར་ན། 2030ལོར་སླེབས་སྐབས་གསར་དུ་ཐོ་འགོད་བྱས་པའི་རླངས་འཁོར་དང་བདལ་གཏོང་རླངས་འཁོར་ཚང་མར་ངེས་པར་དུ་དེ་བས་དྭངས་གཙང་གི་ནུས་རྒྱུའི་སྒུལ་བྱེད་འཕྲུལ་འཁོར་བསྒར་དགོས་པ་དང་། 2040ལོར་སླེབས་སྐབས་འགྲོ་ལམ་ཐོག་གི་རླངས་འཁོར་ཚང་མར་ནུས་རྒྱུ་གཙང་མའི་སྒུལ་ནུས་མཁོ་འདོན་བྱ་རྒྱུ་རེད།

ཆི་ལི།

ཆི་ལི་སྲིད་གཞུང་གིས་2022ལོའི་ཟླ་11ཚེས་21ཉིན《གློག་གསོག་འཇོག་དང་གློག་སྒུལ་རླངས་འཁོར་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་ཁྲིམས་གཞི》དངོས་སུ་ཁྱབ་བསྒྲགས་བྱས་པ་རེད། 2021ལོའི་ཟླ་10པར། ཆི་ལིའི་ནུས་རྒྱུ་པུའུ་ཡིས་འགྲིམ་འགྲུལ་གློག་འཕྲིན་པུའུ་དང་མཉམ་དུ་ནུས་རྒྱུ་གསར་པའི་རླངས་འཁོར་རྒྱལ་ཁབ་འཐབ་ཇུས་དེ་རྒྱལ་ཁབ་ཀྱི་གློག་སྒུལ་འགྲོ་སྐྱོད་འཐབ་ཇུས་སུ་རིམ་སྤོར་བྱ་རྒྱུའི་ཁྱབ་བསྒྲགས་བྱས་ཡོད། འཐབ་ཇུས་དེར་གཞིགས་ན། 2035ལོར་སླེབས་སྐབས་ཆི་ལིའི་རྒྱལ་ནང་དུ་བཙོང་པའི་སྤྱི་སྤྱོད་རླངས་འཁོར་དང་བདལ་གཏོང་རླངས་འཁོར་སོགས་གྲོང་ཁྱེར་གྱི་སྤྱི་པའི་འགྲིམ་འགྲུལ་འཁོར་རིགས་ཚུད་པའི་རླངས་འཁོར་ལ་ཐཱན་འབུད་མེད་པ་100%མངོན་འགྱུར་བྱ་རྒྱུ་དང་། གཏེར་ལས་དང་། ནགས་ལས། ཞིང་ལས། ཨར་ལས་སོགས་ལ་སྤྱོད་པའི་རླངས་འཁོར་ཆེ་གྲས་ཀྱི་གཏན་ཁེལ་ནུས་ཆོད་ཆན་ཝ་560ཡན་ཟིན་པ་ཚང་མ་2035ལོའི་གོང་དུ་ཐཱན་འབུད་མེད་པ་ཡོངས་སུ་མངོན་འགྱུར་བྱ་རྒྱུ་རེད།

འཇར་མན།

ཉེ་ཆར། འཇར་མན་རྒྱལ་ཕྲན་མཉམ་འབྲེལ་སྲིད་གཞུང་གིས《གློག་གསོག་གི་རྨང་གཞིའི་སྒྲིག་བཀོད་ཀྱི་སྤྱིའི་འཆར་འགོདⅡ》དངོས་སུ་ཁྱབ་བསྒྲགས་བྱས་ཤིང་། དེའི་དམིགས་ཡུལ་ནི་མཁོ་མཁན་དང་སྤྱོད་མཁན་གྱི་མཛའ་གྲོགས་རྣམ་པ་གཞིར་བྱས་ཏེ་ནུས་རྒྱུ་གསར་པའི་རླངས་འཁོར་ལ་གློག་གསོག་པའི་རྨང་གཞིའི་སྒྲིག་བཀོད་ཁྱོན་ཡོངས་ནས་བཏོད་དེ་ནུས་རྒྱུ་གསར་པའི་རླངས་འཁོར་གཏོང་བའི་ཡིད་དབང་འཕྲོག་ཤུགས་དེ་བས་ལྡན་པ་བྱ་རྒྱུ་ཡིན་པ་དང་། དེ་ནི་འཇར་མན་གྱིས་ནུས་རྒྱུ་གསར་པའི་རླངས་འཁོར་འཕེལ་རྒྱས་ལ་སྐུལ་འདེད་གཏོང་བའི་བྱ་ཐབས་གལ་ཆེན་གཞན་ཞིག་རེད།

འཇར་མན་ནི་དེང་རབས་རླངས་འཁོར་གྱི་འབྱུང་གནས་ཡིན་པ་དང་རྒྱལ་ཁབ་དེའི་ཀ་རྟེན་ཐོན་ལས་ཆེ་ཤོས་ཡིན་པའི་རླངས་འཁོར་ལས་རིགས་ཀྱིས་ལོ་130ལྷག་ཙམ་གྱི་འཕེལ་རྒྱས་ལམ་བུ་བརྒྱུད་མྱོང་། ཉེ་བའི་ལོ་ཤས་རིང་། འཇར་མན་གྱིས་འགྲིམ་འགྲུལ་ཁྱབ་ཁོངས་ཀྱི་ལྗང་མདོག་ཕྱོགས་སྒྱུར་ལ་སྐུལ་འདེད་ཧུར་ཐག་བཏང་ཞིང་། 2030ལོར་འགྲིམ་འགྲུལ་ཁྱབ་ཁོངས་སུ་40%ནས་42%བར་བཙོག་འབུད་ཉུང་གཏོང་ཐུབ་པའི་རེ་བ་བྱེད་ཀྱི་ཡོད་པ་དང་། ནུས་རྒྱུ་གསར་པའི་རླངས་འཁོར་འཕེལ་རྒྱས་ལ་སྐུལ་འདེད་གཏོང་བ་ནི་བཙོག་འབུད་ཉུང་གཏོང་གི་ཐབས་ལམ་གཙོ་བོའི་གྲས་ཤིག་རེད།

སི་ཕེན།

སི་ཕེན་གྱིས་2021ལོའི་ཟླ་4པར་ཁྱབ་བསྒྲགས་བྱས་པའི་MovesⅢའཁོར་བརྗེའི་ཁ་གསབ་འཆར་གཞི་ལྟར་ན། གལ་སྲིད་2022ལོའི་ལོ་མཇུག་གོང་རང་ཁྱིམ་གྱི་བེད་སྤྱོད་ལོ་ཚད་ལོ་10ལས་བརྒལ་བའི་རླངས་འཁོར་རྙིང་པ་བརྗེ་བ་དང་། གློག་སྒུལ་རྐྱང་པའི་རླངས་འཁོར་རམ་ཡང་ན་མཉམ་བསྲེས་སྒུལ་ཤུགས་རླངས་འཁོར་གསར་རྐྱང་ཉོ་བ་དང་འབྲེལ་ཐོ་འགོད་བྱས་ཚེ། སྲིད་གཞུང་གིས་སླད་ཕྱིན་ལོ་གཅིག་ནས་གསུམ་བར་ཡོ་རོབ་སྒོར་མོ་7000ཟིན་པའི་ཁ་གསབ་ཕྱིར་སློག་རྒྱུ་དང་། རླངས་འཁོར་གསར་པ་ཁོ་ན་ཉོས་ཀྱང་རླངས་འཁོར་ཉོ་མཁན་ལ་ཡོ་རོབ་སྒོར་མོ་5000ཙམ་གྱི་ཁ་གསབ་འཐོབ་སྲིད། གཞན་ཡང་རླངས་འཁོར་ཁེ་ལས་ཀྱིས་ད་དུང་རིན་མི་དགོས་པའི་ཁྱིམ་ཚང་གི་གློག་གསོག་ཡོ་བྱད་དང་སྒྲིག་སྦྱོར་ཞབས་ཞུ་མཁོ་འདོན་བྱས་པར་རིན་གོང་ཡོ་རོབ་སྒོར་མོ་2000ཙམ་ཟིན་གྱི་ཡོད།

སི་ཕེན་ནི་ཡོ་རོབ་ཀྱི་རླངས་འཁོར་ཐོན་སྐྱེད་རྒྱལ་ཁབ་ཆེ་གྲས་གཉིས་པ་ཡིན་པ་དང་། རླངས་འཁོར་ཐོན་ལས་ཀྱིས་དེའི་བཟོ་ལས་སྤྱིའི་ཡོང་འབབ་ཀྱི་11%བཟུང་ཡོད། སི་ཕེན་གྱི་རླངས་འཁོར་དང་ལྗིད་ཐེག་རླངས་འཁོར་བཟོ་སྐྲུན་ཚོང་པའི་མཐུན་ཚོགས་ཀྱི་གྲངས་གཞི་ལྟར་ན། ཕྱིར་གཏོང་འཕར་བའི་སྐུལ་ཁྲིད་འོག་2022ལོའི་ཟླ་1ནས་11བར་རིམ་རྩིས་བྱས་ན་སི་ཕེན་གྱི་རླངས་འཁོར་ཐོན་ཚད་དུས་མཚུངས་ལས་4.2%འཕར་ནས་རླངས་འཁོར་ཁྲི་203ཟིན་ཡོད། རླངས་འཁོར་ལས་རིགས་ཕྱོགས་སྒྱུར་རིམ་སྤོར་ལ་སྐུལ་འདེད་གཏོང་ཆེད། སི་ཕེན་གྱིས་ད་དུང་རྒྱལ་ཁབ་ཀྱི་རླངས་འཁོར་ལས་རིགས་འཕེལ་རྒྱས་ཀྱི་འཆར་གཞིའི་ནང་ཁོར་ཡུག་དང་ནུས་རྒྱུའི་དམིགས་ཚད་ཚད་འབེབས་བྱས་པ་དང་འབྲེལ། བྱེད་ཐབས་སྣ་ཚོགས་སྤྱད་དེ་འགྲིམ་འགྲུལ་ཁྱབ་ཁོངས་ཀྱི་བཙོག་འབུད་ཉུང་གཏོང་མངོན་འགྱུར་བྱས་པ་རེད།

འདི་ནི་སིང་ཀ་ཕོར་ཁྲོམ་གཞུང་གི་གློག་སྒུལ་མཉམ་སྤྱོད་རླངས་འཁོར་ཡིན་པ།

 འདི་ནི་2021ལོའི་ཟླ་10ཚེས་3ཉིན། སི་ཕེན་གྱི་པ་སའེ་ལུའོ་ནའི་རླངས་འཁོར་འགྲེམས་སྟོན་གྱི་གློག་སྒུལ་རླངས་འཁོར་གྱི་གློག་གསོག་ཡོ་བྱད་ཡིན་པ།

 འདི་ནི་2022ལོའི་ཟླ་5ཚེས་23ནས་27ཉིན་བར། འཛམ་གླིང་སོལ་རླངས་ཚོགས་ཆེན་སྐབས་ཉེར་བརྒྱད་པ་ཧན་གོའི་ཏ་ཆིའུ་རུ་འཚོགས་པ་དང་། འདི་ནི་ཚོགས་ཆེན་ཐོག་འགྲེམ་སྟོན་བྱས་པའི་ཧན་གོའི་ཆིང་འབུད་རྫས་ཀྱི་གློག་རྫས་སྤྱི་སྤྱོད་རླངས་འཁོར་ཡིན་པ།

འདི་ནི་2021ལོའི་ཟླ་6ཚེས་8ཉིན། འཇར་མན་གྱི་ཏེ་ལེ་སི་ཏུན་དུ་གནས་པའི་ཏ་ཀྲུང་གློག་སྒུལ་འཁོར་རིགས་ID.3སྒྲིག་སྦྱོར་ཁང་ཡིན་པ།

འདི་ནི་ཆི་ལིའི་རྒྱལ་ས་སན་ཐེ་ཡ་ཀོའི་ཁྲོམ་གཞུང་དུ་ཡོད་པའི་ཀྲུང་གོའི་པི་ཡ་ཏི་གློག་སྒུལ་རྐྱང་པའི་རླངས་འཁོར་ཆེ་གྲས་ཡིན་པ།