ཟླ་1ཚེས་12ཉིན། གསར་འགོད་པར་ལྷ་ས་གྲོང་ཁྱེར་ནོར་སྲིད་ཅུས་ནས་ཤེས་རྟོགས་བྱུང་བར། 《འགོས་ནད་དང་རིམས་ནད་འགོག་བཅོས་མི་སྣར་གནས་སྐབས་རང་བཞིན་གྱི་ལས་ཀའི་ཁ་གསབ་རོགས་དངུལ་སྤྲོད་པའི་སྐོར་གྱི་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་དང་ནོར་སྲིད་པུའི་བརྡ་ཐོ》(མི་སྤྱི་པུའི་གཏན་འབེབས〔2016〕ཡིག་ཨང་4པ) དང《ཏོག་གསར་གློ་ཚད་རིམས་ནད་སྔོན་འགོག་དང་ཚོད་འཛིན་སྐབས་ཀྱི་འཐབ་ས་དང་པོའི་ལས་དོན་མི་སྣའི་གནས་སྐབས་རང་བཞིན་གྱི་ཁ་གསབ་ཚད་གཞིའི་འབྲེལ་ཡོད་དོན་ཚན་ཁ་གསལ་བཟོ་བའི་སྐོར་གྱི་ལྷ་ས་གྲོང་ཁྱེར་ཏོག་དབྱིབས་ནད་དུག་གསར་པའི་གློ་ཚད་ལ་ཁ་གཏད་གཅོག་པའི་ལས་དོན་འགོ་ཁྲིད་ཚོགས་ཆུང་གཞུང་དོན་ཁང་གི་བརྡ་ཐོ》སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། ཉེ་ཆར། ལྷ་ས་གྲོང་ཁྱེར་གྱིས་མི་རེར་ཉིན་རེར་སྒོར་300ལས་མི་བརྒལ་བའི་ཚད་གཞི་གཞིར་བཟུང་། 2022ལོར་གྲོང་ཁྱེར་ཡོངས་ཀྱི་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོའི་སྨན་དོན་མི་སྣ་མི་ཐེངས་12000ཙམ་ལ་གནས་སྐབས་ཀྱི་ལས་ཀའི་ཁ་གསབ་རོགས་དངུལ་སྒོར་དུང་ཕྱུར་1.11ལྷག་ཙམ་སྤྲོད་རྒྱུ་རེད་འདུག མིག་སྔར་ཁ་གསབ་མ་དངུལ་སྨན་ཁང་ཁག་ཏུ་སྤྲད་ཟིན་པ་དང་། ཚང་མ་མི་སྒེར་སོ་སོར་སྤྲོད་རྒྱུ་རེད་འདུག

ཤེས་རྟོགས་བྱུང་བར་གཞིགས་ན། ཁ་གསབ་དངུལ་སྤྲོད་པ་དེ་ལས་རྒྱ་ཆེའི་སྨན་དོན་མི་སྣར་བསམ་པའི་ཐོག་ནས་སྐུལ་ལྕག་དང་དངོས་པོའི་ཐོག་ནས་བྱ་དགའ་ཐོབ་ཡོད་ཅིང་། རྩ་འཛུགས་ཀྱི་ཐུགས་ཁུར་དང་དྲོ་སྐྱིད་ཀྱང་ཚོར་ཐུབ་ཡོད། ལྷ་ས་གྲོང་ཁྱེར་གྱི་འཐབ་ས་དང་པོའི་སྨན་དོན་མི་སྣ་མོན་ཏན་རུའེ་ཡིས“ང་ལ་འཐབ་ས་དང་པོའི་སྨན་དོན་མི་སྣའི་ཁ་གསབ་རོགས་དངུལ་རག་བྱུང་། གཞི་རིམ་གྱི་སྡེ་ཁུལ་འཕྲོད་བསྟེན་ཞབས་ཞུ་ལྟེ་གནས་ཀྱི་སྨན་པ་ཞིག་ཡིན་པའི་ངོས་ནས། ངས་ཕྱིན་ཆད་སྔར་རྒྱུན་བཞིན་ནད་པར་ཞབས་འདེགས་ཞུས་ཏེ། རང་ཉིད་ཀྱི་རང་འཁྲིའི་ལས་དོན་ཡག་པོ་སྒྲུབ་ཀྱི་ཡིན”ཞེས་བཤད། 

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་གནས་སྐབས་ལས་ཀའི་ཁ་གསབ་རོགས་དངུལ་སྤྲོད་པའི་ལས་དོན་ཡག་པོ་སྒྲུབ་ཆེད། ལྷ་ས་གྲོང་ཁྱེར་གྱིས་ཁ་གསབ་སྤྲོད་པའི་རྩ་དོན་དང་བྱ་ཐབས་བཟོས་ཏེ། ཉེན་ཁ་ཆེ་བ་དང་། གནོན་ཤུགས་ཆེ་བ། ལས་དུས་འཕར་མ་མང་པོ་བྱེད་དགོས་པ་བཅས་ཀྱི་མི་སྣ་དང་ལས་གནས་ལ་ཕྱོགས་པ་མཐའ་འཁྱོངས་བྱས་པ་དང་འཐབ་ས་དང་པོའི་སྨན་དོན་མི་སྣར་གཙོ་གནད་དུ་དོ་ཁུར་བྱས་ཡོད་པ་རེད།